திரு மயிலாடுதுறை
சோழ நாட்டு, காவிரித் தென்கரைத் திருத்தலம்.
சென்னை - இராமேசுவரம் இருப்புப் பாதையில் உள்ள
சந்திப்பு நிலையம். தமிழ் நாட்டின் பல நகரங்களில் இருந்தும் பேருந்து வசதிகள் உள்ளன.
மயிலாடுதுறை நகரின் மையப்பகுதியில்
மயூரநாதர் திருக்கோயில் அமைந்துள்ளது.
இறைவர்
: மயூரநாதர்.
இறைவியார் : அபயாம்பிகை
தல
மரம் : மா, வன்னி.
தீர்த்தம் : பிரம தீர்த்தம், காவிரி, ரிஷப தீர்த்தம்.
தேவாரப்
பாடல்கள் : 1. சம்பந்தர் - 1. கரவின் றிநன்மா மலர்,
2. ஏனவெயி றாடரவோ.
2. அப்பர்
- கொள்ளும் காதன்மை
காவிரிக் கரையில் உள்ள 6 திருத்தலங்கள் காசிக்கு சமானமாக
கருதப்படுகின்றன. அவற்றில் மயிலாடுதுறையும் ஒன்றாகும். மற்றவை 1. திருவையாறு, 2. திருவெண்காடு, 3. திருவிடைமருதூர், 4. திருவாஞ்சியம் 5. திருசாய்க்காடு ஆகும்.
மயிலாடுதுறை, மாயவரம், மாயூரம் என்றெல்லாம் குறிப்பிடப்படும்
இத்திருத்தலம் மிகவும் தொன்மையான சிவத்திருத்தலம் ஆகும். "ஆயிரம் ஆனாலும்
மாயூரம் ஆகுமா?" என்னும் முதுமொழியே இதன் சிறப்பை விளக்கும்.
பிரம்ம தேவனால் உருவாக்கப்பட்ட இந்த ஊரில்
பிரம்மா இத்தலத்து இறைவனாம் மாயூரநாதரை பூஜித்தான் என்று புராண வரலாறு கூறுகிறது.
அம்பாள் பார்வதி, மயில் உருவில் சிவபெருமானை பூஜை செய்ததாக கருதப்படும் இரண்டு
சிவத்தலங்களில் மயிலாடுதுறை ஒன்றாகும். மற்றொன்று தொண்டை நாட்டு சிவத்தலமான
திருமயிலை ஆகும். சிவபெருமானை மதிக்காமல் தட்சன் நடத்திய யாகத்தில் இறைவன்
கட்டளையையும் மீறி அழையாத விருந்தாளியாக கலந்து கொண்டு அவமானப்பட்ட பார்வதியை
சிவன் சபித்து விடுகிறார். காவிரிக்கரையில் ஐப்பசி மாதம் 30 நாட்களும் தவம் செய்து தன்னை மீண்டும்
அடையுமாறு சிவன் பார்வதியை சபித்து விடுகிறார். மயில் உருவம் பெற்று சிவபெருமானை
வெகுகாலம் பூஜை செய்து அம்பிகை சுய உருவம் அடைந்து பாவங்கள் நீங்கப்பட்டு சிவனை
அடைந்தாள். மயில் வடிவத்தில் அம்பிகை சிவனை வழிபட்டதால் இத்தலம் மயிலாடுதுறை
எனப்பட்டது. சிவநிந்தனையுடன் செய்யப்பட்ட தட்ச யாகத்தில் கலந்து கொண்ட தேவர்கள்
யாவரும் தண்டிக்கப்பட்டனர். அவர்கள் தாம் செய்த பாவம் நீங்க மயிலாடுதுறை வந்து
மாயூரநாதரை வழிபட்டு நலன் பெற்றனர்.
ஒருமுறை கண்ணுவ முனிவர் கங்கையில்
நீராடச் செல்லும் போது எதிரில் சண்டாளக் கன்னிகள் மூவர் வருகின்றனர். அவர்கள்
கண்னுவ முனிவரை வணங்கி தாங்கள் மூவரும் கங்கை, யமுனை, சரஸ்வதி என்ற நதிகள் என்றும், தங்களிடம் நீராடிய மக்களின் பாவக்கறை
படிந்து தங்கள் உருவம் இவ்வாறு ஆகிவிட்டதென்றும் கூறினர். அவர்களுடைய பாவம் நீங்கி
அவர்கள் சுய உருவம் பெற தென்திசையில் உள்ள மாயூரத்தில் துலா என்னும் ஐப்பசி
மாதத்தில் காவிரியில் மூழ்கி நீராட முனிவர் ஆலோசனை கூற அவ்வாறே செய்து பாவங்கள்
நீங்கி சுய உருவம் பெற்றனர். தேவர்கள், முனிவர்கள், சரஸ்வதி, லக்ஷ்மி, கௌரி, சப்தமாதர்கள் ஆகியோர் மாயூரத்திலுள்ள
காவிரிக்கரையில் நீராட வருகின்றனர். ஆகையால் துலா மாதத்தில் (ஐப்பசி மாதம்)
மயிலாடுதுறையில் காவிரியில் நீராடுவது மிகவும் சிறப்புடையதாகும். அதிலும் ஐப்பசி
மாதத்தில் கடைசி நாளான கடைமுகம் அன்று நீராடுவது மிகமிகச் சிறப்பு. இம்மாதத்தில்
முதல் 29 நாட்களில் நீராட
முடியாவிட்டலும் கடைசி நாளான 30ம் நாள் காவிரியில்
நீராடி மாயூரநாதரையும் அன்னை அபயாம்பிகையும் அன்று வழிபட்டால் மோட்சம் கிட்டும்
என்பது ஐதீகம்.
மறுநாள் கார்த்திகை மாதத்தின் முதல்
நாள் "முடவன் முழுக்கு" என்று கொண்டாடப்படுகிறது. துலா நீராடலைக்
கேள்விப்பட்டு, தன் பாவத்தினைப்
போக்க முடவன் ஒருவன் மயிலாடுதுறைக்கு வந்தான். தன் இயலாமையால் தாமதமாக வந்து
சேர்ந்தான். அதற்குள் ஐப்பசி மாதம் முடிந்து கார்த்திகை முதல் நாள் ஆகி விட்டது.
முடவனான தன்னால் மீண்டும் அடுத்த ஆண்டு வந்து மூழ்கிச் செல்வது இயலாது என
இறைவனிடம் அவன் முறையிட்டதால், இறைவன் அவனுக்கு
ஒருநாள் நீட்டிப்பு தந்தார். முடவனும் காவிரியில் மூழ்கி எழுந்தான். அவனது பாவமும்
நீங்கியது. முடவனுக்காக சிவன் வழக்கமான நேரத்தை முடக்கி வைத்ததால் இதனை, "முடவன்
முழுக்கு" என்கின்றனர்.
