திரு ஆவடுதுறை - 2



சுந்தரர் திருப்பதிக வரலாறு:
            சுந்தரர், திருஅரிசிற்கரைப்புத்தூர் தொழுது பல பதிகளையும் வணங்கிக்கொண்டு திருவாவடுதுறை யடைந்து வலங்கொண்டு இறைஞ்சி, கோச்செங்கட் சோழரையும் சிறப்பித்துப் பாடியருளியது இத் திருப்பதிகம். (தி. 12 பெரிய. புரா. ஏயர்கோன். புரா. 63)

பெரிய புராணப் பாடல் எண் : 63
விளங்கும் திருஆ வடுதுறையில்
            மேயார் கோயில் புடைவலங்கொண்டு,
உளங்கொண்டு உருகும் அன்பினுடன்
            உள்புக்கு, இறைஞ்சி ஏத்துவார்,
வளங்கொள் பதிகம் "மறையவன்" என்று
            எடுத்து வளவன் செங்கணான்
தளங்கொள் பிறப்பும் சிறப்பித்துத்
            தமிழ்ச்சொல் மாலை சாத்தினார்.

            பொழிப்புரை : அருள்விளங்கும் திருவாவடுதுறையில் வீற்றிருந்தருளும் பெருமானின் திருக்கோயிலினை வலங்கொண்டு, இறைவனை உளங்கொண்டு, உருகும் அன்பினுடன் திருக்கோயில் உள்ளே சென்று வணங்கும் சுந்தரர், `மறையவன்\' எனத் தொடங்கும் வளங்கொண்ட திருப்பதிகத்தைப் பாடி, அதன்கண் கோச்செங்கட்சோழ அரசரின் பிறப்பையும் சிறப்பித்து அத்தமிழ்ச்சொல் மாலையைச் சாத்தினார்.

            இத்திருப்பதிகம் தக்கேசிப் பண்ணில் அமைந்ததாகும். இப்பதிகத்து வரும் இரண்டாவது பாடலில் (தி.7 ப.66 பா.2), `தெருண்ட வாயிடை நூல்கொண்டு சிலந்தி சித்திரப் பந்தர் சிக்கென இயற்றச் சுருண்ட செஞ்சடையாய், அது தன்னைச் சோழனாக்கிய தொடர்ச்சி கண்டு' எனக் கோச்செங்கட்சோழப் பெருமானாரின் பிறப்பின் சிறப்பினை எடுத்து மொழிகின்றார் ஆரூரர். இதனை உளங்கொண்டே சேக்கிழார் இவ்வாறு அருளுவாராயினர். இப்பதிகத்தில் ஐந்து திருப்பாடல்களே கிடைத்துள்ளன. ஒவ்வொன்றிலும் ஒருவரலாற்றுச் செய்தி காணக் கிடக்கின்றது.


சுந்தரர் திருப்பதிகம்

7. 028    திருவாவடுதுறை                     பண் - தக்கேசி
                                                திருச்சிற்றம்பலம்

பாடல் எண் : 1
மறைய வன்ஒரு மாணிவந்து அடைய
            வார மாய்அவன் ஆருயிர் நிறுத்தக்
கறைகொள் வேல்உடைக் காலனைக் காலால்
            கடந்த காரணம் கண்டுகண்டு, அடியேன்
இறைவன் எம்பெரு மான்என்று எப்போதும்
            ஏத்தி ஏத்திநின்று அஞ்சலி செய்து,உன்
அறைகொள் சேவடிக்கு அன்பொடும் அடைந்தேன்
            ஆவ டுதுறை ஆதிஎம் மானே

            பொழிப்புரை : திருவாவடுதுறையில் எழுந்தருளியுள்ள , எங்கள் முதற்கடவுளே , உன்னை , அந்தணனாகிய பிரமசாரி ஒருவன் அன்புடன் வந்து அடைய , அவனது அரிய உயிரைப் போகாது நிறுத்த வேண்டி , உதிரத்தைக்கொண்ட சூலத்தையுடைய இயமனைக் காலால் உதைத்துக்கொன்ற காரணத்தை உணர்ந்து உணர்ந்து , அடியேன் , ` யாவர்க்கும் முதல்வன் ; எமக்குப் பெருமான் ` என்று எப்பொழுதும் துதித்துத் துதித்து , அஞ்சலி கூப்பிநின்று, கழலும் சிலம்பும் ஒலித்தலைக் கொண்ட உனது செவ்விய திருவடியிடத்துக் கொண்ட அன்போடும் வந்து அடைந்தேன் ; என்னை ஏற்றுக் கொண்டருள் .

பாடல் எண் : 2
தெருண்ட வாய்இடை நூல்கொண்டு சிலந்தி
            சித்திரப் பந்தர் சிக்கென இயற்ற,
சுருண்ட செஞ்சடை யாய்,அது தன்னைச்
            சோழன் ஆக்கிய தொடர்ச்சிகண்டு, அடியேன்
புரண்டு வீழ்ந்து, நின் பொன்மலர்ப் பாதம்
            போற்றி போற்றிஎன்று அன்பொடு புலம்பி,
அரண்டு என் மேல்வினைக்கு அஞ்சிவந்து அடைந்தேன்,
            ஆவ டுதுறை ஆதிஎம் மானே

            பொழிப்புரை : திருவாவடுதுறையில் எழுந்தருளியுள்ள , எங்கள் முதற்கடவுளே, தெளிவுபெற்ற சிலந்தி ஒன்று, தனது வாயினின்றும் உண்டாகும் நூலால் அழகிய பந்தரை உறுதிப்பட ஆக்க, அச் சிலந்தியை, சுருண்ட, சிவந்த சடையை உடையையாகிய நீ சோழனாய்ப் பிறக்கச்செய்த திருவருளை அறிந்து, அடியேன், எனது எதிர் வினைக்கு அஞ்சித் துணுக்குற்று, உனது அழகிய மலர்போலும் திருவடியில் விழுந்து புரண்டு, ` போற்றி ! போற்றி !` என்று துதித்து, அன்பினால் அழுது, உன்னை வந்து அடைந்தேன்; என்னை ஏன்று கொண்டருள்.
  
