திருத்தணிகை - 0307. முத்துத் தெறிக்க

அருணகிரிநாதர் அருளிய

திருப்புகழ்

முத்துத் தெறிக்க (திருத்தணிகை)

திருத்தணிகை வேலா!

உன்னை நினைந்து வருந்தும் இந்தத் தலைவி முன்

இன்றே திருத்தணிகையில் வந்து அருள்.

தத்தத் தனத்ததன தத்தத் தனத்ததன

     தத்தத் தனத்ததன ...... தனதான

முத்துத்தெ றிக்கவள ரிக்குச்சி லைக்கைமதன்

     முட்டத்தொ டுத்த ...... மலராலே

முத்தத்தி ருச்சலதி முற்றத்து தித்தியென

     முற்பட்டெ றிக்கு ......நிலவாலே

எத்தத்தை யர்க்குமித மிக்குப்பெ ருக்கமணி

     இப்பொற்கொ டிச்சி ...... தளராதே

எத்திக்கு முற்றபுகழ் வெற்றித்தி ருத்தணியில்

     இற்றைத்தி னத்தில் ...... வரவேணும்

மெத்தச்சி னத்துவட திக்குக்கு லச்சிகர

     வெற்பைத்தொ ளைத்த ...... கதிர்வேலா

மெச்சிக்கு றத்திதன மிச்சித் தணைத்துருகி

     மிக்குப்ப ணைத்த ...... மணிமார்பா

மத்தப்ர மத்தரணி மத்தச்ச டைப்பரமர்

     சித்தத்தில் வைத்த ...... கழலோனே

வட்டத்தி ரைக்கடலில் மட்டித்தெ திர்த்தவரை

     வெட்டித்து ணித்த ...... பெருமாளே.

பதம் பிரித்தல்

முத்துத் தெறிக்க வளர் இக்குச் சிலைக்கை மதன்

     முட்டத் தொடுத்த ...... மலராலே,

முத்தத் திருச்சலதி முற்றத்து உதித் தி என

     முற்பட்டு எறிக்கும் ......நிலவாலே,

எத் தத்தையர்க்கும் இதமிக்குப் பெருக்கம் அணி

     இப்பொன் கொடிச்சி ...... தளராதே,

எத்திக்கும் உற்ற புகழ் வெற்றித் திருத்தணியில்

     இற்றைத் தினத்தில் ...... வரவேணும்,

மெத்தச் சினத்து வட திக்குக் குலச் சிகர

     வெற்பைத் தொளைத்த ...... கதிர்வேலா!

மெச்சிக் குறத்தி தனம் இச்சித்து, அணைத்து, உருகி

     மிக்குப் பணைத்த ...... மணிமார்பா!

மத்த ப்ரமத்தர் அணி மத்தச் சடைப் பரமர்

     சித்தத்தில் வைத்த ...... கழலோனே!

வட்டத் திரைக் கடலில் மட்டித்து எதிர்த்தவரை

     வெட்டித் துணித்த ...... பெருமாளே.

பதவுரை

      மெத்த சினத்து --- மிகுதியாகக் கோபித்து,

     வட திக்கு --- வடதிசையில் இருந்த,

     குல சிகர வெற்பை --- சிறந்த சிகரங்களையுடைய கிரவுஞ்ச மலையை,

     தொளைத்த கதிர்வேலா --- தொளைத்துப் பொடியாக்கிய ஒளியுடைய வேலாயுதரே!

      மெச்சி குறத்தி தனம் இச்சித்து --- புகழ்ந்து கூறி, வள்ளி நாயகியின் தனங்களை விரும்பி,

     அணைத்து உருகி --- அவரைத் தழுவி உள்ளம் உருகி,

     மிக்கு பணைத்த மணி மார்பா --- மிகவும் வளர்ந்துள்ள அழகிய திருமார்பினரே!