துலா மாதத்தின் கடைசி நாளில் காவிரியில்
நீராட நாதசர்மா, அனவித்யாம்பிகை எனும்
தம்பதியர் உறுதியுடன் மாயூரம் நோக்கி வந்தார்கள். அவர்கள் வருவதற்குள் 30ம் நாள் நீராடல் முடிந்து விட்டது. எனவே
வருத்தத்துடன் இங்கு சிவனை வேண்டி தங்கினர். அன்றிரவில் நாதசர்மாவின் கனவில்
தோன்றிய சிவன், மறுநாள் அதிகாலை
சூரிய உதயத்திற்கு முன்பு நீராடினாலும், பாவம்
நீங்கி புண்ணியம் கிடைக்கும் என்றார். அதன்படியே மறுநாள் அத்தம்பதியர் காவிரியில்
மூழ்கி பாவம் நீங்கப்பெற்றனர். இதன் அடிப்படையில் கார்த்திகை முதல் நாளன்று, அதிகாலையிலும் இங்கு நீராடும் வழக்கம்
இருக்கிறது.
இத்திருக்கோயில் திருவாவடுதுறை
ஆதீனத்திற்குரியது. நான்கு பக்கமும் சுற்று மதில்களும், கிழக்கே பெரிய கோபுரமும், மற்ற 3 பக்கமும் மொட்டை கோபுரங்களுடனும்
இவ்வாலயம் உள்ளது. வீதி உட்பட ஐந்து பிரகாரங்கள் உள்ளன. கிழக்கிலுள்ள ராஜகோபுரம்
ஒன்பது நிலைகளுடனும், அழகான
சிற்பங்களுடனும் கம்பீரமாகக் காட்சியளிக்கின்றது. உட்கோபுரம் மூன்று
நிலைகளையுடையது. இராஜகோபுர வாயில் வழியாக உள்ளே நுழைந்தவுடன் இடதுபுறம்
திருக்குளமும், வலதுபுறம்
குமரக்கட்டளை அலுவலகமும் உள்ளன. கருவறை கோஷ்டத்தில் உள்ள நடராஜரின் பாதத்திற்கு
அருகில், ஜுரதேவர் இருப்பது
வித்தியாசமான அமைப்பு. இவருக்கு அருகில் ஆலிங்கன மூர்த்தி இருக்கிறார்.
துர்க்கையம்மனின் காலுக்கு கீழே மகிஷனும், அருகில் இருபுறமும் இரண்டு அசுரர்கள்
இருக்கின்றனர். துர்க்கையின் இந்த வடிவத்தை காண்பது அரிது. இங்கு சிவ சண்டிகேஸ்வர்
மற்றும் தேஜஸ் சண்டிகேஸ்வரர் இருவரும் ஒரே சன்னதியில் இருக்கின்றனர். பிரகாரத்தில்
அஷ்டலட்சுமியும், அதற்கு மேலே
சட்டைநாதரும் இருக்கின்றனர். சிவலிங்கத்தை பூஜிக்கும் மகாவிஷ்ணு தனியே
இருக்கிறார்.
நாதசர்மா, அனவித்யாம்பிகை தம்பதியருக்கு இறைவன்
முக்தி கொடுத்ததின் பொருட்டு அவர்களுக்கு அம்பாள் சந்நிதியின் தெற்கே சன்னிதி
உள்ளது. தம்பதியரை லிங்கத்தில் ஐக்கியமாக்கி முக்தி வழங்கிய இறைவன், அதுமட்டுமன்றி "அனைத்து தெய்வங்களையும்
வழிபட்டு முடிந்த பின்பு உங்களையும் வழிபட்டால் மட்டுமே என்னை வழிபட்ட பலன்
கிடைக்கும்" என்ற வரத்தையும் அவர்களுக்கு ஈசன் அருளினார்.
இத்தலத்திலுள்ள முருகன் சந்நிதி (
குமரக்கட்டளை) மட்டும் தருமையாதீனத்திற்குரியது. பிராகாரத்தில் இடதுபுறம்
குமரக்கட்டளைக்குரிய (தருமையாதீனத்திற்குரிய) ஆஸ்தான மண்டபம் உள்ளது. மயூரநாதர்
சந்நிதியின் வடபுறம் குமரக்கட்டளை சுப்பிரமணிய சுவாமியின் திருக்கோயில் உள்ளது.
இந்த முருகப்பெருமானை அருணகிரிநாதர் தனது திருப்புகழில் பாடியுள்ளார். இத்தலத்தில்
முருகப்பெருமான் ஒரு திருமுகத்துடனும் நான்கு திருக்கரங்களுடனும் தனது தேவியர்
இருவருடன் நின்ற கோலத்தில் கிழக்கு நோக்கி எழுந்தருளியுள்ளார். குமரக்கட்டளை
மண்டபத்தில் தென்புறம் பெரியவிநாயகரும், வடபுறத்தில்
ஆறுமுகனும் எழுந்தருளி உள்ளனர். வெளிப் பிரகாரத்தில் வடக்கு மதிலை ஒட்டி கிழக்கு
முகமாக உள்ள கோவிலில் ஆதி மாயூரநாதர் எழுந்தருளி உள்ளார். வடபுறம் உள்ள அம்மன்
சந்நிதியில் அன்னை அபயாம்பிகை நின்ற திருக்கோலத்தில் நான்கு கைகளுடன், மேற்கரங்கள் இரண்டில் சங்கு சக்கரமும், இடது திருக்கரம் தொடை மேல் தொங்கவும், வலது திருக்கரத்தில் கிளியை ஏந்தி
காட்சி தருகிறாள்.
வள்ளல் பெருமான் தாம் பாடி அருளிய விண்ணப்பக்
கலிவெண்பாவில், "வேள் இமையோர் வாய் ஊரத் தேமா மலர் சொரிந்து வாழ்த்துகின்ற மாயூரத்து
அன்பர் மனோரதமே" என்று போற்றி உள்ளார்.
காலை 6 மணி முதல் பகல் 12-30 மணி வரையிலும், மாலை 4 மணி முதல் இரவு 9 மணி வரையிலும் திறந்திருக்கும்.
திருஞானசம்பந்தர்
திருப்பதிக வரலாறு
பெரிய
புராணப் பாடல் எண் : 437
மூவ
லூர்உறை முதல்வரைப் பரவிய மொழியால்,
மேவு
காதலில் ஏத்தியே விருப்பொடும் போந்து,
பூஅ
லம்புதண் புனல்பணைப் புகலியர் தலைவர்
வாவி
சூழ்திரு மயிலாடு துறையினில் வந்தார்.
