வள்ளிமலை - 0318. ஐயும் உறுநோயும்

அருணகிரிநாதர் அருளிய

திருப்புகழ்

ஐயுமுறு நோயும் (வள்ளிமலை)

வள்ளிமலை நாதா!

பிறவித் துன்பத்தில் உழலும் அடியேனை

உன் திருவடியில் சேர்த்து அருள்.

தய்யதன தான தய்யதன தான

     தய்யதன தானத் ...... தனதான

ஐயுமுறு நோயு மையலும வாவி

     னைவருமு பாயப் ...... பலநூலின்

அள்ளல்கட வாது துள்ளியதில் மாயு

     முள்ளமுமில் வாழ்வைக் ...... கருதாசைப்

பொய்யுமக லாத மெய்யைவள ராவி

     உய்யும்வகை யோகத் ...... தணுகாதே

புல்லறிவு பேசி யல்லல் படு வேனை

     நல்லஇரு தாளிற் ...... புணர்வாயே

மெய்யபொழில் நீடு தையலைமு நாலு

     செய்யபுய மீதுற் ...... றணைவோனே

வெள்ளையிப மேறு வள்ளல்கிளை வாழ

     வெள்ளமுது மாவைப் ...... பொருதோனே

வையமுழு தாளு மையமயில் வீர

     வல்லமுரு காமுத் ...... தமிழ்வேளே

வள்ளிபடர் சாரல் வள்ளிமலை மேவு

     வள்ளிமண வாளப் ...... பெருமாளே.

பதம் பிரித்தல்

ஐயும்உறு நோயும், மையலும், அவாவின்

     ஐவரும், உபாயப் ...... பலநூலின்

அள்ளல் கடவாது துள்ளி அதில் மாயும்

     உள்ளமும், இல் வாழ்வைக் ...... கருது ஆசைப்

பொய்யும் அகலாத, மெய்யை வளர் ஆவி

     உய்யும்வகை யோகத்து ...... அணுகாதே,

புல் அறிவு பேசி, அல்லல் படுவேனை

     நல்லஇரு தாளில் ...... புணர்வாயே.

மெய்ய பொழில் நீடு தையலை, முந் நாலு

     செய்ய புயம் மீது உற்று ...... அணைவோனே.

வெள்ளை இபம் ஏறு வள்ளல் கிளை வாழ

     வெள்ள முது மாவைப் ...... பொருதோனே!

வையம் முழுது ஆளும் ஐய! மயில் வீர!

     வல்ல முருகா! முத் ...... தமிழ்வேளே!

வள்ளிபடர் சாரல் வள்ளிமலை மேவு

     வள்ளி மணவாளப் ...... பெருமாளே.

பதவுரை

     மெய்ய --- மெய்ப்பொருளே!

     பொழில் நீடு, தையலை --- சோலையில் வாழ்ந்த வள்ளியம்மையை,

     மு நாலு செய்ய புயம் மீது உற்று அணைவோனே --- சிவந்த பன்னிரு புயங்களால் நெருங்கித் தழுவியவரே!

     வெள்ளை இபம் ஏறு --- வெள்ளை யானைமீது ஏறுகின்ற,

     வள்ளல் கிளை வாழ --- வள்ளலாகிய இந்திரனுடைய சுற்றத்தவராகிய தேவர்கள் வாழும் பொருட்டு,

     வெள்ளம் --- சமுத்திரத்தில்,

     முது மாவை பொருதோனே --- முதிய மாமரமாக நின்ற சூரபன்மனுடன் போர் புரிந்தவரே!

     வையம் முழுது ஆளும் ஐய --- உலக முழுவதும் ஆளுகின்ற தலைவரே!

     மயில் வீர --- மயில்மீது வருகின்ற வீரமூர்த்தியே!

     வல்ல முருகா --- திருவல்லம் என்ற தலத்தில் வாழும் முருகப் பெருமானே!

     முத்தமிழ் வேளே --- இயல் இசை நாடகம் என்ற முத்தமிழ்த் தெய்வமாக விளங்கும் செவ்வேட்பரமரே!

     வள்ளிபடர் சாரல் --- வள்ளிக் கொடி படர்கின்ற சாரலுடன் திகழும்,

     வள்ளி மலை மேவு --- வள்ளி மலையில் வீற்றிருக்கும்,

     வள்ளி மணவாள --- வள்ளி நாயகரே!

     பெருமாளே --- பெருமையின் மிகுந்தவரே!

