திரு விளநகர்
சோழ நாட்டு, காவிரித் தென்கரைத் திருத்தலம்.
மயிலாடுதுறை - தரங்கம்பாடி சாலையில்
மயிலாடுதுறையில் இருந்து 6 கி.மி. தொலைவு.
இறைவர்
: துறைகாட்டும் வள்ளல், உச்சிவனேசுவரர்
இறைவியார்
: வேயுறுதோளி அம்மை
தீர்த்தம் : மெய்ஞ்ஞான தீர்த்தம்
தேவாரப்
பாடல்கள் : சம்பந்தர் - ஒளிரிளம்பிறை
சென்னிமேல்
சிற்ப வேலைப்பாடுகள் நிறைந்த 5 நிலை ராஜகோபுரம் கொண்ட இக்கோயில் 2 பிரகாரங்களைக் கொண்டது. இரண்டாவது
பிரகாரத்தில் சிறிய நந்தி மண்டபமும், ஆஸ்தான
மனடபமும் இருக்கின்றன. 2 வது கோபுர வாசலின்
இருபுறமும் விநாயகர் காணப்படுகிறார். மூலவர் கிழக்கு நோக்கியபடி காட்சி தருகிறார்.
இறைவி வேயுறுதோளியம்மை தனது திருக்கரங்களில் சங்கு சக்கரம் ஏந்தி காட்சி
தருகிறாள். மேற்குப் பகுதியில் சோமஸ்கந்தர், ஆறுமுகன், அருணாசலேஸ்வரர் ஆகியோருக்கு சந்நிதிகள்
உள்ளன. வடக்குப் பிரகாரத்தில் நடராஜர், கிழக்கில்
நவக்கிரக சந்நிதி, சூரியன், பைரவர் ஆகியோருக்கும் சந்நிதிகள் உள்ளன.
ஒரு செவிவழிச் செய்தியும் உண்டு.
திருஞானசம்பந்தர் ஒருமுறை இத்தலத்திற்கு வந்தபோது காவிரி ஆறு கரைபுரண்டு ஓடுவதைப்
பார்த்து கரையிலேயே நின்று பரிதவித்தார். துறை காட்டுபவர் யாரேனும் உள்ளார்களா
என்று சுற்றுமுற்றும் பார்த்த இவரை வேடன் ஒருவன் தன்னைப் பின்தொடர்ந்து வரும்படி
சொல்லி ஆற்றில் இறங்கினான். திருஞானசம்பந்தரும் அவனைப் பின்தொடர்ந்து ஆற்றில்
இறங்க வெள்ளம் பிரிந்து அவர்களுக்கு வழி விட்டது. மறுகரை சேர்ந்த திருஞானசம்பந்தர்
நன்றி சொல்ல வேடனைத் தேட அவன் மாயமாய் மறைந்து விட்டதைக் கண்டார். இறைவனே வேடனாய்
வந்து துறை காட்டியதால் அவர் துறை காட்டும் வள்ளலார் என்று அழைக்கப்படுகிறார். துறைகாட்டும்
வள்ளல் அருள் நமக்கிருந்தால் பிறவிப் பெருங்கடலைச் சுலபமாகக் கடக்கலாம்.
திருக்கொள்ளம்பூதூரில் பெருமான்
நிகழ்த்திய அற்புதத்திற்கும், இதற்கும் என்ன
தொடர்பு என்பதைப் பெருமக்கள் உய்த்து உணர்தல் நலம்.
முன்னொரு காலத்தில் அருள்வித்தன்
என்னும் அந்தணன் இத்தல இறைவன் மீது அளவில்லாத பக்தி கொண்டிருந்தான். நாள் தோறும்
இறைவனுக்கு மாலை கட்டிக் கொடுக்கும் தொண்டினைச் செய்து வந்தான். இவனது பக்தியை
சோதிக்க விரும்பினார் இறைவன். ஒருநாள் இவன் பூக்கூடையுடன் ஆற்றைக்கடந்து வரும்போது
ஆற்றில் வெள்ளம் பெருக்கெடுத்து ஓடும்படி செய்தார். இதனால் கலங்கிய இவன்
தன்னைப்பற்றி கவலைப்படாமல் இறைவனுக்குரிய பூக்கூடையை காப்பாற்றுவதில் மிகவும்
கவனமாக இருந்தான். தலையளவு வெள்ளம் வந்துவிட்ட போதிலும் தன் கைகளால் பூக்கூடையை
தலைக்கு மேல் தூக்கிப் பிடித்துக் கொண்டு தன் உயிரைப் பற்றி கவலைப் படாமல்
இறைவனுக்கு செய்யும் கொண்டில் பங்கம் வந்துவிடக் கூடாதே என்று கவலைப்பட்டான்.