பொழிப்புரை : மூவலூரில்
வீற்றிருக்கும் இறைவரைப் போற்றுகின்ற சொற்களால் மிகுந்த விருப்புடன் போற்றி நின்று, காதல் மிக மலர்களைக் கொண்டு வரும்
குளிர்ந்த நீரையுடைய வயல்கள் சூழ்ந்த சீகாழித் தலைவரான சம்பந்தர், பொய்கைகள் சூழ்ந்த `மயிலாடுதுறைக்கு\' வந்தார்.
பெ.
பு. பாடல் எண் : 438
மல்கு
தண்டலை மயிலாடு துறையினில் மருவும்
செல்வ
வேதியர் தொண்டரோடு எதிர்கொளச் சென்று,
கொல்லை
மான்மறிக் கையரைக் கோயில்புக்கு, இறைஞ்சி,
எல்லை
இல்லதுஓர் இன்பம்முன் பெருகிட எழுந்தார்.
பொழிப்புரை : நிறைந்த பூஞ்சோலைகள்
சூழ்ந்த மயிலாடுதுறையில் திருவுடை அந்தணர்கள் தொண்டர்களுடன் சூழ எதிர் கொண்டு
நிற்பப் புகுந்து, கொல்லையில் வாழும்
மான்கன்றைக் கையில் உடையவரைக் கோயிலுள் புகுந்து வணங்கி, அளவில்லாத ஒப்பற்ற மகிழ்ச்சி பெருக
எழுந்தார்
பெ.
பு. பாடல் எண் : 439
உள்ளம்
இன்புஉற உணர்வுஉறும் பரிவுகொண்டு உருகி,
வெள்ளம்
தாங்கிய சடையரை விளங்குசொல் பதிகத்
தெள்ளும்
இன்னிசைத் திளைப்பொடும் புறத்து அணைந்து அருளி,
வள்ள
லார்மற்ற வளம்பதி மருவுதல் மகிழ்ந்தார்.
பொழிப்புரை : உள்ளத்தில் வைத்து, இன்பம் அடைய, அவ்வுணர்ச்சியுடன் கூடிய அன்பு
மிகுதியால் உருகி, கங்கை வெள்ளத்தையுடைய
சடையினரான இறைவரையே விளங்கும் சொல் பதிகத்தில் வைத்துப் பாடி, அத்தெளிந்த இனிய இசையுடன் கூடிய
மகிழ்வுடன் வெளியே வந்து அவ்வளமுடைய பதியில் மகிழ்ந்து இருந்தார்.
திருமயிலாடுதுறையில்
இறைவரின் திருமுன்பு அருளிய பதிகம் `கரவின்றி' (தி.1 ப.38) எனத் தொடங்கும் தக்கராகப் பண்ணிலமைந்த
பதிகமாகும். இங்கிருந்த நாள்களில் பாடிய பிறிதொரு பதிகம், `ஏனஎயிறு' (தி.3 ப.70) எனத் தொடங்கும் சாதாரிப் பண்ணிலமைந்த
பதிகமாகும்.
திருஞானசம்பந்தர் திருப்பதிகங்கள்
1.038
திருமயிலாடுதுறை பண் - தக்கராகம்
திருச்சிற்றம்பலம்
பாடல்
எண் : 1
கரவு
இன்றி நன்மா மலர்கொண்டு
இரவும்
பகலும் தொழுவார்கள்
சிரம்ஒன்
றியசெஞ் சடையான்வாழ்
வரமா
மயிலா டுதுறையே.
பொழிப்புரை :நெஞ்சிற் கரவின்றி
மணம் மிக்க சிறந்த மலர்கள் பலவற்றையும் பறித்துக் கொண்டு வந்து இரவும் பகலும்
தொழும் அடியார்களுக்கு, தலைமாலை பொருந்தும்
செஞ்சடை உடைய சிவபெருமான் வாழும் பதியாகிய மயிலாடுதுறை மேம்பட்ட தலமாகும்.
வள்ளன்மையுடையான் உகந்தருளும் இடமுமாம்.
பாடல்
எண் : 2
உரவெம்
கரியின் உரிபோர்த்த
பரமன்
உறையும் பதிஎன்பர்
குரவஞ்
சுரபுன் னையும்வன்னி
மருவும்
மயிலா டுதுறையே.
பொழிப்புரை :வலிமை பொருந்திய
கொடியயானையைக் கொன்று அதன் தோலைப் போர்த்த பரமன் உறையும் பதி, குராமரம், சுரபுன்னை வன்னி ஆகிய மரங்கள் செறிந்த
திருமயிலாடுதுறை என்னும் திருத்தலமாகும்.
பாடல்
எண் : 3
ஊனத்து
இருள்நீங் கிடவேண்டில்
ஞானப்
பொருள்கொண்டு அடிபேணும்,
தேன்ஒத்து
இனியான் அமருஞ்சேர்வு
ஆனம்
மயிலா டுதுறையே.
பொழிப்புரை :இப்பிறப்பில்
நமக்குள்ள குறைபாடாகிய ஆணவம் என்னும் இருள் நம்மை விட்டு நீங்க வேண்டில், ஞானப்பொருளாய் உள்ள சிவபெருமான்
திருவடிகளை வணங்குங்கள். தேனை ஒத்து இனியனாய் விளங்கும் அப்பெருமான் தனக்குச்
சேர்வான மயிலாடுதுறையில் விரும்பி உறைகிறான்.
பாடல்
எண் : 4
அஞ்சுஒண்
புலனும் அவைசெற்ற
மஞ்சன்
மயிலா டுதுறையை
நெஞ்சுஒன்
றிநினைந்து எழுவார்மேல்
துஞ்சும்
பிணி ஆயினதானே.
பொழிப்புரை :ஐம்பொறிகளைப் பற்றும்
ஒள்ளிய புலன்களாகிய அவைகளைக் கெடுத்த பெருவீரனாகிய சிவபெருமான் எழுந்தருளிய மயிலாடுதுறையை
மனம் ஒன்றி நினைந்து வழிபட எழுவார் மேல் வரும் பிறவி முதலாகிய பிணிகள்
அழிந்தொழியும்.
பாடல்
எண் : 5
தணிஆர்
மதிசெஞ் சடையான்,தன்
அணிஆர்ந்
தவருக்கு அருள்,என்றும்
பிணியா
யினதீர்த்து அருள்செய்யும்
மணியான்
மயிலா டுதுறையே.
