3. நன்மக்கட் பேறு
தம்
குலம் விளங்கிடப் பெரியோர்கள் செய்துவரு
தருமங்கள் செய்து வரலும்,
தன்மமிகு தானங்கள் செய்தலும், கனயோக
சாதகன் எனப்படுதலும்,
மங்குதல்
இலாத தன் தந்தைதாய் குருமொழி
மறாது வழிபாடு செயலும்,
வழிவழி வரும் தமது தேவதா பத்தி புரி
மார்க்கமும், தீர்க்க ஆயுளும்,
இங்கித
குணங்களும், வித்தையும், புத்தியும்,
ஈகையும், சன்மார்க்கமும்
இவையெலாம் உடையவன் புதல்வனாம்; அவனையே
ஈன்றவன் புண்யவானாம்;
அங்கச
விரோதியே! சோதியே! நீதிசேர்
அரசன்எம தருமை மதவேள்
அனுதினமும் மனதில்நினை தருசதுர கிரிவளர்
அறப்பளீ சுரதே வனே!
இதன்
பொருள் ---
அங்கச விரோதியே - மன்மதனை அழித்தவனே!,
சோதியே - ஒளி வடிவு ஆனவனே!,
நீதி சேர் அரசன் எமது அருமை மதவேள் அனுதினமும்
மனதில் நினைதரு - நீதிமுறை தவறா அரசனான எமது
அருமை மதவேள் நாள்தோறும்
உள்ளத்தில் வழிபடுகின்ற,
சதுரகிரிவளர் அறப்பளீசுர தேவனே - சதுர
கிரியில் எழுந்தருளிய அறப்பளீசுர தேவனே!,
தம் குலம் விளங்கிடப் பெரியோர்கள் செய்துவரு
தருமங்கள் செய்து வரலும் - தமது குலமானது புகழ் பெற்று விளங்க மேலோர்கள் செய்து
வருகின்ற அறச்செயல்களை விடாது செய்து வருதலும்,
தன்மம் மிகு தானங்கள் செய்தலும் - பொருள் ஈட்டும்
வலிமை அற்று வறியவர்களாய் உள்ளவர்க்குச் செய்யும் தருமமும், நல்லோர்க்கு உதவும் தானமும் ஆகிய
இவற்றைச் செய்து வருவதும்,
கன யோக சாதகன் எனப்படுதலும் - உயிருக்குப்பெருமை
தருவதான யோக சாதனையிலே நிற்பவன் என்று பேர் எடுத்தலும்,
மங்குதல் இலாத தன் தந்தைதாய் குருமொழி மறாது
வழிபாடு செயலும் - அன்பில் என்றும் குன்றாத தனது தாய் தந்தையர், குரு ஆகியோருடைய அறிவுரைகளைத் தட்டாமல் செய்து, அவர்களுக்கு வழிபாடு
ஆற்றி வருதலும்,
வழிவழி வரும் தமது தேவதா பத்திபுரி
மார்க்கமும் - வழிவழியாகச் செய்து வரும் தங்கள் குலத்தக்கு ஏற்ற தெய்வ வழிபாட்டு
நெறியில் நிற்றலும்,
தீர்க்க ஆயுளும் - நீண்ட வாழ்நாளைப் பெற்றவனாகவும்,
இங்கித குணங்களும் - நற்பண்புகள் நிறைந்தவனாகவும்,
வித்தையும் - கல்வியும்,
புத்தியும் - அதனால் விளைகின்ற நல்ல அறிவும்,
ஈகையும் - கொடைக் குணமும்,
சன்மார்க்கமும் - நல்லொழுக்க நெறியிலே நிற்பதும்,
இவையெலாம் உடையவன் புதல்வன் ஆம் - இவைகளை எல்லாம்
உடையவனே நன்மகன் ஆவான்,
அவனை ஈன்றவனே புண்யவான் ஆம் - அத்தகு நல்ல மகனைப்
பெற்றவனே புண்ணியத்தை உடையவன் ஆவான்.