திருப் பந்தணை நல்லூர் --- 0861. கும்பமும் நிகர்த்த

அருணகிரிநாதர் அருளிய

திருப்புகழ்

கும்பமும் நிகர்த்த (திருப்பந்தணை நல்லூர்)

முருகா!

தேவரீரது திருவடிகளை வழிபட்டு உய்ய அருள்.

தந்தன தனத்த தந்தன தனத்த

     தந்தன தனத்த ...... தனதான

கும்பமு நிகர்த்த கொங்கையை வளர்த்த

     கொஞ்சுகி ளியொத்த ...... மொழிமானார்

குங்கும பணிக்குள் வண்புழு குவிட்ட

     கொந்தள கம்வைத்த ...... மடவார்பால்

வம்புகள் விளைத்து நண்புகள் கொடுத்து

     மங்கிந ரகத்தில் ...... மெலியாமல்

வண்கயி லைசுற்றி வந்திடு பதத்தை

     வந்தனை செய்புத்தி ...... தருவாயே

பம்புந தியுற்ற பங்கொரு சமர்த்தி

     பண்டுள தவத்தி ...... லருள்சேயே

பைம்புய லுடுத்த தண்டலை மிகுத்த

     பந்தணை நகர்க்கு ...... ளுறைவோனே

சம்புநி ழலுக்குள் வந்தவ தரித்த

     சங்கரர் தமக்கு ...... மிறையோனே

சங்கணி கரத்த ரும்பர்ப யமுற்ற

     சஞ்சல மறுத்த ...... பெருமாளே.

பதம் பிரித்தல்

கும்பமும் நிகர்த்த கொங்கையை வளர்த்த,

     கொஞ்சு கிளி ஒத்த ...... மொழி மானார்,

குங்கும பணிக்குள் வண் புழுகு விட்ட

     கொந்து அளகம் வைத்த ...... மடவார்பால்,

வம்புகள் விளைத்து, நண்புகள் கொடுத்து,

     மங்கி, நரகத்தில் ...... மெலியாமல்,

வண் கயிலை சுற்றி வந்திடு பதத்தை

     வந்தனை செய் புத்தி ...... தருவாயே.

பம்பு நதி உற்ற பங்கு ஒரு சமர்த்தி,

     பண்டு உள தவத்தில் ...... அருள்சேயே!

பைம் புயல் உடுத்த தண்டலை மிகுத்த

     பந்தணை நகர்க்குள் ...... உறைவோனே!

சம்பு நிழலுக்குள் வந்து அவதரித்த

     சங்கரர் தமக்கும் ...... இறையோனே!

சங்கு அணி கரத்தர், உம்பர் பயம் உற்ற

     சஞ்சலம் அறுத்த ...... பெருமாளே. 

பதவுரை

         பம்பு நதி பங்கு உற்ற ஒரு சமர்த்தி பண்டு உள தவத்தில் அருள் சேயே --- (சிவபெருமான் திருமுடியில் பொருந்தி) செறிந்து பரந்துள்ள கங்கை நதியும், அவரது இடப்பாகத்தில் பொருந்தியுள்ள ஒப்பற்ற வல்லமை உள்ள உமாதேவியும் முன்னைத் தவப்பேற்றால் அருளிய குழந்தையே!

      பைம் புயல் உடுத்த --- பசுமையான மேகங்கள் படிந்துள்ளதும்,

     தண்டலை மிகுத்த --- சோலைகள் நிறைந்துள்ளதுமான

     பந்தணை நகர்க்குள் உறைவோனே --- திருப்பந்தணை நல்லூர் என்னும் திருத்தலத்தில் வீற்றிருப்பவரே!

      சம்பு நிழலுக்குள் வந்து அவதரித்த சங்கரர் தமக்கும் இறையோனே --- வெண்ணாவல் மரத்தடியில் வந்து தோன்றிய சிவபெருமானுக்கும் தலைவரே!

      சங்கு அணி கரத்தர் --- பாஞ்சசன்னியம் என்னும் சங்கைத் திருக்கரத்தில் ஏந்தியுள்ள திருமாலும்,

     உம்பர் பயம் உற்ற சஞ்சலம் அறுத்த பெருமாளே --- தேவர்களும் கொண்டிருந்த அச்சத்தினால், அவர்க்கு உண்டான துன்பத்தைப் போக்கிய பெருமையில் மிக்கவரே!

      கும்பமும் நிகர்த்த கொங்கையை வளர்த்த --- குடத்தை நிகர்த்த கொங்கைகள் வளர்ந்துள்ளவர்களும்,

     கொஞ்சு கிளி ஒத்த மொழி மானார் ---

கொஞ்சுமொழி பேசுகின்ற கிளியைப் போன்ற பேச்சினை உடையவர்களும் ஆகிய விலைமாதர்கள்,

      குங்கும பணிக்குள் --- குங்குமக் கலவையால் ஆன ஒப்பனையுடன்,

     வண்புழுகு விட்ட --- வளப்பம் உள்ள புனுகை விட்டு வாரிவிடப்பட்டு,

     கொந்து அளகம் வைத்த மடவார்பால் --- பூங்கொத்துக்களை அணிந்துள்ள கூந்தலை உடைய அவர்களிடத்தில்,

      வம்புகள் விளைத்து --- வீணான செயல்களில் ஈடுபட்டு,

     நண்புகள் கொடுத்து மங்கி --- அவர்களோடு நட்புப் பூண்டு இருந்ததன் விளைவாக அறிவும், பொருளும், உடலும் மங்கி,

     நரகத்தில் மெலியாமல் --- இம்மையிலும், மறுமையிலும் துன்பத்தில் மெலிவு அடையாமல்,

      வண் கயிலை சுற்றி வந்திடு பதத்தை வந்தனை செய் புத்தி தருவாயே --- வளப்பமுள்ள கயிலை மலையைச் சுற்றி வந்த தேரீரது திருவடிகளை வழிபடுகின்ற புத்தியைக் கொடுத்து அருள்வாயாக.

பதவுரை

    சிவபெருமான் திருமுடியில் பொருந்தி, செறிந்து பரந்துள்ள கங்கை நதியும், அவரது இடப்பாகத்தில் பொருந்தியுள்ள ஒப்பற்ற வல்லமை உள்ள உமாதேவியும் முன்னைத் தவப்பேற்றால் அருளிய குழந்தையே!

         பசுமையான மேகங்கள் படிந்துள்ளதும், சோலைகள் நிறைந்துள்ளதுமான திருப்பந்தணை நல்லூர் என்னும் திருத்தலத்தில் வீற்றிருப்பவரே!

         வெண்ணாவல் மரத்தடியில் வந்து தோன்றிய சிவபெருமானுக்கும் தலைவரே!

         பாஞ்சசன்னியம் என்னும் சங்கைத் திருக்கரத்தில் ஏந்தியுள்ள திருமாலும், தேவர்களும் கொண்டிருந்த அச்சத்தினால், அவர்க்கு உண்டான துன்பத்தைப் போக்கிய பெருமையில் மிக்கவரே!

