திருத் துருத்தி
சோழ நாட்டு, காவிரித் தென்கரைத் திருத்தலம்.
மக்கள் வழக்கில் "குத்தாலம்" என்று
வழங்கப்படுகின்றது.
மயிலாடுதுறை - கும்பகோணம் சாலையில்
மயிலாடுதுறையில் இருந்து 9 கி. மீ. தொலைவிலும், கும்பகோணத்தில் இருந்து 24 கி. மீ. தொலைவிலும் குத்தாலம் என்ற
ஊரில் இத்திருத்தலம் அமைந்துள்ளது. திருவேள்விக்குடி, திருஎதிர்கொள்பாடி, திருமணஞ்சேரி ஆகியவை
இத்திருத்தலத்திற்கு அருகில் உள்ளன.
இறைவர்
: உத்தரவேதீஸ்வரர், சொன்னவாறு அறிவார், கற்றளி மகாதேவர்
இறைவியார் :
மிருதுமுகிழாம்பிகை, பரிமள சுகந்த நாயகி,
அரும்பன்ன வனமுலையாள்
தல
மரம் : குத்தால மரம் (ஒருவகை ஆத்தி
மரம்)
தீர்த்தம் : காவிரி தீர்த்தம், சுந்தர தீர்த்தம், பத்மதீர்த்தம், வடகுளம்
தேவாரப்
பாடல்கள்: 1. சம்பந்தர் -1. வரைத்தலைப் பசும்,
2. ஓங்கிமேல் உழிதரும்.
2. அப்பர்
- 1. பொருத்திய குரம்பை தன்னை.
3. சுந்தரர் - 1. மின்னுமா மேகங்கள்,
2. மூப்பதும் இல்லை
பிறப்பதும்
திருவாவடுதுறை தலத்தில் அம்பாள் பசு
வடிவம் நீங்கப் பெற்று சுய உருவம் அடைந்ததும் சிவபெருமான் காட்சி அளித்தார். ஆனால்
திருமணம் நடைபெறவில்லை. அம்பாளுக்கு இன்னொரு பணி காத்திருந்தது. அருகிலுள்ள
குத்தாலத்தில் தவம் செய்து வந்த பரதமா முனிவருக்கு அவர் விரும்பியபடி அம்பாள்
வேள்விக் குண்டத்தில் இறைவன் விருப்பப்படி ஒரு பெண்ணாகப் பிறந்தாள். ஈஸ்வரனை
திருமணம் செய்து கொள்ளும் பொருட்டு தினமும் காவிரிக்குச் சென்று ந்தியில்
நடுவிலிருந்த மணல் மேட்டில் சிவலிங்கம் பிரதிஷ்டை செய்து வழிபட்டு வந்தாள். 8-ம் நாள் இறைவன் அங்கு இலிங்க வடிவில்
தோன்றி லிங்கத்தில் இருந்து வெளிப்பட்டு அம்பிகையின் கரம் பற்றினார். அம்பிகை
நாணம் கொண்டு "சாத்திரங்களில் கூறப்பட்டுள்ளபடி தாய் தந்தையர், உற்றார் உறவினர் சூழ என்னைத் திருமணம்
முடிக்க வேண்டும்" என்று கூறினாள். உன் விருப்பப்படியே நம் திருமணம் நடக்கும்
என்று ஈசன் கூற அம்பிகை முனிவரின் ஆசிரமம் அடைந்தாள். இனைவன் தாமே சொல்லிய
விதியின்படி தான் திருமணம் செய்து கொள்வதாக அம்பாளுக்கு வாக்களித்து அதன் படியே
நடந்து கொண்டதால் இறைவன் நாமம் சொன்னவாரறிவார் என்றாயிற்று.
இத்திருத்தலத்தின் தலவிருட்சம் உத்தால
மரம் என்ற ஒரு வகை ஆத்தி மரம். அம்மரம் குடையாக அமைய அம்பாளைத் திருமணம் செய்து
கொள்ள சுவாமி மணவாளநாதராக எழுந்தருளினார். அம்மரத்தினடியில் இன்றும் இரண்டு
பாதுகைகள் இருப்பதைக் காணலாம். எனவே இத்தலம் உத்தாலவனம் என்று பெயர் பெற்று பின்
மருவி குத்தாலம் என்றாயிற்று. தற்போது குத்தாலம் என்று அறியப்படும் இத்தலம்
தேவாரப் பதிகம் பாடப் பெற்ற காலத்தில் துருத்தி என்று வழங்கப்பட்டது. துருத்தி
என்றால் ஆற்றின் இடையில் உள்ள தீவு என்று பொருள் படும். திருநாவுக்கரசர் தனது
பதிகத்தின் 3-ஆவது பாடலில் "பொன்னியி னடுவு தன்னுட் பூம்புனல்
பொலிந்து தோன்றும் துன்னிய துருத்தி
யானைத் தொண்டனேன் கண்ட வாறே" என்று
குறிப்பிடுவதால் இவ்வூர் கி.பி. ஏழாம் நூற்றாண்டில் காவிரி நதியின் இடையில் ஒரு
தீவாக இருந்திருக்க வேண்டும் என்பது புலனாகிறது.
