திருக்குறள்
பொருட்பால்
அ. அரசியல்
அதிகாரம் 61 -- மடி இன்மை
இந்த அதிகாரத்துள் வரும் எட்டாம் திருக்குறளில், "சோம்பல் உடைமை ஒருவன் குடும்பத்தில் இருக்குமானால், அது அவனை பகைவர்க்கு மீளாத அடிமை ஆக்கிவிடும்" என்கின்றார் நாயனார்.
இதற்குத் திருக்குறள்...
மடிமை குடிமைக்கண் தங்கின், தன் ஒன்னார்க்கு
அடிமை புகுத்தி விடும்.
இதற்குப் பரிமேலழகர் உரை ---
மடிமை குடிமைக்கண் தங்கின் --- மடியினது தன்மை குடிமையுடையான்கண்ணே தங்குமாயின்;
தன் ஒன்னார்க்கு அடிமை புகுத்திவிடும் --- அஃது அவனைத் தன் பகைவர்க்கு அடியனாம் தன்மையை அடைவித்துவிடும்,
(மடியினது தன்மை - காரியக் கேடு. குடிமை - குடி செய்தல் தன்மை. அஃது அதனை உடைய அரசன் மேற்றாதல், 'தன் ஒன்னார்க்கு' என்றதனான் அறிக. அடியனாம் தன்மை - தாழ்ந்து நின்று ஏவல் கேட்டல்.)
இத் திருக்குறளுக்கு விளக்கமாக, பிறைசை சாந்தக் கவிராயர் பாடியருளிய நீதிசூடாமணி என்கின்ற "இரங்கேச வெண்பா" என்னும் நூலில் இருந்து ஒரு பாடல்...
துஞ்சுவிழிக் கும்பகன்னன் துண்டம் செவிஇழந்தும்
எஞ்சுதலை உற்றான் இரங்கேசா --- விஞ்சும்
மடிமை குடிமைக்கண் தங்கில்தன் ஒன்னார்க்கு
அடிமை புகுத்தி விடும்.
இதன் பொருள் ---
இரங்கேசா - திருவரங்கநாதக் கடவுளே! துஞ்சு விழிக் கும்பகன்னன் - தூங்கும் வி்ழிகளையுடைய கும்பகன்னன், துண்டம் செவி இழந்தும் - மூக்கையும் காதுகளையும் (சுக்கிரீவன் கடித்துவிட்டதனால்) போக்கடித்துக் கொண்டும், எஞ்சுதலை உற்றான் - உயிர் பிழைத்திருத்தலைப் பெற்றான், (ஆகையால், இது) விஞ்சும் மடிமை - மிகுந்த சோம்பலானது, குடிமைக்கண் தங்கின் - ஓர் அரசனுடைய குடியில் பொருந்தி இருக்குமாயின், தன் ஒன்னார்க்கு - அது அவனுடைய பகைவர்களுக்கு, அடிமை புகுத்தி விடும் – அவனை அடிமைத்தனம் செய்யும்படி நுழைத்து விடும் (என்பதை விளக்குகின்றது).
கருத்துரை --- "சோம்பர் என்பவர் தேம்பித் திரிவர்" என்பது ஔவைப் பிராட்டியின் “கொன்றை வேந்தன்”.
விளக்கவுரை --- இராமாயணப் போரில் கும்பகன்னன் சண்டைக்கு வந்து, சகல வானரங்களையும் கொன்று வெற்றி பெற்று அதற்கு அடையாளமாக வானரத்தலைவனான சுக்கிரீவனைத் தூக்கிக் கொண்டு முரசம் முழங்க அதிவேகமாகப் போனான். அப்போது அவனுக்கு வழக்கமாயுள்ள சோம்பல் காரணமாக தூக்கம் வந்து விட்டது. அதனால் சற்று மயங்கி இருந்தான். அதுதான் சரியான சமயம் அவனை அவமானப்படுத்தி அவனிடத்திருந்து தப்புவதற்கு என்று எண்ணின சுக்கிரீவன், அவனுடைய மூக்கையும் காதுகளையும் கடித்து எரிந்து விட்டுத் தப்பி வந்து தன் சேனையோடு சேர்ந்துகொண்டான். பிறகு அவன் மூக்கு முதலியவைகளை இழந்து பிழைத்திருக்கும் அவமானத்தால், அதற்கு அப்புறமும் தன் உயிரை வைத்துக் கொண்டிருக்க மாட்டாமல், சண்டையில் மாண்டு மடிந்தான். மடிமை கும்பகன்னன் குடிமையில் தங்கி இருந்ததால், அவனை ஒன்னார்க்கு அடிமை புகுத்தி விடும் அவமானத்தை அவனுக்கு வருவித்தது காண்க.
No comments:
Post a Comment