பாடல் எண் : 3
திகழும் மால்அவன் ஆயிரம் மலரால்
            ஏத்து வான்,ஒரு நீள்மலர் குறைய,
புகழி னால்,அவன் கண்இடந்து இடலும்,
            புரிந்து சக்கரம்  கொடுத்தல்கண்டு, அடியேன்
திகழும் நின்திருப் பாதங்கள் பரவி,
            தேவ தேவ,நின் திறம்பல பிதற்றி,
அகழும் வல்வினைக்கு அஞ்சிவந்து அடைந்தேன்,
            ஆவ டுதுறை ஆதிஎம் மானே

            பொழிப்புரை : தேவர்கட்குத் தேவனே , திருவாவடுதுறையில் எழுந்தருளியுள்ள , எங்கள் முதற்கடவுளே , மிக்க புகழுடையவனாகிய திருமால் நாள்தோறும் ஆயிரந் தாமரைப் பூக்களால் உன்னை அருச்சிக் கின்றவன் , ஒருநாள் ஒரு சிறந்தபூக்குறைய , அவன் அதற்கு மெலி யாது , புகழத்தக்க உறுதிப் பாட்டுடன் , தனது கண்களில் ஒன்றைப் பெயர்த்து உனக்குச் சாத்த , அதனைக்கண்டு மகிழ்ந்து அவனுக்கு நீ சிறந்த சக்கரப்படையை அளித்தமையை உணர்ந்து , அடியேன் , என் நிலைமையைப் பெயர்த்து , நிலையில்லாது உழலச் செய்கின்ற வலிய வினைக்கு அஞ்சி , ஒளிவீசுகின்ற உனது திருவடிகளைத் துதித்து , உனது பெருமைகள் பலவற்றையும் பலகாற் பேசி , உன்னை வந்து அடைந்தேன் ; என்னை ஏன்றுகொண்டருள் .

பாடல் எண் : 4
வீரத் தால்ஒரு வேடுவன் ஆகி,
            விசைத்தொர் கேழலைத் துரந்துசென்று அணைந்து,
போரைத் தான்விச யன்தனக்கு அன்பாய்ப்
            புரிந்து, வான்படை கொடுத்தல்கண்டு, அடியேன்
வாரத் தால்உன நாமங்கள் பரவி,
            வழிபட்டு, உன்திற மேநினைந்து, உருகி,
ஆர்வத் தோடும்வந்து அடியிணை அடைந்தேன்,
            ஆவ டுதுறை ஆதிஎம் மானே

            பொழிப்புரை : திருவாவடுதுறையில் எழுந்தருளியுள்ள , எங்கள் முதற்கடவுளே , நீ , ஒரு வேடுவனாய் உருக்கொண்டு , ஒரு பன்றியை , வீரத்துடன் விரைந்து துரத்திச் சென்று , உன்னை நோக்கித் தவம் செய்துகொண்டிருந்த அருச்சுனனை அடைந்து , அவன்மேல் வைத்த விருப்பத்தால் அவனோடு போர் புரிந்து , பின்பு அவனுக்கு , சிறந்த படையாகிய பாசுபதக் கணையை அளித்தமையை அறிந்து , அடியேன் உனது தன்மைகளை நினைந்து உருகி , உனது திருப்பெயர்களை அன் போடு சொல்லி உன்னை வழிபட்டு , ஆர்வத்தோடு வந்து உன் திருவடி யிணையை அடைந்தேன் ; என்னை ஏன்று கொண்டருள் .
  
பாடல் எண் : 5
ஒக்க முப்புரம் ஓங்குஎரி தூவ,
            உன்னை உன்னிய மூவர்நின் சரணம்
புக்கு, மற்றுஅவர் பொன்னுல காளப்
            புகழி னால்அருள் ஈந்தமை அறிந்து,
மிக்க நின்கழ லேதொழுது, அரற்றி,
            வேதி யா,ஆதி மூர்த்தி,நின் அரையில்
அக்கு அணிந்த எம்மான், உனை அடைந்தேன்,
            ஆவ டுதுறை ஆதிஎம் மானே.

            பொழிப்புரை : வேதம் ஓதுபவனே . உலகிற்கு முதலாய மூர்த்தியே, உன் அரையில் எலும்பை அணிந்த பெருமானே, திருவாவடுதுறையில் எழுந்தருளியுள்ள, எங்கள் முதற்கடவுளே, நீ, மூன்று ஊர்களில் ஓங்கி எரிகின்ற நெருப்பை ஒருசேர எழுப்பிய பொழுது, அங்கு உன்னையே நினைத்திருந்த மூவராகிய அவர் மட்டில் உய்ந்து, உன் திருவடியை அடைந்து, மேல்உலகத்தை ஆளும் வண்ணம், அவர்கட்கு, புகழத்தக்க வகையில் திருவருள் ஈந்தமையை அறிந்து, அடியேன், மேலான உனது திருவடியையே தொழுது முறையிட்டு, உன்னை அடைந்தேன்; என்னை ஏன்றுகொண்டருள்.
                                                * * * * * * 6, 7, 8, 9, 10. * * * * *
                                                            திருச்சிற்றம்பலம்

--------------------------------------------------------------------------------------------------------

சுந்தரர் திருப்பதிக வரலாறு:

            சுவாமிகள், திருவொற்றியூரில் இரந்து நீங்கி, திருக்கச்சி ஏகம்பம் பணிந்து இடது கண்ணைப் பெற்று, வருகின்ற வழியில் திருவரத்துறை பணிந்து பல பதிகளையும் வணங்கிக் கொண்டு அன்பருடன் பொன்னியாற்றில் நீராடி திருவாவடுதுறை அணைந்து பாடியருளியது இத்திருப்பதிகம். (தி. 12 பெரிய. புரா. ஏயர்கோன். புரா. 296) இத் திருப்பதிகப் பாடல் முழுவதும், 'இங்கெனக்கு ஆர் உறவு' என்று பாடியிருத்தல் கருதத்தக்கது.
 
பெரிய புராணப் பாடல் எண் : 295
பரமர்திரு அரத்துறையைப் பணிந்துபோய், பலபதிகள்
விரவிமழ விடைஉயர்த்தார் விரைமலர்த்தாள் தொழுதுஏத்தி,
உரவுநீர்த் தடம்பொன்னி அடைந்து, அன்பருடன்ஆடி,
அரவுஅணிந்தார் அமர்ந்ததிரு ஆவடுதண் துறைஅணைந்தார்.