சுந்தரரும் இத்தலத்து இறைவன் மேல்
பதிகம் பாடி இருக்கிறார். சங்கிலி நாச்சியாருக்கு திருவொற்றியூரில் செய்து கொடுத்த
சத்தியத்தை மீறி அவளைப் பிரிந்து சென்றதால் இரண்டு கண்களையும் இழந்து உடல் நலிந்து
திருத்துருத்தி வந்திருக்கிறார். காஞ்சிபுரத்தில் இடகண் பார்வையைப் பெற்றாலும், நலிந்த உடலுடன் இத்தலத்திற்கு வந்து
இங்குள்ள இறைவனை மனமுருகி வேண்டி தன்னை மன்னித்தருளும்படி வேண்டினார். இறைவனும்
ஆலயத்தின் வடபாகத்திலுள்ள தாமரைக் குளத்தில் நீராடினால் உன் உடற்பிணி
தீர்ந்துவிடும் என்று அருளினார். சுந்தரரும் அவ்வாறே செய்ய, நீரிலிருந்து எழும்போது முன்னிலும்
பளபளக்கும் திருமேனியுடன் திகழ்ந்தார். அப்போது, திருத்துருத்தியையும், திருவேள்விக்குடியையும் இணைத்து, "மின்னுமா மேகங்கள்"
எனத்
தொடங்கும் திருப்பதிகம் பாடினார். சுந்தரமூர்த்தி நாயனாரின் பிணி தீர்த்ததால்
தாமரைத் தடாகத்திற்கு சுந்தர தீர்த்தம் என்று பெயர் ஏற்பட்டது. தீர்த்தக்கரையில்
சுந்தரருக்கு கோயில் உள்ளது.
ஆலயம் ஊருக்கு நடு நாயகமாக
விளங்குகிறது. 5 நிலை இராஜகோபுரம்
மேற்கு நோக்கி உள்ளது. இரண்டு பிரகாரங்கள் கொண்டது. கோபுர வாயில் வழியாக உள்ளே
நுழைந்தவுடன் கொடிமரம், பலிபீடம் உள்ளன.
வலதுபுறம் தல விருட்சமான உத்தால மரமும் அதை சுற்றி உள்ள பீடமும் உள்ளது. மூலவர்
சந்நிதி மேற்கு பார்த்து அமைந்திருக்கிறது. பக்கத்திலேயே தெற்குப் பார்த்த
இறைவியின் சந்நிதி உள்ளது. இவ்விரு கோவில்களும் தனித்தனியே வலம் வருமாறு தனிப்
பிரகாரங்களோடு அமைந்துள்ளன.
அம்பிகையை மணந்து கொள்ள வந்த இறைவனுக்குத்
துணையாக வந்த விநாயகர் "துணைவந்த விநாயகர்" என்ற பெயருடன் அம்பாள்
சந்நிதிக்கு செல்லும் வழியில் வெளிப் பிரகாரத்தில் தென்மேற்கு மூலையில் கோயில்
கொண்டிருக்கிறார். உட்பிரகாரத்தில் வலஞ்சுழி விநாயகரையும் தரிசிக்கலாம். கிழக்குப்
பிரகாரத்தில் மேற்கு நோக்கி எழுந்தருளியிருக்கும் ஸ்ரீசண்முகரை பார்த்துப் பரவசம்
அடையலாம். அத்தனை கலையழகுடன் இவர் காட்சி அளிக்கிறார். பிரகாரத்தின் வணகிழக்குப்
புறத்தில் நவக்கிரகங்கள், சப்தரிஷீஸ்வரர், சனீஸ்வரர், பைரவர் மற்றும் பஞ்ச லிங்கங்கள் ஆகிய
சந்நிதிகள் உள்ளன.
சுவாமி கருவறை விமானத்திலுள்ள சுதைச்
சிற்பங்கள் யாவும் பெரியவையாகவும்,
கலையழகோடும்
காணப்படுகின்றன.இவற்றை நிதானமாக பார்த்து ரசிக்க வேண்டும். அக்னி பகவான் இத்தலத்து
இறைவனை வழிபட்டு தன் பாபங்களை போக்கிக் கொண்டுள்ளார். காசிபன், ஆங்கிரசன், கௌதமன், மார்க்கண்டேயர், வசிஷ்டர், புலஸ்தியர், அகஸ்தியர் ஆகிய சப்தரிஷிகளும் வழிபட்டு
இத்தலத்தில் பேறு பெற்றுள்ளனர். சூரியன், பரத
முனிவர் ஆகியோரும் இத்தலத்து இறைவனை வழிபட்டு பெறும் பேறு பெற்றிருக்கின்றனர்.
கார்த்திகைத் திங்கள் ஞாயிறு நாள்கள் வழிபாடு
சிறப்பு.
வள்ளல் பெருமான் தாம் பாடி அருளிய விண்ணப்பக்
கலிவெண்பாவில், "பேராக் கரு
திருத்தி ஏத்தும் கருத்தர்க்கு அருள் செய் திருத்துருத்தி இன்பச் செழிப்பே"
என்று போற்றி உள்ளார்.
காலை 9 மணி முதல் பகல் 12 மணி வரையிலும், மாலை 5-30 மணி முதல் இரவு 8-30 மணி வரையிலும் திறந்திருக்கும்.
திருஞானசம்பந்தர்
திருப்பதிக வரலாறு
பெ.
பு. பாடல் எண் : 291
செழுந்திரு
வேள்விக் குடியில் திகழ்மண வாளநல் கோலம்,
பொழிந்த
புனல்பொன்னி மேவும் புனிதத் துருத்தி
இரவில்
தழும்பிய
தன்மையும் கூடத் தண்தமிழ் மாலையில்
பாடிக்
கொழுந்துவெண்
திங்கள் அணிந்தார் கோடி காவில்சென்று
அடைந்தார்.
