திருத்தணிகை - 0315. வெற்றி செய உற்ற

அருணகிரிநாதர் அருளிய

திருப்புகழ்

வெற்றி செயவுற்ற (திருத்தணிகை)

திருத்தணிகை வேலா!

பத்தி நெறியை எனக்கு அருள் புரிந்து,  

முத்தி நலத்தை வழங்கி, 

 உயர்ந்த மரகத மயிலின் மீது வந்து அருள்.

தத்ததன தத்ததன தத்ததன தத்ததன

     தத்ததன தத்த தனதான

வெற்றிசெய வுற்றகழை விற்குதைவ ளைத்துமதன்

     விட்டகணை பட்ட ...... விசையாலே

வெட்டவெளி யிற்றெருவில் வட்டபணை யிற்கனல்வி

     ரித்தொளிப ரப்பு ...... மதியாலே

பற்றிவசை கற்றபல தத்தையர்த மக்குமிசை

     பட்டதிகி ரிக்கு ...... மழியாதே

பத்தியையெ னக்கருளி முத்தியைய ளித்துவளர்

     பச்சைமயி லுற்று ...... வரவேணும்

நெற்றிவிழி பட்டெரிய நட்டமிடு முத்தமர்நி

     னைக்குமன மொத்த ...... கழல்வீரா

நெய்கமல மொக்குமுலை மெய்க்குறவி யிச்சையுற

     நித்தமிறு கத்த ...... ழுவுமார்பா

எற்றியதி ருச்சலதி சுற்றியதி ருத்தணியில்

     எப்பொழுது நிற்கு ...... முருகோனே

எட்டசல மெட்டநில முட்டமுடி நெட்டசுரர்

     இட்டசிறை விட்ட ...... பெருமாளே.

பதம் பிரித்தல்

வெற்றி செய உற்ற கழை வில் குதை வளைத்து, மதன்

     விட்ட கணை பட்ட ...... விசையாலே,

வெட்ட வெளியில் தெருவில் வட்ட பணையில் கனல்

     விரித்து ஒளி பரப்பு ...... மதியாலே,

பற்றி வசை கற்ற பல தத்தையர் தமக்கும் இசை

     பட்ட திகிரிக்கும் ...... அழியாதே,

பத்தியையெ எனக்கு அருளி, முத்தியை அளித்து, வளர்

     பச்சைமயில் உற்று ...... வரவேணும்.

நெற்றி விழி பட்டு எரிய நட்டம் இடும் உத்தமர்

     நினைக்கும் மனம் ஒத்த ...... கழல்வீரா!

நெய் கமலம் ஒக்கு முலை, மெய்க் குறவி இச்சை உற,

     நித்தம் இறுகத்  ...... தழுவும் மார்பா!

எற்றிய திருச்சலதி சுற்றிய திருத்தணியில்

     எப்பொழுதும் நிற்கும் ...... முருகோனே!

எட்டு அசலம் எட்ட, நிலம் முட்ட, முடி நெட்டு அசுரர்

     இட்ட சிறை விட்ட ...... பெருமாளே.

பதவுரை

      நெற்றி வழிபட்டு எரிய --- நெற்றிக் கண்ணின் தீ பட்டு (மன்மதன் எரிந்துபோக),

     நட்டம் இடும் உத்தமர் --- திரு நடனம் புரிந்தவராகிய சிவபெருமான்,

     நினைக்கு மனம் ஒத்த --- உம்மைத் தியானிக்க அவர் திருவுள்ளத்தில் பொருந்திய,

     கழல் வீரா --- திருவடிகளையுடைய வீரரே!

      நெய் கமலம் ஒக்கும் முலை --- தேன் பொருந்திய தாமரையின் மொக்கு போன்ற தனத்தைஉடைய,

     மெய் குறவி இச்சை உற --- உண்மை நிலையில் நின்ற வள்ளிபிராட்டி அன்புகொள்ள,

     நித்தம் இறுக தழுவும் மார்பா --- நாள்தோறும் கெட்டியாகத் தழுவுகின்ற திருமார்பை உடையவரே!

      எற்றிய திரு சலதி சுற்றிய --- அலைவீசும் அழகிய நீர் நிலை சூழ்ந்த,

     திருத்தணியில் --- திருத்தணிகை மலையில்,

     எப்பொழுதும் நிற்கும் -- எந்நாளும் வீற்றிருக்கும்,

     முருகோனே --- முருகக் கடவுளே!

      எட்டு அசலம் எட்ட -- எட்டு மலைகள் வரை எட்டிப் பரவவும்,

     நிலம் முட்ட --- நிலம் முழுவதும்,

     முடி நெட்டு --- தங்கள் முடிச் சின்னத்தை வைத்து அரசு புரிந்த,

     அசுரர் இட்ட சிறைவிட்ட --- அசுரர்கள் இட்ட தேவர்களது சிறையை விடுவித்த,

     பெருமாளே --- பெருமையின் மிகுந்தவரே!