அவனுடைய உறுதியையும், அன்பையும் கண்ட
இறைவன் அவனுக்கு அருள் சொரிந்து ஆற்றின் துறையைக் காட்டி அவனைக் கரையேறச்
செய்தார். இதனால் இறைவன் "துறை காட்டும் வள்ளல்" ஆனார்.
வள்ளல் பெருமான் தாம் பாடி அருளிய விண்ணப்பக்
கலிவெண்பாவில், "தேயா வளநகர் என்று எவ்வுலகும் வாழ்த்தப்படும் சீர் விளநகர் வாழ்
எங்கள் விருந்தே" என்று போற்றி உள்ளார்.
காலை 7 மணி முதல் பகல் 12 மணி வரையிலும், மாலை 5 மணி முதல் இரவு 8 மணி வரையிலும் திறந்திருக்கும்.
திருஞானசம்பந்தர்
திருப்பதிக வரலாறு
பெரிய
புராணப் பாடல் எண் : 437
மூவ
லூர்உறை முதல்வரைப் பரவிய மொழியால்
மேவு
காதலில் ஏத்தியே, விருப்பொடும் போந்து,
பூஅ
லம்புதண் புனல்பணைப் புகலியர் தலைவர்
வாவி
சூழ்திரு மயிலாடு துறையினில் வந்தார்.
பொழிப்புரை : மூவலூரில்
வீற்றிருக்கும் இறைவரைப் போற்றுகின்ற சொற்களால் மிகுந்த விருப்புடன் போற்றி நின்று, காதல் மிக மலர்களைக் கொண்டு வரும்
குளிர்ந்த நீரையுடைய வயல்கள் சூழ்ந்த சீகாழித் தலைவரான சம்பந்தர், பொய்கைகள் சூழ்ந்த `மயிலாடுதுறைக்கு' வந்தார்.
பெ.
பு. பாடல் எண் : 438
மல்கு
தண்டலை மயிலாடு துறையினில் மருவும்
செல்வ
வேதியர் தொண்டரோடு எதிர்கொளச் சென்று,
கொல்லை
மான்மறிக் கையரைக் கோயில்புக்கு, இறைஞ்சி,
எல்லை
இல்லதுஓர் இன்பம்முன் பெருகிட எழுந்தார்.
பொழிப்புரை : நிறைந்த பூஞ்சோலைகள்
சூழ்ந்த மயிலாடுதுறையில் திருவுடை அந்தணர்கள் தொண்டர்களுடன் சூழ எதிர் கொண்டு
நிற்பப் புகுந்து, கொல்லையில் வாழும்
மான்கன்றைக் கையில் உடையவரைக் கோயிலுள் புகுந்து வணங்கி, அளவில்லாத ஒப்பற்ற மகிழ்ச்சி பெருக
எழுந்தார்
பெ.
பு. பாடல் எண் : 439
உள்ளம்
இன்புஉற உணர்வுஉறும் பரிவுகொண்டு உருகி,
வெள்ளம்
தாங்கிய சடையரை விளங்குசொல் பதிகத்
தெள்ளும்
இன்னிசைத் திளைப்பொடும் புறத்து அணைந்து அருளி,
வள்ள
லார்மற்ற வளம்பதி மருவுதல் மகிழ்ந்தார்.
பொழிப்புரை : உள்ளத்தில் வைத்து, இன்பம் அடைய, அவ்வுணர்ச்சியுடன் கூடிய அன்பு
மிகுதியால் உருகி, கங்கை வெள்ளத்தையுடைய
சடையினரான இறைவரையே விளங்கும் சொல் பதிகத்தில் வைத்துப் பாடி, அத்தெளிந்த இனிய இசையுடன் கூடிய
மகிழ்வுடன் வெளியே வந்து அவ்வளமுடைய பதியில் மகிழ்ந்து இருந்தார்.
பெ.
பு. பாடல் எண் : 440
அத்தி
ருப்பதி அகன்றுபோய் அணிகிளர் சூலக்
கைத்த
லப்படை வீரர்செம் பொன்பள்ளி கருதி,
மெய்த்த
காதலில் விளநகர் விடையவர் பாதம்
பத்தர்
தம்முடன் பணிந்து, இசைப் பதிகம்முன்
பகர்ந்தார்.
