திருத்தணிகை - 0314. வினைக்கு இனம் ஆகும்

அருணகிரிநாதர் அருளிய

திருப்புகழ்

வினைக்கு இனமாகும் (திருத்தணிகை)

திருத்தணிகை வேலா!

பிறவிக் குழியில் விழுந்து வேதனைப்பட்டு அழியாமல்,

உன் திருப்புகழை ஓதி உய்ய அருள்

தனத்தன தானம் தனத்தன தானம்

     தனத்தன தானம் ...... தனதான

வினைக்கின மாகுந் தனத்தினர் வேளம்

     பினுக்கெதி ராகும் ...... விழிமாதர்

மிகப்பல மானந் தனிற்புகு தாவெஞ்

     சமத்திடை போய்வந் ...... துயர்மூழ்கிக்

கனத்தவி சாரம் பிறப்படி தோயுங்

     கருக்குழி தோறுங் ...... கவிழாதே

கலைப்புல வோர்பண் படைத்திட வோதுங்

     கழற்புக ழோதுங் ...... கலைதாராய்

புனத்திடை போய்வெஞ் சிலைக்குற வோர்வஞ்

     சியைப்புணர் வாகம் ...... புயவேளே

பொருப்பிரு கூறும் படக்கடல் தானும்

     பொருக்கெழ வானும் ...... புகைமூளச்

சினத்தொடு சூரன் கனத்திணி மார்பந்

     திறக்கம ராடுந் ...... திறல்வேலா

திருப்புக ழோதுங் கருத்தினர் சேருந்

     திருத்தணி மேவும் ...... பெருமாளே.

பதம் பிரித்தல்

வினைக்கு இனம் ஆகும் தனத்தினர், வேள் அம்-

     பினுக்கு எதிர் ஆகும் ...... விழிமாதர்,

மிகப் பல மானம் தனில் புகுதா வெம்

     சமத்திடை போய் வெம் ...... துயர் மூழ்கி,

கனத்த விசாரம் பிறப்பு அடி தோயும்,

     கருக்குழி தோறும் ...... கவிழாதே,

கலைப் புலவோர் பண் படைத்திட ஓதும்

     கழல் புகழ் ஓதும் ...... கலைதாராய்.

புனத்து இடை போய், வெம் சிலைக் குறவோர், வஞ்-

     சியைப் புணர் வாகுஅம் ...... புயவேளே!

பொருப்பு இரு கூறும் பட, கடல் தானும்

     பொருக்கு எழ, வானும் ...... புகைமூள,

சினத்தொடு சூரன் கனத் திணி மார்பம்

     திறக்க அமராடும் ...... திறல்வேலா!

திருப்புகழ் ஓதும் கருத்தினர் சேரும்

     திருத்தணி மேவும் ...... பெருமாளே.

பதவுரை

      புனத்து இடை போய் --- தினைப்புனத்தின் நடுவில் சென்று,

     வெம் சிலை குறவோர் --- வெப்பமாகிய போருக்கு உரிய வில்லைத் தாங்கிய வேடர்களின் மகளாகிய,

     வஞ்சியைப் புணர் --- கொடி போன்ற வள்ளி நாயகியைத் தழுவுகின்ற,

     வாகு அம்புய --- மிக்க அழகிய தோள்களையுடையவரே!

      வேளே --- உபகாரியே;

      பொருப்பு இருகூறும் பட --- கிரவுஞ்சமலை இரு பிளவாகுமாறும்,

     கடல் தானும் பொருக்கு எழ --- சமுத்திரம் வற்றி துகள் படுமாறும்,

     வானும் புகை மூள --- விண்ணில் புகை மூளுமாறும்,

     சினத்தொடு --- சீற்றத்துடன்,

     கன திணி மார்பம் திறக்க --- சூரபன்மனுடைய வலிமையும் திண்மையுமுடைய மார்பு திறந்து அழியுமாறும்,

     அமர் ஆடும் திறல் வேலா --- போர் புரிந்த வலிமை மிகுந்த வேலாயுதரே!

      திருப்புகழ் ஓதும் கருத்தினர் சேரும் --- திருப்புகழைப் பண்ணுடன் ஓதுகின்ற எண்ணமுடைய அடியார்கள் கூடுகின்ற,

     திருத்தணி மேவும் --- திருத்தணியம்பதியில் வாழுகின்ற,

     பெருமாளே --- பெருமையில் மிகுந்தவரே!

      வினைக்கு இனம் ஆகும் --- தீவினைகட்கு இனமாக நிற்கும்,

     தனத்தினர் --- தனங்களையுடையவர்,

     வேள் அம்பினுக்கு எதிர் ஆகும் விழி மாதர் --- மன்மதனுடைய கணைக்கு இணையாக நின்று துன்பத்தைத் தரும் விழிகளையுடைய பொதுமாதர்களின்,

     மிக பல மானந்தனில் புகுதா -- மிகுதியான பல வகைப்பட்ட அவமானச் செயல்களில் புகுந்து,

     வெம் சமத்திடை போய் --- அவர்களுடைய சாகசப் போரில் அகப்பட்டு,

     வெம் துயர் மூழ்கி --- வெம்மையான துன்பத்துக்குள் முழுகி,

     கனத்த விசாரம் --- பெரிய கவலை தரும்,

     பிறப்பு அடி தோயும் --- பிறவிக்கு அடி நிலையாகிய

     கரு குழி தோறும் கவிழாதே --- கருவாகிய குழிதோறும் அடியேன் அழுந்தாமல்,

     கலை புலவோர் --- கலை கற்ற புலவர்,

     பண் படைத்திட ஓதும் --- இசை அமையுமாறு பாடுகின்ற,

     கழல் புகழ் ஓதும் கலை தாராய் --- வீரக்கழல் அணிந்த திருவடியின் புகழை ஓதும் திறத்தினை அடியேனுக்கு அருள் புரிவீர்.

