இடம், காலம், வலி அறிந்து செல்

யானையைச் சலந்தனில் இழுத்த அக்கரா

பூனையைக் கரைதனில் பிடிக்கப் போகுமோ?

தானையும் தலைவரும் தலம்விட்டு ஏகினால்

சேனையும் செல்வமும் தியங்கு வார்களே.

இதன் பொருள் ---

     யானையைச் சலந்தனில் இழுத்த அக்கரா --- யானை ஒன்றினை, தான் வலிமையோடு இருக்கும் நீர் நிலையில் பற்றி இழுத்த முதலையானது

     பூனையைக் கரைதனில் பிடிக்கப் போகுமோ --- தான் இருக்கும் இனத்தை விட்டுத் தரையில் வந்து ஒரு பூனையைப் பிடிக்க முடியுமோ?

(தனக்கு வலிமை பொருந்திய நீர் நிலையை விட்டு வெளியே வந்தால், சிறிய பூனையைக் கூட இழுக்க வலிமை இருக்காது.  அதுபோல)

     தானையும் தலைவரும் தலம்விட்டு ஏகினால் --- படைகளும் அவற்றின் தலைவராகிய படைக் கர்த்தர்களும் அவர் இருக்கும் இடத்தை விட்டு, தங்களுக்கு வலிமை குறையும் இடத்திற்குச் சென்றால்,

     சேனையும் செல்வமும் தியங்குவார்களே --- படைகளும் பொருளும் வலி குறைந்து பகைவரிடம் அகப்பட்டு (செய்வது அறியாது) மயங்குவார்கள்.

     கருத்து --- அவரவர் இருப்பிடத்தில் அவரவருக்குத் தக்க வலிமை இருக்கும். மாற்றார் மேல் செல்லும்போது காலம், வலி, இடம் ஆகியவற்றை ஆராய்ந்து அறிந்து செல்லுதல் வேண்டும்.

     இடன் அறிதல், காலம் அறிதல், வலி அறிதல் என்னும் அதிகாரங்களில் திருவள்ளுவ நாயனார் இவற்றை விரித்து உரைத்துள்ளார்.