      வெற்றி செய உற்ற --- வெற்றியைத் தரவல்ல,

     கழை வில் குதை வளைத்து --- கரும்பு வில்லின் முனையை வளைத்து,

     மதன் விட்ட --- மன்மதன் செலுத்திய,

     கணை பட்ட விசையாலே --- கணைகள் உடலின்மீது பட்ட வேகத்தாலும்,

     வெட்ட வெளியில் --- வெட்ட வெளியிடங்களிலும்,

     தெருவில் --- தெருக்களிலும்,

     வட்ட பணையில் --- வட்டமான பறைபோல் விளங்கி,

     கனல் விரித்து --- நெருப்பை வீசி,

     ஒளி பரப்பும் மதியாலே --- ஒளியைப் பரப்புகின்ற  சந்திரனும்,

     பற்றி வசை --- வசை மொழிகளைக் கொண்டு,

     கற்ற --- அவ்வசை மொழிகளையே பயின்ற,

     பல தத்தையர் தமக்கும் --- கிளியை யொத்த பல மாதர்களின் வசை மொழியாலும்,

     இசைப்பட்ட திகிரிக்கும் --- இசையை எழுப்பும் புல்லாங் குழலாலும்,

     அழியாதே --- நான் மெலிவுற்று அழியாமல்,

     பத்தியை எனக்கு அருளி --- பத்திநெறியை எனக்குத் தந்தருளி,

     முத்தியை அளித்து --- முத்தியையும் அருள் செய்து,

     வளர்பச்சை மயில் உற்று வரவேணும் --- வளர்கின்ற மயில்மீது ஏறி வரவேண்டும்.

பொழிப்புரை

         நெற்றிக் கண்ணின் நெருப்பினால் மன்மதனை எரித்தவரும், திருநடனம் புரிகின்ற உத்தமருமாகிய சிவமூர்த்தி, உம்மைத் தியானிக்க, அவரது திருவுள்ளத்தில் எழுந்தருளியுள்ள திருவடிகளையுடைய வீரரே!

     தேன் பொருந்திய தாமரையின் மொட்டு போன்ற தனத்தையுடைய, உண்மை நிலையில் நின்ற வள்ளிநாயகி அன்பு கொள்ள, தினந்தோறும் கெட்டியாகத் தழுவுகின்ற திருமார்பினரே!

     அலை வீசுகின்ற அழகிய நீர் நிலைகள் சூழ்ந்த திருத்தணிகை மலைமீது எப்போதும் வீற்றிருக்கின்ற முருகக் கடவுளே! தி

     சைகளிலுள்ள எண்கிரிகள் வரையிலும் பரவவும், நிலம் முழுவதும் தங்கள் அரசாட்சியைச் செலுத்திய அசுரர்கள் இட்ட தேவர்களின் சிறையை விடுவித்த பெருமிதம் உடையவரே!

         வெற்றியைத் தரவல்ல கரும்புவில்லை வளைத்து மன்மதன் விட்ட மலர்க் கணைகள் பட்ட வேகத்தாலும் வெட்ட வெளிகளிலும், வீதிகளிலும், வட்டமான பறை போல் விளங்கி, நெருப்பை வீசி ஒளி செய்கின்ற சந்திரனாலும், வசைமொழிகளைப் பற்றிக் கொண்டு, அம்மொழிகளையே கிளிபோன்ற பல பெண்களின் வசைமொழியாலும், இசையுடன் கூடிய புல்லாங் குழலாலும், நான் அழியாதபடி, பத்தி நெறியை எனக்கு அருள்புரிந்து, முத்தி நலத்தை வழங்கி, உயர்ந்த மரகத மயிலின் மீது வந்து அருள் புரிவீராக.

விரிவுரை

இத்திருப்புகழ் அகப்பொருள் துறையில் பாடியது. ஆன்மாவாகிய நாயகி பரமான்மாவாகிய முருகனை நாயகனாக அடையும் பொருட்டு விரகதாபத்தால் முறையிடும் முறையில் அமைந்தது.

வெற்றி செயவுற்ற கழை விற்குதை வளைத்து மதன் ---

மன்மதன் அமரர்மீது மலர் வில்லும், மனிதர்மீது கரும்பு வில்லும் அரக்கர் மீது இரும்பு வில்லும் தரித்துப் போர் புரிவான்.

மால், அயன், இந்திரன் சந்திரன், தேவர், முனிவர் முதலியவர்களைத் தன் வில்லினால் வெற்றி பெற்றவன்.