         குடத்தை நிகர்த்த கொங்கைகள் வளர்ந்துள்ளவர்களும், கொஞ்சுமொழி பேசுகின்ற கிளியைப் போன்ற பேச்சினை உடையவர்களும் ஆகிய விலைமாதர்கள்.

         குங்குமக் கலவையால் ஆன ஒப்பனையுடன், வளப்பம் உள்ள புனுகை விட்டு வாரிவிடப்பட்டு, பூங்கொத்துக்களை அணிந்துள்ள கூந்தலை உடைய அவர்களிடத்தில் வீணான செயல்களில் ஈடுபட்டு, அவர்களோடு நட்புப் பூண்டு இருந்ததன் விளைவாக அறிவும், பொருளும், உடலும் மங்கி, இம்மையிலும், மறுமையிலும் துன்பத்தில் மெலிவு அடையாமல் வளப்பமுள்ள கயிலை மலையைச் சுற்றி வந்த தேரீரது திருவடிகளை வழிபடுகின்ற புத்தியைக் கொடுத்து அருள்வாயாக.

விரிவுரை

வண் கயிலை சுற்றி வந்திடு பதத்தை வந்தனை செய் புத்தி தருவாயே ---

நாரத முனிவர் ஒரு சமயம் பெருந்தவம் புரிந்தனர். அத்தவத்துக்கு இரங்கிய பிரமதேவர், அவருக்கு ஒரு மாதுளங் கனியைத் தந்தனர். மாம்பழம் என்று பலரும் கூறுகின்றனர். "மாது ளங்கனியை ஒருநாள் பகிர்ந்த உமை அருள்பாலா" என்றே அருணகிரிநாதப் பெருமான் பாடி உள்ளார். அந்த மாதளங்கனியை நாரதமுனிவர் சிவபெருமானுடைய திருவடியில் வைத்து வணங்கினார்.

விநாயகமூர்த்தியும், முருகப் பெருமானும், தாய் தந்தையரை வணங்கி அக்கனியைக் கேட்டார்கள். “அகில உலகங்களையும் ஒரு நொடிப் பொழுதில் வலம் வந்தவர்க்கு இக் கனி தரப்படும்” என்று கூறியருளினார் சிவபெருமான்.

முருகவேள் மயில் வாகனத்தின் மீது ஊர்ந்து அகில உலகங்களையும் ஒரு நொடிப் பொழுதில் வலம் வந்தார். விநாயகப் பெருமான், அகில உலகங்களும் சிவத்துக்குள் அடங்கி நிற்றலால், சிவமூர்த்தியை வலம் வந்தார். “தேவரீருக்கு அன்னியமாக உலகம் இல்லையே” என்று கூறி வணங்கினார். பரமசிவன் விநாயகருக்குப் பழத்தை தந்தருளினார்.

உலகங்களை வலம் வந்த வடிவேற்பெருமான் தனக்குக் கனி தராமையால் வெகுள்வார் போல் வெகுண்டு, சிவகிரியின் மேல் திசை நோக்கித் தண்டாயுதபாணியாக நின்றார். சிவமூர்த்தியும் உமாதேவியாரும் கணங்கள் புடை சூழச்சென்று முருகவேளை எடுத்து அணைத்து, “கண்மணி! அரும்பு-சரியை; மலர் கிரியை; காய்-யோகம்; பழம்-ஞானம். நீ ஞானபண்டிதன். ஞானமாகிய பழம் நீதான். பழநி நீ” என்றார். அதனால் அப்பதிக்கும் பழநி என நாமம் ஏற்பட்டது.

இந்த வரலாற்றின் உட்பொருள்

(1)   கணேசமூர்த்தி கந்தமூர்த்தி என்ற இருவரும் கனி கேட்டபோது சிவபெருமான் அப்பழத்தைப் பிளந்து பாதி பாதியாகத் தந்து இருக்கலாம்.

(2)   காரைக்கால் அம்மையார் வேண்ட மாங்கனியைத் தந்த சிவபெருமான், மற்றொரு பழத்தை உண்டாக்கிக் கொடுத்திருக்கலாம்.

    

(3)   எல்லா உலகங்களையும் ஒரு நொடிப்பொழுதில் வலம் வரும் ஆற்றல் வல்லமை கணபதிக்கும் உண்டு.

(4)   உலகங்கள் யாவும் சிவத்துக்குள் ஒடுங்கியிருக்கின்றன என்ற உண்மையை ஞானபண்டிதனான முருகவேளும்    அறிவார்.

ஆகவே, சிவத்துக்கு இரு தன்மைகள் உண்டு என்பதும், ஒன்று எல்லாவற்றிலும் சிவம் தங்கியிருக்கிறது என்றும், மற்றொன்று எல்லாப்பொருள்களும் சிவத்துக்குள் ஒடுங்கி நிற்கின்றன என்றும் தெளிதல் வேண்டும்.

இந்த இரு கடவுள் தன்மைகளையும் உலகத்தவர் உணர்ந்து உய்யும் பொருட்டு, விநாயகர் சிவத்துக்குள் எல்லாவற்றையும் பார்த்தார். முருகர் எல்லாப் பொருள்களிலும் சிவத்தைப் பார்த்தார்.

இது எல்லாம் சிவத்துக்குள் அடங்குந் தன்மை. இந்த அரிய தத்துவத்தை இவ் வரலாறு நமக்கு உணர்த்துகின்றது. இந்த இனிய கருத்தை நன்கு சிந்தித்துத் தெளிக.

அந்த பரம்பொருளின் திருவடிகளை வழிபட்டால் உய்தி பெறலாம் என்பதை அறியாது, அற்ப இன்பத்திற்காக, விலைமாதர் பின்சென்று, அவர்க்கு ஏவல் செய்து, அரிதில் முயன்று பெற்ற பொருள்களை எல்லாம் அவர்க்குத் தந்து துன்பத்தில் துவளக் கூடாது.  எனவே, முருகப்பெருமான் திருவடிகளை வழிபடும் பேற்றைத் தனக்கு அருளுமாறு அடிகளார் வேண்டுகின்றார்.

பம்பு நதி பங்கு உற்ற ஒரு சமர்த்தி பண்டு உள தவத்தில் அருள் சேயே ---

  

பம்பு - பரந்துள்ள, நெறிந்துள்ள, விரைந்து ஓடுகின்ற.

நதி - கங்கை. இங்கு கங்காதேவியைக் குறித்தது.

     முருகப் பெருமான், சிவபரம்பொருளின் நெற்றிக்கண்ணில் தீப்பொறியாக வந்து, கங்கையிடம் சிறிது நேரம் இருந்ததால், அவர் கங்கையின் மைந்தன் என்று போற்றப் பெறுகின்றார்.