            பொழிப்புரை : சிவபெருமானுடைய திருவரத்துறை என்னும் திருப்பதியைப் பணிந்து, அப்பால் சென்று, அவ்வவ் விடங்களிலுமுள்ள பல திருப்பதிகளையடைந்து விடைக் கொடியையுடைய சிவபெருமானது மணமிக்க மலரனைய திருவடிகளைத் தொழுது போற்றி, பெருகிய நீருடைய குளிர்ந்த காவிரியாற்றைச் சேர்ந்து, அன்பருடன் நீராடி எழுந்து, அப்பால் சென்று, பாம்பணிந்த பெருமானின் திருஆவடுதண்டுறையை அணைந்தார்.

பெ. பு. பாடல் எண் : 296
அங்குஅணைவார் தமை, அடியார் எதிர்கொள்ளப் புக்குஅருளி,
பொங்குதிருக் கோயிலினைப் புடைவலங்கொண்டு, உள்அணைந்து,
"கங்கைவாழ் சடையாய்ஓர் கண்ணிலேன்" எனக் கவல்வார்
"இங்குஎனக்கு ஆர்உறவு" என்னும் திருப்பதிகம் எடுத்துஇசைத்தார்.

            பொழிப்புரை : அத்திருப்பதியை அணைய வரும் நம்பிகளை, அடியவர்கள் வந்து எதிர்கொண்டிட, அவர்களுடன் புகுந்தருளி, பெருகிநிற்கும் அருளின் சிறப்புடைய திருக்கோயிலினை வலம் வந்து, உள்ளே சென்று, எம்பிரானை நினைந்து, `கங்கை வார் சடையாய் ஓர் கண்ணிலேன்' எனக் கவல்பவர், `இங்கு எனக்கு ஆர் உறவு\' என்று சிறந்ததொரு திருப்பதிகத்தை எடுத்துப் பாடி அருளினார்.

            `கங்கைவார் சடையாய்' (தி.7 ப. 70) எனும் முதற்குறிப்புடைய பதிகம் தக்கேசிப் பண்ணில் அமைந்ததாகும். பதிகப் பாடல் தொறும் `யார் எனக்கு உறவு அமரர்கள் ஏறே' எனவரும் நிறைவுத் தொடரை ஆசிரியர் முகந்தெடுத்து மொழிந்துள்ளார். திருக்கடைக் காப்பில் `சிங்கடியப்பன்' எனத் தம்மைக் குறித்திருப்பது, வரலாற் றிற்கு அரணாயுள்ளது. இப்பதிகத்து வரும் இரண்டாவது பாடலில், `கண்ணிலேன் உடம்பில் அடுநோயால் கருத்தழிந்து உனக்கே பொறையானேன்' எனவரும் முறைப்பாட்டால், கண்ணிழந்ததோடு உடம்பை வருத்தும் மேகநோயும் நம்பிகளுக்கு இருந்தமை விளங்குகின்றது.

சுந்தரர் திருப்பதிகம்

7. 070    திருவாவடுதுறை                    பண் - தக்கேசி
                                                            திருச்சிற்றம்பலம்
பாடல் எண் : 1
கங்கை வார்சடை யாய்,கண நாதா,
            கால காலனே, காமனுக்கு அனலே,
பொங்கு மாகடல் விடமிடற் றானே,
            பூத நாதனே, புண்ணியா, புனிதா,
செங்கண் மால்விடை யாய்,தெளி தேனே,
            தீர்த்த னே,திரு வாவடு துறையுள்
அங்க ணா,எனை அஞ்சல்என் றருளாய்,
            ஆர்எ னக்குஉறவு, அமரர்கள் ஏறே

            பொழிப்புரை : கங்கையைத் தாங்கிய நீண்ட சடையை உடையவனே , பூத கணங்கட்குத் தலைவனே , காலனுக்குக் காலனே, காமன் உடலுக்கு நெருப்பாகியவனே, அலை மிகுகின்ற பெரிய கடலில் தோன்றிய நஞ்சினை உடைய கண்டத்தை உடையவனே, உயிர்கட்கு முதல்வனே, அறவடிவினனே, தூயோனே , சிவந்த கண்களை யுடைய திருமாலாகிய இடபத்தை யுடையவனே , தெளிந்த தேன் போல்பவனே , கடவுளே , தேவர்களாகிய விலங்குகட்கு ஆண் சிங்கமாய் உள்ளவனே, திருவாவடுதுறையில் எழுந்தருளியிருக்கின்ற கருணையாளனே , அடியேனுக்கு உறவாவார் , உன்னையன்றி வேறு யாவர் உளர் ! என்னை , ` அஞ்சேல் ` என்று சொல்லித் தேற்றி எனக்கு அருள் செய்யாய் .
  
பாடல் எண் : 2
மண்ணின் மேல்மயங் கிக்கிடப் பேனை,
            வலிய வந்துஎனை ஆண்டுகொண் டானே,
கண்ணி லேன்உடம் பில்அடு நோயால்
            கருத்து அழிந்து,உனக்கே பொறை ஆனேன்,
தெள்நி லாஎறிக் கும்சடை யானே,
            தேவ னே,திரு வாவடு துறையுள்
அண்ண லே,எனை அஞ்சல்என்று அருளாய்,
            ஆர்எ னக்குஉறவு, அமரர்கள் ஏறே

            பொழிப்புரை : நிலவுலகின்கண் மானுட வாழ்க்கையில் மயங்கிக் கிடக்கக் கடவேனாகிய என்முன் நீயே வலிய வந்து என்னை ஆண்டு கொண்டவனே , தெளிவாகிய நிலவொளியை வீசுகின்ற சடையை உடையவனே , இறைவனே , திருவாவடுதுறையில் எழுந்தருளியிருக் கின்ற அண்ணலே , தேவர்களாகிய , விலங்குகட்கு ஆண் சிங்கமாய் உள்ளவனே , யான் கண் இல்லேனாயினேன் ; அதன்மேலும் , உடம்பில் வந்து பற்றி வருத்துகின்ற நோயினால் மனம் வருந்தினமையால் , உனக்குத்தான் சுமையாய் விட்டேன் ; எனக்கு உறவாவார் உன்னை யன்றி வேறு யாவர் உளர் ! ஆதலின் , என்னை ` அஞ்சேல் ` என்று சொல்லித் தேற்றி , எனக்கு அருள்செய்யாய் .