    

விட்ட கணைபட்ட விசையாலே ---

சந்திரனுடைய ஒளி வெட்ட வெளியில் நன்கு வீசுகின்றது.

தெருவில் ---

வீதிகளிலும் அவ்வொளி வீசுகின்றது.

வட்ட பணையில் ---

பணை-பறை. பறைபோல் வட்ட வடிவில் சந்திரன் திகழ்கின்றான்.

கனல் விரித்தொளி பரப்பு மதியாலே ---

சந்திரனுடைய குளிர்ந்த அமிர்த கிரணம் மற்றவர்க்குத் தட்பமாக இருக்கும். தலைவனைப் பிரிந்த தலைவிக்கு அது நெருப்பாக இருக்கும்.

  “வாரி மீதே எழு          திங்களாலே

       மாரவேள் ஏவிய     அம்பினாலே

 பார் எலாம் ஏசிய          பண்பினாலே

       பாவியேன் ஆவி     மயங்கலாமோ”    --- திருப்புகழ்

பற்றி வசை கற்றபல தத்தையர் தமக்கும் ---

தலைவனை விரும்பி தலைவி தவிக்கும்போது, அவளுடைய நிலைமையைக் கண்ட மாதர்கள் வசைமொழி கூறி ஏசுவார்கள். அவர்கள் அவ்வசைமொழியை நன்கு கற்றவர்கள்.

தத்தை-கிளி. கிளிபோல் கொஞ்சிப் பேசி இகழ்வார்கள்.

       “ஓராத அனையர் கொடு வசைபேச”

       “தெருவினில் நடவா மடவார் திரண்டொறுக்கும் வசையாலே”    --- திருப்புகழ்

இசைபட்ட திகிரிக்கும் அழியாதே ---

திகிரி-மூங்கில்.

இயற்கையான இசைக் கருவி புல்லாங்குழல். முதன் முதலாகப் புல்லாங்குழலை இசைத்தவர் முருகவேள்.

“குழலன் கோட்டான் குறும்பல் இயத்தன்”            --- திருமுருகாற்றுப்படை

இந்தக் குழலோசை இனிமையானது. “குழலினிது” என்கிறார் திருவள்ளுவர்.

இக்குழலோசை காமுகர்க்கு வேதனையைத் தரும்.

மன்மதனுடைய கணை நிலவொளி. மாதர்களின் வசை, குழலோசை இத்தனையும் சேர்ந்து முருகா! உன்னை நினைந்து உருகும் தலைவியாகிய என்னை வருத்துகின்றன.

 “இரவி என, வடவை என, ஆலால விடம் அது என,

   உருவுகொடு ககனமிசை மீது ஏகி மதியும்வர,

     இரதிபதி கணைகள் ஒரு நால் ஏவ, விருது குயில் அது கூவ,

ஏழுகடலின் முரசின் இசை, வேய் ஓசை, விடையின் மணி

   இசை குறுகி, இரு செவியில் நாராசம் உறுவது என

     இகல்புரிய, மதனகுரு ஓராத அனையர் கொடு வசைபேச,

       அரகர என வனிதைபடு பாடு ஓத அரிதுஅரிது”         --- திருப்புகழ்

பத்தியை எனக்கருளி ---

இவ்வாறு நான் உன்மீது காதலால் வருந்தாவண்ணம் முருகா! பத்தி நெறியைத் தந்தருள்வாய்.

முத்தியை யளித்து ---

பக்தியால் வருவது முக்தி.

     “ஆனபய பக்தி வழிபாடு பெறுமுத்தி அது

    ஆக நிகழ் பக்தஜன வாரக்காரனும்”      --- திருவேளைக்காரன் வகுப்பு

பச்சை மயிலுற்று வரவேணும் ---

அடியேனுக்குப் பத்தியும் முத்தியும் தரும் பொருட்டு பச்சை மயிலேறி வந்தருள்வாய்.

நெற்றி விழி பட்டெரிய ---

மன்மதன் இறைவன்மீது மலர்க்கணை சொரிந்தபோது சிவபெருமான், நெற்றிக் கண்ணால் அவனைச் சாம்பராக எரித்தருளினார்.

இந்த அருள் தன்மையான வீரச் செயலை உலகிற்கு உணர்த்துந் தலம் திருக்குறுக்கை.

இத்தலம் அட்ட வீரட்டானங்களில் ஒன்று. இது மாயூரத்துக்கு அருகில் உள்ள சிவத்தலம். தருமையாதீனத்தின் ஆட்சியில் உள்ளது. மிகத் தூய்மையாக விளங்குகின்றது.