                                              ---  "தேசுதிகழ்

பூங்கயிலை வெற்பில் புனைமலர்ப் பூங்கோதைஇடப்

பாங்கு உறையும் முக்கண் பரஞ்சோதி, – ஆங்குஒருநாள்

வெந்தகுவர்க்கு ஆற்றாத விண்ணோர் முறைக்கு இரங்கி,

ஐந்து முகத்தோடு அதோமுகமும் -  தந்து,

திருமுகங்கள் ஆறுஆகி, செந்தழல்கண் ஆறும்

ஒருமுகமாய்த் தீப்பொறி ஆறு உய்ப்ப,  -  விரிபுவனம்

எங்கும் பரக்க, இமையோர் கண்டு அஞ்சுதலும்,

பொங்கு தழல்பிழம்பை பொன்கரத்தால்  - அங்கண்

எடுத்து அமைத்து, வாயுவைக் "கொண்டு ஏகுதி"என்று, எம்மான்

கொடுத்து அளிப்ப, மெல்லக் கொடுபோய், - அடுத்தது ஒரு

பூதத் தலைவ! "கொடுபோதி”, எனத் தீக்கடவுள்

சீதப் பகீரதிக்கே சென்று உய்ப்ப, - போதுஒருசற்று

அன்னவளும் கொண்டு அமைதற்கு ஆற்றாள், சரவணத்தில்

சென்னியில் கொண்டு உய்ப்ப,  திருவுருவாய் - முன்னர்

அறுமீன் முலைஉண்டு, அழுது, விளையாடி,

நறுநீர் முடிக்கு அணிந்த நாதன் - குறுமுறுவல்

 கன்னியொடும் சென்று அவட்குக் காதல் உருக்காட்டுதலும்,

அன்னவள் கண்டு, அவ்வுருவம் ஆறினையும் - தன்இரண்டு

கையால் எடுத்து அணைத்து, கந்தன் எனப்பேர் புனைந்து,

மெய்ஆறும் ஒன்றாக மேவுவித்து, -  செய்ய

முகத்தில் அணைத்து,  உச்சி மோந்து, முலைப்பால்

அகத்துள் மகிழ் பூத்து அளித்து, - சகத்துஅளந்த

வெள்ளை விடைமேல் விமலன் கரத்தில் அளித்து

உள்ளம் உவப்ப உயர்ந்தோனே"!            --- கந்தர் கலிவெண்பா.

வெண்மையான ஒளி விளங்குகின்ற, அழகிய கயிலை மலையில், தொடுக்கப் பெற்ற அழகிய பூமாலையினை அணிந்த உமாதேவியாரை தமது இடப்பாகத்திலே வீற்றிருக்கப் பெற்ற மூன்று திருக் கண்களை உடைய மேலான சோதி வடிவாகிய சிவபெருமான், அவ்விடத்து ஒருநாள்  கொடிய அசுரர்கள் செய்யும் துன்பத்தைத் தாங்க இயலாத தேவர்களின் முறையீட்டிற்குத் திருவுளம் இரங்கி,  தம் ஈசானம், தற்புருடம், அகோரம், வாமதேவம், சத்தியோசாதம் என்னும் ஐந்து திருமுகங்களுடன் கீழ் நோக்கிய திருமுகம் ஒன்றினையும் கொண்டு, ஆறு திருமுகங்களை உடையவராய், செந்தழல் வடிவாகிய ஆறு நெற்றிக் கண்களின் நின்றும், ஒரே சமயத்தில் ஆறு தீப்பொறிகளை வெளிப்படுத்த, அத்தீப் பொறிகள் விரிந்து நின்ற உலகங்கள் எங்கும் பரவ,  அவற்றைத் தேவர்கள் கண்டு பயப்படவும், அதனை அறிந்து பொங்கிய அத் தீப்பொறிகளின் திரட்சியினைத் தம் அழகிய திருக் கரத்தால் உடனே அவ்விடத்தினின்றும் எடுத்து, அவற்றின் வேகத்தை அடக்கி, வாயுதேவனை நோக்கி,  'நீ இவற்றை எடுத்துச் செல்வாயாக' என்று சிவபெருமான் அவனிடம் கொடுத்து அருள, வாயுதேவனும் அவற்றைப் பெற்று மெல்லக் கொண்டு சென்று, தன்னால் இயலாமல், தன்னை அடுத்து நிற்பவனாகிய அக்கினி தேவனை நோக்கி,  'ஒப்பற்ற ஐம்பூதங்களுக்குத் தலைவனாய் உள்ள அக்கினித் தேவனே, நீ இப்பொறிகளை எடுத்துச் செல்வாயாக' என்று கூறி அவனிடம் கொடுக்க, அக்கினி தேவனும் அவற்றைப் பெற்றுத் தாங்க இயலாமல் சென்று, குளிர்ந்த கங்கை ஆற்றில் கொண்டுபோய் விடுக்க, அந்த கங்கா தேவியும் அவற்றைச் சிறிது நேரமும் தாங்கிக் கொண்டு இருப்பதற்கு வலிமை அற்றவளாய், தனது தலைமீது தாங்கிச் சென்று சரவணப் பொய்கையில் விடுக்க, அவ்விடத்து அத்தீப்பொறிகள் ஆறும் ஆறு குழந்தைகளின் திருவுருவங்களாய் மாற, முதற்கண் கார்த்திகைப் பெண்கள் அறுவர் முலைப்பாலை அக்குழந்தைகள் பருகி, அழுது விளையாடி இருக்க, மணமிக்க கங்கை நீரைச் சடைமுடியில் தரித்த சிவபெருமான்,  புன்சிரிப்பை உடைய உமாதேவியாரொடு சரவணப் பொய்கையினை அடைந்து, தனது திருமகனுடைய திருவுருவங்களை அத்தேவிக்குக் காண்பித்தலும்,  உமாதேவியார் கண்டு, அந்த ஆறு திருவுருவங்களையும், தன்னுடைய இரண்டு திருக்கரங்களாலும் ஒருசேர எடுத்து, ஆறு திருவுருவங்களையும் ஒரு திருவுரு ஆக்கிச் சேர்த்துத் தழுவி, கந்தன் என்று திருநாமம் சூட்டி, தனது செவ்விய திருமுகத்தில் சேர்த்து அணைத்து, உச்சியை முகந்து, திருவுளத்தில் மகிழ்ச்சி உற்று, தனது திருமுலைப் பாலை அளித்து, உலகத்தைத் தனது ஈரடியால் அளந்த திருமாலாகிய வெள்ளை இடபத்தின் மீது எழுந்தருளி இருக்கும் சிவபெருமானது திருக்கரத்தில் கொடுத்து இருக்க, அவ் அம்மையப்பர் திருவுளம் மகிழ்ச்சி கூர உயர்வு உற்று இருந்தவர் முருகப் பெருமான்.

