061. மடி இன்மை - 07. இடி புரிந்து

 திருக்குறள்

பொருட்பால்

அ. அரசியல்

அதிகாரம் 61 -- மடி இன்மை

இந்த அதிகாரத்துள் வரும் ஏழாம் திருக்குறளில், "சோம்பலை மேற்கொண்டு, முயற்சியைக் கைக்கொள்ளாதவர், இடித்துக் கூறுதலைத் தொடர்ந்து செய்து இகழ்கின்ற சொற்களைக் கேட்பர்" என்கின்றார் நாயனார்.

சோம்பேறி, எச் செயலையும் செய்யத் தகுதி அற்றவன் என்று இவனது சொல்லை நண்பர்களே கேளாது இருப்பதுடன், இகழ்ந்தும் பேசுவதைக் கேட்டுக் கொண்டே இருக்க நேரிடும்.

இதற்குத் திருக்குறள்...

இடிபுரிந்து எள்ளும் சொல் கேட்பர், மடிபுரிந்து

மாண்ட உஞற்று இல் அவர்.

இதற்குப் பரிமேலழகர் உரை ---

மடி புரிந்து மாண்ட உஞற்று இலவர் --- மடியை விரும்புதலான் மாண்ட முயற்சி இல்லாதார்; 

இடி புரிந்து எள்ளும் சொல் கேட்பர் --- தம் நட்டார்முன் கழறுதலை மிகச் செய்து அதனால் பயன் காணாமையின், பின் இகழ்ந்து சொல்லும் சொல்லைக் கேட்பர்.

('இடி' என்னும் முதல்நிலைத் தொழிற் பெயரான்', 'நட்டார்' என்பது பெற்றாம். அவர் இகழ்ச்சி சொல்லவே, பிறர் இகழ்ச்சி சொல்லாமையே முடிந்தது. அவற்றிற்கெல்லாம் மாறு சொல்லும் ஆற்றல் இன்மையின் 'கேட்பர்' என்றார்.)

இத் திருக்குறளுக்கு விளக்கமாக, கமலை வெள்ளியம்பலவாண முனிவர் பாடி அருளிய "முதுமொழி மேல் வைப்பு" என்னும் நூலில் இருந்து ஒரு பாடல்...

“மாறன் இறை அருளால் வந்து வெல்லத் தோற்ற அளவில்

போர்விண்ட இந்திரனைப் போலவே, சால

இடிபுரிந்து எள்ளும் சொல் கேட்பர், மடிபுரிந்து

மாண்ட உஞற்று இல் அவர்.”

இதன் பொருள் ---

மாறன் --- உக்கிரகுமார பாண்டியன்.  

உக்கிரகுமார பாண்டியன் வானாடு சென்று இருந்த போது, தனக்குச் சமானமாக உக்கிரன் நடந்து கொண்டமையை இந்திரன் கண்டு சினம் கொண்டு, பாண்டி நாட்டில் மழை பெய்யாதவண்ணம் மேகங்களுக்குக் கட்டளை இடவே, பாண்டி நாட்டின் மலைகளில் தங்கிய மேகங்களை உக்கிரன் தளை இட்டான்.  இந்திரன் அவற்றை விடுவிக்கும் பொருட்டு, உக்கிரனுடன் போருக்கு வந்து மகுடபங்கம் அடைந்து முதுகிட்டு ஓடினான். இந்திரன் முடிமேல் வளை எறிந்த படலத்தைத் திருவிளையாடல் புராணத்தில் காண்க.

பின்வரும் பாடல், இத் திருக்குறள் கருத்துக்கு ஒப்ப அமைந்துள்ளதை அறிக.

கண்கூடாப் பட்டது கேடுஎனினும் கீழ்மக்கட்கு

உண்டோ உணர்ச்சி, மற்று இல்ஆகும், - மண்டுஎரி

தான்வாய் மடுப்பினும் மாசுணம் கண்துயில்வ,

பேரா பெருமூச்சு எறிந்து.     ---  நீதிநெறி விளக்கம்.

இதன் பொருள் ---

மிகுந்த நெருப்பு சூழ்ந்து எரிந்தாலும் பெரிய பாம்புகள், பெருமூச்சு விட்டுக்கொண்டு தூங்கிக் கொண்டிருக்கும். அவ்விடத்தினின்றும் அசையா. (அதுபோல) தமக்கு வரும் கெடுதிகளை நேராகவே பார்த்தார்களானாலும், கீழ்மக்களுக்கு அவற்றினின்றுந் தப்பிப்பிழைக்கும் உணர்ச்சி இல்லையாகும்.