பாடல் எண் : 3
ஒப்பு இலாமுலை யாள்ஒரு பாகா,
            உத்தமா, மத்தம் ஆர்தரு சடையாய்,
முப்பு ரங்களைத் தீவளைத்து அங்கே
            மூவ ருக்குஅருள் செய்ய வல்லானே,
செப்ப ஆல்நிழற் கீழ்இருந்து அருளும்
            செல்வ னே,திரு வாவடு துறையுள்
அப்ப னே,எனை அஞ்சல்என்று அருளாய்,
            ஆர்எ னக்குஉறவு, அமரர்கள் ஏறே

            பொழிப்புரை : நிகரற்ற தனங்களையுடைய உமையவளை ஒரு பாகத்தில் உடையவனே , மேலானவனே , ஊமத்தம் பூப் பொருந்திய சடையை உடையவனே , முப்புரங்களைத் தீவளையச் செய்து , அப்பொழுதே அவற்றில் இருந்தவர்களுள் மூவருக்கு மட்டில் அருள் செய்ய வல்லவனே , அறத்தைச் சொல்லுதற்கு ஆல் நிழலில் அமர்ந் தருளிய செல்வனே , திருவாவடுதுறையில் எழுந்தருளியிருக்கின்ற என் அப்பனே ! தேவர்களாகிய விலங்குகளுக்கு ஆண் சிங்கமாய் உள்ளவனே , எனக்கு உறவாவார் உன்னையன்றி வேறு யாருளர் ! என்னை ` அஞ்சேல் ` என்று சொல்லித் தேற்றி , எனக்கு அருள் செய்யாய் .
  
பாடல் எண் : 4
கொதியி னால்வரு காளிதன் கோபம்
            குறைய ஆடிய கூத்துஉடை யானே,
மதியி லேன்உடம் பில்அடு நோயால்
            மயங்கி னேன், மணியே, மண வாளா
விதியி னால்இமை யோர்தொழு தேத்தும்
            விகிர்த னே,திரு வாவடு துறையுள்
அதிப னே,எனை அஞ்சல்என்று அருளாய்,
            ஆர்எ னக்குஉறவு, அமரர்கள் ஏறே

            பொழிப்புரை : சீற்றத்தொடு வந்த காளியினது கோபம் தணியும்படி அவளோடு எதிர்நின்று ஆடிய நடனத்தை யுடையவனே , மாணிக்கம் போல்பவனே , மணவாளக் கோலத்தினனே , தேவர்கள் , முறைப்படி வணங்கித் துதிக்கின்ற இறைவனே , திருவாவடுதுறையில் எழுந்தருளி யிருக்கின்ற தலைவனே , தேவர்களாய விலங்குகட்கு ஆண் சிங்கமாய் உள்ளவனே , அறிவில்லேனாகிய யான் உடம்பில் வந்து வருத்துகின்ற பிணியினால் , செய்வது அறியாது மனம் கலங்குகின்றேன் ! எனக்கு உறவாவார் , உன்னையன்றி வேறு யாவர் உளர் ! என்னை , ` அஞ்சேல் ` என்று சொல்லித் தேற்றி , எனக்கு அருள் செய்யாய் .
  
பாடல் எண் : 5
வந்த வாள்அரக் கன்வலி தொலைத்து,
            வாழும் நாள்கொடுத் தாய், வழி முதலே,
வெந்த வெண்பொடிப் பூசவல் லானே,
            வேட னாய்விச யற்குஅருள் புரிந்த
இந்து சேகர னே,இமை யோர்சீர்
            ஈச னே, திரு வாவடு துறையுள்
அந்த ணா, எனை அஞ்சல்என்று அருளாய்,
            ஆர்எ னக்குஉறவு, அமரர்கள் ஏறே

            பொழிப்புரை : உலகமாகிய வழிக்கு முதலானவனே , வெந்த தனால் ஆகிய வெள்ளிய திருநீற்றைப் பூச வல்லவனே , அருச்சுன னுக்கு வேட உருவத்தில் சென்று அருள்செய்த சந்திர சேகரனே , தேவர் களுக்குப் புகழுடைய தலைவனே , திருவாவடுதுறையில் எழுந்தருளி யிருக்கின்ற அந்தணனே , தேவர்களாகிய விலங்குகட்கு ஆண் சிங்கமாய் உள்ளவனே , எனக்கு உறவாவார் , உன்னையன்றி வேறு யாவர் உளர் ! அன்று நீ இருக்கும் இடத்தில் செருக்குக் கொண்டு வந்த கொடிய அரக்கனாகிய இராவணனது வலிமையை அழித்து , பின்பு அவனுக்கு வாழ்நாள் கொடுத்து விடுத்தாய் ; இன்று , என்னை , ` அஞ்சேல் ` என்று சொல்லித் தேற்றி , எனக்கு அருள் செய்யாய் .
  
பாடல் எண் : 6
குறைவு இலாநிறைவே, குணக் குன்றே,
            கூத்த னே,குழைக் காதுஉடை யானே,
உறவு இலேன்உனை அன்றிமற்று அடியேன்,
            ஒருபி ழைபொறுத் தால்இழிவு உண்டே,
சிறைவண்டு ஆர்பொழில் சூழ்திரு வாரூர்ச்
            செம்பொ னே, திரு வாவடு துறையுள்
அறவ னே, எனை அஞ்சல்என்று அருளாய்,
            ஆர்எ னக்குஉறவு, அமரர்கள் ஏறே

            பொழிப்புரை : ` குறை ` எனப்படுவது ஒன்றேனும் இல்லாத நிறைவுடையவனே , இறைமைக் குணங்கள் எல்லாவற்றானும் இயன்ற தொரு மலை எனத் தக்கவனே , கூத்துடையவனே , குழையணிந்த காதினை யுடையவனே , சிறையை யுடைய வண்டுகள் ஒலிக்கின்ற சோலை சூழ்ந்த திருவாரூரில் உள்ள , செம்பொன் போல்பவனே , திருவாவடுதுறையில் எழுந்தருளியிருக்கின்ற அறவடிவினனே , தேவர்களாகிய விலங்குகட்கு ஆண் சிங்கமாய் உள்ளவனே , அடியேனும் உன்னையன்றி உறவினர் ஒருவரையும் உடையேன் அல்லேன் ; எனக்கு உறவாரும் உன்னையன்றி வேறு யாவர் உளர்! ஆதலின், யான் செய்த ஒரு குற்றத்தை நீ பொறுத்துக்கொண்டால், உனக்கு வருவதொரு தாழ்வுண்டோ! என்னை, `அஞ்சேல்` என்று சொல்லித் தேற்றி , எனக்கு அருள்செய்யாய் .
  