சம்பு நிழலுக்குள் வந்து அவதரித்த சங்கரர் தமக்கும் இறையோனே ---

திருவானைக்கா என்ற திருத்தலத்தில் சிவபெருமான் வெண்ணாவல் மரத்தின் கீழ் எழுந்தருளி இருக்கின்றார். நமது தேசம் நாவலந்தீவு. நாவலந்தீவில் நாவலின்கீழ் இருக்கின்றார் என்பது மிகவும் சிறந்தது.

வெண்நாவலின் மேவிய எம் அழகா   ---  திருஞானசம்பந்தர்.

உருளும்போது அறிவு ஒண்ணா; உலகத்தீர்!

தெருளும், சிக்கெனத் தீவினை சேராதே!

இருள் அறுத்து நின்று, ழுஈசன்ழு என்பார்க்கு எலாம்

அருள் கொடுத்திடும்-ஆனைக்கா அண்ணலே.       --- அப்பர்.

மறைகள் ஆயின நான்கும்

         மற்றுஉள பொருள்களும் எல்லாத்

துறையும் தோத்திரத்து இறையும்

         தொன்மையும் நன்மையும் ஆய

அறையும் பூம்புனல் ஆனைக்

         காஉடை ஆதியை நாளும்

இறைவன் என்றுஅடி சேர்வார்

         எம்மையும் ஆள்உடை யாரே.            ---  சுந்தரர்.

இவ்வாறு மூவரும் இசைத் தமிழால் பாட, அத்தமிழ் மணக்கும் திருத்தலம் திருவானைக்கா.

விண்ணவர் போற்றிசெய் ஆனைக்காவில்

         வெண்ணாவல் மேவிய மெய்ப்பொருளை

நண்ணி யிறைஞ்சிமுன் வீழ்ந்தெழுந்து

         நாற்கோட்டு நாகம் பணிந்ததுவும்

அண்ணல்கோச் செங்க ணரசன்செய்த

         அடிமையும் அஞ்சொல் தொடையில்வைத்துப்

பண்ணுறு செந்தமிழ் மாலைபாடிப்

         பரவிநின் றேத்தினர் பான்மையினால். ---  பெரியபுராணம்.

சங்கு அணி கரத்தர் உம்பர் பயம் உற்ற சஞ்சலம் அறுத்த பெருமாளே ---

"தேவர்கள் கருத்தில் மேவிய பயத்தை வேல்கொடு தணித்த பெருமாளே" என்று அருணகிரிநாதப் பெருமான் பிறிதொரு திருப்புகழில் போற்றி உள்ளார்.

பந்தணை நகர்க்குள் உறைவோனே ---

"திருப்பந்தணை நல்லூர்", சோழ நாட்டு காவிரி வடகரைத் திருத்தலம். மக்கள் வழக்கில் "பந்தநல்லூர்" என்று வழங்குகிறது.

கும்பகோணம் - பந்தநல்லூர், திருப்பனந்தாள் - பந்தநல்லூர் பேருந்து வசதிகள் உள்ளன.

இறைவர் --- பசுபதீசர்.

இறைவியார் --- வேணுபுஜாம்பிகை, காம்பனதோளியம்மை.

தல மரம்--- சரக்கொன்றை.

தீர்த்தம்  --- சூரியதீர்த்தம்.

திருஞானசம்பந்தப் பெருமானும், அப்பர் பெருமானும் வழிபட்டுத் திருப்பதிகங்கள் அருளிய திருத்தலம்.

இத் திருத்தலத்தின் பெயர்க் காரணம் குறித்து வழங்கப்பட்டு வரும் வரலாறு ஒன்று உண்டு.  உமாதேவி பந்துகொண்டு விளையாட விரும்பினாள். இறைவனும் நால்வேதங்களையே பந்துகளாக்கித் தந்துதவினார். உமாதேவி மிகவும் விருப்புடன் விளையாடிக் கொண்டிருந்தாள். அதற்கு இடையூறாக ஆகலாகாது என்றெண்ணிச் சூரியன் மறையாது இருந்தான் காலநிலை மாறுவது கண்டு தேவர்கள் இறைவனிடம் முறையிட்டனர். இறைவனும் அவ்விடத்திற்கு வந்தார். அவரையும் கவனியாது உமை விளையாடிக் கொண்டிருந்தாள். அது அறிந்த இறைவன் கோபங்கொண்டு, அப்பந்தை தன் திருவடியால் எற்றினார். பந்தைக் காணாத உமை, இறைவனிடம் வந்து வணங்க, அம்பிகையை பசுவாகுமாறு சபித்தார். சாபவிமோசனமாக, அப் பந்து விழும் தலத்தில், கொன்றையின் கீழ் தாம் வீற்றிருப்பதாகவும், அங்கு வந்து வழிபடுமாறும் பணித்தார். அவ்வாறே திருமாலை உடன் ஆயனாக அழைத்துக்கொண்டு, பசு உருவில் (காமதேனுவாகி) கண்வ முனிவர் ஆசிரமம் அடைந்து அங்கிருந்து வந்தார். அங்கிருக்கும் நாளில் புற்று உருவிலிருந்த இறைவன் திருமேனிக்குப் பால் சொரிந்து வழிபட்டு வந்தார். ஆயனாக வந்த திருமால் நாடொறும் கண்வமுனிவரின் அபிஷேகத்திற்குப் பால் தந்து வந்தார். ஒரு நாள் பூசைக்குப் பசுவிடம் பால் இல்லாமைக் கண்டு, சினமுற்றுப் பசுவின் பின்சென்று அதுபுற்றில் பால் சொரிவதுகண்டு சினந்து பசுவைத் தன் கைக்கோலால் அடிக்க, அப்பசுவும் துள்ளிட, அதனால் அதன் ஒருகாற் குளம்பு புற்றின்மீது பட - இறைவன் ஸ்பரிசத்தால் உமாதேவி தன் சுயவுருவம் அடைந்து சாபவிமோசனம் நீங்கி அருள் பெற்றாள்.

பசுவுக்குப் பதியாக வந்து ஆண்டுகொண்டமையால் சுவாமி பசுபதி என்று பெயர் பெற்றார். இறைவன் எற்றிய பந்து வந்து அணைந்த இடமாதலின் பந்தணைநல்லூர் என்று ஊர்ப் பெயருண்டாயிற்று. மூலவரின் சிரசில் பசுவின் குளம்புச்சுவடு பதிந்திருப்பதாகச் சொல்லுகின்றார்கள்.

காம்பீலி மன்னனின் மகன் குருடு நீங்கிய இடம். இதனால் இம்மன்னன் தன் மகனுக்கு பசுபதி என்று பெயர் சூட்டியதோடு, திருக்கோயில் திருப்பணிகளையும் செய்து வழிபட்டதாக வரலாறு. இது தொடர்பாகவே இங்குள்ள திருக்குளம் இன்றும் காம்போச மன்னன் துறை என்றழைக்கப்படுகிறது.

தனிக்கோயிலாக பரிமளவல்லித் தாயாருடன் ஆதிகேசவப் பெருமாள் வீற்றிருக்கின்றார். இவர்தான் உமையுடன் ஆயனாக வந்தவர்.

