திருக்குறள்
பொருட்பால்
அ. அரசியல்
அதிகாரம் 61 -- மடி இன்மை
அதாவது, எண்ணிய செயலைச் செய்யுங்கால், உள்ளத்தில் ஊக்கம் இன்மையால், தாமதகுணம் காரணமாக சோம்பல் உண்டாகும். சோம்பல் இல்லாது இருக்க வலியுறுத்தினார் நாயனார்..
தாமத குணத்தின் வடிவமாவது, மோகம் கொள்ளுதல், பேருண்டி, அநீதி, உறக்கம், மறதி, சோம்பல், தவறுதல், கொலை, வஞ்சனை முதலியன ஆகும். இவை இல்லாது இருத்தல் வேண்டும்.
இந்த அதிகாரத்துள் வரும் இரண்டாம் திருக்குறளில், "குடும்பத்தைக் குடும்பமாக வைத்திருக்க எண்ணுபவர், சோம்பல் மடிந்து போகும்படியாக முயற்சியோடு நடந்து கொள்ள வேண்டும்" என்கின்றார் நாயனார்.
நெருப்பை நெருப்பாகவே எண்ணுதல் வேண்டும் என்பது போல, மடியை மடியாகக் கொண்டு ஒழுகவேண்டும் என்றார். அவ்வாறு எண்ணாவிடில், சோம்பலானது நாள்தோறும் சிறிது சிறிதாக அதிகரித்து, ஊக்கம் உடைமையைக் கெடுத்து, குடியைக் கெடுத்துவிடும். எனவே, ஒருவன் வாழ்வில் உயரவேண்டுமானால், மடியை மடித்தல் வேண்டும்.
இதற்குத் திருக்குறள்...
மடியை மடியா ஒழுகல், குடியைக்
குடியாக வேண்டு பவர்.
இதற்குப் பரிமேலழகர் உரை ---
குடியைக் குடியாக வேண்டுபவர் --- தாம் பிறந்த குடியை மேல்மேல் உயரும் நற்குடியாக வேண்டுவார்;
மடியை மடியா ஒழுகல் --- மடியை மடியாகவே கருதி முயற்சியோடு ஒழுகுக.
('முயற்சியோடு' என்பது அவாய் நிலையான் வந்தது. நெருப்பிற் கொடியது பிறிதின்மை பற்றி, நெருப்பை நெருப்பாகவே கருதுக என்றாற் போல், மடியின் தீயது பிறிதின்மை பற்றிப் பின்னும் அப்பெயர் தன்னானே கூறினார். 'அங்ஙனம் கருதி அதனைக் கடிந்து முயன்று ஒழுகவே தாம் உயர்வர்; உயரவே குடி உயரும் என்பார், குடியைக் குடியாக வேண்டுபவர்' என்றார். அங்ஙனம் ஒழுகாக்கால் குடி அழியும் என்பது கருத்து. இனி மடியா என்பதனை வினையெச்சமாக்கிக் கெடுத்தொழுகுக என்று உரைப்பாரும் உளர்.)
பின்வரும் பாடல்கள் இத் திருக்குறள் கருத்துக்கு ஒப்பாக அமைந்துள்ளதை அறியலாம்...
மடியை வியங்கொள்ளின் மற்றைக் கருமம்
முடியாத வாறே முயலும் - கொடியன்னாய்!
பாரித் தவனை நலிந்து தொழில்கோடல்
மூரி உழுது விடல். --- பழமொழி நானூறு.
இதன் பொருள் ---
கொடி அன்னாய் - கொடிபோன்ற இடையை உடையவளே! மடியை வியம் கொள்ளின் - சோம்பல் உடையானை ஒருசெயலைச் செய்ய ஏவினால், மற்றை கருமம் முடியாத ஆறே முயலும் - அவனைச் செய்ய ஏவிய அச்செயல் முடியாத விதமாகவே முயற்சி செய்வான் சோம்பல் உடையான், பாரித்தவனை நலிந்து தொழில்கோடல் – சோம்பலில் மிகுந்தவனைத் துன்புறுத்திக் காரியத்தைக் கொள்ளுதல் மிகவும் கடினமானது ஆகும். (அவ்வாறு செந்தல்) மூரி உழுது விடல் - கிழட்டு எருதினைக் கொண்டு நிலத்தை உழுது பயன் கொள்ள எண்ணுவதோடு ஒக்கும்.
சோம்பல் உடையானைக் கொண்டு ஒரு காரியம் செய்வித்தல் ஆகாது. நலிந்து செய்வித்தாலும் அதனால் பயன் உண்டாகாது. சோம்பலில் மிகுந்தவனை வருத்தியாவது காரியம் செய்விப்போமாயினும், காரியம் தாம் விரும்பிய காலத்தில் முடிவுறாது. பயன் பெறுதல் இல்லை..
தெளிவுற நூல்பல தினமும் வாசித்து
மிளிர் உடல் வருந்தியும் வெறுக்கை ஈட்டி,நல்
கிளிமொழி மனைவியைக் கிளைஞரைப் பல
எளியரைத் தாங்குவோர்க்கு இல்லை மந்தமே. --- நீதிநூல்.
இதன் பொருள் ---
மெய்ந்நூல்களை நாள்தோறும் தெளிய ஓதி, விளங்கும் உடல் வருந்தப் பாடுபட்டுப் பணம் தேடி, கிளிமொழி போன்ற மனைவியையும் கிளைஞர்களையும் பல எளியவர்களையும் பேணி வருவோர்க்குச் சோம்பல் உண்டாகாது.
No comments:
Post a Comment