திருக்குறள்
பொருட்பால்
அ. அரசியல்
அதிகாரம் 59 -- ஒற்றாடல்
இந்த அதிகாரத்துள் வரும் ஐந்தாம் திருக்குறளில், "யாரும் ஐயுறக் கூடாத தோற்றத்தோடு, வெகுளும் கண்ணுக்கு அஞ்சாது, எந்நிலையிலும் கருத்தை வெளிப்படுத்தாமல் இருக்கவல்லவனே ஒற்றன் ஆவான்" என்கின்றார் நாயனார்.
ஒற்றன் எனப்படுபவன் தன்னை ஒருவர் கண்ட காலத்தில், அவர் ஐயப்படாதவாறு, பார்ப்பனர், வணிகர் முதலியோரது வடிவைப் போல மாறுவேடம் பூண்டு இருந்தும், ஒருக்கால் சந்தேகம் கொண்டு, இன்னான் என்று அறிய முற்பட்டு, உண்மை அறிந்து கொண்டு இவனைக் கோபித்துப் பார்க்க நேரும்போது, சிறிதும் அஞ்சாது இருப்பதும், உண்மையை அறியவேண்டி சாமம், தானம், பேதம், தண்டம் முதலிய உபாயங்களால் துன்புறுத்திய போதும், தன்னை அறிவிக்காமல், தான் வந்த காரியத்தையும் அறிவிக்காமல் இருக்கும் திறம் படைத்தவனே ஒற்றன் ஆகத் தகுதி உடையவன்.
இதற்குத் திருக்குறள்....
கடாஅ உருவொடு, கண் அஞ்சாது, யாண்டும்
உகாஅமை வல்லதே ஒற்று.
இதற்குப் பரிமேலழகர் உரை ---
கடாஅ உருவொடு --- ஒற்றப்பட்டார் கண்டால் ஐயுறாத வடிவோடு பொருந்தி;
கண் அஞ்சாது - அவர் ஐயுற்று அறியலுறின் செயிர்த்து நோக்கிய அவர் கண்ணிற்கு அஞ்சாது நின்று;
யாண்டும் உகாஅமை வல்லதே ஒற்று --- நான்கு உபாயமும் செய்தாலும் மனத்துக் கொண்டவற்றை உமிழாமை வல்லனே ஒற்றனாவான்.
('கடா' என்பது 'கடுக்கும்' என்னும் பெயரெச்சத்து எதிர்மறை. ஐயுறாத வடிவாவன பார்ப்பார், வணிகர் முதலாயினார் வடிவு.)
பின்வரும் பாடல்கள், இத் திருக்குறளுக்கு ஒப்பாக அமைந்துள்ளதை அறியலாம்...
“இற்றிது காலம் ஆக, இலங்கையர் வேந்தன் ஏவ,
ஒற்றர் வந்து அளவு நோக்கி, குரங்கு என உழல்கின்றாரைப்
பற்றினன் என்ப மன்னோ-பண்டு தான் பல நாள் செய்த
நல் தவப் பயன் தந்து உய்ப்ப, முந்துறப் போந்த நம்பி."--- கம்பராமாயணம், ஒற்றுக் கேள்விப் படலம்.
இதன் பொருள் ---
காலம் இற்று இது ஆக - காலம் இத்தன்மையது ஆக; இலங்கையர் வேந்தன் ஏவ - இலங்கை மக்களின் தலைவனான இராவணனது ஏவலினால்; ஒற்றர் வந்து - (வேவு பார்க்கும்) ஒற்றர்கள் (அங்கு) வந்து; அளவு நோக்கி - (வானரப் படையின் திறம், எண்ணிக்கை முதலிய) அளவுகளைப் பார்த்து; குரங்கு என உழல்கின்றாரை - குரங்குகள் போல வேடமிட்டுப் (பாடி வீடுகட்கிடையே) திரிகின்றவர்களை; தான் பண்டு பலநாள் செய்த - தான், முன்பு பன்னெடு நாட்கள் (பொறுமை பூண்டு) செய்த; நல்தவப் பயன்- நல்ல தவத்தின் பயன்; தந்து உய்ப்ப - விளைந்து (பின்னின்று) செலுத்த; முந்து உறப் போந்த நம்பி - முன்னதாக இராமன் திருவடிகளைப் பற்றி உய்ய வந்த புருடோத்தமனாகிய வீடணன்; பற்றினன் - (ஒற்றர் எனக் கண்டு) பற்றிக் கொண்டான்.
அரக்கர், விரும்பும் வடிவம் பெற்றுக் கொள்ளும் திறம் உடையவர். விரும்பும் வடிவம் எடுக்கும் திறத்தால் அரக்கர்க்குக் 'காமரூபர்' என்னும் பெயர் உண்டு.
“கூட்டிய விரல் திண்கையால்
குரங்குகள் இரங்கக் குத்தி,
மீட்டு ஒரு வினை செய்யாமல்,
மாணையின் கொடியால் வீக்கிப்
பூட்டிய கையர் வாயால்
குருதியே பொழிகின்றாரைக்
காட்டினன் கள்வர் என்னாக்
கருணையங் கடலும் கண்டான்.” --- கம்பராமாயணம், ஒற்றுக் கேள்விப் படலம்
இதன் பொருள் ---
கூட்டிய விரல் திண்கையால் - சேர்த்து மடக்கி (முட்டியாக்கிய) வலிய கைகளால்; இரங்கக் குரங்குகள் குத்தி - (காண்போர்) இரங்குமாறு குரங்குகளால் குத்தப் பெற்று; மீட்டு ஒருவினை செயாமல் - பின்பு, வேறு ஒரு செயல் செய்ய இயலாதவாறு; மாணையின் கொடியால் வீக்கி - மாணையின் கொடியினால் (இறுக்கி); பூட்டிய கையர் - சேர்த்துக் கட்டிய கைகளை உடையவராய்; வாயால் குருதியே பொழிகின்றாரை - வாயினால் இரத்தமே கக்குகின்றவர்களாகிய அந்த ஒற்றர்களை; 'கள்வர்' என்னாக் காட்டினன் - 'வஞ்சகர்' இவர் என்று (வீடணன்) காட்டினான்; அம் கருணைக் கடலும் கண்டான் – அதனை அழகிய கருணைக் கடலான இராமபிரானும் (திருவிழிகளால்) (அவர்களைப்) பார்த்தான்.
மாணை --- ஒரு வகைக் கொடி, ஓணான் கொடி என்பர்.
No comments:
Post a Comment