பொழிப்புரை : அம்மையப்பராகிய
பெருமான், வளம் மிக்க `திருவேள்விக்குடியில்\' வீற்றிருக்கும் மணவாளத் திருக்கோலத்தை, பொய்யாமல் வருகின்ற நீர் வளம் கொண்ட தூய
`திருத்துருத்தியில்' பகலில் காணக்காட்டி, இரவில் இவ்வேள்விக்குடியில்
அக்கோலத்துடனேயே எழுந்தருளிய தன்மையையும் சேர்த்துக் குளிர்ந்த தமிழ்மாலை பாடி, முளைக்கும் கொழுந்தைப் போன்ற வெண்மையான
பிறைச் சந்திரனைச் சூடிய இறைவரின் `திருக்கோடிகா' என்ற திருப்பதிக்குச் சென்று அடைந்தார்.
குறிப்புரை : திருத்துருத்தியையும்
திருவேள்விக்குடியையும் இணைத்து ஒரே பதிகத்தில் பாடப் பெற்றுள்ளன. காரணம், இறைவன் உமையம்மையாருக்குப் பகலில்
திருத்துருத்தியிலும், இரவில்
திருவேள்விக்குடியிலுமாக வீற்றிருந்தருளிக் காட்சி கொடுத்தருளியமையாகும்.
இவ்வகையில் அமைந்த திருப்பதிகம்,
`ஓங்கி
மேலுழிதரு' (தி.3 ப.90) எனத் தொடங்கும் சாதாரிப் பண்ணிலமைந்த
திருப்பதிகமாகும்.
3. 090 திருத்துருத்தி –
திருவேள்விக்குடி பண் - சாதாரி
திருச்சிற்றம்பலம்
பாடல்
எண் : 1
ஓங்கிமேல்
உழிதரும் ஒலிபுனல் கங்கையை ஒருசடைமேல்
தாங்கினார்
இடுபலி தலைகல னாக்கொண்ட தம்அடிகள்,
பாங்கினால்
உமையொடு பகல்இடம் புகலிடம் பைம்பொழில்சூழ்
வீங்குநீர்த்
துருத்தியார் இரவிடத்து உறைவர்வேள்
விக்குடியே.
பொழிப்புரை : சிவபெருமான் , மேன்மேலும் ஒங்கி எழுந்து ஓசையுடன்
பெருக்கெடுத்து வந்த கங்கையாற்றின் வெள்ளத்தை ஒரு சடையில் தாங்கியவர் . இடுகின்ற
பிச்சையை ஏற்கத் தலை யோட்டையே பாத்திரமாகக் கொண்ட தலைவர் . முறைப்படி , பகற்காலத்தில் தங்குமிடமாகப் பசுமையான
சோலைகள் சூழ்ந்ததும் , நீர்ச்செழிப்பு
மிக்கதுமான திருத்துருத்தி என்னும் திருத்தலத்தை உடையவர் . அப்பெருமானே இரவில்
திருவேள்விக்குடி என்னும் திருத்தலத்தில் வீற்றிருந்தருளுகின்றார் .
பாடல்
எண் : 2
தூறுசேர்
சுடலையில் சுடர்எரி ஆடுவர், துளங்கு ஒளிசேர்
நீறுசாந்து
எனஉகந்து அணிவர்,வெண் பிறைபுல்கு
சடைமுடியார்,
நாறுசாந்து
இளமுலை அரிவையோடு ஒருபகல்
அமர்ந்தபிரான்
வீறுசேர்
துருத்தியார் இரவிடத்து உறைவர்வேள்
விக்குடியே.
பொழிப்புரை : சிவபெருமான் , புதர்ச்செடிகள் நிறைந்த சுடு காட்டில்
ஒளிவிடும் நெருப்பேந்தி ஆடுபவர் . விளங்கும் ஒளி யுடைய திருநீற்றினைக் கலவைச்
சந்தனம் போல மகிழ்ச்சியுடன் அணிந்து கொள்பவர் . வெண்மையான பிறைச்சந்திரனை அணிந்த
சடைமுடி உடையவர் . மணம் கமழும் சந்தனக்குழம்பை அணிந்த இளமையான கொங்கைகளையுடைய
உமாதேவியோடு பொருள்வளமிக்க திருத்துருத்தியில் பகற்காலத்தில் தங்கியிருப்பவர் .
இரவில் திருவேள்விக் குடியில் வீற்றிருந்தருள்பவர் .
பாடல்
எண் : 3
மழைவளர்
இளமதி மலரொடு தலைபுல்கு
வார்சடைமேல்
கழைவளர்
புனல்புகக் கண்டஎம் கண்ணுதல்
கபாலியார்தாம்,
இழைவளர்
துகில்அல்குல் அரிவையோடு ஒருபகல்
அமர்ந்தபிரான்,
விழைவளர்
துருத்தியார் இரவிடத்து உறைவர்வேள்
விக்குடியே.
பொழிப்புரை : குளிர்ச்சியான
இளம்பிறையும் , கொன்றை , ஊமத்தை போன்ற மலர்களோடு ஒரு வெண்தலையும்
பொருந்திய நீண்ட சடையின் மீது ,
கரும்பு
முதலிய பயிர்களை வளர்க்கும் கங்கை நதியினைத் தங்கச் செய்த எம் கண்ணுதல் கடவுளாகிய
சிவபெருமான் பிரம கபாலம் ஏந்தியவர் . அவர் இழைகளால் நெய்யப்பட்ட ஆடை யணிந்த
அல்குலையுடைய உமாதேவியோடு பகலில் ,
மேன்மேலும்
தரிசிக்க ஆசைதரும் திருத்துருத்தியில் வீற்றிருந்தருளுவார் . அவரே இரவில்
திருவேள்விக்குடியில் வீற்றிருந்தருளுவார் .