பொழிப்புரை :குளிர்ந்த பிறைமதியை
அணிந்துள்ள சிவந்த சடை முடியை உடையவனாகிய சிவபெருமானை அணுகியவருக்கு என்றும் அருள்
உளதாம். பிணி முதலானவற்றைப் போக்கி அருள்புரியும் மணி போன்றவனாய் அப்பெருமான்
மயிலாடுதுறையில் உள்ளான்.
பாடல்
எண் : 6
தொண்டர்
இசைபா டியுங்கூடிக்
கண்டு
துதிசெய் பவன்ஊராம்
பண்டும்
பலவே தியர்ஓத
வண்டுஆர்
மயிலா டுதுறையே.
பொழிப்புரை :தொண்டர்களாயுள்ளவர்கள்
கூடி இசை பாடியும், தரிசித்தும்
துதிக்கும் சிவபெருமானது ஊர் முற்காலத்தும் இக்காலத்தும் வேதியர்கள் வேதங்களை
ஓதித்துதிக்க, வண்டுகள் ஒலிக்கும்
சோலைகள் சூழ்ந்த மயிலாடுதுறையாகும்.
பாடல்
எண் : 7
அணங்கோடு
ஒருபா கம்அமர்ந்து
இணங்கி
அருள்செய் தவன்ஊராம்
நுணங்கும்
புரிநூ லர்கள்கூடி
வணங்கும்
மயிலா டுதுறையே.
பொழிப்புரை :உமையம்மையை ஒரு
பாகமாக விரும்பி ஏற்று வீற்றிருந்து அருள் புரிபவன் ஊர், முப்புரி நூல் துவளும் அந்தணர்கள் கூடி
வணங்கும் திருமயிலாடுதுறை ஆகும்.
பாடல்
எண் : 8
சிரங்கை
யினில்ஏந் திஇரந்த
பரங்கொள்
பரமேட் டிவரையால்
அரங்க
அரக்கன் வலிசெற்ற
வரங்கொள்
மயிலா டுதுறையே.
பொழிப்புரை :பிரமகபாலத்தைக்
கையில் ஏந்திப் பலர் இல்லங்களிலும் சென்று இரந்த மேன்மை கொண்டவன் சிவபிரான். கயிலை
மலையால் இராவணனை நெரியுமாறு அடர்த்த நன்மையாளனாகிய அப்பெருமானை அடியவர் வணங்கி
நன்மைகளைப் பெறும் தலம் திருமயிலாடுதுறை.
பாடல்
எண் : 9
ஞாலத்
தைநுகர்ந் தவன்தானும்
கோலத்து
அயனும் அறியாத
சீலத்
தவன்ஊர் சிலர்கூடி
மாலைத்
தீர்மயிலா டுதுறையே.
பொழிப்புரை :உலகை விழுங்கித் தன்
வயிற்றகத்தே வைத்த திரு மாலும்,
அழகிய
நான்முகனும் அறியாத தூயவனாகிய சிவபெருமானது ஊர், அடியவர் ஒருங்கு கூடி வழிபட்டுத் தம்
அறியாமை நீங்கப் பெறும் சிறப்புடைய திருமயிலாடுதுறை ஆகும்.
பாடல்
எண் : 10
நின்றுண்
சமணும் நெடுந்தேரர்
ஒன்றும்
ஆறியா மைஉயர்ந்த
வென்றி
அருள் ஆனவன்ஊராம்
மன்றல்
மயிலா டுதுறையே.
பொழிப்புரை :நின்றுண்பவர்களாகிய
சமணர்களும் நெடிதுயர்ந்த புத்தர்களும் ஒரு சிறிதும் தன்னை அறியாதவர்களாய் ஒழியத்
தான் உயர்ந்த வெற்றி அருள் இவைகளைக் கொண்டுள்ள சிவபெருமானது ஊர் நறுமணம் கமழும்
திருமயிலாடுதுறை ஆகும்.
பாடல்
எண் : 11
நயர்கா
ழியுள்ஞா னசம்பந்தன்
மயல்தீர்
மயிலா டுதுறைமேல்
செயலால்
உரைசெய் தனபத்தும்
உயர்வுஆம்
இவைஉற்று உணர்வார்க்கே.
பொழிப்புரை :ஞானத்தினால்
மேம்பட்டவர் வாழும் சீகாழிப்பதியுள் வாழும் ஞானசம்பந்தன், தன்னை வழிபடுவாரின் மயக்கத்தைத்
தீர்த்தருளும் மயிலாடுதுறை இறைவனைப் பற்றித் திருவருள் உணர்த்தும் செயலால்
உரைத்தனவாகிய இத்திருப்பதிகப் பாடல் களாகிய இவை பத்தும் உற்றுணர்வார்க்கு உயர்வைத்
தரும்.
திருச்சிற்றம்பலம்
3. 070 திருமயிலாடுதுறை பண் - சாதாரி
திருச்சிற்றம்பலம்
பாடல்
எண் : 1
ஏனஎயிறு
ஆடுஅரவொடு என்புவரி
ஆமைஇவை பூண்டு
இளைஞராய்க்
கானவரி
நீடுஉழுவை அதள்உடைய
படர்சடையர்
காணிஎனலாம்,
ஆனபுகழ்
வேதியர்கள் ஆகுதியின்
மீதுபுகை போகிஅழகார்
வானம்உறு
சோலைமிசை மாசுபட
மூசுமயி லாடுதுறையே.
பொழிப்புரை : சிவபெருமான்
பன்றியின் கொம்பும் , படமெடுத்து ஆடும்
பாம்பும் , எலும்பும் , வரிகளையுடைய ஆமையோடும் அணிந்து , இளைஞராய் , காட்டில் வாழும் , வரிகளையுடைய புலித் தோலை ஆடையாக
உடுத்தவர் . படர்ந்து விரிந்த சடையுடைய அச்சிவ பெருமானைக் கண்டு தரிசிப்பதற்குரிய
இடம் , புகழ்மிக்க
அந்தணர்கள் வளர்க்கும் வேள்வியிலிருந்து எழும்புகை , அழகிய தேவலோகத்திலுள்ள கற்பகச்சோலை மீது
அழுக்குப்படப் படியும் திருமயிலாடுதுறை என்னும் திருத்தலமாகும் .
பாடல்
எண் : 2
அந்தண்மதி
செஞ்சடையர் அம்கண்எழில்
கொன்றையொடு அணிந்து
அழகராம்,
எந்தம்அடி
கட்குஇனிய தானம்அது
வேண்டில்எழில்
ஆர்பதிஅதாம்,
கந்தமலி
சந்தினொடு கார்அகிலும்
வாரிவரு காவிரிஉளால்
வந்ததிரை
உந்திஎதிர் மந்திமலர்
சிந்துமயி
லாடுதுறையே.