பொழிப்புரை : மயிலாடுதுறை என்னும்
அத்திருப்பதியினின்றும் நீங்கிச் சென்று, அழகு விளங்கும் சூலப்படையைக் கையில்
கொண்ட வீரரான இறைவரின் திருச்செம்பொன்பள்ளியைக் கருதிச் சென்று பணிந்து, மெய்ம்மையான பெருவிருப்பால் `திருவிளநகரில்\' எழுந்தருளிய விடையை உடைய இறைவரின்
திருவடிகளை அடியார்களுடனே கூடிப் பணிந்து இசையுடைய திருப்பதிகத்தினைத் திருமுன்பு
பாடினார்.
திருச்செம்பொன்பள்ளியில்
அருளிய பதிகம் `மருவார் குழலி' (தி.1 ப.25) எனத் தொடங்கும் தக்கராகப் பண்ணிலமைந்த
பதிகம் ஆகும்.
திருவிளநகரில் அருளிய பதிகம் `ஒளிரிளம் பிறை' (தி.2 ப.78) எனத் தொடங்கும் காந்தாரப் பண்ணிலமைந்த
பதிகமாகும்.
2.078 திருவிளநகர் பண் - காந்தாரம்
திருச்சிற்றம்பலம்
பாடல்
எண் : 1
ஒளிர்இளம்பிறை
சென்னிமேல் உடையர்,கோவண ஆடையர்,
குளிரிளம்மழை
தவழ்பொழில் கோலநீர்மல்கு காவிரி
நளிர்இளம்புனல்
வார்துறை நங்கை கங்கையை
நண்ணினார்
மிளிர்இளம்பொறி
அரவினார் மேயதுவிள நகர்அதே.
பொழிப்புரை :விளங்குகின்ற
இளம்பிறை சென்னிமேல் உடையவர். கோவண ஆடை உடுத்தவர். கங்கை நங்கையை விரும்பியவர்.
ஒளியும் புள்ளிகளும் பொருந்திய இளநாகம் அணிந்தவர். அவ்விறைவர் விரும்பி உறையும்
தலம், தண்ணிய மழை
பொழியத்தக்க மேகங்கள் தவழும் பொழில்களைக் கொண்டதும், அழகிய நீர் நிறைந்ததும் குளிர்ந்த புதிய
புனலைக் கொண்டு நீண்ட துறையுடன் விளங்குவதுமான விளநகராகும்.
பாடல்
எண் : 2
அக்குஅரவ்வுஅணி
கலன்என, அதனொடு ஆர்த்ததொர்
ஆமைபூண்டு
உக்கவர் சுடு
நீறுஅணிந்து, ஒளிமல்குபுனல்
காவிரிப்
புக்கவர் துயர்
கெடுக எனப் பூசுவெண்பொடி மேவிய
மிக்கவர் வழி
பாடுசெய் விளநகர்அவர் மேயதே.
பொழிப்புரை :எலும்பையும் பாம்பையும்
அணிந்து, அவ்வணிகலனோடு ஆமை
ஓட்டையும் பூண்டு இறந்தவரை எரித்த சுடுகாட்டு நீற்றை அணிந்து விளங்கும் பெருமான்
மேவிய தலம் ஒளி நிறைந்த நீரை உடைய காவிரியில் மூழ்கிய அடியவர் துயர் கெடுமாறு நீறு
பூசியவராய் வழிபாடு செய்கின்ற விளநகராகும்.
பாடல்
எண் : 3
வாளிசேர்அடங்
கார்மதி தொலையநூறிய வம்பின்வேய்த்
தோளிபாகம்
அமர்ந்தவர், உயர்ந்ததொல்கடல்
நஞ்சுஉடன்
காளம்மல்கிய
கண்டத்தர், கதிர்விரிசுடர்
முடியினர்,
மீளிஏறுஉகந்து
ஏறினார் மேயதுவிள நகர்அதே.
பொழிப்புரை :அம்பினைச்
சேர்ப்பித்துப் பகைவரின் முப்புரங்களை அழியுமாறு செய்தவரும், புதிய மூங்கில் போலும் தோள்களை உடைய
உமையம்மையை ஒரு பாகமாக விரும்பி ஏற்றவரும், உயர்ந்த பழமையான கடலின்கண் தோன்றிய
நஞ்சினை உண்டதோடு அதன் கரிய நிறம் மல்கிய கண்டத்தை உடையவரும், ஒளிவிரிந்த தழல் போலும் சடையினரும், வலிய விடையேற்றை உகந்து ஏறி வருபவரும் ஆன
சிவபிரான் மேவியது விளநகர்.
