061. மடி இன்மை - 03. மடிமடிக் கொண்டு

திருக்குறள்

பொருட்பால்

அ. அரசியல்

அதிகாரம் 61 -- மடி இன்மை

இந்த அதிகாரத்துள் வரும் மூன்றாம் திருக்குறளில்,"மடித்து அழித்தற்கு உரிய சோம்பலை அழிக்காமல் ஏற்று நடந்து கொள்ளும் அறிவில்லாதவன் பிறந்த குடும்பமானது, அவனினும் முந்தி அழியும்" என்கின்றார் நாயனார்.

அழிவினைத் தரக்கூடிய சோம்பலை ஒருவன் தனது மனத்தே கொண்டு நடக்க முயல்வானானால், அவனுக்கு இயற்கையாக உள்ள அறிவும் கெட்டு, அவனால் காக்கப்பட வேண்டிய குடியும் காப்பதற்கு இல்லாமல் அவனது கண் முன்னரேயே அழியும்.

இதற்குத் திருக்குறள்...

மடிமடிக் கொண்டு ஒழுகும் பேதை பிறந்த

குடி, மடியும் தன்னினும் முந்து.

இதற்குப் பரிமேழகர் உரை ---

மடி மடிக்கொண்டு ஒழுகும் பேதை பிறந்த குடி --- விடத்தகுவதாய மடியைத் தன்னுள்ளே கொண்டு ஒழுகும் அறிவில்லாதான் பிறந்த குடி; 

தன்னினும் முந்து மடியும் --- அவன் தன்னினும் முந்துற அழியும்.

(அழிவு தருவதனை அகத்தே கொண்டு ஒழுகுதலின் 'பேதை' என்றும்; அவனால் புறம் தரப்படுவதாகலின் 'குடி தன்னினும் முந்துற அழியும்' என்றும் கூறினார். ஆக்கத்திற் பிற்படினும் அழிவில் முற்படும் என்பதாம்.)

பின்வரும் பாடல்கள் இத் திருக்குறள் கருத்துக்கு ஒப்பாக அமைந்துள்ளமை அறியலாம்...

சிற்று எறும்பு ஆதியாச் சீவ கோடிகள்

முற்றும் மெய் உழைத்து, உயிர் முறையில் காக்குமால்,

சற்றுமெய் அசைவு இலாச் சழக்கர் ஆருயிர்

அற்ற ஓர் சவம்கொல், மற்று அசரமே கொலோ. --- நீதிநூல்.

இதன் பொருள் ---

  சிறிய எறும்பு முதல் பெரிய யானை வரை எல்லா உயிரினங்களும் உழைத்து முறையாகத் தம் உயிரைக் காக்கின்றன. உடல் ஒரு சிறிதும் அசையாது சோம்பி இருக்கும் தீயோர் உயிர் அற்ற சவமோ? அல்லது நிலைத்திணையாகிய பட்ட மரமோ?

 

விடக்கு உறும் சடம்பல வேலை செய்தற்கா

நடக்கவும் ஓடவும் நனி உறுப்புகள்

மடக்கவு நீட்டவும் வாய்ந்ததால், சும்மா

கிடக்குமெய்ச் சோம்புளோர் கேடு உளார்களே. --- நீதிநூல்.

இதன் பொருள் ---

  இறைச்சி நிறைந்த அறிவில்லதாகிய இவ்வுடல் வேலை செய்தற்பொருட்டே, உறுப்புகள் நடக்கவும், ஓடவும், மடக்கவும், நீட்டவும் பொருத்தமாக வாய்த்துள்ளன.. அப்படியிருந்தும், வேலை செய்யாது அவ் வுறுப்புகளை வறிதே கிடக்கும்படி செய்வோர் தீயவராவர்.

  விடக்கு-இறைச்சி. சடம்-அறிவில்லது; உடல். சும்மா-வறிது.