பொழிப்புரை : சிவபெருமான் அழகிய
குளிர்ந்த சந்திரனை அணிந்த சிவந்த சடையையுடையவர் . அச்சடையிலே அழகிய கொன்றை மாலையை
அணிந்த அழகரான எம் சிவபெருமான் வீற்றிருந்தருளும் இனிய இடம் திருமயிலாடுதுறை
என்னும் திருத்தலமாகும் . அத்திருத்தலமானது மணம் கமழும் சந்தனமரங்களோடு , கரிய அகில் மரங்களையும் வாரிக் கொண்டு
வரும் காவிரியின் அலைகள் தம்மேல் நீர்த்திவலை வீசுவதால், அதனைக் கோபித்து அதற்கு எதிராக, கரையோரத்துச் சோலைகளிலுள்ள குரங்குகள்
மலர்களை வீசுகின்ற தன்மையுடன் திகழ்வதாகும்.
பாடல்
எண் : 3
தோளின்மிசை
வரிஅரவ நஞ்சுஅழல
வீக்கிமிகு
நோக்குஅரியராய்
மூளைபடு
வெண்தலையில் உண்டுமுது
காடுஉறையும்
முதல்வர்இடமாம்
பாளைபடு
பைங்கமுகு செங்கனி
நிரந்துகமழ்பூ
வாளைகுதி
கொள்ளமடல் விரியமண
நாறுமயி லாடுதுறையே.
பொழிப்புரை : சிவபெருமான் , தோளின்மீது வரிகளையுடைய பாம்பு நஞ்சை
உமிழுமாறு , அதனை இறுக அணிந்தவர்
. எண்ணுதற்கு அரியவராய் விளங்குபவர் . மூளை நீங்கிய பிரமகபாலத்தில் பலியேற்று
உண்டு சுடுகாட்டில் வசிப்பவர் . எப்பொருட்கும் முதல்வரான அச்சிவபெருமான்
வீற்றிருந்தருளும் இடம் , காவிரியிலுள்ள
வாளைமீன்கள் கரையோரங்களிலுள்ள பாளைபொருந்திய பசிய கமுக மரங்களில் பாய , அவை சிவந்த பழங்களை உதிர்க்க , அதனால் பூ இதழ்கள் விரிய நறுமணம் கமழும்
திருமயிலாடுதுறை என்னும் திருத்தலமாகும் .
பாடல்
எண் : 4
ஏதம்இலர், அரியமறை மலையர்மகள்
ஆகிய இலங்குநுதல்ஒண்
பேதைதட
மார்பதுஇட மாகஉறை
கின்றபெரு
மானதுஇடமாம்,
காதன்மிகு
கவ்வையொடு மவ்வல்அவை
கூடிவரு காவிரிஉளால்
மாதர்மறி
திரைகள்புக எறியவெறி
கமழுமயி லாடுதுறையே.
பொழிப்புரை : சிவபெருமான் எவ்விதக்
குற்றமுமில்லாதவர். அரிய வேதங்களை அருளிச் செய்து அவற்றின் பொருளாகவும்
விளங்குபவர் . மலையரசன் மகளான ,
ஒளி
பொருந்திய வளைந்த நெற்றியையுடைய உமாதேவியின் அகன்ற மார்பு தன் இடப்பகுதியாக
உறைகின்ற சிவபெருமான் வீற்றிருந்தருளும் இடமாவது , ஆரவாரித்து வரும் அலைகள் மூலம் மல்லிகை
முதலிய நறுமணமலர்கள் கூடிவரும் காவிரியில் நீராட மாதர்கள் புக , மணமற்ற பொருள்களும் மணம் கமழப்பெறும்
திருமயிலாடுதுறை என்னும் திருத்தலமாகும் .
பாடல்
எண் : 5
பூவிரி
கதுப்பின்மட மங்கையர்
அகந்தொறு
நடந்துபலிதேர்
பாவிரி
இசைக்குஉரிய பாடல்பயி
லும்பரமர் பழமைஎனலாம்,
காவிரி
நுரைத்துஇரு கரைக்குமணி
சிந்தவரி வண்டுகவர
மாவிரி
மதுக்கிழிய மந்திகுதி
கொள்ளுமயி
லாடுதுறையே.
பொழிப்புரை : மலர்ந்த பூக்களைக்
கூந்தலில் சூடியுள்ள , தாருகாவனத்து
முனிபத்தினிகளின் இல்லங்கள்தோறும் சென்று பிச்சையெடுத்துப் பண்ணோடு கூடிய பாடல்களை
இசைக்கும் சிவபெருமான் மிகப் பழமையானவர் . காவிரியின் அலைகள் இரு கரைகளிலுமுள்ள
சோலைகளில் இரத்தினங்களைச் சிதற ,
அதனால்
அஞ்சி மந்திகள் குதிக்க , மரக்கிளைகளில் மோதி , மாமரத்தில் கட்டப்பட்ட தேன்கூடுகள்
கிழியத் தேன் சிந்த , அதனை வண்டுகள்
கவர்ந்துண்ணும் வளமிக்க திருமயிலாடுதுறையில் சிவபெருமான் வீற்றிருந்தருளுகின்றார்
.
பாடல்
எண் : 6
கடந்திகழ்
கருங்களிறு உரித்துஉமையும்
அஞ்சமிக
நோக்குஅரியராய்,
விடந்திகழும்
மூவிலைநல் வேல்உடைய
வேதியர்
விரும்பும்இடமாம்,
தொடர்ந்துஒளிர்
கிடந்ததுஒரு சோதிமிகு
தொண்டைஎழில்
கொண்டதுவர்வாய்
மடந்தையர்
குடைந்தபுனல் வாசமிக
நாறுமயி லாடுதுறையே.
பொழிப்புரை : சிவபெருமான் மதம்
பொருந்திய கரிய யானையின் தோலை உரித்து உமாதேவி அஞ்சுமாறு போர்த்திக் கொண்டவர் .
மனத்தால் எண்ணுதற்கு அரியவர் . பகைவர்கட்குக் கேடு விளைவிக்கும் மூவிலைச் சூலம்
கொண்டவர் . வேதங்களை அருளிச் செய்து வேதப்பொருளாகவும் விளங்குபவர் . அப்பெருமான்
விரும்பி வீற்றிருந்தருளும் இடமாவது ஒளிர்கின்ற மேனியும் , கொவ்வைப் பழம் போல் அழகிய சிவந்த வாயும்
கொண்ட தேவமகளிர் நீரைக் குடைந்து ஆடுவதால் நீர் நறுமணம் கமழும் சிறப்புடைய திருமயிலாடுதுறை
என்னும் திருத்தலமாகும் .