பாடல் எண் : 7
வெய்ய மாகரி ஈர்உரி யானே,
            வேங்கை ஆடையி னாய்,விதி முதலே,
மெய்ய னே,அடல் ஆழிஅன்று அரிதான்
            வேண்ட நீகொடுத்து அருள்புரி விகிர்தா,
செய்ய மேனிய னே, திகழ் ஒளியே,
            செங்க ணா, திரு வாவடு துறையுள்
ஐய னே, எனை அஞ்சல்என்று அருளாய்,
            ஆர்எ னக்குஉறவு, அமரர்கள் ஏறே

            பொழிப்புரை : கொடிய , பெரிய யானையினது உரித்த தோலை யுடையவனே , புலித்தோல் ஆடையை உடுத்தவனே , விதிவிலக்குக் களுக்குத் தலைவனே , மெய்ப்பொருளானவனே , அன்று திருமால் வேண்டிக்கொள்ள , வலிமையையுடைய சக்கரத்தை அவனுக்கு அளித்தருளிய இறைவனே , சிவந்த திருமேனியையுடையவனே , ஒளிகள் எல்லாவற்றினும் மேம்பட்டு விளங்குகின்ற ஒளியாய் உள்ளவனே , நெருப்புக்கண்ணை உடையவனே , திருவாவடுதுறை யில் எழுந்தருளியிருக்கின்ற தலைவனே , தேவர்களாகிய விலங்கு கட்கு ஆண் சிங்கமாய் உள்ளவனே , எனக்கு உறவாவர் உன்னை யன்றி வேறுயாவர் உளர் ! என்னை , ` அஞ்சேல் ` என்று சொல்லித் தேற்றி , எனக்கு அருள் செய்யாய் .
  
பாடல் எண் : 8
கோதி லாஅமு தே, அருள் பெருகு
            கோல மே, இமை யோர்தொழு கோவே,
பாதி மாதுஒரு கூறுஉடை யானே,
            பசுப தீ, பர மா,பர மேட்டி,
தீது இலாமலை யே, திரு வருள்சேர்
            சேவ கா,திரு வாவடு துறையுள்
ஆதி யே, எனை அஞ்சல்என்று அருளாய்,
            ஆர்எ னக்குஉறவு, அமரர்கள் ஏறே

            பொழிப்புரை : கோதில்லாத அமுதம் போல்பவனே , அருள் வெள்ளம் பெருகுகின்ற தோற்றத்தை உடையவனே , தேவர்கள் வணங்குகின்ற தலைவனே , உடம்பின் ஒருபாதியில் மங்கை ஒருத்தியது ஒருபங்கினை உடையவனே , உயிர்கட்குத் தலைவனே , மேலானவனே , மேலிடத்தில் இருப்பவனே , நன்மையால் இயன்ற மலைபோல்பவனே , சிறப்புடைய அருள் பொருந்திய வீரனே, திருவாவடுதுறையில் எழுந்தருளியிருக்கின்ற முதற்பொருளான வனே , தேவர்களாகிய விலங்குகட்கு ஆண் சிங்கமாய் உள்ளவனே , எனக்கு உறவாவார், உன்னையன்றி வேறு யாவர் உளர் ! என்னை , ` அஞ்சேல் ` என்று சொல்லித் தேற்றி , எனக்கு அருள்செய்யாய் .

பாடல் எண் : 9
வான நாடனே, வழித்துணை மருந்தே,
            மாசி லாமணி யே,மறைப் பொருளே,
ஏன மாஎயிறு ஆமையும் எலும்பும்
            ஈடு தாங்கிய மார்புஉடை யானே,
தேன்நெய் பால்தயிர் ஆட்டுஉகந் தானே,
            தேவ னே,திரு வாவடு துறையுள்
ஆனை யே, எனை அஞ்சல்என்று அருளாய்
            ஆர்எ னக்குஉறவு, அமரர்கள் ஏறே

            பொழிப்புரை : ஆகாயமாகிய நாட்டை உடையவனே , செல்லும் வழிக்குத் துணையாகிய அமுதம்போல்பவனே , குற்றமில்லாத மாணிக்கம் போல்பவனே , வேதத்தின் பொருளாய் உள்ளவனே , பன்றியின் பெரிய கொம்பினையும் , ஆமை ஓட்டையும் , எலும்பையும் , இடப்பட்ட அணிகளாகத் தாங்கிய மார்பையுடையவனே , ` தேன் , நெய் , பால் , தயிர் ` இவைகளால் மூழ்குவித்தலை விரும்புகின்றவனே , இறைவனே , திருவாவடுதுறையில் எழுந்தருளியிருக்கின்ற என் யானை போல்பவனே , தேவர்களாகிய விலங்குகட்கு ஆண் சிங்கமாய் உள்ளவனே , எனக்கு உறவாவார் உன்னையன்றி வேறு யாவர் உளர் ! என்னை , ` அஞ்சேல் ` என்று சொல்லித் தேற்றி எனக்கு அருள் செய்யாய் .

பாடல் எண் : 10
வெண்த லைப்பிறை கொன்றையும் அரவும்
            வேரி மத்தமும் விரவிமுன் முடித்த
இண்டை மாமலர்ச் செஞ்சடை யானை,
            ஈச னை, திரு ஆவடு துறையுள்
அண்ட வாணனை, சிங்கடி அப்பன்
            அணுக்க வன்தொண்டன், ஆர்வத்தால் உரைத்த
தண்த மிழ்மலர் பத்தும்வல் லார்கள்,
            சாதலும் பிறப்பும் அறுப் பாரே

            பொழிப்புரை : வெண்டலையோடு பொருந்தும் பிறையையும், கொன்றைமலர் மாலையையும் , பாம்பினையும் , தேனையுடைய ஊமத்த மலரையும் ஒருங்கு விரவிச் சூடிக்கொண்ட சிறந்த இண்டை மாலையையுடைய , சிவந்த சடைமுடியையுடையவனும் , முதற் கடவுளும் , திருவாவடுதுறையில் எழுந்தருளியிருக்கின்ற சிவலோக வாணனும் ஆகிய இறைவனை , அவனுக்கு அணுக்கனாய் நிற்கின்ற வன்றொண்டனாகிய , சிங்கடிக்குத் தந்தை , மிக்க அன்போடும் பாடிய இத்தண்ணிய தமிழ்மாலைகளாகிய பாடல்கள் பத்தினையும் பாட வல்லவர்கள் , இறத்தலையும் பிறத்தலையும் ஒழித்து , எஞ்ஞான்றும் ஒரு தன்மையராய் வாழ்வார்கள் .
                                                            திருச்சிற்றம்பலம்


