திருப் பறியலூர்
வீரட்டம்
([கீழப்] பரசலூர்)
சோழ நாட்டு, காவிரித் தென்கரைத் திருத்தலம்.
மக்கள் வழக்கில் "கீழப்
பரசலூர்" என்று வழங்குகின்றது.
மயிலாடுதுறை - தரங்கம்பாடி பாதையில் 'செம்பொன்னார் கோயிலை' அடைந்து, அவ்வூர் மெயின் ரோட்டில் 'நல்லாடை' என்று கைகாட்டி காட்டும் பாதையில்
(வலப்புறமாக) சிறிது தூரம் சென்று,
'பரசலூர்
' சாலையில் திரும்பி 2 கி. மீ. செல்லவேண்டும். (இப்பாதை
குறுகலான ஒருவழிப் பாதை)
இறைவர்
: வீரட்டேசுவரர், தட்சபுரீசுவரர்.
இறைவியார் :
இளங்கொம்பனையாள்.
தல
மரம் : வில்வம். (பலா என்றும் சொல்லப்படுகிறது.)
தீர்த்தம் : உத்திரவேதி தீர்த்தம்.
தேவாரப்
பாடல்கள் : சம்பந்தர் - கருத்தன்
கடவுள்
தேவர்களுக்கு ஏற்பட்ட
பாவத்தைத் தண்டனை மூலம் பறித்ததால் 'பறியலூர்
' என்றும்; தக்கன் யாகம் செய்த தலமாதலின் தக்ஷபுரம்
என்றும் இஃது வழங்கலாயிற்று.
வீரபத்திரரை ஏவித்
தக்கனைத் சங்கரித்த தலம்.
அட்ட வீரட்டத்
தலங்களுள் ஒன்று. கருவறைச் சுவரில் தக்கன் சிவலிங்கத்தைப் பூசிக்கும் சிற்பம்
உள்ளது.
மூலவர் பெரிய
திருமேனி - சுயம்பு மூர்த்தி - சதுர ஆவுடையார்; கோமுகம் மாறி உள்ளது.
இக்கோயிலில்
நவக்கிரகங்கள் ஒன்பதும் இல்லை. சூரியன் மட்டுமே உள்ளார்.
இங்கு அர்த்தசாம
வழிபாடு பைரவருக்கு நடத்தப்படுகிறது.
சிறிய ஊர். கழமையான திருக்கோயில். இராசகோபுரம்
இல்லை. மோயிலின் எதிரில் சாலையின் மறுபுறத்தில் விநாயகர் கோயில் உள்ளது. இங்கிருந்து
பார்த்தாலே மூலத்தானம் தெரியும்.
வலம் வந்து உள்ளே நுழைந்தால் விநாயகர், விசுவநாதர்,
பைரவர், சூரியன் சந்நிதிகள் உள்ளன. கருவறைச்
சுற்றில் தக்கன்சிவலிங்கத்தைப் பூசிக்கும் சிற்பம் உள்ளது. விநாயகரையும், நால்வரையும் வணங்கியபின், உள மண்டபத்தில்
தட்ச சம்மார மூர்த்தியை வணங்கலாம். கீழே செப்புத் தகட்டில் தக்கன் வேள்வி செய்வது போலவும்,
பிரமன் இருப்பது போலவும் சிற்பம் உள்ளது.
மூலவர் பெரிய திருமேனி. சதுர ஆவுடையார். கோமுகம்
மாறி உள்ளது. வெளி முன் மண்டபத்தில் அம்பாள்
சந்நிதி தெற்கு நோக்கி உள்ளது. நவக்கிரகங்கள்
இல்லை.
வள்ளல் பெருமான் தாம் பாடி அருளிய விண்ணப்பக்
கலிவெண்பாவில், "இளமைச் செறியல் ஊர் கூந்தல் திரு அனையாரொடும் பறியலூர் வாழ் மெய்ப்பரமே"
என்று போற்றி உள்ளார்.