பாடல்
எண் : 4
கால்விளங்குஎரி
கழலினார், கைஇலங்கிய வேலினார்,
நூல்விளங்கிய
மார்பினார், நோய்இலார், பிறப் பும்இலார்,
மால்விளங்குஒளி
மல்கிய மாசுஇலாமணி மிடறினார்
மேல்விளங்குவெண்
பிறையினார் மேயதுவிள நகர்அதே.
பொழிப்புரை :காலில் விளங்கும்
கழலணிந்தவர். கையில் விளங்கும் சூலத்தை உடையவர். பூணநூல் விளங்கும் மார்பினர்.
துன்புறும் நோயும் பிறத்தலும் இல்லாதவர். கருமை விளங்கும் ஒளி நிரம்பிய குற்ற மற்ற
நீல மணி போலும் கண்டத்தினர். வானவெளியில் விளங்கும் வெள்ளிய பிறையைச் சூடியவர்.
அவ்விறைவர் மேயது விளநகர்.
பாடல்
எண் : 5
பன்னிஆர்மறை
பாடினார், பாயசீர்ப்பழங்
காவிரித்
துன்னு தண்துறை
முன்னினார் தூநெறி பெறுவார் எனச்
சென்னி திங்களைப்
பொங்குஅராக் கங்கையோடுடன்
சேர்த்தினார்
மின்னுபொன்புரி
நூலினார் மேயதுவிள நகர்அதே.
பொழிப்புரை :வேதங்களை அருளியவர்.
அவ்வேதங்களைப் பாடுபவர். முடியில் திங்கள், சினம்மிக்க பாம்பு, கங்கை ஆகியவற்றைச் சூடியவர்.
மின்னுகின்ற பொன்போலும் முப்புரிநூலை அணிந்தவர். அவ்விறைவர் அன்பர்கள்
வணங்கித்தூநெறி பெறும் பொருட்டு எழுந்தருளியிருக்குமிடம் பரவிய புகழையுடைய
காவிரியின் துறைகளை உடைய கரையில் அமைந்த விளநகராகும்.
பாடல்
எண் : 6
தேவரும்அம
ரர்களும், திசைகள்மேல்உள
தெய்வமும்
யாவரும் அறியாதது ஓர் அமைதியால் தழல்
உருவினார்,
மூவரும்அவர்
என்னவும், முதல்வரும்இவர்
என்னவும்,
மேவ அரும்பொருள்
ஆயினார் மேயதுவிள நகர்அதே.
பொழிப்புரை :தேவரும், அமரரும், திசைக்காவல் தெய்வங்களும் முதலான
யாவராலும் அறிதற்கரிய இயல்பினர். தழல் போலும் உருவினர். திருமால், பிரமன், உருத்திரன் ஆகிய மூவரும் இவரே என்று
கூறுமாறும் அவர்களின் தலைவராய் விளங்குவார் இவரே என்னு மாறும் பொருந்த அரிய
பொருளாய் விளங்குபவர். அவ்விறைவர் மேவிய இடம் விளநகராகும்.
பாடல்
எண் : 7
சொல்தருமறை
பாடினார், சுடர்விடும்சடை
முடியினார்
கல்தருவடம்
கையினார் , காவிரித்துறை
காட்டினார்,
மல்தரு திரள்
தோளினார் மாசுஇல்வெண்பொடிப்
பூசினார்
வில்தருமணி
மிடறினார், மேயதுவிள நகர்அதே.
பொழிப்புரை :எழுதி உணர்த்தாது
சொல்லப்பட்டே வரும் வேதங்களை அருளியவர். ஒளிவிடும் சடைமுடியை உடையவர். செபமணி
மாலையைக் கையில் கொண்டவர். மற்போர் செய்தற்கு ஏற்ற திரண்ட தோள்களை உடையவர்.
குற்றமற்ற வெண்மையான திருநீற்றுப்பொடி பூசியவர். ஒளி தரும் நீலமணி போலும்
மிடறுடையவர். அவ்விறைவர் மேவியது காவிரித்துறையில் அமைந்த விளநகராகும்.