சேந்தனார் அருளிச் செய்தது
திருவிசைப்பா

9. 06   திருவாவடுதுறை                   பண் - பஞ்சமம்
                                                            திருச்சிற்றம்பலம்
பாடல் எண் : 1
பொய்யாத வேதியர், சாந்தைமெய்ப்
            புகழாளர் ஆயிரம் பூசுரர்
மெய்யே திருப்பணி செய்,சீர்
            மிகுகா விரிக்கரை மேய
ஐயா, திருஆ வடுதுறை
            அமுதே, என்று உன்னை அழைத்தக்கால்,
மைஆர் தடங்கண் மடந்தைக்கு,ஒன்று
            அருளாது ஒழிவது மாதிமையே.

            பொழிப்புரை : என்றும் தான் கூறுவது பொய்த்தல் இல்லாத வேதத்தை ஒதுபவராய்ச் சாத்தனூரில் வாழும் உண்மையான புகழாளராய், எண்ணிக்கையில் ஆயிரவராய் உள்ள நிலத்தேவராம் அந்தணர்கள் உள்ளம் ஒன்றித் திருத்தொண்டு செய்கின்ற, சிறப்பு மிகுகின்ற காவிரிக் கரையில் விரும்பி வீற்றிருக்கும் தலைவனே! திருவாவடுதுறையில் உகந்தருளியிருக்கும் அமுதமே! என்று என் மகள் உன்னை அழைத் தால் மைதீட்டிய பெரிய கண்களைஉடைய என்மகளுக்கு நீ ஒரு வார்த்தையும் மறுமாற்றமாகக் கூறாமல் இருப்பது உனக்குத் தகுதியோ? பெருமையோ? - என்று தாய் பெருமானிடம் முறையிட்டவாறு.

பாடல் எண் : 2
மாதி மணங்கம ழும்பொழில்
            மணிமாட மாளிகை வீதிசூழ்
சோதி மதில்அணி சாந்தைமெய்ச்
            சுருதி விதிவழி யோர்தொழும்
ஆதி, அமரர் புராணனாம்
            அணிஆ வடுதுறை நம்பி, நின்ற
நீதி அறிகிலள், பொன்நெடும்
            திண்டோள் புணர நினைக்குமே.

            பொழிப்புரை : என் மகள் நறுமணம் கமழும் சோலைகளும், அழகிய மேல்மாடிகளை உடைய மாளிகைகளை உடைய வீதிகளும் சூழ்ந்துள்ள, ஒளிவீசும் மதில்களால் அழகு செய்யப்பட்டுள்ள சாத்தனூரில் உள்ள உண்மையான வேதநெறியில் வாழும் சான்றோர் கள் வணங்குகின்ற, ஏனைய தேவர்களுக்கு முற்பட்ட பழைமை யனாகிய, அழகிய ஆவடுதுறை என்ற கோயிலில் உகந்தருளி யிருக்கும் குணபூரணனாகிய எம்பெருமான் பெருமையை உள்ளவாறு அறியும் ஆற்றல் இலளாய் அவனுடைய பொன்நிறமுடைய நீண்ட வலிய தோள்களைத் தழுவநினைக்கின்றாள் - என்று தன்மகள் நலம் வினவிய அயலக மகளிருக்குத் தாய் கூறியவாறு.

பாடல் எண் : 3
நினைக்கும், நிரந்தர னே என்னும்,
            நிலாக்கோலச் செஞ்சடைக் கங்கைநீர்
நனைக்கும் நலங்கிளர் கொன்றைமேல்
            நயம்பேசும், நன்னுதல், நங்கைமீர்,
மனக்குஇன்ப வெள்ள மலைமகள்
            மணவாள நம்பி,வண் சாந்தையூர்
தனக்குஇன்பன், ஆவடு தண்துறைத்
            தருணேந்து சேகரன் என்னுமே.

            பொழிப்புரை : நல்லநெற்றியை உடைய பெண்களே! என்மகள் எம்பெருமானை விருப்புற்று நினைப்பவளாய் `எக்காலத்தும் நிலை பெற்றிருப்பவனே` என்று அவனைப்பற்றிப் பேசுவாள். பிறைச் சந்திரனுடைய அழகினைக் கொண்ட சிவந்த சடையில் மறைந் திருக்கும் கங்கைநீர் ஈரமாக்குகின்ற பெருமானுடைய கொன்றைப்பூங் கண்ணியின்மீது விருப்பம் கொண்டு பேசுவாள். மனத்திற்கு இன்ப வெள்ளத்தை அருளுபவனாய், பார்வதியை மணந்த குணபூரணனாய், வளமான சாத்தனூரில் விருப்புடையவனாய் அவ்வூரிலுள்ள ஆவடு துறை என்ற கோயிலில் உகந்தருளியிருக்கும் பிறைசூடி என்று எம் பெருமானைப் பற்றிப் பேசுவாள் - என்று செவிலி தன் மகள் நிலையை வினவிய அயலக மகளிருக்கு உரைத்தவாறு.
  
பாடல் எண் : 4
தருணேந்து சேகர னே எனும்,
            தடம்பொன்னித் தென்கரைச் சாந்தையூர்ப்
பொருள்நேர்ந்த சிந்தை யவர்தொழப்
            புகழ்செல்வ மல்குபொன் கோயிலுள்
அருள்நேர்ந்து அமர்திரு ஆவடு
            துறை ஆண்ட ஆண்தகை அம்மானே,
தெருள்நேர்ந்த சித்தம் வலியவா
            திலக நுதலி திறத்திலே.