சிவலிங்கம் கம்பீரமாகத் திகழ்கின்றது. இங்குள்ள நடன சபையின் பேர் காமாங்க நாசனி சபை. மிக அழகாக விளங்குகின்றது. சபைக்கு எதிரில் அருள் பெற்ற மன்மதன் இரதி தேவியுடன் வணங்கியவண்ணம் நிற்கின்றான்.

இத்தலத்து இறைவர் திருநாமம் யோகீச்சுரர். இங்கு கடுக்காய் தல விருட்சம். அதனால் கடுவனம் என்ற பெயரும் உண்டு.

எந்தத் தலத்துக்குச் சென்றாலும் தமது கரத்தை நீட்டி ஆகாய கங்கையை எடுத்து வழியிடும் நியதியுடையவர் தீர்க்கவாகு என்ற முனிவர். இத்தலத்துக்கு வந்து வழிபட முயன்ற அவர் கை குறுகிவிட்டது. அதனால் குறுங்கை முனிவர் ஆனார்.

அதனால் அவர் வருந்தினார். விநாயகர், “முனியே! வருந்தற்க. யாமும் குறுகிய கையுடன் இருக்கின்றோம். அதனால் குறுங்கை விநாயகர் என்பர். இத்தீர்த்தம் சூல தீர்த்தம். இது ஆகாயகங்கையினும் புனிதமானது. இத்தீர்த்தத்தால் இறைவனை வழிபடுவாயாக” என்று விநாயகர் அருளிச் செய்தார்.

தீர்க்கவாகு என்ற முனிவருடைய கை குறுகியபடியால் இத்தலம் திருக்குறுக்கை என வழங்கலாயிற்று. முனிவர் சூல தீர்த்தத்தால் இறைவனை வழிபட்டு அருள் பெற்றார்.

நட்டமிடும் உத்தமர் ---

காமதகனம் புரிந்து சிவபெருமான் நடனம் ஆடியருளினார்.

நினைக்கும் மனமொத்த கழல் வீரா ---

சிவபெருமான் திருத்தணியில் முருகவேளின் திருவடியைச் சித்தத்தில் வைத்துத் தியானம் புரிந்தார்.

   மத்தப்ர மத்தமணி மத்தச் சடைப்பரமர்

   சித்தத்தில் வைத்த கழலோனே.           --- (முத்துத்தெறிக்க) திருப்புகழ்

நெய்கமலம் ஒக்கு முலை ---

நெய்-தேன் தேன் சொரிகின்ற தாமரையின் மொட்டு தனத்துக்கு உவமை.

இறுகத்தழுவு மணிமார்பா ---

இறைவன் சக்தியுடன் கூடுவது உலகம் வளர்ச்சியெய்தி இன்புறும் பொருட்டு.

தென்பால் உகந்து ஆடும் தில்லைச் சிற்றம்பலவன்

பெண்பால் உகந்தான் பெரும்பித்தன் காணேடீ,

பெண்பால் உகந்திலனேல் பேதாய்! இருநிலத்தோர்

விண்பால் யோகுஎய்தி வீடுவர்காண் சாழலோ.           --- திருவாசகம்

   “தறுகண் சிறுகண் சங்கராம சயில சரசவல்லி

  இறுகத் தழுவும் கடகாசலபன் னிருபுயனே”          --- கந்தரலங்காரம்.

எற்றிய திருச்சலதி சுற்றிய திருத்தணி:-

நீர்நிலைகள் சூழ்ந்து அலைகள் வீசி வளஞ்செய்கின்ற நாட்டில் திருத்தணி விளங்குகின்றது. அருகில் நந்தியாறும், அநேக ஏரிகளும் குளங்களும், சுனைகளும் சூழ்ந்திருக்கின்றன.

எப்பொழுது நிற்கும் முருகோனே ---

திருத்தணியில் எந்நாளும் நீங்காது உறைகின்றான் முருகன்.

எட்ட சலமுட்ட முடிநெட்ட சுரர் ---

சூராதி அவுணருடைய ஆட்சி எட்டு குலகிரி வரையும் நிலவுலக முழுவதும் பரவியிருந்தது.

இட்ட சிறைவிட்ட பெருமாளே ---

சூரன் தேவர்களையும் தேவமாதர்களையும் சிறைப்படுத்தினான். முருகவேள் தேவர்களின் சிறை தீர்த்தருளினார்.

தேவர் சிறை தீர்த்த தேவன் தமது உடற் சிறையையும் தீர்த்தருளுவான்.

       “ஏழையின் இரட்டை வினை ஆயதொர் உடல் சிறை

    இராமல் விடுவித்து அருள் நியாயக்காரனும்”     --- திருவேளைக்காரன் வகுப்பு.

கருத்துரை

தேவர் சிறை தீர்த்த திருத்தணி முருகா! உன்னை விரும்பும் நாயகியான என்னை ஆட்கொண்டருளுவீர்.