பாடல்
எண் : 7
அவ்வதிசை
யாரும்அடி யாரும்உளர்
ஆகஅருள் செய்து,அவர்கள்மேல்
எவ்வம்அற
வைகலும் இரங்கிஎரி
ஆடும்எமது ஈசன்இடமாம்
கவ்வையொடு
காவிரி கலந்துவரு
தென்கரை
நிரந்துகமழ்பூ
மவ்வலொடு
மாதவி மயங்கிமண
நாறுமயி லாடுதுறையே.
பொழிப்புரை : அந்தந்தத்
திக்குகளிலுள்ள எல்லா அடியவர்களும் நல்ல வண்ணம் வாழும் பொருட்டு அருள்செய்து , அவர்களுடைய வினைகள் நீங்க நாள்தோறும்
இரங்கித் தீயேந்தி ஆடுகின்ற எம் இறைவனான சிவபெருமான் வீற்றிருந்தருளும் இடம் , ஆரவாரத்தோடு வரும் காவிரி - மணமிக்க
மல்லிகை , மாதவி முதலான
மலர்களைத் தள்ளிவர நறுமணம் கமழும் அதன் தென்கரையிலுள்ள திருமயிலாடுதுறை என்னும்
திருத்தலமாகும் .
பாடல்
எண் : 8
இலங்கைநகர்
மன்னன்முடி ஒருபதினொடு
இருபதுதொள்
நெரியவிரலால்
விலங்கலில்
அடர்த்துஅருள் புரிந்தவர்
இருந்தஇடம்
வினவுதிர்களேல்,
கலங்கல்நுரை
உந்திஎதிர் வந்தகயம்
மூழ்கிமலர்
கொண்டுமகிழா
மலங்கிவரு
காவிரி நிரந்துபொழி
கின்றமயி லாடுதுறையே.
பொழிப்புரை : இலங்கை மன்னனான
இராவணனின் பத்து முடிகளையும் , இருபது தோள்களையும்
நெரியும்படி தன்காற் பெருவிரலைக் கயிலைமலையில் ஊன்றி அடர்த்துப் பின் அவனுக்கு
அருள்புரிந்தவர் சிவபெருமான் . அப்பெருமான் வீற்றிருந்தருளும் இடம் , கலங்கலோடு நுரையைத் தள்ளி , எதிரேயுள்ள குளத்தில் பாய்ந்து அங்குள்ள
மணமிக்க மலர்களை அடித்துக் கொண்டு களிப்புடன் சுழித்து வருகின்ற காவிரியாறு
பாய்வதால் வளமிக்க திருமயிலாடுதுறை என்னும் திருத்தலமாகும்.
பாடல்
எண் : 9
ஒண்திறலின்
நான்முகனும் மாலும்மிக
நேடிஉண ராதவகையால்
அண்டம்உற
அங்கிஉரு வாகிமிக
நீண்டஅர னாரதுஇடமாம்,
கெண்டைஇரை
கொண்டுகெளிறு ஆர்உடன்
இருந்துகிளர்
வாய்அறுதல்சேர்
வண்டல்மணல்
கெண்டிமட நாரைவிளை
யாடுமயி லாடுதுறையே.
பொழிப்புரை : மிகுந்த வலிமையுடைய
பிரமனும் , திருமாலும் தேடியும்
உணரமுடியாவண்ணம் , ஆகாயம்வரை அளாவி
நெருப்புப் பிழம்பாய் நீண்டு நின்ற சிவபெருமான் வீற்றிருந்தருளும் இடமாவது , கெண்டைமீனை இரையாக உண்டு , கெளிறு , ஆரல் முதலிய மீன்கள் விளங்குகின்ற
ஆற்றின் கரையிலுள்ள நாரை , தண்ணீர் அறுத்தலால்
உண்டான வண்டல் மண்ணைக் கிளறி விளையாடும் திருமயிலாடுதுறை என்னும் திருத்தலமாகும் .
பாடல்
எண் : 10
மிண்டுதிறல்
அமணரொடு சாக்கியரும்
அலர்தூற்ற
மிக்கதிறலோன்
இண்டைகுடி
கொண்டசடை எங்கள்பெரு
மானதுஇடம்
என்பர்எழிலார்,
தெண்திரை
பரந்துஒழுகு காவிரிய
தென்கரை
நிரந்துகமழ்பூ
வண்டுஅவை
திளைக்கமது வந்துஒழுகு
சோலைமயி லாடுதுறையே.
பொழிப்புரை : துடுக்காகப்
பேசுகின்ற சமணர்களும் , புத்தர்களும்
பழித்துக்கூற , அவர்கள் அறிவிற்கு
அப்பாற்பட்ட ஆற்றலுடையவனும் , இண்டைமாலை சூடிய
சடைமுடி உடையவனுமான எங்கள் சிவபெருமான் வீற்றிருந்தருளும் இடமாவது , தெள்ளிய அலைகள் உடன் பாயும்
காவிரியாற்றின் தென்கரையில் மணமிக்க பூக்களில் வண்டுகள் மூழ்கியுண்ண , தேன் வெளிப்பட்டு ஒழுகுகின்ற சோலைகளையுடைய
அழகிய திருமயிலாடுதுறை என்னும் திருத்தலமாகும் .
பாடல்
எண் : 11
நிணந்தரு
மயானம்நிலம் வானமதி
யாததுஒரு
சூலமொடுபேய்க்
கணந்தொழு
கபாலிகழல் ஏத்திமிக
வாய்த்ததுஒரு
காதன்மையினால்,
மணந்தண்மலி
காழிமறை ஞானசம்
பந்தன்மயி
லாடுதுறையைப்
புணர்ந்ததமிழ்
பத்துமிசை யால்உரைசெய்
வார்பெறுவர்
பொன்உலகமே.
பொழிப்புரை : இறந்தார் உடலின்
கொழுப்புப் பொருந்திய சுடுகாட்டில் , பூவுலகிலும்
, வானுலகிலும் உள்ள
வீரர் எவரையும் பொருட்படுத்தாத சிறப்புடைய சூலப்படையோடு , பேய்க்கூட்டங்கள் தொழ , பிரமகபாலத்தை ஏந்தியுள்ள சிவபெருமானின்
திருவடிகளை வணங்கி மிக்க அன்புடன் ,
நறுமணமும்
, குளிர்ச்சியும்
பொருந்திய சீகாழியில் அவதரித்த வேதங்களின் உட்பொருளை நன்குணர்ந்த ஞானசம்பந்தன் , திருமயிலாடுதுறையைப் போற்றிப் பாடிய இத்
தமிழ்ப்பாக்கள் பத்தினையும் இசையோடு பாடுகிறவர்கள் சொர்க்கலோகம் அடைவர் .