பாடல்
எண் : 4
கரும்புஅன
வரிசிலைப் பெருந்தகைக் காமனைக் கவின்அழித்த,
சுரும்பொடு
தேன்மல்கு தூமலர்க் கொன்றைஅம்
சுடர்ச்சடையார்,
அரும்புஅன
வனமுலை அரிவையொடு ஒருபகல்
அமர்ந்தபிரான்,
விரும்புஇடம்
துருத்தியார் இரவிடத்து உறைவர்வேள்
விக்குடியே
பொழிப்புரை : இறைவன் கரும்பு
வில்லையுடைய பெருந்தகை யாகிய மன்மதனின் அழகிய உடலை அழித்தவர் . வண்டுகள்
மொய்க்கும் , தேன் மணம் கமழும் தூய
கொன்றை மலரை அழகிய ஒளிமிக்க சடைமுடியில் அணிந்தவர் . அவர் தாமரை மொட்டுப் போன்று
அழகிய கொங்கைகளை உடைய உமாதேவியோடு பகலில் விரும்பி வீற்றிருந்தருளும் இடம்
திருத்துருத்தி என்னும் திருத்தல மாகும் . அவரே இரவில் வீற்றிருந்தருளுவது
திருவேள்விக்குடி என்னும் திருத்தலமாகும் .
பாடல்
எண் : 5
வளங்கிளர்
மதியமும், பொன்மலர்க் கொன்றையும், வாள்அரவும்,
களங்கொளச்
சடைஇடை வைத்தஎம் கண்ணுதல், கபாலியார்தாம்,
துளங்குநூன்
மார்பினப், அரிவையொடு ஒருபகல்
அமர்ந்தபிரான்,
விளங்குநீர்த்
துருத்தியார் இரவிடத்து உறைவர்வேள்
விக்குடியே.
பொழிப்புரை : அழகு மிளிரும்
சந்திரனும் , பொன் போன்ற
கொன்றைமலரும் , வாள் போன்று ஒளிரும்
பாம்பும் இருக்குமிடமாகச் சடைமுடியில் வைத்தருளிய , நெற்றிக்கண்ணையுடைய எங்கள் சிவபெருமான்
பிரமகபாலம் ஏந்தியவர் . அசைகின்ற முப்புரி நூலணிந்த மார்பினர் . அவர்
உமாதேவியாரோடு பகலில் நீர்வளமிக்க திருத்துருத்தி என்னும் திருத்தலத்திலும் , இரவில் திருவேள்விக்குடி என்னும்
திருத்தலத்திலும் வீற்றிருந்தருளுவார் .
பாடல்
எண் : 6
பொறிஉலாம்
அடுபுலி உரிவையர், வரிஅராப்
பூண்டுஇலங்கும்
நெறிஉலாம்
பலிகொளும் நீர்மையர், சீர்மையை
நினைப்புஅரியார்,
மறிஉலாம்
கையினர், மங்கையொடு ஒருபகல்
அமர்ந்தபிரான்,
வெறிஉலாம்
துருத்தியார் இரவிடத்து உறைவர்வேள்
விக்குடியே.
பொழிப்புரை : சிவபெருமான்
வரிகளையுடைய கொல்லும் தன்மையுடைய புலித்தோலாடை அணிந்தவர் . நெடிய பாம்பை ஆபரணமாகப்
பூண்டவர் . பிச்சை எடுப்பதை நெறியாகக் கொண்ட தன்மையர் . இத்தகைய எளிமை உடையவர்
ஆயினும் , எவராலும் நினைத்துப்
பார்ப்பதற்கும் அரிய பெருமையுடையவர். மான்கன்று ஏந்திய கையினர் . அத்தகைய பெருமான்
உமாதேவியாரோடு பகலில் , நறுமணம் கமழும்
திருத்துருத்தி என்னும் திருத்தலத்திலும் , இரவில் திருவேள்விக்குடி என்னும்
திருத்தலத்திலும் வீற்றிருந்தருளுகின்றார் .
பாடல்
எண் : 7
புரிதரு
சடையினர், புலிஉரி அரையினர், பொடிஅணிந்து
திரிதரும்
இயல்பினர், திரிபுரம் மூன்றையும்
தீ வளைத்தார்,
வரிதரு
வனமுலை மங்கையொடு ஒருபகல்
அமர்ந்தபிரான்
விரிதரு
துருத்தியார் இரவிடத்து உறைவர்வேள்
விக்குடியே.
பொழிப்புரை : சிவபெருமான்
முறுக்குண்ட சடையினை உடையவர் . புலியின் தோலை அரையில் உடுத்தவர் . திருவெண் நீற்றை
அணிந்து கொண்டு திரியும் இயல்பினர் . திரியும் புரங்கள் மூன்றையும் தீயால்
வளைவித்து எரித்தவர் . சந்தனக் கீற்றுக்கள் எழுதப் பெற்ற அழகிய கொங்கைகளையுடைய
உமாதேவியோடு பகலில் திருத்துருத்தி என்னும் திருத்தலத்திலும் , இரவில் திருவேள்விக்குடி என்னும்
திருத்தலத்திலும் வீற்றிருந்தருளுவார்.
பாடல்
எண் : 8
நீண்டுஇலங்கு
அவிர்ஒளி நெடுமுடி அரக்கன்இந்
நீள்வரையைக்
கீண்டுஇடந்
திடுவன் என்று எழுந்தவன் ஆள்வினை
கீழ்ப்படுத்தார்,
பூண்டநூல்
மார்பினர் அரிவையொடு ஒருபகல் அமர்ந்தபிரான்
வேண்டுஇடம்
துருத்தியார் இரவிடத்து உறைவர்வேள்
விக்குடியே.