      மத்த ப்ரமத்தர் --- மிகுந்த பித்தரான,

     அணி மத்தச் சடை --- அழகிய ஊமத்தம் பூவைச் சூடிய,

     பரமர் --- பெரியவராகிய சிவபெருமான்,

     சித்தத்தில் வைத்த கழலோனே --- தமது திருவுள்ளத்தில் வைத்துப் போற்றிய திருவடிகளை உடையவரே!

       வட்ட திரைக் கடலில் --- வட்டமாகிய அலைகளை வீசும் சமுத்திரத்தில்,

     எதிர்த்தவரை --- எதிர்த்து வந்த அசுரர்களை,

     மட்டித்து --- முறித்து அழித்து,

     வெட்டித் துணித்த பெருமாளே --- வெட்டித் துண்டாக்கிய பெருமையிற் சிறந்தவரே!

      முத்து தெறிக்க வளர் --- தனக்குள்ளே யிருந்த முத்து வெளியே வெளியே தெரித்து விடுமாறு வளர்ந்த,

     இக்கு சிலை கை மதன் --- கரும்பை வில்லாகக் கொண்ட கையையுடைய மன்மதன்,

     முட்ட தொடுத்த மலராலே --- நன்றாகத் தொடுத்துவிட்ட மலர்க்கணையாலும்,

     முத்த திரு சலதி --- முத்துக்களையுடைய அழகிய கடலின்,

     முற்றத்து உதித் தி என --- மருங்கிலே, உதித்த தீயைப் போன்ற,

     முற்பட்டு எறிக்கு நிலவாலே --- எதிர்ப்பட்டு வீசும் நிலவாலும்,

     எ தத்தையர்க்கும் இத மிக்கு பெருக்கம் அணி --- கிளி போல் பேசும் எந்தப் பெண்களும் அவர் (வசை) கூறுவதால் துன்பம் பெருகி அத்துன்பத்தை அணிகின்ற,

     இ பொன் கொடிச்சி தளராதே --- இந்தப் பொன் கொடிபோன்ற நாயகி தளர்ச்சியுறாத வண்ணம்,

     எ திக்கும் உற்ற புகழ் --- எல்லாத் திசைகளிலும் புகழ் பரந்துள்ள,

     வெற்றி திருத்தணியில் --- வெற்றி விளங்குந் திருத்தணிகையம் பதியில்,

     இற்றை தினத்தில் வரவேணும் --- இன்றைய நாளில் தேவரீர் வந்தருளவேண்டும்.

பொழிப்புரை

         வடதிசையில் சிறந்த சிகரங்களுடன் இருந்த கிரவுஞ்ச மலையை மிகவும் கோபித்துத் தொளைத்துப் பொடி செய்த ஒளிமிக்க வேலாயுதரே!

வள்ளி நாயகியின் ஞானமாகிய தனத்தை மெச்சி விரும்பித் தழுவி உள்ளம் உருகி மிகவும் பருத்து ஓங்கிய அழகிய திருமார்பினரே!

மிகவும் பித்தராகிய வரும் அழகிய ஊமத்த மலரைச் சூடியவருமாகிய பரமசிவத்தின் திருவுள்ளத்தில் வைத்த திருவடிவினரே!

அலைகள் வீசுகின்ற வட்டமான கடலில் எதிர்த்த சூராதியவுணர்களை வெட்டித் துண்டாக்கிய பெருமிதம் உடையவரே!

         முத்து வெளிப்பட வளர்ந்த கரும்பை வில்லாகக் கரத்தில் ஏந்திய மன்மதன் நன்றாக விடுத்த மலர்க்கணையாலும், முத்துக்களையுடைய அழகிய கடலின் கண் உதித்து தீப்போல் எதிர்ப்பட்ட சந்திர ஒளியாலும், கிளிபோன்ற பெண்கள் பேசும் வசைமொழியாலும், இந்தப் பொற்கொடியாகிய தலைவி தளராத வண்ணம், எல்லாத் திசைகளிலும் புகழ்பெற்ற வெற்றியுடன் கூடிய திருத்தணிகையம்பதியில் இன்று தேவரீர் வந்து அருள்செய்வீராக.