திருஞானசம்பந்தர்
திருப்பதிக வரலாறு
பெரிய
புராணப் பாடல் எண் : 441
பாடும்
அப்பதி பணிந்துபோய், பறியலூர் மேவும்
தோடு
உலாமலர் இதழியும் தும்பையும் அடம்பும்
காடு
கொண்டசெஞ் சடைமுடிக் கடவுளர் கருது
நீடு
வீரட்டம் பணிந்தனர், நிறைமறை வேந்தர்.
பொழிப்புரை : நிறைவான மறைத்
தலைவரான பிள்ளையார் முற்கூறியவாறு திருப்பதிகம் பாடிய திருவிளநகர் என்ற அப்பதியை
வணங்கிச் சென்று, `திருப்பறியலூரில்' வீற்றிருக்கும் இதழ்களையுடைய
கொன்றையையும் தும்பையையும் கடம்ப மலரையும் அணிந்த சிவந்த சடையையுடைய சிவபெருமான்
விரும்பி வீற்றிருக்கும் திருவீரட்டானத்தை அடைந்து வணங்கினார்.
பெ.
பு. பாடல் எண் : 442
பரமர்
தந்திருப் பறியலூர் வீரட்டம் பரவி,
விரவு
காதலின் வேலையின் கரையினை மேவி,
அரவு
அணிந்தவர் பதிபல அணைந்துமுன் வணங்கி,
சிரபு
ரத்தவர் திருத்தொண்டர் எதிர்கொளச் செல்வார்.
பொழிப்புரை : சிவபெருமானின்
திருப்பறியலூர் வீரட்டத்தைப் பணிந்து, பொருந்திய
அன்பால் அங்கு நின்றும் கடலின் கரையை அடைந்து, பாம்பை அணிந்த இறைவரின் பல
திருப்பதிகளையும் சென்று வணங்கிச் சீகாழித் தலைவரான பிள்ளையார், அங்கங்கும் தொண்டர்கள் சூழ வந்து
வரவேற்கச் செல்பவராய்,
திருப்பறியலூரில்
அருளிய பதிகம் `கருத்தன் கடவுள்' (தி.1 ப.134) எனத் தொடங்கும் மேகராகக்குறிஞ்சிப்
பண்ணிலமைந்த பதிகமாகும். இங்குப் பதி பல என்றது திருவிடைக்கழி, திருஅளப்பூர் முதலாயினவாகலாம் என்பர்
சிவக்கவிமணியார். பதிகங்கள் எவையும் கிடைத்தில.
1.134 திருப்பறியலூர்வீரட்டம் பண் - மேகராகக்குறிஞ்சி
திருச்சிற்றம்பலம்
பாடல்
எண் : 1
கருத்தன், கடவுள், கனல்ஏந் திஆடும்
நிருத்தன், சடைமேல் நிரம்பா
மதியன்,
திருத்தம்
உடையார் திருப்பறி யலூரில்
விருத்தன்
எனத்தகும் வீரட்டத் தானே.
பொழிப்புரை :திருந்திய
மனமுடையவர்கள் வாழும் திருப்பறியலூரில் தொன்மையானவனாய் விளங்கும் வீரட்டானத்து
இறைவன் அனைத்துலகங்களுக்கும் தலைவனும், கடவுளுமாக
இருப்பவன். கையில் கனலேந்தி நடனம் புரிபவன். சடைமுடி மீது இளம்பிறை அணிந்தவன்.
பாடல்
எண் : 2
மருந்தன், அமுதன், மயானத்துள் மைந்தன்,
பெருந்தண்
புனல்சென்னி வைத்த பெருமான்,
திருந்து
மறையோர் திருப்பறி யலூரில்
விரிந்த
மலர்ச்சோலை வீரட்டத் தானே.
பொழிப்புரை :ஒழுக்கத்திற் சிறந்த
அந்தணர்கள் வாழும் விரிந்த மலர்ச் சோலைகளையுடைய திருப்பறியலூரில் விளங்கும் வீரட்டானத்து
இறைவன், பிணி தீர்க்கும்
மருந்தாவான். உயிர் காக்கும் அமுதமாவான். மயானத்துள் நின்றாடும் வலியோனாவான்.