பொழிப்புரை

         தினைப்புனத்தினிடை சென்று வெப்பமான வில்லை ஏந்திய வேடர்களின் புதல்வியாகிய வள்ளியம்மையைத் தழுவிய அழகிய தோள்களையுடையன் உபகாரியே!

     கிரவுஞ்ச மலை இரண்டு பிளவாகுமாறும், சமுத்திரம் வற்றித் துகள் படுமாறும் வானத்திலே புகை எழுமாறும், கோபத்துடன் வந்த சூரபன்மனுடைய மிகுந்த வலிமையுள்ள மார்பு பிளக்குமாறும் போர் புரிந்த ஆற்றல் படைத்த வேலாயுதரே!

     திருப்புகழை ஓதுகின்ற அடியார்கள் கூடுகின்ற திருத்தணிமலை மீது எழுந்தருளிய பெருமிதம் உடையவரே!

         வினைகட்கு இனமாக நிற்கும் தனங்களை உடையவர்களும், மன்மதனுடைய பாணத்திற்கு நிகரான கண்களை உடையவர்களும், ஆகிய பொது மகளிரது, மிகுந்த பலவகையான அவமானச் செயல்களில் புகுந்து, அம்மாதருடைய கொடிய சாகசத்துக்குள் சென்று வெய்ய துன்பத்துள் முழுகி, மிகுந்த துயரத்தைத் தரும் பிறவியின் அடிப்படையான கருவின் குழிதோறும் அழுந்த உழலாதபடி, கலைகள் கற்ற புலவர்கள் இசையுடன் ஓதுகின்ற உமது கழலடியின் புகழை அடியேன் ஓதுகின்ற ஞானத்தைத் தந்தருளுவீர்.

      

விரிவுரை

வினைக்கு இனமாகும் தனத்தினர் ---

பல வினைகட்கு உறவாக நிற்பது பொதுமகளிரது தனங்கள். தனத்தை விரும்பி தனத்தைத் தேடும் பொருட்டு, பலப்பல தீமைகளை மாந்தர் புரிகின்றார்கள்.

மிகப்பல மானந்தனில் புகுதா ---

பலப்பல அவமானத்தைத் தரும் செயல்களில் மாந்தர் ஈடுபட்டு கேடுறுகின்றார்கள். பொது மகளிர் உறவால் இம்மையில் பழியும், மறுமையில் பாவமும் எய்தும்.

வெஞ்சமத்திடை போய் வெந்துயர் மூழ்கி ---

தான் விரும்பிய ஒருத்தியை மற்றொருவன் விரும்பி வருவான் அதனால் அவனுடன் பலத்த சண்டை நிகழும்; மண்டையும், பொருளும் போய் ஊரவர் கூறும் வசைமொழியும் பலவகையான பிணிகளும் மூடி வருந்துவார்கள்.

கனத்த விசாரம் பிறப்படி தோயும் கருக்குழி தோறும் கவிழாதே ---

மோக விசாரத்தால் பெரிய துயரத்தையடைந்து, அவ்வினைக் கீடாக கருக்குழி தோறும் சென்று பல்வேறு பிறவியெடுத்து ஆன்மாக்கள் அல்லல்படும்.

கலைப்புலவோர் பண் படைத்திட வோதும் கழற்புகழோதும் ---

பல கலைகள் கற்ற புலவர்கள் இன்னிசையுடன் முருகனுடைய திருவடியைப் புகழ்ந்து பாடுவார்கள். அவ்வண்ணம் புலவர்கள் புகழ்கின்ற முருகவேளின் திருவடியைப் புகழ்ந்து பாடுகின்ற கலையே சிறந்த கலை. அதனைத் தனக்கு அருளுமாறு அடிகளார் இத்திருப்புகழில் வேண்டுகிறார்.

புனத்திடை போய் ---   

புனம் என்பது ஞானப்பயிர்.

வஞ்சி ---

வள்ளியென்பது பக்குவப்பட்ட ஆன்மா. ஞானப் பயிர் விளைத்த பக்குவமுற்ற ஆன்மாவை முருகன் தன்னுடன் இரண்டறக் கலக்குமாறு கருணைபுரிகிறான். ஒவ்வொரு ஆன்மாவும் வள்ளியைப் போல் முருகனையடைந்து அப்பரம நாயகனுடன் கலந்து இன்புறுதல் வேண்டும்.

பொருப்பு இரு கூறும் பட ---

கிரவுஞ்சமலை இருபிளவாக முருகன் வேலை விடுத்தருளினான். அது ஆன்மாக்களின் கஞ்சிதவினைக் கூட்டம். வினைக் கூட்டம் பொடிபட வேலை விடுத்தனன்.

கடல் தானும் பொருக்கெழ ---

வேலின் வெப்பத்தால் கடல் திடலாகியது. பிறவிப் பெருங்கடல் வற்றிவிட்டது.

சூரன் கனத்திணி மார்பந் திறக்க ---

ஆணவமலம் பிளவுபட்டு அழிந்தது. சூரன்-ஆணவம்.

கருத்துரை

திருத்தணி மலையுறை தேவனே! உமது திருப்புகழ் பாட அருள் புரிவாய்.