சுவாமி சந்நிதி நுழைவாயிலுக்கு "திருஞானசம்பந்தர் திருவாயில்" என்று பெயரிடப்பட்டுள்ளது.

கருத்துரை

முருகா! தேவரீரது திருவடிகளை வழிபட்டு உய்ய அருள்.

திருமகள் வாழிடம், சிறப்பு.

திருமகள் எங்கே இருப்பாள்?

திருமகள் யாரைச் சேர்ந்து இருப்பாள்?

---------------

     பூமியில் மனிதராகப் பிறந்துவிட்டால், அறவழியில் வாழவேண்டும், அதற்குப் பொருள் ஈட்டவேடண்டும். காதல் மனையாளுடன் கருத்து ஒருமித்து வாழவேண்டும். அறவழியில் பொருளைத் துய்த்து, பிறர்க்கும் துய்க்கத் தந்து இன்பம் காணவேண்டும். இறுதியில் எல்லாப் பற்றையும் விட்டொழித்து பரகதியைக் சேரவேண்டும்.

"ஈதல் அறம் தீவினைவிட்டு ஈட்டல்பொருள் எஞ்ஞான்றும்

காதல் இருவர் கருத்து ஒருமித்து - ஆதரவு

பட்டதே இன்பம் பரனை நினைந்து இம்மூன்றும்

விட்டதே பேரின்ப வீடு".

என்றார் ஔவைப் பிராட்டியார்.

     பரனை நினைத்து ஈதல் --- அறம் ஆகும்.

     அந்த அறத்தைச் செலுத்த, பரனை நினைத்து தீய வழி விடுத்து சேர்ப்பது --- பொருள்

     அறவழியில் சேர்த்த பொருகளைக் கொண்டு, அறச் செயல்களைப் புரிந்து, தாமும் துய்த்து, பிறர்க்கும் உதவி வாழ், பரனை நினைத்து காதலர் இருவர் கருத்து ஒருமித்து ஆதரவு பட்டதே --- இன்பம்

     பரனை நினைத்து இம் மூன்றையும் விடுதல் --- வீடுபேறு.

     பொருளை எப்படி வேண்டுமானாலும் கொடுக்கலாம். விருப்போடும் கொடுக்கலாம். வெறுப்போடும் கொடுக்கலாம். அப்படித் தருவது அறம் ஆகாது. ஏன் பரனை நினைந்து செல்வத்தைச் செய்தல்வேண்டும்? பிறருக்குக் கொடுத்தல் வேண்டும்? என்னும் வினா எழலாம். நாமாகச் செல்வத்தைச் செய்தோம், நாம் கொடுக்கின்றோம் என்னும் எண்ணத்தோடு கொடுத்தால், "நான்" கொடுக்கின்றேன், "எனது" பொருளைக் கொடுக்கின்றேன் என்னும் முனைப்பு எழும். நான் எனது என்னும் பற்று இல்லாமல் செய்வதே அறம் ஆகும்.

     செல்வம் நம்மால் மட்டுமே வந்து சேருவதில்லை. இறைவன் திருவருளால் வந்தது என்று கொண்டால் நல்லது. காரணம், முயன்றவர் அனைவருக்குமே செல்வம் வந்து சேர்வது இல்லை.

"பிறக்கும்போது கொடு வந்தது இல்லை, பிறந்து மண்மேல் 

இறக்கும்போது கொடுபோவது இல்லை, இடைநடுவில்

குறிக்கும் இச் செல்வம் சிவம் தந்தது என்று கொடுக்க அறியாது,

இறக்கும் குலாமருக்கு என்ப சொல்வேன் கச்சிஏகம்பனே!"

என்றார் பட்டினத்தடிகள்.

     சரி, எப்படி வாழவேண்டும் என்பது குறித்து, "அறப்பளீசுர சதகம்" என்னும் நூல் காட்டுவதைக் காண்போம்....

புண்ணிய வசத்தினால் செல்வம் அது வரவேண்டும்;

     பொருளை ரட்சிக்க வேண்டும்

  புத்தியுடன் அது ஒன்று நூறாக வேசெய்து

     போதவும் வளர்க்க வேண்டும்;

உண்ண வேண்டும்; பின்பு நல்ல வத்ர ஆபரணம்

     உடலில் தரிக்க வேண்டும்;

  உற்ற பெரியோர் கவிஞர் தமர் ஆதுலர்க்கு உதவி

     ஓங்கு புகழ் தேட வேண்டும்;

மண்ணில் வெகு தருமங்கள் செயவேண்டும்; உயர் மோட்ச

     வழிதேட வேண்டும்; அன்றி,

  வறிதில் புதைத்து வைத்து ஈயாத பேர்களே

     மார்க்கம் அறியாக் குருடராம்

அண்ணலே! கங்கா குலத்தலைவன் மோழைதரும்

     அழகன்எம தருமை மதவேள்

  அனுதினமும் மனதில்நினை தருசதுர கிரிவளர்

     அறப்பளீ சுரதே வனே!

          இதன் பொருள் ---

     அண்ணலே --- தலைவனே!,

     கங்காகுலத் தலைவன் மோழைதரும் அழகன் எமது அருமை மதவேள், அனுதினமும் மனதில் நினைதரு சதுரகிரிவளர் அறப்பளீசுர தேவனே --- கங்கை மரபில் முதல்வனான மோழை ஈன்றெடுத்த அழகு மிக்கவனான, எமது அரிய மதவேள் என்பான்,  நாள்தோறும் உள்ளத்தில் கொண்டு வழிபடுகின்ற, சதுரகிரியில் எழுந்தருளிய அறப்பளீசுர தேவனே!,

     செல்வமது புண்ணிய வசத்தினால் வரவேண்டும் --- செல்வமானது ஒருவனுக்கு அவன் நன்னெறியில் ஒழுகியதன் பயனாக வந்து சேர வேண்டும்.

     பொருளை ரட்சிக்க வேண்டும் --- நன்னெறியில் சிறுச் சிறிதாக வந்த செல்வத்தைக் காப்பாற்றி வைக்க வேண்டும்.

     புத்தியுடன் அது ஒன்று நூறாகவே செய்து போதவும் வளர்க்க வேண்டும் --- அறிவோடு சிந்தித்து, அந்தப் பொருளை ஒன்று நூறாகுமாறு நன்றாகப் பெருக்கும் உபாயத்தைத் தேட வேண்டும்.

     உண்ண வேண்டும் --- உலோப குணம் இல்லாமல் வயிறு ஆர உண்ண வேண்டும்.

     பின்பு நல்ல வத்திரம் ஆபரணம் உடலில் தரிக்க வேண்டும் --- பிறகு அழகிய ஆடைகளையும், அணிகலன்களையும் உடலிலே தரித்து மகிழ வேண்டும்.

