திருக்குறள்
பொருட்பால்
அ. அரசியல்
அதிகாரம் 59 -- ஒற்றாடல்
இந்த அதிகாரத்துள் வரும் மூன்றாம் திருக்குறளில், "ஒற்றரைக் கொண்டு, பகைவர், அயலார், நட்பினர் ஆகிய எல்லாரிடத்தும் நிகழும் செயல்களை அறிந்து வரச் செய்து, அவற்றால் உண்டாகும் பயனை ஆராய்ந்து அறியாத மன்னன், வெற்றி அடையக் கிடந்த ஒரு வழி வேறு இல்லை" என்கின்றார் நாயனார்.
எதனையும் இடங்கள்தோறும் சென்று பிறர் அறியாமல் கண்டும், கேட்டும், நன்மை தீமைகளைச் சொல்லுகின்ற ஒற்றர்களைக் கொண்டு தெரிந்துகொள்வதன் மூலம், தனது ஆட்சிக்கும் மக்களுக்கும் எதிரான செயல்களை அறிந்து, அவைகளை வெற்றி கொள்ளவேண்டும்.
இதற்குத் திருக்குறள்...
ஒற்றினான் ஒற்றி, பொருள் தெரியா மன்னவன்
கொற்றம், கொளக் கிடந்ததது இல்.
இதற்குப் பரிமேலழகர் உரை ---
ஒற்றினான் ஒற்றிப் பொருள் தெரியா மன்னவன் --- ஒற்றினானே எல்லார்கண்ணும் நிகழ்ந்தவற்றை ஒற்றுவித்து அவற்றான் எய்தும் பயனை ஆராயாத அரசன்;
கொற்றம் கொளக் கிடந்தது இல் --- வென்றியடையக் கிடந்தது வேறொரு நெறி இல்லை.
(அந்நிகழ்ந்தனவும் பயனும் அறியாது பகைக்கு எளியனாதல் பிறிதின் தீராமையின் 'கொற்றம் கொளக் கிடந்தது இல்' என்றார். இதற்குக் கொளக்கிடந்ததொரு வென்றி இல்லை என்று உரைப்பினும் அமையும். இதனான் அத்தொழில் செய்யாதவழி வரும் குற்றம் கூறப்பட்டது.)
இத் திருக்குறளுக்கு விளக்கமாக, பிறைசை சாந்தக் கவிராயர் பாடி அருளிய, நீதிசூடாமணி என்கின்ற "இரங்கேச வெண்பா" என்னும் நூலில் இருந்து ஒரு பாடல்...
“மேகநா தன்செய்த வேள்விதனை ஒற்றினால்
ஏகிஅழித்து உய்ந்தார், இரங்கேசா! --- சேகரித்த
ஒற்றினால் ஒற்றிப் பொருள் தெரியா மன்னவன்
கொற்றம் கொளக்கிடந்தது இல்.”
இதன் பொருள் ---
இரங்கேசா - திருவரங்கநாதக் கடவுளே! மேகநாதன் செய்த வேள்விதனை - இந்திரசித்தன் செய்த நிகும்பலை யாகத்தை, ஒற்றினால் ஏகி அழித்து உய்ந்தார் - வேவால் உணர்ந்து, சென்று, அழித்து, (இளையபெருமாள் முதலியோர் வெற்றி பெற்றுப்) பிழைத்தார்கள், (ஆகையால், இது) ஒற்றினால் ஒற்றி சேகரித்த பொருள் தெரியாத மன்னவன் - வேவால் பகைவரிடத்து நிகழ்பவைகளை அறிந்து கொண்டு அவற்றின் பிரயோசனத்தை ஆராய்ந்து அறியாத மன்னவன், கொற்றம் கொளக் கிடந்தது இல் - வெற்றிபெறத் தக்க வழி வேறு இல்லை (என்பதை விளக்குகின்றது).
கருத்துரை --- அரசன் ஒற்றால் உளவு அறிந்து காரியம் செய்யவேண்டும்.
விளக்கவுரை --- இந்திரசித்தன் நிகும்பலையில் செய்திருந்த யாகத்தை இளையபெருமாள் முதலியோர் அறியாதிருந்தார்கள். அவன் திடீரென்று மாயமாய் மறைந்து இருந்தான். ஆகையால், அவன் இருப்பைப் பற்றி சந்தேகமுற்ற இராமபிரான் விபீடணரை அனுப்பிப் பாம்பறியும் பாம்பின் கால் என்றபடி, இந்திரசித்தன் நிலைமையை அறிந்து வரும்படிக் கட்டளை இட்டார். அப்படியே அவர் சென்று, அவன் நிகும்பலையில் யாகம் செய்வதை உணர்த்தினார். உடனே இளையபெருமாள் முதலியோரை, இராமபிரான் ஏவி, அவ் யாகத்தை அழிக்கக் கட்டளை இட்டார். அதன்படி அவர்கள் சென்று யாகத்தை அழித்து, இந்திரசித்தனோடு போர் புரிந்து அவனையும் கொன்று வென்று விளங்கினார்கள். ஒற்றினால் ஒற்றிச் சேகரித்த பொருள் தெரிந்ததனால் வந்த பயன் இது. ஆகையால், "ஒற்றினால் ஒற்றிப் பொருள் தெரியா மன்னவன் கொற்றம் கொளக் கிடந்தது இல்" என்றார் நாயனார்.