பொழிப்புரை : நெடுந்தூரம்
விளங்கிப் பிரகாசிக்கும் இரத்தினங்கள் பதிக்கப்பட்ட பெரிய கிரீடத்தை அணிந்துள்ள
இராவணன் ` இப்பெரிய
கயிலைமலையைப் பெயர்த்தெடுத்து அப் பாலிடுவேன் ` என்று ஆணவத்துடன் எழுந்த அவனது
முயற்சியை அழித்தருளியவர் சிவபெருமான் . அவர் பூணூல் அணிந்த திருமார்பினர் . அவர்
உமா தேவியோடு பகலில் , விரும்பி
வீற்றிருந்தருளும் இடம் திருத்துருத்தி என்னும் திருத்தலமாகும் . இரவில்
திருவேள்விக்குடி என்னும் திருத்தலத்தில் வீற்றிருந்தருளுவார்.
பாடல்
எண் : 9
கரைகடல்
அரவுஅணைக் கடவுளும் தாமரை நான்முகனும்
குரைகழல்
அடிதொழக் கூர்எரி எனநிறம் கொண்டபிரான்
வரைகெழு
மகளொடும் பகல்உடம் புகல்இடம்
வண்பொழில்சூழ்
விரைகமழ்
துருத்தியார் இரவிடத்து உறைவர்வேள்
விக்குடியே.
பொழிப்புரை : ஒலிக்கின்ற கடலில்
பாம்புப் படுக்கையில் துயில்கொள்ளும் திருமாலும் , தாமரை மலரில் வீற்றிருக்கும் பிரமனும் , ஒலிக்கும் வீரக்கழல்களை அணிந்த தம்
திருவடிகளை , செருக்கழிந்து
தொழுமாறு ஓங்கிய நெருப்பு வடிவாய் நின்றவர் சிவபெருமான் . அவர் மலைமகளான
உமாதேவியோடு பகலில் வீற்றிருந்தருளும் இடம் வளமை வாய்ந்த சோலைகள் சூழ்ந்த நறுமணம்
கமழும் திருத்துருத்தி என்னும் திருத்தலமாகும் . இரவில் திருவேள்விக்குடி என்னும்
திருத்தலத்தில் வீற்றிருந்தருளுகின்றார் .
பாடல்
எண் : 10
அயமுக
வெயில்நிலை அமணரும் குண்டரும்
சாக்கியரும்
நயமுக
உரையினர் நகுவன சரிதைகள் செய்துஉழல்வார்,
கயல்அன
வரிநெடும் கண்ணியொடு ஒருபகல்
அமர்ந்தபிரான்
வியன்நகர்த்
துருத்தியார் இரவிடத்து உறைவர்வேள்
விக்குடியே.
பொழிப்புரை : பழுக்கக் காய்ச்சிய
இரும்பு போல் சுடும் வெயிலில் தவமென்று நிற்றலையுடைய சமணர்களும் , குண்டர்களாகிய புத்தர்களும் , இன்முகத்தோடு நயமாகப் பேசி , நகைச்சுவை ததும்பும் செயல்களைச் செய்து
திரிபவர்கள் . ஆதலால் அவர் உரைகளைக் கொள்ளாதீர் . கயல்மீன் போன்ற , அழகிய , வரிகளையுடைய நீண்ட கண்களையுடைய
உமாதேவியோடு பகலில் அகன்ற நகராகிய திருத்துருத்தியில் வீற்றிருந்தருளும்
சிவபெருமான் இரவில் திருவேள்விக்குடியில் வீற்றிருந்தருளுகின்றார் . அவரை வழிபட்டு
உய்வீர்களாக .
பாடல்
எண் : 11
விண்உலாம்
விரிபொழில் விரைமணல் துருத்திவேள்
விக்குடியும்
ஒண்உலாம்
ஒலிகழல் ஆடுவார் அரிவையொடு உறைபதியை
நண்உலாம்
புகலியுள் அருமறை ஞானசம் பந்தன்சொன்ன
பண்உலாம்
அருந்தமிழ் பாடுவார் ஆடுவார் பழியிலரே.
பொழிப்புரை : ஒளிவிடும் , ஒலிக்கின்ற கழல்கள் அணிந்து திருநடனம்
செய்யும் சிவபெருமான் உமாதேவியோடு வீற்றிருந் தருளுகின்ற , ஆகாயம்வரை உயர்ந்துள்ள விரிந்த சோலைகள்
நிறைந்த , மணம் பொருந்திய மணற்
பரப்பையுடைய திருத்துருத்தி , திருவேள்விக்குடி ஆகிய
திருத்தலங்களைப் போற்றி அனைவரும் வழிபடும் திருப்புகலியில் அவதரித்த அருமறைவல்ல
ஞானசம்பந்தன் பாடிய பண்ணோடு கூடிய இந்த அரிய தமிழ்ப்பதிகத்தைப் பாடுபவர்களும் , பரவசமடைந்து ஆடுபவர்களும் எவ்விதமான
பழியும் , பாவமும்
இல்லாதவர்களாவர் .
திருச்சிற்றம்பலம்
அடுத்த திருத்தல யாத்திரையில், திருஆவடுதறை, திருக்கோழம்பம், திரு வைகல், திரு நல்லம், திருவழுந்தூர் ஆகிய திருத்தலங்களை வழிபட்டு, திருஞானசம்பந்தப் பெருமான், திருத்துருத்தி இறைவரைப் பணிந்தார்.
பெரிய
புராணப் பாடல் எண் : 435
மன்னு
மாமடம் மகிழ்ந்தவான் பொருளினை வணங்கி,
பன்னு
பாடலில் பதிகஇன் னிசைகொடு பரவி,
பொன்னி
மாநதிக் கரையினில் மீண்டும்போந்து அணைந்து,
சொன்ன
வாறுஅறி வார்தமைத் துருத்தியில் தொழுதார்.