     உற்ற பெரியோர், கவிஞர், தமர், ஆதுலர்க்கு உதவி ஓங்குபுகழ் தேடவேண்டும் --- தம்மை அடைந்த பெரியோர்க்கும், கவிஞருக்கும், உறவினர்க்கும், வறியவர்க்கும் கொடுத்து மிக்க புகழைத் தேடிக் கொள்ள வேண்டும்,

     மண்ணில் வெகு தருமங்கள் செயவேண்டும் --- உலகில் பல வகையான அறச் செயல்களையும் செய்தல் வேண்டும்.

     உயர் மோட்ச வழி தேட வேண்டும் --- மேலான வீடு பேற்றினை அடையும் வழியைத் தேடிக் கொள்ள வேண்டும்,

     அன்றி --- இவ்வாறு அல்லாமல்,

     வறிதில் புதைத்து வைத்து ஈயாத பேர்களே மார்க்கம் அறியாக் குருடராம் --- தேடிய செல்வத்தை வீணிலே மண்ணில் புதைத்து வைத்துவிட்டு தானும் துய்க்க அறியாமல், பிறர்க்கும் கொடுக்காதவர்களே நல்ல நெறியினை அறியாத அறிவுக் குருடர்கள் ஆவர்.

     அவ்வாறு நன்னெறியில் வாழப் பொருளை ஈட்டவேண்டுமானால், நன்னெறியில் வாழத் திருவருள் வேண்டும். திருவருள் இருக்குமானால், திருமகள் அருளும் இருக்கும். திருமகள் இருப்பது எங்கு? அவளது இருப்பால் என்ன விளையும்? என்பது குறித்து, "குமரேச சதகம்" கூறுவது காண்போம்...

சத்தியம் அது இருப்பவர் இடத்தினில்

     சார்ந்து திருமாது இருக்கும்;

சந்ததம் திருமாது இருக்கும் இடந்தனில்

     தனது பாக்கியம் இருக்கும்;

மெய்த்துவரு பாக்கியம் இருக்கும் இடந்தனில்

     விண்டுவின் களைஇருக்கும்;

விண்டுவின் களைபூண்டு இருக்கும் இடம்தனில்

     மிக்கான தயைஇருக்கும்;

பத்தியுடன் இனியதயை உள்ளவர் இடம்தனில்

     பகர்தருமம் மிகஇருக்கும்;

பகர்தருமம் உள்ளவர் இடம்தனில் சத்துரு

     பலாயனத் திறல்இருக்கும்;

வைத்துஇசை மிகுந்ததிறல் உள்ளவர் இடத்தில்வெகு

     மன்னுயிர் சிறக்கும் அன்றோ?

மயில் ஏறி விளையாடு குகனே! புல் வயல்நீடு

     மலைமேவு குமரேசனே!

          இதன் பொருள் ---

     மயில் ஏறி விளையாடு குகனே ---  மயில் மீது எழுந்தருளி அருள் விளையாடல்கள் புரியும் குகப் பெருமானே!

     புல்வயல் நீடு மலை மேவு குமர ஈசனே --- திருப் புல்வயல் என்னும் திருத்தலத்தில் எழுந்தருளி உள்ள குமாரக் கடவுளே!

     சத்தியம் தவறாது இருப்பவர் இடத்தினில் திருமாது

சார்ந்து இருக்கும் --- உண்மை நெறியில் வழுவாமல் வாழ்பவர் இடத்தில் திருமகள் சேர்ந்து இருப்பாள்,

     திருமாது இருக்கும் இடந்தனில் சந்ததம் தனது பாக்கியம் இருக்கும் --- திருமகள் வாழுகின்ற அந்த இடத்திலே எப்போதும் அவள் அருளால் பெறப்படும் செல்வம் இருக்கும்,

     மெய்த்து வரு பாக்கியம் இருக்கும் இடந்தனில் விண்டுவின் களையிருக்கும் --- உண்மையாக அவ்வாறு வருகின்ற செல்வம் இருக்கும் இடத்திலே திருமாலின் அருள் இருக்கும்,

     விண்டுவின் களை பூண்டு இருக்கும் இடம் தனில் மிக்கான தயை இருக்கும் --- திருமாலின் அருளைப் பெற்றோர் இடத்திலே பெருமைக்குரிய இரக்கம் மிகுந்து இருக்கும்,

     பத்தியுடன் இனிய தயை உள்ளவரிடந்தனில்

பகர் தருமம் மிக இருக்கும் --- திருமாலிடத்து வைத்துள்ள அன்பும், இனிய இரக்க குணமும் உள்ளவர் இடத்திலே சிறப்பித்துச் சொல்லப்படும் ஈகை என்னும் அறம் இருக்கும்,

     பகர் தருமம் உள்ளவர் இடந்தனில் சத்துரு பலாயனத் திறல் இருக்கும் --- புகழ்ந்து கூறப்படும் அற உணர்வு உள்ளவர் இடத்திலே பகைவரை வெல்லும் வலிமை இருக்கும்,

     இசை வைத்து மிகுந்த திறல் உள்ளவரிடத்தில் வெகு மன் உயிர் சிறக்கும் அன்றோ --- புகழ் பெற்று உயர்ந்த வலிமை பெற்றவர் இடத்திலே மிகுதியான நிலைபெற்ற உயிர்கள் சிறப்புற்று வாழும் அல்லவா?

     கருத்து --- சத்தியம் தவறாத உத்தமர் வாழும் இடத்திலே செல்வ வளமும், இறைவன் அருளும், தானமும், தருமமும் சிறக்கும். அந்த இடத்திலே பகைவருக்கும் அருளும் பண்பு இருக்கும். அதனால் எல்லா உயிர்களும் இன்புற்று வாழும்.

     திருமகளின் கடைக்கண் பார்வை உண்டானால் வருகின்ற சிறப்புக்கள் குறித்து, "குமரேச சதகம்" கூறுவது...

திருமகள் கடாட்சம்உண் டானால் எவர்க்கும்

     சிறப்புண்டு, கனதை உண்டு,

சென்றவழி எல்லாம் பெரும்பாதை ஆய்விடும்,

     செல்லாத வார்த்தைசெல்லும்

பொருளொடு துரும்பு மரியாதைஆம், செல்வமோ

     புகல் பெருக்காறு போல் ஆம்,

புவியின் முன் கண்டு மதியாதபேர் பழகினவர்

     போலவே நேசம் ஆவார்,

பெருமையொடு சாதியில் உயர்ச்சிதரும், அனுதினம்

     பேரும் ப்ரதிட்டை உண்டாம்,

பிரியமொடு பகையாளி கூட உறவு ஆகுவான்,

     பேச்சினில் பிழை வராது,

வரும் என நினைத்த பொருள் கைகூடி வரும், அதிக

     வல்லமைகள் மிகவும் உண்டாம்,

மயிலேறி விளையாடு குகனேபுல் வயல்நீடு

     மலைமேவு குமரேசனே.

இதன் பொருள் ---

     மயில் ஏறி விளையாடு குகனே --- மயில் மீது எழுந்தருளி அருள் விளையாடல்கள் புரியும் குகப் பெருமானே!