            பொழிப்புரை : பெரும்பரப்புடைய காவிரியின் தென்கரையில் அமைந்த சாத்தனூரில் மெய்ப்பொருளிலேயே ஈடுபட்டமனத்தை யுடைய அடியவர்கள் வழிபட, புகழும் செல்வமும் நிறைந்த ஆவடு துறைக் கோயிலுள் அருளை வழங்கிக் கொண்டு வீற்றிருக்கும், ஆளும் தகுதியைஉடைய தலைவனே! என்மகள் `பிறையைத் தலையில் சூடியவனே` என்று உன்னைப் பலகாலும் அழைக்கிறாள். திலகம் அணிந்த நெற்றியைஉடைய என்மகள் திறத்தில் மாத்திரம் தெளிந்த அறிவினைஉடைய உன்மனம் இரக்கம் கொள்ளாமல் கல்போல இருப் பதன் காரணம்யாது? - என்று தாய் பெருமானிடம் முறையிட்டவாறு.
  
பாடல் எண் : 5
திலக நுதல்உமை நங்கைக்கும்
            திருஆ வடுதுறை நம்பிக்கும்
குலக அடியவர்க்கு என்னை ஆள்
            கொடுத்து,ஆண்டு கொண்ட குணக்கடல்
அலது, ஒன்று அறிகின்றி லேமெனும்,
            அணியும்வெண் ணீறு, அஞ் செழுத்துஅலால்
வலதுஒன்று இலள், இதற்கு என்செய்கேன்,
            வயல்அந்தண் சாந்தையர் வேந்தனே.

            பொழிப்புரை : வயல்வளம் பொருந்திய அழகிய குளிர்ந்த சாத்தனூர்க்கு அரசே! என்மகள் `நெற்றியில் திலகம் அணிந்த உமா தேவிக்கும் திருவாவடுதுறைக் கோயிலில் உகந்தருளியிருக்கும் குண பூரணனான எம்பெருமானுக்கும் அடிமைசெய்யும் கூட்டமான அடியவர்களுக்கு அடியேனை ஆட்படுத்து. என்னைத்தனக்கு அடிமையாகக் கொண்ட குணக்கடலாகிய எம்பெருமானை அல்லது யான்வேறு ஒருதெய்வத்தை அறியேன் என்று பலகாலும் கூறுகிறாள். வெண்ணீறு அணிதலும் திரு ஐந்தெழுத்தை ஓதுதலும் அல்லாமல் அவள் வேற்றுச் செயல் எதனையும் செய்கின்றாள் அல்லள். அவளுடைய இந்தநிலைமாறி அவள் பழைய நிலைக்கு வருதலுக்கு யான் செயற்பாலது யாது? - என்று செவிலி இறைவனிடம் முறையிட்டவாறு.
  
பாடல் எண் : 6
வேந்தன் வளைத்தது மேருவில்,
            அரவுநாண், வெங்கணை செங்கண்மால்,
போந்த மதில்அணி முப்புரம்
            பொடிஆட, வேதப்புர வித்தேர்ச்
சாந்தை முதல்அயன் சாரதி,
            கதிஅருள், என்னும்இத் தையலை
ஆந்தண் திரு ஆவடுதுறை
            யான்செய்கை, யார்அறி கிற்பரே.

            பொழிப்புரை : `சிவபெருமானே! வானத்தில் உலாவிக்` கொண் டிருந்த மதில்களால் சூழப்பட்ட மூன்று கோட்டைகளும் சாம்பலாகு மாறு மேருமலையை வில்லாக வளைத்து, வாசுகியை வில் நாணாகக் கொண்டு, சிவந்தகண்களை உடைய திருமாலை அம்பாகக் கொண்டு, வேதங்களாகிய குதிரைகள் பூட்டப்பட்ட, பிரமனைத் தேர்ப்பாகனாக உடைய தேரினைச் செலுத்திய சாத்தனூர்த் தலைவனே! உன் அருளே அடியேனுக்குக்கதி` என்று என் மகள் பலகாலும் கூறுகிறாள். அவள் திறத்துத் தண்ணீரினால் குளிர்ந்த திருவாவடுதுறை என்னும் கோயிலில் உகந்தருளியிருக்கும் சிவபெருமான் செய்யநினைத்திருக் கின்ற செயலை யாவர் அறியவல்லார்? - என்று மகள் நலம் வினவிய அயலக மங்கையருக்குத் தாய் கூறியவாறு.

பாடல் எண் : 7
கிற்போம் எனத்தக்கன் வேள்விபுக்கு
            எடுத்துஓடிக் கெட்டஅத் தேவர்கள்
சொற்போலும் மெய்ப்பயன், பாவிகாள்,
            என்சொல்லிச் சொல்லும்இத் தூமொழி,
கல்போல் மனம்கனி வித்தஎம்
            கருணால யா, வந்தி டாய், என்றால்
பெற்போ, பெருந்திரு ஆவடு
            துறையாளி, பேசாது ஒழிவதே.

            பொழிப்புரை : `பாவிகளே` நாங்கள் வேள்வியை முழுமையாக நிறைவேற்றி வைப்போம் என்று சொல்லி வேள்வியை நடத்தப்புகுந்து வீரபத்திரர் வந்த அளவில் வேள்விச்சாலையிலிருந்து எழுந்து ஓடி அழிந்த அந்தத் தேவர்களின் சொற்கள் பயன்படாமல் போனதுபோல, நீங்கள் இந்த உடலால் எம்பெருமான் திருத்தொண்டினைவிடுத்து வேற்று உலகியல் செயல்களில் ஈடுபடும் செய்தி பயன்தாராது வீணாகும்` என்று இந்தத் தூய்மையான சொற்களைஉடைய என்மகள் பலகாலும் கூறுகிறாள். `எங்கள் கல் போன்றமனத்தைப் பழம்போல மென்மையுடையதாக்கிய கருணைக்கு இருப்பிடமான எம் பெருமானே! அடியேனுக்கு அருளவருவாயாக` என்று என் மகள் அழைத்தால், `மேம்பட்ட திருவாவடுதுறையை ஆள்பவனே! அவள் அழைத்தலுக்கு நீ ஒன்றும் பேசாமல் இருப்பது உனக்கு ஏற்ற தன்மையோ?` - என்று தாய் இறைவனிடம் வேண்டியவாறு.

பாடல் எண் : 8
ஒழிவுஒன்று இலாஉண்மை வண்ணமும்,
            உலப்புஇலள் ஊறுஇன்ப வெள்ளமும்,
மொழிவுஒன்றுஇ லாப்பொன்னித் தீர்த்தமும்,
            முனிகோடி கோடியா மூர்த்தியும்,
அழிவுஒன்று இலாச்செல்வச் சாந்தையூர்
            அணிஆ வடுதுறை ஆடினாள்,
இழிவுஒன்று இலாவகை எய்திநின்று
            இறுமாக்கும் என்இள மானளே.