மிகப் பெரியதாகப் பரந்து வந்த குளிர்ந்த கங்கையைத் தன் சென்னியில் தாங்கி
வைத்துள்ள பெருமானாவான்.
பாடல்
எண் : 3
குளிர்ந்துஆர்
சடையன், கொடுஞ்சிலை வில்காமன்
விளிந்தான்
அடங்க வீந்துஎய்தச் செற்றான்,
தெளிந்தார்
மறையோர் திருப்பறி யலூரில்
மிளிர்ந்துஆர்
மலர்ச்சோலை வீரட்டத் தானே.
பொழிப்புரை :அறிவில் தெளிந்த
மறையோர்கள் வாழும் மலர்ச்சோலைகளால் சூழப்பட்ட திருப்பறியலூரில் விளங்கும்
வீரட்டானத்து இறைவன் குளிர்ந்த சடைமுடியை உடையவன். கொடிய வில்லை வளைத்து மலர்க்கணை
தொடுத்த மன்மதனை எரித்து இறக்குமாறு செய்து, இரதிதேவி வேண்ட அவனைத் தோற்றுவித்தவன்.
பாடல்
எண் : 4
பிறப்புஆதி
இல்லான், பிறப்பார் பிறப்புச்
செறப்புஆதி
அந்தம் செலச்செய்யும் தேசன்,
சிறப்பாடு
உடையார் திருப்பறி யலூரில்
விறல்பா
ரிடம்சூழ வீரட்டத் தானே.
பொழிப்புரை :சிறப்புடையவர்கள்
வாழ்கின்ற திருப்பறியலூரில் வலிமை பொருந்திய பூதகணங்கள் தன்னைச் சூழ விளங்கும்
வீரட்டானத்து இறைவன், பிறப்பும் இறப்பும்
இல்லாதவன். இவ்வுலகில் பிறவி எடுக்கும் உயிர்கள் அடையும் பிறப்புக்கும், சிறப்புக்கும் முதலும் முடிவும்
காணச்செய்யும் ஒளி வடிவினன்.
பாடல்
எண் : 5
கரிந்தார்
இடுகாட்டில் ஆடும் கபாலி,
புரிந்தார், படுதம் புறங்காட்டில்
ஆடும்
தெரிந்தார்
மறையோர் திருப்பறிய லூரில்
விரிந்துஆர்
மலர்ச்சோலை வீரட்டத் தானே.
பொழிப்புரை :நான்கு வேதங்களையும் ஆராய்ந்தறிந்த
மறையவர்கள் வாழும் விரிந்த மலர்ச்சோலைகளையுடைய திருப்பறியலூரில் விளங்கும்
வீரட்டானத்து இறைவர், இறந்தவர்களைக்
கரிந்தவர்களாக எரிக்கும் சுடுகாட்டில் ஆடும் கபாலி.
பாடல்
எண் : 6
அரவுஉற்ற
நாணா, அனல்அம்பு அதுஆக,
செருவுற்
றவர்புரம் தீஎழச் செற்றான்,
தெருவில்
கொடிசூழ் திருப்பறி யலூரில்
வெருவுற்
றவர்தொழும் வீரட்டத் தானே.
பொழிப்புரை :தெருக்களில் நடப்பட்ட
கொடிகளால் சூழப்பெற்ற திருப்பறியலூரில், பிறவிப்பிணிக்கு
அஞ்சுபவர்களால் தொழப்படும் வீரட்டானத்து இறைவன், வாசுகி என்னும் பாம்பை மேருவில்லில்
நாணாக இணைத்து அனலை அம்பாகக் கொண்டு தன்னோடு போரிட்டவரின் முப்புரங்களைத் தீ
எழுமாறு செய்து அழித்தவன்.
பாடல்
எண் : 7
நரைஆர்
விடையான், நலம்கொள் பெருமான்,
அரைஆர்
அரவம் அழகா அசைத்தான்,
திரைஆர்
புனல்சூழ் திருப்பறி யலூரில்
விரைஆர்
மலர்ச்சோலை வீரட்டத் தானே.