     புல்வயல் நீடு மலை மேவு குமர ஈசனே --- திருப் புல்வயல் என்னும் திருத்தலத்தில் எழுந்தருளி உள்ள குமாரக் கடவுளே!

     எவர்க்கும் திருமகள் கடாட்சம் உண்டானால் சிறப்பு உண்டு --- யாவருக்கும் திருமகளின் கிடைக்கண் நோக்கம் உண்டானால் கீர்த்தி உண்டு;

     கனதை உண்டு --- பெருமை உண்டு;

     சென்றவழி எல்லாம் பெரும்பாதை ஆய்விடும் ---வாழ்ந்து காட்டும் வழி எல்லாம் எல்லோரும் பின்பற்றும் பெரிய ஒழுக்கநெறி ஆகிவிடும்;

      செல்லாத வார்த்தை செல்லும் --- ஏற்றுக் கொள்ளத்தகாத சொற்களும் பிறரால் ஏற்றுக் கொள்ளப்படும்;

     பொருள் ஒரு துரும்பு --- எல்லாப் பொருளும் அவருக்கு எளிதில் கிடைக்கும்;

     மரியாதை ஆம் --- பிறர் போற்றும் சிறப்பு உண்டாகும்;

     செல்வமோ புகல் பெருக்கு ஆறுபோல் ஆம் --- அவரிடத்தில் செல்வமானது வற்றாத ஆற்று வெள்ளம் போல் வந்து சேரும்,

     புவியில் முன் கண்டு மதியாத பேர் பழகினவர் போலவே நேசம் ஆவர் --- இந்த உலகில் வறுமை உடையவனாய் இருந்தபோது, கண்டும் காணாதது போல், மதியாமல் சென்றவர் எல்லாம், முன்பே நெடுநாள் பழகினவர் போல் வந்து நட்புக் கொண்டாடுவர்.

     சாதியில் பெருமையொடு உயர்ச்சி தரும் --- பிறந்த குலத்தில் பெருமையும், உயர்வும் உண்டாகும்,

      அனுதினமும் பேரும் பிரதிட்டை உண்டாம் --- எந்நாளும் பேரும் புகழும் உண்டாகும்,

     பகையாளி கூட பிரியமொடு உறவாகுவான் ---

பகைவனும் கூட அன்போடு உறவு கொண்டாடுவான்;

     பேச்சினில் பிழை வராது --- பேசும் போது பிழையில்லாத பேச்சு வரும்;  (வந்தாலும் பிழையாக யாரும் கொள்ளமாட்டார்)

     வரும் என நினைத்த பொருள் கைகூடி வரும் --- வரவேண்டும் என்று எண்ணிய பொருள் யாவும் தவறாமல் கிட்டும்,

     அதிக வல்லமைகள் மிகவும் உண்டாம் --- எடுத்த செயலை முடிக்கும் பேராற்றல் மிகுதியாக உண்டாகும்.

     இவ்வளவு சிறப்புக்களையும் அருளுகின்ற திருமகள் எங்கு வீற்றிருக்கின்றாள் என்பதை, பின்வரும் பாடல்கள் காட்டும்...

கடவா ரணத்திலும், கங்கா சலத்திலும்,

     கமலா சனந்தன்னிலும்,

காகுத்தன் மார்பிலும், கொற்றவ ரிடத்திலும்,

     காலியின் கூட்டத்திலும்,

நடமாடு பரியிலும், பொய்வார்த்தை சொல்லாத

     நல்லோ ரிடந்தன்னிலும்,

நல்லசுப லட்சண மிகுந்தமனை தன்னிலும்,

     ரணசுத்த வீரர்பாலும்,

அடர்கே தனத்திலும், சுயம்வரந் தன்னிலும்,

     அருந்துளசி வில்வத்திலும்,

அலர்தரு கடப்பமலர் தனிலும்,இர தத்திலும்,

     அதிககுண மானரூப

மடவா ரிடத்திலும் குடிகொண்டு திருமாது

     மாறாது இருப்பள் அன்றோ?

மயிலேறி விளையாடு குகனே!புல் வயல்நீடு

     மலைமேவு குமரேசனே. --- குமரேச சதகம்.

        இதன் பொருள் ---

     மயில் ஏறி விளையாடு குகனே ---  மயில் மீது எழுந்தருளி அருள் விளையாடல்கள் புரியும் குகப் பெருமானே!

     புல்வயல் நீடு மலை மேவு குமர ஈசனே --- திருப் புல்வயல் என்னும் திருத்தலத்தில் மலை மீது எழுந்தருளி உள்ள குமாரக் கடவுளே!

     கட வாரணத்திலும் ---  மதயானையின் இடத்திலும்,

     கங்கா சலத்திலும் --- கங்கையின் தூய நீரிலும்,

     கமல ஆசனம் தன்னிலும் --- தாமரை மலராகிய ஆசனத்திலும்,

     காகுத்தன் மார்பிலும் --- திருமாலின் மார்பிலும்,

     கொற்றவர் இடத்திலும் --- அரசர் இடத்திலும்,

     காலியின் கூட்டத்திலும் --- பசுக்களின் கூட்டத்திலும்,

     நடம் ஆடு பரியிலும் --- நடையில் சிறந்த

குதிரையின் இடத்திலும்,

     பொய் வார்த்தை சொல்லாத நல்லோர் இடம் தன்னிலும் --- பொய் கூறாத நல்லவர்கள் இடத்திலும்,

     நல்ல சுப லக்கணம் மிகுந்த மனை தன்னிலும் --- சிறந்த சுப இலக்கணங்கள் பொருந்தி உள்ள வீட்டிலும்,

     இரண சுத்த வீரர் பாலும் --- போருக்கு உரிய உயர்ந்த வீரர் இடத்திலும்,

     அடர் கேதனத்திலும் --- மிகுந்த வெற்றிக் கொடியின் இடத்திலும்,

     சுயம்வரம் தன்னிலும் --- சுயம் வர திருமணத்திலும்,

     அருந் துளசி வில்வத்திலும் --- அரிய துளசி மற்றும் வில்வ பத்திரத்திலும்,

     அலர் தரு கடப்ப மலர் தனிலும் --- மலர்ந்த கடப்ப மலரிலும்,

     இரதத்திலும் --- தேரிலும்,

     அதிக குணமான ரூப மடவாரிடத்திலும் --- நற்குணம் வாய்ந்த அழகிய பெண்கள் இடத்திலும்,

     திருமாது குடிகொண்டு மாறாது இருப்பள் அன்றோ --- திருமகள் குடிகொண்டு எப்போதும் நீங்காமல் இருப்பாள் அல்லவா?