பாடல்
எண் : 8
படர்தரும்சடை
முடியினார், பைங்கழல்அடி பரவுவார்
அடர் தரும் பிணி
கெடுக என அருளுவார், அரவு அரையினார்,
விடர் தரும் மணி
மிடறினார், மின்னுபொன்புரி
நூலினார்.
மிடல் தரும் படை
மழுவினார், மேயதுவிள நகர்அதே.
பொழிப்புரை :பரவிய சடைமுடியை
உடையவர். தம் கழல் அடிகளைப்பரவும் அடியவர்களை வருத்தும் பிணிகள் கெடுவனவாக என
அருள் செய்பவர். பாம்பினை இடையில் கட்டியவர். மலைப் பிளவில் இருந்து கிட்டும்
நீலமணி போலும் மிடற்றை உடையவர். மின்னுகின்ற பொன்போன்ற முப்புரிநூலை அணிந்தவர்.
வலிய படைக்கலனாக மழுவை ஏந்தியவர். அவ்விறைவர் மேவியது விளநகராகும்.
பாடல்
எண் : 9
கைஇலங்கிய
வேலினார், தோலினார்,கரி காலினார்,
பைஇலங்குஅரவு
அல்குலாள் பாகம்ஆகிய பரமனார்,
மைஇலங்கு ஒளி
மல்கிய மாசுஇலாமணி மிடறினார்,
மெய்இலங்கு வெண்
நீற்றினார் மேயதுவிள நகர்அதே.
பொழிப்புரை :கையில் விளங்கும்
சூலத்தை உடையவர். தோலாடை உடுத்தவர். முற்றழிப்புக் காலத்தில் தாம் ஒருவரே அழியாது
நிற்பவர். பாம்பின் படம் போலும் அல்குலை உடைய உமையம்மையை இடப்பாகமாக உடைய பரமர்.
கரிய ஒளி நிறைந்த குற்ற மற்ற நீலமணி போன்ற மிடற்றினை உடையவர். திருமேனியில்
விளங்கும் திருவெண்ணீற்றை அணிந்தவர். அவ்விறைவர் மேவியிருப்பது விளநகர் ஆகும்.
பாடல்
எண் : 10
உள்ளதன் தனைக்
காண்பன்கீழ் என்ற மாமணி வண்ணனும்
உள்ளதன் தனைக்
காண்பன்மேல் என்ற மாமலர் அண்ணலும்
உள்ளதன் தனைக்
கண்டிலார், ஒளிஆர் தருஞ்சடை
முடியின்மேல்
உள்ளதன் தனைக்
கண்டிலா ஒளியார் விளநகர்
மேயதே.
பொழிப்புரை :கீழ் உள்ள திருவடியை
யான் காண்பேன் என்று சென்ற கரிய மணிவண்ணனாகிய திருமாலும், மேல் உள்ள திருமுடியை யான் காண்பேன்
என்று சென்ற தாமரை மலர்மேல் உறையும் நான்முகனும் உள்பொருளாய் விளங்கும்
சிவபிரானைக் கண்டிலர். ஒளி பொருந்திய சடைமுடியின் மேல் விளங்கும் பிறை முதலியவற்றை
யாரும் காண இயலாத சோதிப் பிழம்பாய்த் தோன்றும் அப்பெருமானார் தம்மை அன்பர்கள்
கண்டு வழிபட விளநகரில் எழுந்தருளியுள்ளார்.
பாடல்
எண் : 11
மென்சிறைவண்டு
யாழ்முரல் விளநகர்த்துறை மேவிய
நன்பிறைநுதல்
அண்ணலைச் சண்பைஞானசம் பந்தன்சீர்
இன்புஉறுதமி
ழால்சொன்ன ஏத்துவார்வினை
நீங்கிப்போய்த்
துன்புறு துயரம் இலர் தூநெறி பெறு வார்களே.
பொழிப்புரை :மெல்லிய சிறகுகளை
உடைய வண்டுகள் யாழ் போல முரலும் விளநகரில் காவிரித்துறையில் எழுந்தருளிய பிறை
சூடிய பெருமானை, சண்பைப்பதியில்
தோன்றிய ஞானசம்பந்தன் சிறப்பும் இனிமையும் பொருந்திய தமிழால் புனைந்த
இப்பாடல்களைக் கூறி ஏத்துகின்றவர் வினைகள் நீங்கித் துன்பமும் துயரமும் அடைதல்
இலர். தூய வீட்டு நெறியைப் பெறுவார்கள்.
திருச்சிற்றம்பலம்