பொழிப்புரை :அலைகளையுடைய
நீர்க்கால்களால் சூழப்பட்டதும்,
மணம்
பொருந்திய மலர்ச் சோலைகளை உடையதுமான திருப்பறியலூர் வீரட்டத்தில் விளங்கும் இறைவன், வெண்மை நிறம் பொருந்திய விடையேற்றை
உடையவன். நன்மைகளைக் கொண்டுள்ள தலைவன், இடையில்
பாம்பினைக் கச்சாக அழகுறக் கட்டியவன்.
பாடல்
எண் : 8
வளைக்கும்
எயிற்றின் அரக்கன் வரைக்கீழ்
இளைக்கும்
படிதான் இருந்து, ஏழைஅன்னம்
திளைக்கும்
படுகர்த் திருப்பறி யலூரில்
விளைக்கும்
வயல்சூழ்ந்த வீரட்டத் தானே.
பொழிப்புரை :பெண் அன்னங்கள் ஆண்
அன்னங்களோடு கூடித்திளைக்கும் ஆழமான மடுக்களை உடையதும், மிகுதியான நெல் விளைவைத் தரும்
வயல்களால் சூழப்பட்டதுமான திருப்பறியலூர் வீரட்டானத்து இறைவன், வளைந்த பற்களையுடைய இராவணனைக்
கயிலைமலையின்கண் அகப்படுத்தி அவனை வலிமை குன்றியவனாகும்படி கால்விரலால் அடர்த்து
எழுந்தருளி இருப்பவனாவான்.
பாடல்
எண் : 9
விளங்கொள்
மலர்மேல் அயன்,ஓத வண்ணன்,
துளங்கும்
மனத்தார் தொழத்தழ லாய்நின்றான்,
இளம்கொம்பு
அனாளோடு இணைந்தும் பிணைந்தும்
விளங்கும்
திருப்பறியல் வீரட்டத் தானே.
பொழிப்புரை :இளைய பூங்கொம்பு
போன்றவளாகிய உமை யம்மையோடு இணைந்தும், இடப்பாகமாக
அவ்வம்மையைக் கொண்டும் விளங்குபவனாகிய திருப்பறியல்வீரட்டத்து இறைவன், ஒளி விளங்கும் தாமரை மலர்மேல் உறையும்
பிரமனும் கடல்வண்ணனாகிய திருமாலும் அச்சத்தால் நடுங்கிய மனத்தையுடையவராய்த்
தன்னைத் தொழத் தழல் உருவாய் நின்றவனாவான்.
பாடல்
எண் : 10
சடையன், பிறையன், சமண்சாக் கியரோடு
அடைஅன்பு
இலாதான், அடியார் பெருமான்,
உடையன்
புலியின் உரிதோல் அரைமேல்,
விடையன்
திருப்பறியல் வீரட்டத் தானே.
பொழிப்புரை :திருப்பறியல்
வீரட்டத்தில் உறையும் இறைவன், சடையில் பிறை
அணிந்தவன். சமணர், புத்தர் ஆகியோர்க்கு
அருள்புரிதற்கு உரிய அன்பிலாதவன். புலியின் தோலை இடைமேல் ஆடையாக உடுத்தவன். விடையேற்றினை
உடையவன்.
பாடல்
எண் : 11
நறுநீர்
உகும்காழி ஞானசம் பந்தன்
வெறிநீர்த்
திருப்பறியல் வீரட்டத் தானைப்
பொறிநீடு
அரவன் புனைபாடல் வல்லார்க்கு
அறுநீடு
அவலம், அறும் பிறப்புத்
தானே.
பொழிப்புரை :நல்ல நீர் பாயும்
சீகாழிப்பதியில் தோன்றிய ஞானசம்பந்தன், மணங்கமழும்
நீர்வளமுடைய திருப்பறியல் வீரட்டானத்து உறையும் புள்ளிகளையுடைய நீண்ட பாம்பினை
அணிந்த இறைவனைப் புனைந்து போற்றிய இப்பதிகப் பாடல்களை வல்லவர்கட்குப் பெரிய
துன்பங்களும் பிறப்பும் நீங்கும்.
திருச்சிற்றம்பலம்