     ஐயும் --- கோழையும்,

     உறுநோயும் --- சேரும் நோய்களும்,

     மையலும் --- மோக மயக்கமும்,

     அவாவின் ஐவரும் --- ஆசையைத் தூண்டுகின்ற மெய் வாய் கண் நாசி செவி என்ற ஐந்து பொறிகளும்,

      உபாயம் --- அவைகளின் சூழ்ச்சிகளும்,

     பல நூலின் --- பல கலைகளும் ஆகிய இந்த,

     அள்ளல் கடவாது --- சேற்றினைத் தாண்டாது,

     துள்ளி அதில் மாயும் --- குறித்து அவைகட்கு உட்பட்டு இறந்து போகின்ற,

     உள்ளமும் --- மனதும்,

     இல் வாழ்வை கருது ஆசை --- மனை வாழ்க்கையையே விரும்புகின்ற ஆசையும்,

     பொய்யும் --- பொய்யும்,

     அகலாத மெய்யை வளர் ஆவி உய்யும் வகை --- நீங்காத இந்த உடம்பை வளர்க்கின்ற உயிரானது உய்யும்படியான,

     யோகத்து அணுகாதே --- சிவயோகத்தை அடியேன் மேற் கொள்ளாமல்,

     புல் அறிவு பேசி --- இழிவான அறிவுப் பேச்சுக்களைப் பேசி,

     அல்லல் படுவேனை --- துன்பத்தை அடைகின்ற அடியேனை,

     நல்ல இரு தாளில் புணர்வாயே --- பிறவித்துயரைத் தீர்க்கும் உமது திருவடியிற் சேர்ந்தருளுவீராக.

பொழிப்புரை

     மெய்ப் பொருளே!

     நீண்ட சோலையில் வாழ்ந்த வள்ளி பிராட்டியாரைச் சிவந்த பன்னிரு புயங்களாலும் தழுவுபவரே!

     வெள்ளையானை மீது ஏறுகின்ற வள்ளலாகிய இந்திரனுடைய சுற்றத்தவராகிய அமரர்கள் வாழும்பொருட்டு, கடலில் மாமரமாக நின்ற சூரபன்மனுடன் போர் செய்தவரே!

     உலக முழுவதும் ஆள்கின்ற தலைவரே!

     மயில் வீரரே!

     திருவல்லத்தில் உறைகின்ற முருகக் கடவுளே!

     முத்தமிழ்த் தெய்வமாகிய செவ்வேட் பரமரே!

     வள்ளிக்கொடி படர்கின்ற வள்ளிமலையில் வாழ்கின்ற வள்ளி நாயகரே!

     பெருமிதம் உடையவரே!

     கோழையும், நோய்களும், மோக மயக்கமும், ஆசையைத் தூண்டுகின்ற ஐம்பொறிகளும், அவைகளின் சூழ்ச்சிகளும், பல கலைகளும் ஆகிய இந்தச் சேற்றினைக் கடக்க மாட்டாது, துள்ளி அதில் வீழ்ந்து மாய்ந்து போகின்ற உள்ளமும், மனை வாழ்க்கையையே விரும்புகின்ற ஆசையும் பொய்யும் நீங்காத இந்த உடலை வளர்க்கின்ற உயிர் உய்யும்படியான சிவ யோகத்தை மேற்கொள்ளாமல், புன்மைஆன அறிவினால் வீண் வார்த்தைகளைப் பேசித் துயரப்படுகின்ற அடியேனை பிறவித் துயரை யொழிக்கும் உமது பாதமலரிற் சேர்த்து ஆண்டருள்வீராக.

விரிவுரை

ஐயும் ---

ஐ-கோழை.

புலனைந்தும் பொறிகலங்கி நெறிமயங்கி அறிவு அழிந்திட்டு  ஐம்மேல்உந்தி

அலமந்த போதாக, அஞ்சேல்என்று அருள்செய்வான் அமருங்கோயில்

வலம்வந்த மடவார்கள் நடமாட முழவதிர மழை என்று அஞ்சிச்

சிலமந்தி அலமந்து மரம்ஏறி முகில்பார்க்குந் திருவையாறே.   --- திருஞானசம்பந்தர்.

மைஅரி மதர்த்த ஒண்கண் மாதரார் வலையில் பட்டு,

கைஎரி சூலம் ஏந்தும் கடவுளை நினைய மாட்டேன்,

ஐ நெரிந்து அகம் மிடற்றே அடைக்கும்போது ஆவியார்தாம்

செய்வதுஒன்று அறிய மாட்டேன் திருப்புக லூர னீரே.   --- அப்பர்.

ஐயினால் மிடறு அடைப்புண்டு, ஆக்கை விட்டு,

     ஆவியார் போவதுமே, அகத்தார் கூடி,

மையினால் கண் எழுதி, மாலை சூட்டி,

     மயானத்தில் இடுவதன் முன், மதியம் சூடும்

ஐயனார்க்கு ஆள்ஆகி, அன்பு மிக்கு,

     அகம் குழைந்து, மெய் அரும்பி, அடிகள் பாதம்

கையினால் தொழும் அடியார் நெஞ்சின் உள்ளே

     கன்றாப்பூர் நடுதறியைக் காணல் ஆமே!               --- அப்பர்.

ஐயும் தொடர்ந்து, விழியும் செருகி,அறிவு அழிந்து,

மெய்யும் பொய்யாகி விழுகின்ற போது,ஒன்று வேண்டுவல் யான்,

செய்யும் திருவொற்றியூர் உடையீர், திருநீறும் இட்டு,

கையும் தொழப்பண்ணி, ஐந்தெழுத்து ஓதவும் கற்பியுமே.       --- பட்டினத்தார்.