பொழிப்புரை : திருவழுந்தூரில் நிலையான
மாமடம் என்று திருப்பாட்டினுள் குறிக்கப்பெற்ற கோயிலில் மகிழ்ந்து வீற்றிருக்கின்ற
பெரும்பொருள் ஆன இறைவரை, போற்றி ஏத்தும்
திருப்பதிகத்தைப் பண்ணுடன் பாடி,
வணங்கி, காவிரிக் கரையில் மீளவும் வந்து
சேர்ந்து, சொன்னவாறு அறிவாரைத்
திருத்துருத்தியில் பிள்ளையார் வணங்கினார்.
பெ.
பு. பாடல் எண் : 436
திரைத்த
டம்புனல் பொன்னிசூழ் திருத்துருத் தியினில்
"வரைத்த லைப்பசும்
பொன்"எனும் வண்தமிழ்ப் பதிகம்
உரைத்து, மெய்உறப்
பணிந்துபோந்து, உலவும்அந் நதியின்
கரைக்கண்
மூவலூர்க் கண்ணுத லார்கழல் பணிந்தார்.
பொழிப்புரை : அலைகளையுடைய காவிரி
நீர் சூழ்ந்த திருத்துருத்தியில் `வரைத்தலைப் பசும்
பொன்' எனத் தொடங்கும் வளமை
உடைய திருப்பதிகத்தைப் பாடி, உடல் நிலம் பொருந்தப்
பணிந்து, சென்று உலவுகின்ற
அக்காவிரி ஆற்றின் கரையில் திருமூவலூரில் இறைவரை வணங்கினார்.
குறிப்புரை : `வரைத்தலைப் பசும்பொன்' (தி.2 ப.98) எனத் தொடங்கும் பதிகம் நட்டராகப்
பண்ணிலமைந்ததாகும்.
2.098 திருத்துருத்தி பண் - நட்டராகம்
திருச்சிற்றம்பலம்
பாடல்
எண் : 1
வரைத்தலைப்
பசும்பொனோடு அருங்கலன்கள் உந்திவந்து
திரைத்தலைச்
சுமந்துகொண்டு எறிந்துஇலங்கு காவிரிக்
கரைத்தலைத்
துருத்திபுக்கு இருப்பதே கருத்தினாய்,
உரைத்தலைப்
பொலிந்துஉனக்கு உணர்த்துமாறு வல்லமே.
பொழிப்புரை :மலைகளிலிருந்து
பொன்னையும் , அரிய அணிகளையும்
உந்தி ஆரவாரம் செய்து அலை வீசி வரும் காவிரிக் கரையிலுள்ள திருத்துருத்தியில்
எழுந்தருளும் விருப்புடைய இறைவனே! சொன்னவாறறிதலில் உனக்கு யாம் உணர்த்தும் வன்மை
உடையோமோ ?
பாடல்
எண் : 2
அடுத்துஅடுத்த
கத்தியோடு வன்னிகொன்றை கூவிளம்
தொடுத்துஉடன்
சடைப்பெய்தாய், துருத்தியாய்,ஓர் காலனைக்
கடுத்துஅடிப்
புறத்தினால் நிறத்துஉதைத்த காரணம்
எடுத்துஎடுத்து
உரைக்குமாறு வல்லம்ஆகில் நல்லமே.
பொழிப்புரை :சடையில் அகத்திப்பூ , வன்னி , வில்வம் கொன்றை மலர் என்பவற்றை
அடுத்தடுத்துத் தொடுத்தணிந்தவனே ! திருத்துருத்தி யில் எழுந்தருளியவனே ! நீ
காலனைச் சினந்து திருவடியால் அவன் மார்பில் உதைத்தழித்த காரணத்தைப் பலகாலும்
எடுத்து எடுத்து உரைத்தலில் வல்லமை உடையோமாயின் நாங்கள் நன்மை உறுவோம் .
பாடல்
எண் : 3
கங்குல்கொண்ட
திங்களோடு கங்கைதங்கு செஞ்சடைச்
சங்குஇலங்கு
வெண்குழை சரிந்துஇலங்கு காதினாய்,
பொங்குஇலங்கு
பூணநூல் உருத்திரா, துருத்திபுக்கு
எங்கும்நின்
இடங்களா அடங்கிவாழ்வது என்கொலோ.
பொழிப்புரை :கங்குலில் ஒளி
வீசுதலைக் கொண்ட திங்களோடு கங்கையும் தங்கிய செஞ்சடையையும் , சங்கால் இயன்று விளங்கும் வெண்குழை
தொங்கும் காதினையும் , பொங்கி விளங்கும் பூண
நூலையும் உடைய உருத்திரமூர்த்தியே! எல்லா இடங்களும் உன் இடங்களாக இருக்க , திருத்துருத்தி என்ற இத்தலத்தில் புக்கு
அடங்கி வாழ்தற்குக் காரணம் யாதோ ?
பாடல்
எண் : 4
கருத்தினாலொர்
காணியில் விருத்திஇல்லை,
தொண்டர்தம்
அருத்தியால்தம்
அல்லல்சொல்லி ஐயம்ஏற்பது அன்றியும்,
ஒருத்திபால்
பொருத்திவைத்து, உடம்புவிட்டு
யோகியாய்
இருத்தி, நீ துருத்திபுக்கு
இதுஎன்னமாயம் என்பதே.
பொழிப்புரை :கருதுமிடத்து ஒரு
காணி நிலத்தில் பயிரிட்டு வரும் வருவாயும் உனக்கு இல்லை. தொண்டர்கள்மேல் உள்ள
ஆசையால் தம் அல்லல் சொல்லி ஐயம் ஏற்கின்றதன்றி , ஒரு பெண்ணைத் தன் உடம்பின் ஒரு பாகத்தே
கொண்டிருந்தும் உடம்பின்மேல் உளதாம் பற்றை விடுத்து யோகியாய் இருந்து
திருத்துருத்தியில் புகுந்து எழுந்தருளி யிருத்தற்குரிய மாயம் யாதோ ?