அடுத்து, இத் திருக்குறளுக்கு விளக்கமாக, சிதம்பரம் ஈசானிய மடத்து இராமலிங்க சுவாமிகள் பாடி அருளிய, "முருகேசர் முதுநெறி வெண்பா" என்னும் நூலில் இருந்து ஒரு பாடல்...
“பின்னைகரம் வீடியபின் பேதுற்றான் சூரன்,ஒற்றை
முன்இனிது ஆளாமல், முருகேசா! --- அன்னதனால்
ஒற்றினால் ஒற்றிப் பொருள்தெரியா மன்னவன்
கொற்றம் கொளக்கிடந்தது இல்.”
இதன் பொருள் ---
முருகேசா - முருகப் பெருமானே, சூரபதுமன் - சூரபதுமனானவன், ஒற்றை - ஒற்றாடலை, முன் இனிது ஆளாமல் - முன்னரே நன்றாகச் செய்து கொள்ளாதபடியினால், பின்னை கரம் வீடிய பின் - தங்கையாகிய அசமுகியின் கை வெட்டுண்ட பிறகு, பேதுற்றான் - உள்ளம் வருந்தினான். அன்னதனால் - ஆகையால், ஒற்றினால் ஒற்றிப் பொருள் தெரியா மன்னவன் - ஒற்றர்களால் நாட்டு நிகழ்ச்சிகளை அறிந்து அவற்றின் பயனை அறிந்து கொள்ளாத அரசன், கொற்றம் கொளக் கிடந்தது இல் - வெற்றி பெறத்தக்க வழி வேறு இல்லை.
சூரபதுமனானவன் ஒற்றரைக் கொண்டு செய்தி அறிந்துகொள்ளுதலை, முன்னரே மேற்கொள்ளாதபடியினால் தங்கையினுடைய கை வெட்டுண்ட பிறகு வருத்தத்தை அடைந்தான். ஒற்றர்களால் நாட்டு நிகழ்ச்சிகளை அறிந்து அவற்றின் பயனைத் தெரிந்து கொள்ளாத அரசன் வெற்றி அடைதற்கு வழி ஒன்றும் இல்லை என்பதாம்.
சூரபதுமனுக்கு அஞ்சி இந்திரன் இந்திராணியோடு நிலவுலகத்தை அடைந்து தங்கினான். இந்திராணியை ஐயனார்பால் ஒப்புவித்து விட்டு, தான் திருக்கயிலைக்குச் சென்றான். ஐயனார் கட்டளைப்படி வீரமாகாளர் இந்திராணியைக் காவல் செய்திருந்தார். இந்திரணியைச் சூரபதுமனுடைய தங்கையாகிய அசமுகி ஒருநாள் கண்டாள். அவளைத் தன்னுடைய தமையனுக்கு மனைவியாக்க வேண்டுமென்று எண்ணினான். இந்திராணியினுடைய கையைப் பற்றி இழுத்தாள். அவ்வளவில் வீரமாகாளர் அசமுகியினுடைய கைகளை வெட்டினார். அவள் புலம்பிக்கொண்டு போய்ச் சூரபதுமனிடம் முறையிட்டாள். அவன் முன்னரே ஒற்றர்களை ஏற்படுத்தி வைத்திருந்தும் பகைவனாகிய இந்திரன் இருக்குமிடத்தையும் அவன் செய்யும் காரியங்களையும் ஒற்றர்கள் உணர்ந்து சென்று சூரனிடம் உரைக்கவில்லை. அதனாலேயே இவ்வாறு ஏற்பட்டது என்று வருந்தி அவ் ஒற்றர்களைப் பலவாறு கடிந்துரைத்து இகழ்ந்தான். ஒற்றர்களால் நன்கு செய்தி உணர்ந்து கொள்ளாதபடியால் சூரபதுமனானவன் பல தொல்லைகளை அனுபவிக்க நேர்ந்தது.
பின்வரும் பாடல்கள் இத் திருக்குறளுக்கு ஒப்பாக அமைந்துள்ளதை அறியலாம்...
“ஒற்றினான் ஒற்றிப் பொருள்தெரிதல்முன்இனிதே;
முன்தான் தெரிந்து முறைசெய்தல் முன்இனிதே;
பற்றிலனாய்ப் பல்லுயிர்க்கும் பாத்துற்றுப்பாங்கறிதல்
வெற்றிவேல் வேந்தர்க்கு இனிது.”---இனியவை நாற்பது.