உறு நோயும்: ---

இந்த உடம்பு பல்வேறு நோய்கட்கு இடமாயது.

  “பல நோயும் நிலுவை கண்டது”       ---- (முனையழிந்தது) திருப்புகழ்.

மையலும் ---

ஆசையால் கோபமும், கோபத்தால் மயக்கமும் வரும். மயக்கத்தால் செய்வன தவிர்வன உணர முடியாத நிலைமையேற்படும்.

      காமம் வெகுளி மயக்கம் இவை மூன்றன்

      நாமம் கெட, கெடும் நோய்           --- திருக்குறள்.

அவாவின் ஐவரும் ---

ஐவர் - மெய் வாய் கண் நாசி செவி என்ற ஐம்பொறிகள். இந்த ஐம்பொறிகளும் அவாவை அதிகரிக்கச் செய்யும்.

கண் - கண்ட பொருள்களை விரும்பச் செய்யும்.

வாய் - சுவையான உணவை விரும்பச் செய்யும்.

நாசி - நறுமணத்தையும்,

செவி - இனிய மொழிகளையும் பாடல்களையும் விரும்பும்.

கைவாய் கதிர்வேல் முருகன் கழல்பெற்று

உய்வாய், மனனே, ஒழிவாய் ஒழிவாய்

மெய் வாய் விழி நாசியொடும் செவி ஆம்

ஐவாய் வழி செல்லும் அவாவினையே.            --- கந்தரநுபூதி.

உபாயம் ---

ஆசையினால் பல சூழ்ச்சிகள் செய்ய நேரும்.

பல நூலின் ---

கல்வியும் கவலை தருவதுதான். அதனால்தான் மாணிக்க வாசகர்,

       “கல்வி யென்னும் பல்கடல் பிழைத்தும்”

       “கற்பனவும் இனிமையும்”

என்று அருளிச் செய்தார்.

அள்ளல் கடவாது ---

அள்ளல்-சேறு. இந்தத் துன்பமாகிய சேற்றைக் கடவாது ஆன்மாக்கள் அதில் வீழ்ந்து மாய்கின்றன.

பேற்றைத் தவம் சற்றும் இல்லாத என்னைப் பிரபஞ்சம் என்னும்

சேற்றைக் கழிய வழிவிட்டவா! செம் சடா அடவிமேல்

ஆற்றைப் பணியை இதழியைத் தும்பையை அம்புலியின்

கீற்றைப் புனைந்த பெருமான் குமாரன் கிருபாகரனே.      --- கந்தரலங்காரம்.    

 

உள்ளமும் இல் வாழ்வைக் கருதாசைப் பொய்யும் அகலாத மெய் ---

மெய்-உடம்பு. இந்த உடம்பு மனம் ஆசை முதலியவற்றுக்கு இடமாய் நிற்பது.

உய்யும் வகை யோகத்து அணுகாதே ---

உயிர்க்கும் உய்யும் நெறி யோக நெறியாகும்.

அருணகிரியார் சிவராஜ யோகத்தைப் பற்றி திருப்புகழில் பலமுறை விளக்கஞ் செய்கின்றார்.

புல்லறிவு பேசி அல்லல் படுவேனை ---

புல்லறிவினால் வீண் வார்த்தைகளைச் சதா பேசிப் பலர் அல்லல் படுகின்றார்கள்.

      பயன்இல் சொல் பாராட்டுவானை மகன்எனல்,

      மக்கட் பதடி எனல்.                   --- திருக்குறள்.

        

வெள்ள முது மாவை ---

உறுதி இழந்த சூரபன்மன் இறுதியில் கடலில் ஒளிந்து எஃகு மாமரமாய் நின்றான். முருகவேள் வேலினால் அம் மாமரத்தைப் பிளந்து அழித்தருளினார்.

 “கடல் சலம் தனிலே ஒளி சூரனை

    உடல் பகுந்து, இரு கூறு எனவே, அது

    கதித்து, எழுந்து ஒரு சேவலும் மாமயில் விடும்வேலா” --- (மனத்திரைந்) திருப்புகழ்.

வல்ல முருகா ---

வல்லம் - திருவல்லம் என்ற திருத்தலம். இது நீவா நதிக் கரையில் இருக்கின்றது. சென்னையிலிருந்து காட்பாடிக்கு போகும் இருப்புப் பாதையில் காட்பாடிக்கு 12 மைலுக்குக் கிழக்கில் உள்ளது. இத்தலம் திருஞானசம்பந்தராலும், அருணகிரி நாதராலும், சேக்கிழாராலும் பாடப்பெற்றது. வில்வ வனம் என்றும் பெயர் பெற்றது. அருமையான திருத்தலம்.

     சிவானந்த மவுன சுவாமிகள் என்னும் மகான், இறைத் தொண்டோடு, மக்கள் தொண்டையும் புரிந்து, எண்ணற்ற அற்புதங்களை இயற்றிய திருத்தலம்.

   

கருத்துரை

வள்ளி மலை முருகா! உயிர் பிரியும் போது உன் திருவடி தந்து ஆட்கொள்வீர்.