பாடல்
எண் : 5
துறக்குமா
சொலப்படாய் துருத்தியாய்,
திருந்தடி
மறக்குமாறு
இலாத என்னை மையல்செய்து, இம் மண்ணின்மேல்
பிறக்குமாறு
காட்டினாய், பிணிப்படும்
உடம்புவிட்டு
இறக்குமாறு
காட்டினாய்க்கு, இழுக்குகின்றது
என்னையே.
பொழிப்புரை :திருத்துருத்தியில்
எழுந்தருளிய இறைவனே ! பகலில் யோகியாய்த் திருத்துருத்தியிலும், இரவில் மணவாளக் கோலத்தோடு வேள்விக்
குடியிலும் எழுந்தருளியுள்ள நீ,
துறக்கும்
உபாயத்தைக் கூறினீர் இல்லை. அழகிய திருவடியின்பத்தில் திளைத்து அதனை மறவாதிருந்த
என்னை மயக்குறுத்திடும் மண்ணுலகில் பிறக்குமாறும், நோய்க்கு இடமான இவ்வுடம்பை விடுத்து
இறக்குமாறும் செய்தருளினாய். யான் உனக்குச் செய்த இழுக்கு யாதோ? சொல்வாயாக.
பாடல்
எண் : 6
வெயிற்கு எதிர்ந்து
இடம்கொடாது அகங்குளிர்ந்த பைம்பொழில்
துயிற்கு எதிர்ந்த
புள்இனங்கள் மல்குதண் துருத்தியாய்
மயிற்கு எதிர்ந்து
அணங்குசாயல் மாதுஒர்பாகம் ஆக,மூ
எயிற்கு எதிர்ந்து
ஒர்அம்பினால் எரித்தவில்லி அல்லையே.
பொழிப்புரை :வெயிலை எதிர்த்து
அதற்கு இடம் கொடாது அகம் குளிர்ந்த பைம் பொழிலில் துயிலாதனவாய்ப் பறவைஇனங்கள்
நிறைந்து வாழும் தண்மையான திருத்துருத்தியில் எழுந்தருளிய இறைவனே ! மயிலொடு மாறுபட்டு
அழகால் அதனை வருந்தச் செய்யும் அழகினை உடைய உமைபாகராக மூவெயில்களை எதிர்த்து
அவற்றை ஓரம்பினால் எரித்த சிறந்த வில்லாளி யல்லையோ நீ!.
பாடல்
எண் : 7
கணிச்சிஅம்
படைச்செல்வா, கழிந்தவர்க்கு
ஒழிந்தசீர்
துணிச்சிரக்
கிரந்தையாய், கரந்தையாய், துருத்தியாய்,
அணிப்படும்
தனிப்பிறைப் பனிக்கதிர்க்கு அவாவுநல்
மணிப்படும்
பைநாகம், நீ மகிழ்ந்தஅண்ணல்
அல்லையே.
பொழிப்புரை :மழுப்படையினை உடைய
செல்வரே ! பல்லூழிக் காலங்களில் அழிந்தொழிந்த சிறப்பினராகிய திருமால் பிரமர்களுடைய
தலையோடுகளைக் கட்டிய முடிச்சுடையவரே ! கரந்தை சூடியவரே , திருத்துருத்தியில் உறைபவரே ! அழகியதும்
ஒப்பற்றது மான இளம்பிறையின் குளிர்ந்த நிலவொளியை அவாவும் , நல்ல மணியை உடைய படப்பாம்பை ஒருங்கே
அணிந்த தலைமையாளர் அல்லிரோ நீர் .
பாடல்
எண் : 8
சுடப்பொடிந்து
உடம்புஇழந்து அநங்கன்ஆய மன்மதன்
இடர்ப்படக்
கடந்து,இடம் துருத்தியாக
எண்ணினாய்,
கடற்படை
உடையஅக் கடல்இலங்கை மன்னனை
அடற்பட
அடுக்கலில் அடர்த்தஅண்ணல் அல்லையே.
பொழிப்புரை :நெற்றிவிழி சுடுதலால்
பொடியாய் உடம்பு அழிந்த மன்மதன் இடர்ப்பட அவனை வென்று தமக்கு இடமாகத்
திருத்துருத்தியைக் கொண்டவரே ! கடற்படையை உடைய இலங்கை மன்னன் இராவணன் துன்புறுமாறு
மலையின் கீழ் அகப்படுத்தி அடர்த்த தலைமையாளர் அல்லிரோ நீர் .
பாடல்
எண் : 9
களங்குளிர்ந்து
இலங்குபோது காதலானும், மாலுமாய்,
வளங்கிளம்பொன்
அம்கழல் வணங்கிவந்து காண்கிலார்,
துளங்குஇளம்பி
றைச்செனித் துருத்தியாய்,
திருந்தடி
உளங்குளிர்ந்த
போதுஎலாம் உகந்துஉகந்து உரைப்பனே.
பொழிப்புரை :தேன் உடையதாய்க்
குளிர்ந்து இலங்கும் தாமரைப் போதில் எழுந்தருளிய பிரமனும் திருமாலும் வந்து வணங்கி
அழகிய திருவடிகளைக் காணாதவராயினர் . ஒளி துளங்கும் இளம்பிறையைச் சூடிய
சென்னியினராய திருத்துருத்தி இறைவரே ! உம் திருவடிப் பெருமைகளை உளம் குளிர்ந்த
போதெல்லாம் உவந்து உரைத்து மகிழ்கிறேன் .
