காப்புச் செய்யுள்

குமரேச சதகம்

மூலமும் உரையும்

     குமரேச சதகம் என்பது குமரனாகிய முருகப்பெருமான் மீது பாடப்பட்ட சதகம் ஆகும். சபகம் என்பது நூறு செய்யுள்களால் ஆனொரு பிரபந்த வகை.

    

     குமரேசன் என்னும் முருகப் பெருமானைத் தலைவனாக அமைத்து இந்நூலைச் செய்திருப்பதால் குமரேச சதகம் எனப்பட்டது.

     புதுக்கோட்டை மாவட்டத்திலே உள்ள திருப்புல்வயல் என்னும் தலத்தில், மலையின்மீது குமரக்கடவுள் திருக்கோயில் உள்ளது.

     இச் சதகத்தின் இறுதியிலே, ‘பன்னிய புல்வயலில் வால குமரேசர் மேற் பரிந்த குருபாத தாசன்' என வருவதால் இந் நூலாசிரியர் பெயர் குருபாததாசர் என அறியலாம். இவரது இயற் பெயர் முத்துமீனாட்சிக் கவிராயர் என்றும், இவர் வேளாளர் குலத்தவர் என்றும் கூறுகின்றார்கள்.

காப்புச் செய்யுள்

பூ மேவு புல்லைப் பொருந்து குமரேசர் மேல்,

தே மேவிய சதகம் செப்பவே, - கோ மேவிக்

காக்கும் சரணவத்தான், கம்ப கும்பத்து ஐந்துகரக்

கா குஞ்சர வணத்தான் காப்பு.

     இதன் பொருள் ---

     பூ மேவு புல்லைப் பொருந்து குமரேசர் மேல் --- இந்தப் பூமியிலே பொருந்தி உள்ள திருப்புல்வயல் என்னும் திருத்தலத்தில் எழுந்தருளிய குமரக்கடவுள் மீது,

     தே மேவிய சதகம் செப்ப ---- இனிமை பொருந்திய சதகம் என்னும் இந்தப் பிரபந்த்ததைப் பாட,

     கோ மேவிக் காக்கும் சரவணத்தான் --- தலைவனாக இருந்து காப்பாற்றும் சரவணத்திலே தோன்றிய முருகப் பெருமானும்,

     கம்பம் --- அடியவருடைய அன்பு என்னும் கட்டுத்தறியிலே கட்டுண்ட,

     கும்பத்து --- குடம் போன்ற மத்தகத்தினையும்

     ஐந்துகரம் --- ஐந்து திருக்கரங்களையும் உடைய

     கா குஞ்சர வணத்தான் ---  காட்டில் வாழும் யானையின் வடிவத்தை உடைய மூத்த பிள்ளையார் ஆகிய விநாகப் பெருமான்,

     காப்பு - காவலாக விளங்குவர்.

        

     விளக்கம் --- குமரேச சதகத்தினைப் பாடுதற்கு மூத்த பிள்ளையாரும் (விநாயகரும்) முருகனும் அருள் புரிவார்கள்.

          

      குமரன் - இளையோன். ஈசன் - கடவுள்.  குமர + ஈசன் = குமரேசன் = இளைய பிள்ளாயார் ஆகிய குமாரக் கடவுள். சரவணம் - நாணல். கரம்-கை. குஞ்சரம் - யானை. வணம் - வடிவு, அழகு. வண்ணம் என்னும் சொல் பாடலை நோக்கி, வணம் என்று வந்தது.