திருச்சிற்றம்பலம்
திருநாவுக்கரசர்
திருப்பதிக வரலாறு
பெரிய
புராணப் பாடல் எண் : 190
மேவுபுனல்
பொன்னிஇரு கரையும் சார்ந்து
விடைஉயர்த்தார்
திருச்செம்பொன் பள்ளி பாடி,
காஉயரும்
மயிலாடு துறை,நீள் பொன்னிக்
கரைத்துருத்தி, வேள்விக்குடி, எதிர்கொள் பாடி,
பாவுறு
செந்தமிழ்மாலை பாடிப் போற்றி,
பரமர்திருப்
பதிபலவும் பணிந்து போந்தே,
ஆவுறும்அஞ்சு
ஆடுவார் கோடி காவில்
அணைந்து,பணிந்து, ஆவடுதண் துறையைச்
சார்ந்தார்.
பொழிப்புரை : நீர் இடையறாது
பொருந்திய காவிரி ஆற்றின் இரு கரைகளிலும் சேர்ந்து, ஆனேற்றுக் கொடியை உயர்த்திய சிவபெருமானின்
திருச்செம்பொன்பள்ளியினைப் பாடிச் சோலைகள் உயர்ந்து சூழ்ந்த திருமயிலாடுதுறையையும், காவிரியின் இரு கரைகளிலும் உள்ள
திருத்துருத்தி - திருவேள்விக்குடியையும், திருஎதிர்கொள்பாடியையும் தொழுது
செந்தமிழ்ப் பதிகங்களான பாமாலைகளால் போற்றி, இறைவரின் திருப்பதிகள் பலவற்றையும்
பணிந்து சென்று, ஆன் ஐந்தையும் ஆடும்
சிவபெருமானின் திருக்கோடிக்காவை அடைந்து, வணங்கிச்
சென்று, திருவாவடுதுறையைச்
சேர்ந்தார்.
இங்கு முதற்கண்
குறிக்கப்பட்ட திருப்பதிகள் ஐந்தாம். இவ்விடங்களில் பாடப்பெற்ற திருப்பதிகங்கள்:
1. திருச்செம்பொன்
பள்ளி:
இது இக்காலத்துச் செம்பொனார்கோயில் என வழங்கப் பெறுகிறது.
(அ). `ஊனினுள் உயிரை` (தி.4 ப.29) - திருநேரிசை.
(ஆ) `கானறாத` (தி.5 ப.36) - திருக்குறுந்தொகை.
2. திருமயிலாடுதுறை:
`கொள்ளும் காதல்` (தி.5 ப.39) - திருக்குறுந்தொகை.
3. 3+4. திருத்துருத்தியும்
திருவேள்விக்குடியும்: இறைவன் பகலில் திருத்துருத்தியிலும் இரவில்
வேள்விக்குடியிலும் எழுந்தருளியிருப்பர். இதனால் இவ்விரு திருப்பதிகளையும் இணைத்தே
ஞானசம்பந்தரும் சுந்தரரும் பாடியுள்ளனர். நாவரசர் திருத்துருத்தி ஒன்றற்கே பதிகம்
பாடியுள்ளார். `பொருத்திய` (தி.4 ப.42) - திருநேரிசை.
4. திருஎதிர்கொள்பாடிக்கு
உரிய பதிகம் கிடைத்திலது. இனி, இப்பதிகளோடு `பரமர் திருப்பதி பலவும் பணிந்து போந்தே` என ஆசிரியர் அருளுவதால், இதுபொழுது பாடிய பதிகள் வேறு பிறவும்
உளவாம் எனத் தெரிகிறது.
அவையாவன:
1. திருஅன்னியூர் :
`பாறலைத்த` (தி.5 ப.8) - திருக்குறுந்தொகை.
2. திருமணஞ்சேரி:
`பட்டநெற்றியர்` (தி.5 ப.87) - திருக்குறுந்தொகை.
இப்பாடலில்
ஆசிரியர் நிறைவாக இருபதிகளைக் குறிக்கின்றார். அவை:
1. திருக்கோடிக்கா: (அ).
`நெற்றிமேல்` (தி.4 ப.51) - திருநேரிசை.
(ஆ). `சங்குலாம்` (தி.5 ப.78) -திருக்குறுந்தொகை. (இ).
கண்டலஞ்சேர் (தி.6 ப.81) -திருத்தாண்டகம்.
2. திருவாவடுதுறை: இப்பதியில் அருளிய
பதிகங்கள் வரும் பாடலில் குறிக்கப் பெறுகின்றன.
5. 039 திருமயிலாடுதுறை திருக்குறுந்தொகை
திருச்சிற்றம்பலம்
பாடல்
எண் : 1
கொள்ளும்
காதன்மை பெய்துறும் கோல்வளை
உள்ளம்
உள்கி உரைக்கும் திருப்பெயர்
வள்ளல்
மாமயி லாடு துறைஉறை
வெள்ளம்
தாங்கு சடையனை வேண்டியே.
பொழிப்புரை : மயிலாடுதுறையில்
உறைகின்ற வள்ளலும் , கங்கை வெள்ளம்
தாங்கிய சடையனுமாகிய பெருமானை விரும்பிக் காதல் கொள்ளும் இயல்புடைய திரண்ட வளைகள்
பெய்யப்பட்ட இப்பெண் உள்ளத்தால் உள்கி அப்பெருமான் திருப்பெயரையே உரைக்கும்
தன்மையள் ஆயினள் .
பாடல்
எண் : 2
சித்தந்
தேறும் செறிவளை சிக்கெனும்
பச்சை
தீரும்என் பைங்கொடி, பால்மதி
வைத்த
மாமயி லாடு துறைஅரன்
கொத்தி
னிற்பொலி கொன்றை கொடுக்கிலே.
பொழிப்புரை : சடையின்கண் வெண்பிறை
வைத்த பெருமை பொருந்திய மயிலாடுதுறைத் தலத்து இறைவனது கொத்தாகப் பொலியும் கொன்றை
மலரினைக் கொடுத்தால் தன் சித்தம் தெளிந்து , உடல் பூரித்து வளைகளைச் செறிப்பாள் என்
பைங்கொடியாகிய இவள் தன் பச்சைவண்ணமும் நீங்கிப் பழைய நிறம் பெறுவாள் .
பாடல்
எண் : 3
அண்டர்
வாழ்வும் அமரர் இருக்கையும்
கண்டு
வீற்றிருக் கும்கருத்து ஒன்றுஇலோம்
வண்டு
சேர்மயி லாடு துறைஅரன்
தொண்டர்
பாதங்கள் சூடித் துதையிலே.