நற்பரி முகத்திலே, மன்னவர் இடத்திலே,

     நாகரிகர் மாமனை யிலே,

  நளினமலர் தன்னிலே, கூவிளந் தருவிலே,

     நறைகொண்ட பைந்துள விலே,

கற்புடையர் வடிவிலே, கடலிலே, கொடியிலே,

     கல்யாண வாயில் தனிலே,

  கடிநக ரிடத்திலே, நற் செந்நெல் விளைவிலே,

     கதிபெறு விளக்க தனிலே,

பொற்புடைய சங்கிலே, மிக்கோர்கள் வாக்கிலே

     பொய்யாத பேர்பா லிலே,

  பூந்தடம் தன்னிலே, பாற்குடத்து இடையிலே

     போதகத் தின்சிர சிலே

அற்பெரும் கோதைமலர் மங்கைவாழ் இடம் என்பர்

     அண்ணல்எமது அருமை மதவேள்

  அனுதினமும் மனதில்நினை தருசதுர கிரிவளர்

     அறப்பளீ சுரதே வனே!      --- அறப்பளீசுர சதகம்.

  இதன் பொருள் ---

     அண்ணல் --- தலைவனே!

     எமது அருமை மதவேள் அனுதினமும் மனதில் நினைதரு சதுரகிரிவளர் அறப்பளீசுர தேவனே --- எமது அரிய மதவேள் என்பான், எக்காலத்தும் உள்ளத்தில் வழிபடுகின்ற சதுர கிரியில் எழுந்தருளிய அறப்பளீசுர தேவனே!,

     நல் பரி முகத்தில் --- அழகிய குதிரையின் முகத்திலும்,

     மன்னவர் இடத்தில் --- அரசரின் இடத்திலும்,

     நாகரிகர் மாமனையில் --- நயத்தகு நாகரிகம் அறிந்தவர்கள் வாழும் வீட்டிலும்,

     நளின மலர் தன்னில் --- தாமரை மலரிலும்,

     கூவிளந் தருவில் ---- வில்வ மரத்திலும்,

     நறை கொண்ட பைந் துளவில் --- மணமுடைய பசிய திருத் துழாயிலும்,

     கற்புடையர் வடிவில் --- கற்புடைய பெண்களின் வடிவத்திலும்,

     கடலில் --- கடலிலும்,

     கொடியில் ---- துகில் கொடியிலும்,

     கல்யாண வாயில் தனில் --- திருமண வீட்டின் வாயிலிலும்,

     கடி நகர் இடத்தில் --- காவலுடைய நகரத்திலும்,

     நல் செந்நெல் விளைவில் --- நல்ல செந்நெல் விளைவிலும்,

     கதிபெறு விளக்கு அதனில் --- ஒளிவீசுகின்ற விளக்கிலும்,

     பொற்பு உடைய சங்கில் --- அழகுள்ள சங்கிலும்,

     மிக்கோர்கள் வாக்கில் --- பெரியோர் வாயிலிருந்து பிறக்கும் சொல்லில்,

     பொய்யாத பேர் பாலில் --- பொய் சொல்லாதவர் இடத்திலும்,

     பூந் தடம் தன்னில் --- மலர்கள் நிறைந்துள்ள குளத்திலும்,

     பாற்குடத்திடையில் --- பால் குடத்திலும்,

     போதகத்தின் சிரசில் --- யானையின் மத்தகத்திலும்,

     அல்பெரும் கோதை மலர்மங்கை வாழ் இடம் என்பர் --- இருண்ட நீண்ட கூந்தலையுடைய திருமகளானவள் வாழுகின்ற இடம் என்பர் பெரியோர்.

     ஆனால், திருமகள் வாழும் இடம் எது என்று திருவள்ளுவ நாயனார் கூறுவது,

"மடி உளாள் மாமுகடி என்ப, மடி இலான்

தாள் உளாள் தாமரையினாள்"

     சோம்பல் இருக்கும் இடத்திலே மூதேவி இருப்பாள். சோம்பல் இல்லாதவன் இடத்திலே திருமகள் இருப்பாள்.

     "தாள்" என்னும் சொல்லுக்கு முயற்சி அல்லது சோம்பல் இல்லாமை என்பதைப் பொருளாக் கொண்டால், மேற்படி பொருள் வரும்.

     முயற்சி என்பது, நன்னெறியில் முயலுவதையே குறிக்கும்.

     "தாள்" என்னும் சொல்லுக்கு, காலடி, பாதம் என்றும் பொருள் உண்டு. அவ்வாறு கொண்டால், நன்னெறியில் முயலுபவனது காலடியில் திருமகள் தவழ்ந்து கொண்டு இருப்பாள் என்பது பொருளாய் வரும்.

     இரண்டாவதாகச் சொன்னதே பொருந்தும் என்பது, பின்வரும், திருஞானசம்பந்தர் தேவாரப் பாடலால் அறியலாம்....

"கொய்த அம் மலரடி கூடுவார், தம்

மை திகழ் திருமகள் வணங்க வைத்துப்

பெய்தவன் பெருமழை, உலகம் உய்யச்

செய்தவன் உறைவிடம் திருவல்லமே"

இதன் பொழிப்புரை ---

     அன்பர்களால் கொய்து அணியப் பெற்ற அழகிய மலர் பொருந்திய திருவடிகளைச் சேர்பவர்களை, பலரிடத்தும் மாறிமாறிச் செல்லும் இயல்பினளாகிய திருமகளை வணங்குமாறு செய்விப்பவனும், பெருமழை பெய்வித்து உலகை உய்யுமாறு செய்பவனுமாய சிவபிரானது உறைவிடம் திருவல்லமாகும்.

பின்வரும் அப்பர் தேவாரப் பாடலையும் காண்போம்...

"செந்துவர் வாய்க்கருங் கண்இணை வெண்நகைத் தேன்மொழியார்

வந்து வலம்செய்து மாநடம் ஆட மலிந்த செல்வக்

கந்தம் மலிபொழில் சூழ்கடல் நாகைக்காரோணம் என்றும்

சிந்தை செய்வாரைப் பிரியாது இருக்கும் திருமங்கையே".

இதன் பொழிப்புரை ---

     சிவந்த பவளம் போன்ற வாயையும் கரிய இருகண்களையும் , வெள்ளிய பற்களையும், தேன்போன்ற இனிய சொற்களையும் உடைய இளைய மகளிர் வந்து வலம் செய்து சிறந்த கூத்து நிகழ்த்துமாறு , செல்வம் மிகுந்ததும் , நறுமணம் வீசும் பொழில்களால் சூழப்பட்டதுமான கடலை அடுத்து அமைந்த நாகைக் காரோணத்தை என்றும் தியானிப்பவர்களைத் திருமகள் என்றும் நீங்காது இருப்பாள்.

     ஆக, திருமகள் எங்கு இருப்பதாகக் கொண்டாலும் சரி. நினைக்கும் இடத்தில் அவள் இருப்பாள். அறவழியில் முயலும் இடத்தில் அவள் இருப்பாள். சத்தியம் தவறாத உத்தமர் வாழும் இடத்தில் அவள் இருப்பாள். இறை அடியாருடைய காலடியில் நீங்காமல் இருப்பாள்.