இதன் பொருள் ---
வெற்றி வேல் வேந்தற்கு ஒற்றினால் ஒற்றிப் பொருள் தெரிதல் முன் இனிதே - வெற்றியைத் தருகின்ற வேலையுடைய அரசனுக்கு ஒற்றராலே எல்லாரிடத்தும் நிகழ்வனவற்றை ஒற்றுவித்து, அவற்றின் பயனை ஆராய்தலின், பெருமை இனிது; முன் தான் தெரிந்து முறை செய்தல் முன் இனிதே - தான் குற்றத்தை முன்னர் ஆராய்ந்து தண்டம் செய்தல் மிக இனிது; பற்று இலனாய் பல் உயிர்க்கும் பூத்து உற்று பாங்கு அறிதல் இனிது - ஒருவர்க்கும் பற்றிலனாய், எல்லார்க்கும் அப் பற்றினைப் பகுத்து, எல்லாரிடத்தும் தானும் சென்று குற்றம் உளவாயின் அறிதல் இனிது.
“ஒற்றின் தெரியாச் சிறைப்புறத்து ஓர்தும்எனப்
பொன்தோள் துணையாத் தெரிதந்தும் - குற்றம்
அறிவுஅரிது என்று அஞ்சுவதே செங்கோன்மை, சென்று
முறையிடினும் கேளாமை அன்று.” --- நீதிநெறி விளக்கம்.
இதன் பொருள் ---
ஒன்றின் தெரியா - வேவுகாரரால் தெரியப்படாத உண்மைகளை, சிறைப்புறத்து ஒர்தும் என - ஒதுக்கிடங்களில் இருந்து தெரிந்து கொள்வோம் என்று, பொன் தோள் துணையா தெரிதந்தும் - பொன்னாலான வீரவளை அணிந்த தனது தோளே தனக்குத் துணையாக நினைத்துக் கொண்டு போய் அங்கிருந்து அவற்றைத் தெரிந்து கொண்டும், குற்றம் அறிவரிது என்று அஞ்சுவதே செங்கோன்மை - குடிமக்களின் செய்கைகளில் குற்றமாவன இவைதாம் என்று துணிதல் அருமையானதென்று நினைத்து அக்குற்றங் காண்டலுக்கு அஞ்சுவதே நல்ல அரசாட்சி முறையாகும். (அதுவே முறையாமன்றிச்) சென்று முறையிடினும் கேளாமையன்று - குடிமக்களே போய்த் தமது குறைகளைச் சொல்லிக் கொண்டாலும் அதனைக் கேளாமலிருப்பது முறைமையன்று.
அரசனாவான் குடிமக்களின் நலங்களை அவர்கள் இருக்குமிடத்தில் வேவுகாரர்களை அனுப்பி வரச்செய்து, அவர்கள் வாயிலாகத் தெரிந்து கொள்வதுமன்றி, அவர்களாலும் தெரிந்து கொள்ளப்படாத உண்மைகளைத் தன் தோளே துணையாகத் தானே நேரிற்சென்று அறிவதும், அங்ஙனம் அறிந்த இடத்தும் அவர்பாலுள்ள குற்றங்களை அறியாதொழிவதுமே நல்ல அரசாட்சி முறையாம். அன்றி, அவ்வாறு தன் ஒற்றர்கள் மூலமாகவாவது அல்லது தானாகவாவது போய் அவர் நலங்களை அறியாதொழிதலும், குடிமக்கள் தாமாகவாவது தன்னிடம் வந்து முறையிட்டுக் குறையிரக்கும் போதுகூட அதனைக் கேளாமலிருப்பதும் முறையல்ல.
“அருமறை காவாத நட்பும், பெருமையை
வேண்டாது விட்டொழிந்த பெண்பாலும், யாண்டானும்
செற்றங்கொண் டாடுஞ் சிறுதொழும்பும், இம்மூவர்
ஒற்றாள் எனப்படு வார்.” --- திரிகடுகம்.
இதன் பொருள் ---
அருமறை காவாத நட்பும் - பிறர்க்கு வெளிப்படுத்தக் கூடாத மறைமொழியைக் காப்பாற்றாத நட்பாளனும்; பெருமையை வேண்டாது விட்டு ஒழிந்து பெண்பாலும் - பெருமைக்குணத்தை விரும்பாமல் தலைவன் குறைகளை வெளிப்படுத்தி, தருமத்தினின்றும் நீங்கிய பெண்ணும்; யாண்டானும் - எங்காயினும், செற்றம் கொண்டு ஆடும் சிறு தொழும்பும் - கோபங்கொண்டு அவன்மேல் குற்றங் கூறுகின்ற குற்றலாளனும்; இ மூவர் - ஆகிய இம் மூவரும், ஒற்றாள் எனப்படுவார் - ஒற்றர்களை ஒப்பர் என்று சொல்லப்படுவார்.
ஒருவன் மறைமொழியை வெளிப்படுத்தும் நண்பனும், உள்ள பெருமையும் ஒழிக்கக் கருதும் பெண்ணும் தலைவரிடம் பகை பாராட்டும் வேலையாளனும் ஒற்றரை ஒத்தவர் என்பது கருத்து.
No comments:
Post a Comment