விரிவுரை

  

முத்துத் தெறிக்க வளர் இக்கு ---

இக்கு - கரும்பு; முத்து கரும்பில் பிறக்கும்; முத்துக்கள் இருபது இடங்களில் பிறக்கும்.

யானையின் தந்தம், பன்றியின் கொம்பு, இப்பி, பாக்கு, வாழை, சங்கு, சலஞ்சலம், மீன், கொக்கு, தாமரை, பெண்களின் கழுத்து, நெல், கரும்பு, மூங்கில், பசுவின்பால், பாம்பு, மேகம், சந்திரன், உடும்பு, முதலை என்ற இவைகள் என உணர்க.

தந்தி வராகம் மருப்பு இப்பி பூகம் தழை கதலி

நந்து சலஞ்சலம் மீன்தலை கொக்கு நளின மின்னார்

கந்தரம் சாலி கழைக்கன்னல் ஆவின்பல் கட்செவி கார்

இந்து உடும்பு கராமுத்தம் ஈனும் இருபதுமே.

இத்திருப்புகழ் நாயகீ நாயக பாவத்தில் பாடியது. தலைவி தலைவனை விரும்பி வாடுகின்ற தன்மையில் அமைந்தது.

தலைவி மன்மதனுடைய மலர்க்கணையால் வருந்துகின்றாள்.

முற்றத் துதித்தி யென ---

முற்றத்து உதி தி எனப் பிரிக்க. கடலின் முற்றத்தில் உதிக்கின்ற தீயைப் போல் சந்திர வொளி வெதுப்புகின்றது.

எத்தத்தையர்க்கும் இதம் மிக்குப் பெருக்கம் அணி ---

தத்தை-கிளி; கிளிபோன்ற பெண்கள் வசை கூறுவர்; அதனால் தலைவி துன்பத்தை யடைகின்றாள்.

இப்பொற் கொடிச்சி தளராதே ---

இந்தப் பொன் கொடிபோன்ற தலைவி தளராதபடி நீர் வந்து அருள்புரிவீராக.

எத்திக்கும் உற்றபுகழ் வெற்றித் திருத்தணி ---

திருத்தணி மிகச் சிறந்த திருத்தலம். எல்லாத் திசைகளிலும் இத்தலத்தைப் புகழ்கின்றார்கள்.

இற்றைத் தினத்தில் வரவேணும் ---

இளம்பூரணரே! இத்தலைவியின் துயர் தீர இன்றே வந்து ஆட்கொண்டருள்வீர்.

குறத்திதனம் இச்சித்து ---

வள்ளி நாயகி-தவமான். தவஞ்செய்வோர்க்கு உண்டாவது ஞானம். அந்த ஞானத்தை ஞானபண்டிதன் விரும்புகின்றார்.

மத்த ப்ரமத்தர் ---

மத்த ப்ரமத்தர்-மிகுந்த பித்து உடையவர்.

ஆன்மாக்கள் செய்கின்ற குற்றங்கள் அனைத்தும் பொறுத்து அருள்பாலிக்கின்ற கருணை பித்து எனப்படும்.

“பெற்றமனம் பித்து பிள்ளை மனம் கல்லு” என்பது பழமொழி. மகன் செய்கின்ற குற்றங்களைப் பொறுத்து அவன் வாழ்க என்று வாழ்த்துகின்ற அன்னை மனம் பித்து எனப்படும்.

       “பித்தாபிறை சூடீ பெருமானே யருளாளா”    --- சுந்தரர் தேவாரம்.

மத்தச்சடையர் ---

மத்தம்-ஊமத்தம். தலைக்குறைந்து ஊமத்தம் என்பது மத்தம் என வந்தது.

       “மத்தமு மதியமும் வைத்திடும் அரன்மகன்”  ---(கைத்தல) திருப்புகழ்.

கருத்துரை

         முருகா! உன்னை விரும்பி வருந்துகின்ற இத்தலைவிக்கு முன் இன்று வந்தருள்வீர்.