பொழிப்புரை : வண்டுகள் சேர்ந்த
மயிலாடுதுறைத் தலத்து இறைவனுக்குத் தொண்டுசெய்யும் அடியார் திருப்பாதங்களைச்
சூடிச் செறிந்துகொண்டால் , தேவ உலக வாழ்வும் , தேவர்களது பதவி இன்பங்களும் கண்டு
வீற்றிருக்கும் கருத்து எமக்குச் சிறிதும் இல்லை .
பாடல்
எண் : 4
வெஞ்சி
னக்கடுங் காலன் விரைகிலான்,
அஞ்சு
இறப்பும் பிறப்பும் அறுக்கலாம்,
மஞ்சன்
மாமயி லாடு துறையுறை
அஞ்சொ
லாள்உமை பங்கன் அருளிலே.
பொழிப்புரை : பெருவீரம் உடையானும் , பெருமைக்குரிய மயிலாடுதுறையில் உறையும்
அழகிய சொல்லை உடையானாகிய உமைபங்கனும் ஆகிய பெருமான் அருளினால் வெவ்விய சினத்தை
உடையனாய் விரைந்துவரும் காலன் நம்மிடம் விரைய மாட்டான் ; அஞ்சத்தகுவனவாகிய இறப்பும் பிறப்பும்
அறுக்கலாம் .
பாடல்
எண் : 5
குறைவி
லோம்கொடு மாநுட வாழ்க்கையால்,
கறைநி
லாவிய கண்டன்,எண் தோளினன்,
மறைவ
லான்,மயி லாடு துறைஉறை
இறைவன்
நீள்கழல் ஏத்தி இருக்கிலே.
பொழிப்புரை : திருநீலகண்டனும் , எட்டுத் தோளினனும் , வேதம் வல்லவனுமாகிய மயிலாடுதுறை உறையும்
இறைவன் நீண்ட கழல்களை ஏத்தி இருந்தால் , கொடிய
மானிட வாழ்க்கையால் வருகின்ற குறைவு சிறிதும் இல்லாதவராவோம்.
பாடல்
எண் : 6
நிலைமை
சொல்லு நெஞ்சே, தவம் என்செய்தாய்
கலைகள்
ஆயவல்லான், கயிலாய நன்
மலையன், மாமயி லாடுதுறையன், நம்
தலையின்
மேலும் மனத்துளும் தங்கவே.
பொழிப்புரை : கலைகளை ஆய வல்லவனும் , கயிலாயமலை உடையவனுமாகிய பெருமானின்
நிலையை சொல்லும் நெஞ்சமே ! பெருமைக்குரிய மயிலாடுதுறை இறைவன் நம்தலையின் மேலும்
மனத்துள்ளும் தங்குதற்கு எத்துணைப் பெருந்தவம் நீ செய்துள்ளாய் !
பாடல்
எண் : 7
நீற்றி
னான்,நிமிர் புன்சடை யான்,விடை
ஏற்றி
னான்,நமை ஆளுடை யான்,புலன்
மாற்றி
னான்,மயிலாடு துறைஎன்று
போற்று
வார்க்கும்உண் டோபுவி வாழ்க்கையே.
பொழிப்புரை : திருநீறணிந்தவனும் , நிமிர்தலுற்ற பொலிவுற்ற சடையினனும் , விடையாகிய ஏற்றினை உடையவனும் , நம்மை ஆளுடையவனும் , புலன்களின் நெறியை மாற்றியவனுமாகிய
மயிலாடுதுறை என்று போற்றுகின்ற அடியார்கட்குத் துயரம் மிகுந்த இவ்வுலக வாழ்க்கை
உண்டோ ?
பாடல்
எண் : 8
கோலும்
புல்லும் ஒருகையில் கூர்ச்சமும்
தோலும்
பூண்டு துயரம்உற்று என்பயன்,
நீல
மாமயி லாடு துறையனே,
நூலும்
வேண்டுமோ நுண்உணர்ந் தோர்கட்கே.
பொழிப்புரை : நீல நிறம் உடைய கரிய
மயில்கள் ஆடும் துறையினை உடையவனே ! முக்கோலும் , தருப்பைப்புல்லும் , ஒரு கையில் கூர்ச்சமும் , தோலும் பூண்டு துயரம் அடைந்து பயன் யாது
? நுண்ணுணர்வுடையோர்க்கு
நூலும் வேண்டுமோ ?
பாடல்
எண் : 9
பணங்கொள்
ஆடுஅரவு அல்குல் பகீரதி
மணங்கொ
ளச்சடை வைத்த மறையவன்,
வணங்கு
மாமயி லாடு துறைஅரன்
அணங்கொர்
பால்கொண்ட கோலம் அழகிதே.
பொழிப்புரை : படத்தினைக் கொண்டு
ஆடுகின்ற அரவனைய அல்குலை உடைய கங்கையை , மணம்கமழும்படி
சடையின் கண் வைத்த மறைவடிவானவனும்,
வணங்கியெழும்
மயிலாடுதுறை உறைபவனுமாகிய இறைவன் அம்மையினை ஒருபாகத்தே கொண்டு அருள்செய்யும்
திருக்கோலம் மிக அழகியதாகும் .
பாடல்
எண் : 10
நீள்நி
லாஅர வச்சடை நேசனைப்
பேணி
லாதவர் பேதுறவு ஓட்டினோம்,
வாள்நி
லாமயி லாடு துறைதனைக்
காணில்
ஆர்க்கும் கடுந்துயர் இல்லையே.
பொழிப்புரை : நீண்ட நிலவினையும் , அரவத்தையும் சடையில் விரும்பிச்
சூடியுள்ளவனைப் பேணாதவர் பேதுறும்படி விலக்கினோம்; ஒளிபொருந்திய மயிலாடுதுறையினைக் காணில், ஆர்க்கும் கடுந்துயரங்கள் இல்லை .
பாடல்
எண் : 11
பருத்த
தோளும் முடியும் பொடிபட
இருத்தி
னான்அவன் இன்னிசை கேட்டலும்
வரத்தி
னான், மயி லாடு துறைதொழும்
கரத்தி
னார்வினைக் கட்டுஅறும் காண்மினே.
பொழிப்புரை : இராவணனது பருத்த
தோள்களும் முடிகளும் தூளாகுமாறு இருத்தினவனும் , அவனது இன்னிசையைக் கேட்டலும் வரம்
அருளியவனும் ஆகிய பெருமானை , மயிலாடுதுறையில்
தொழும் கரத்தினை உடையவர்கள் வினை ,
கட்டற்றுப்போகும்
காண்பீராக.
திருச்சிற்றம்பலம்