ஆராய்ந்து பெண்டு கொள்

கொண்டநல் கலைகளோடு

     குணம்இலாக் கோதைமாரைக்

கண்டு விண்டு இருப்பது அல்லால்

     கலக்கல் ஆகாது, புல்லின்

உண்டு என மதுவை உண்ண

     ஒவியப் பூவில் வீழ்ந்த

வண்டு இனம் பட்டபாடு

     மனிதரும் படுவர் தாமே.

இதன் பொருள் ---

     கொண்ட நல் கலைகளோடு --- ஆராய்ந்து அறிந்து கொண்ட நல்ல சாத்திரப் பயிற்சியோடு,

     குணம் இலாக் கோதைமாரைக் கண்டு -- நல்ல குணங்கள் பொருந்தி இராத பெண்களைக் கண்டு,

     விண்டு இருப்பது அல்லால் --- அவரிடம் இருந்து விலகியே இருக்கவேண்டுமே அல்லாது,

     கலக்கல் ஆகாது --- (அவர்கள் அழகை விரும்பி மணம் புரிந்துகொண்டு) அவரோடு கூடுதல் தகாது,

     புல்லின் --- (அவ்வாறு இன்றி மணம் புரிந்து) கலந்தால்,

     ஓவியப் பூவில் --- ஓவியமாகத் தீட்டப்பட்ட மலரில்

     மதுவை உண்டு என --- தேன் உள்ளது என்று எண்ணி,

     உண்ண --- அதனை உண்ணும் பொருட்டு,

     வீழ்ந்த --- அதிலே விழுந்து அடிபட்டு வருந்திய

     வண்டு இனம் பட்டபாடு --- வண்டுக் கூட்டங்கள் பட்ட துன்பத்தினை

     மனிதரும் படுவர் தாமே --- (நல்லறிவும் நற்குணமும் இல்லாத பெண்ணை மணந்து கலந்த) மனிதரும் அடைந்து வருந்துவர்.

     கருத்து --- இதுவே பெண்களுக்கும் பொருந்தும்.  நல்லறிவும் நற்குணமும் இல்லாத ஆடவனை, அவனது அழகு மற்றும் செல்வம் கருதி மணத்தல் துன்பம் தரும் என்று கொள்ள வேண்டும்.