            பொழிப்புரை : அழிதல் சிறிதும் இல்லாத செல்வன் கழல்ஏத்தும் செல்வத்தை உடைய சாத்தனூரில் உள்ள அழகிய ஆவடுதுறைக் கோயிலில் இன்பவெள்ளத்தில் மூழ்கிய, எனக்கு அன்னைபோன்று இனிய என் இளமான் போன்ற மகள் நீங்குதல் சிறிதும் இல்லாது ஆவடு துறைப் பெருமானுடைய உண்மை இயல்புகளைவிடாது சொல்லிக் கொண்டிருப்பாளாய், ஊறிக்கொண்டிருக்கும் பேரின்ப வெள்ளத்தை யும், வற்றுதல் சிறிதும் இல்லாத காவிரித் தீர்த்தத்தையும் கோடிக்கணக் கான முனிவர்களையும், கணக்கற்ற இறைவனுடைய திருவுரு வங்களையும் குறைபாடு இல்லாத வகையில் அடைந்துநின்று அன் பால் எங்கள் சொற்களுக்குச் சிறிதும் செவிசாய்க்காத வகையில் பெரு மிதம் கொண்டுள்ளாள் - என்று தாய் தன்மகள் நிலைபற்றி அயலக மகளிரிடம் கூறியவாறு.

பாடல் எண் : 9
மான்நேர் கலை, வளை யும்கவர்ந்து,
            உளம்கொள்ளை கொள்ள வழக்குஉண்டே,
தேனே, அமுதே, என் சித்தமே,
            சிவலோக நாயகச் செல்வமே,
ஆனேஅ லம்பு புனல்பொன்னி
            அணிஆ வடுதுறை அன்பர்தம்
கோனே,நின் மெய்யடி யார்மனக்
            கருத்தை முடித்திடும் குன்றமே.

            பொழிப்புரை : தேன்போன்ற இனியவனே! அமுதம்போலப் புத்துயிர் அளிப்பவனே! என் உள்ளமே உறையுளாகக் கொண்டவனே! சிவலோகத் தலைவனாகிய என் செல்வமே! பசுக்கள் ஒலித்துக் கொண்டு மூழ்கும் நீரை உடைய காவிரியாற்றங் கரையிலமைந்த அழகிய ஆவடுதுறையில் உகந்து குடியிருக்கும் அடியார் தலைவனே! உன்னுடைய உண்மை அடியவர்களுடைய உள்ளங்களின் விருப் பங்களை நிறைவேற்றிவைக்கும் அருட்குன்றே! இத்தகைய இனிய பண்புகளையும் செயல்களையும் உடைய நீ மான்போன்ற என்மகளுடைய அழகிய உடையையும் கவர்ந்து அவள் உள்ளத்தையும் உன்வசப் படுத்துவதற்கு என்னநீதி உள்ளது? - என்று செவிலி இறைவனிடம் முறையிட்டவாறு.

பாடல் எண் : 10
குன்றுஏந்தி, கோகன கத்துஅயன்
            அறியா நெறிஎன்னைக் கூட்டினாய்,
என்று ஏங்கி ஏங்கிஅ ழைக்கின்றாள்,
            இளவல்லி எல்லைக டந்தனள்,
அன்றேஅ லம்பு புனல்பொன்னி
            அணிஆ வடுதுறை ஆடினாள்,
நன்றே இவள்நம் பரம்அல்லள்
            நவலோக நாயகன் பாலளே.

            பொழிப்புரை : கோவர்த்தன மலையைக் குடையாகப்பிடித்த திருமாலும், தாமரையில் தங்கும்பிரமனும் உணர முடியாத உன் திருவருள் நெறியிலே என்னையும் சேர்த்து விட்டாயே என்று மனம் பலவாறு வருந்திப் பெருமானை அழைக்கிறாள். இளங்கொடி போல்வாளாகிய என் மகள் என் கட்டுப்பாட்டைக் கடந்துவிட்டாள். ஒலிக்கும் நீரை உடைய காவிரிக்கரையில் அமைந்த அழகிய ஆவடு துறையை அடைந்து விட்டாள். இவள் நம் கட்டுப்பாட்டுக்கு அடங்கிய வள் அல்லள். புதிய உலகங்களுக்கும் தலைவனாகிய எம் பெரு மானைச் சார்ந்தவள் ஆயினாள். இவள் செயல் நமக்கு நன்றாக இருக் கிறதா? - என்று தாய் தன்னைச் சேர்ந்தவரிடம் கூறியவாறு.
  
பாடல் எண் : 11
பாலும் அமுதமும் தேனுமாய்
            ஆனந்தம் தந்து, உள்ளே பாலிப்பான்
போலும், என் ஆர்உயிர்ப் போகமாம்
            புரகால, காம புராந்தகன்,
சேலும் கயலும் திளைக்கும்நீர்த்
            திரு ஆவடுதுறை வேந்தனோடு
ஆலும் அதற்கே முதலும்ஆம்,
            அறிந்தோம் அரிவைபொய் யாததே.

            பொழிப்புரை : `பாலும் அமுதும் தேனுமாக எனக்கு ஆனந்தம் தந்து என் மனத்தினுள்ளே நின்று இன்பம் கொடுத்தருளி என் அருமையான உயிரிடத்து இன்பத்தை விளைவிப்பவனாய்த் திரிபுரம், இயமனுடைய உடல், மன்மதனுடைய உடல் இவற்றை அழித்த வனாய், சேல்மீனும் கயல்மீனும் விளையாடும் காவிரிநீரை உடைய திருவாவடுதுறை மன்னனாகிய எம் பெருமானோடு விளையாடு வதற்கே என் மகள் முற்படுகிறாள். இதுவே உண்மையான செய்தி. இந்தப்பெண் தான் வகுத்துக்கொண்ட இந்த வழியிலிருந்து விலக மாட்டாள் என்பதனை அறிந்தோம்` என்று தாய் தமரிடம் கூறியவாறு.
திருச்சிற்றம்பலம்

பொது --- 1114. கரவுசேர் மகளிர்

அருணகிரிநாதர் அருளிய திருப்புகழ் கரவுசேர் மகளிர் (பொது) முருகா!  மௌனம் ஆகிய கூட்டில் அடியேன் இருந்து,  பேரானந்தத்தை அனுபவிக்க அருள் புரிவாய...