பாடல்
எண் : 10
புத்தர்தத்
துவம்இலாச் சமண்உரைத்த பொய்தனை
உத்தமம்
எனக்கொளாது, உகந்துஎழுந்து, வண்டுஇனம்
துத்தநின்று
பண்செயும் சூழ்பொழில் துருத்திஎம்
பித்தர்பித்த
னைத்தொழப் பிறப்புஅறுத்தல் பெற்றியே.
பொழிப்புரை :புத்தர்களும்
தத்துவங்கள் அற்ற நெறியாகிய சமணமதத்தினரும் உரைத்த பொய்களை உண்மை எனக் கொள்ளாது , வண்டினங்கள் மகிழ்வோடு எழுந்து , துத்தம் என்னும் சுருதியில் பாடும்
பைம்பொழில் சூழ்ந்த திருத்துருத்தியில் விளங்கும் பித்தர்கள் ஆகிய பக்தர்களிடம்
பித்துக் கொண்டு அன்பு செய்யும் பரமனைத் தொழப் பிறப்பு அறுத்தல் பயனாய் விளையும் .
பாடல்
எண் : 11
கற்றுமுற்றி
னார்தொழும் கழுமலத்து அருந்தமிழ்
சுற்றுமுற்றும்
ஆயினான் அவன்பகர்ந்த சொற்களால்
பெற்றம்ஒன்று
உயர்த்தவன் பெருந்துருத்தி பேணவே
குற்றம்முற்றும்
இன்மையில் குணங்கள்வந்து கூடுமே.
பொழிப்புரை :கல்விகற்று நிறைவு
பெற்றவர்களால் தொழப் பெறும் கழுமலத்துள் தோன்றிய, அருந்தமிழை முற்றிலுமாக அறிந்துணர்ந்த
ஞானசம்பந்தன் அருளிய இப்பதிகப் பாடல்களால் விடைக் கொடியை ஏந்திய சிவபிரானது
திருத்துருத்தியை விரும்பி வழிபடுவோர் குற்றமற்றவர் ஆவர். அவரிடம் நற்குணங்கள்
வந்து பொருந்தும்.
திருச்சிற்றம்பலம்
----------------------------------------------------------------------------------------------------------
திருநாவுக்கரசர்
திருப்பதிக வரலாறு
பெரிய
புராணப் பாடல் எண் : 190
மேவுபுனல்
பொன்னிஇரு கரையும் சார்ந்து,
விடைஉயர்த்தார்
திருச்செம்பொன் பள்ளி பாடி,
காஉயரும்
மயிலாடு துறை,நீள் பொன்னிக்
கரைத்துருத்தி, வேள்விக்குடி, எதிர்கொள் பாடி,
பாவுறு
செந்தமிழ்மாலை பாடிப் போற்றி,
பரமர்திருப்
பதிபலவும் பணிந்து போந்தே,
ஆவுறும்அஞ்சு
ஆடுவார் கோடி காவில்
அணைந்து,பணிந்து, ஆவடுதண் துறையைச்
சார்ந்தார்.
பொழிப்புரை : நீர் இடையறாது
பொருந்திய காவிரி ஆற்றின் இரு கரைகளிலும் சேர்ந்து, ஆனேற்றுக் கொடியை உயர்த்திய
சிவபெருமானின் திருச்செம்பொன்பள்ளியினைப் பாடிச் சோலைகள் உயர்ந்து சூழ்ந்த
திருமயிலாடுதுறையையும், காவிரியின் இரு
கரைகளிலும் உள்ள திருத்துருத்தி - திருவேள்விக்குடியையும், திருஎதிர்கொள்பாடியையும் தொழுது
செந்தமிழ்ப் பதிகங்களான பாமாலைகளால் போற்றி, இறைவரின் திருப்பதிகள் பலவற்றையும்
பணிந்து சென்று, ஆன் ஐந்தையும் ஆடும்
சிவபெருமானின் திருக்கோடிக்காவை அடைந்து, வணங்கிச்
சென்று, திருவாவடுதுறையைச்
சேர்ந்தார்.
குறிப்புரை : இங்கு முதற்கண்
குறிக்கப்பட்ட திருப்பதிகள் ஐந்தாம். இவ்விடங்களில் பாடப்பெற்ற திருப்பதிகங்கள்:
1. திருச்செம்பொன்
பள்ளி:
இது இக்காலத்துச் செம்பொனார்கோயில் என வழங்கப் பெறுகிறது. (அ). `ஊனினுள் உயிரை` (தி.4 ப.29) - திருநேரிசை. (ஆ) `கானறாத` (தி.5 ப.36) - திருக்குறுந்தொகை.
2. திருமயிலாடுதுறை: `கொள்ளும் காதல்` (தி.5 ப.39) - திருக்குறுந்தொகை.
3. 3+4. திருத்துருத்தியும்
திருவேள்விக்குடியும்: இறைவன் பகலில் திருத்துருத்தியிலும்
இரவில் வேள்விக்குடியிலும் எழுந்தருளியிருப்பர். இதனால் இவ்விரு திருப்பதிகளையும்
இணைத்தே ஞானசம்பந்தரும் சுந்தரரும் பாடியுள்ளனர். நாவரசர் திருத்துருத்தி ஒன்றற்கே
பதிகம் பாடியுள்ளார். `பொருத்திய` (தி.4 ப.42) - திருநேரிசை.
4. திருஎதிர்கொள்பாடிக்கு
உரிய பதிகம் கிடைத்திலது. இனி, இப்பதிகளோடு `பரமர் திருப்பதி பலவும் பணிந்து போந்தே` என ஆசிரியர் அருளுவதால், இதுபொழுது பாடிய பதிகள் வேறு பிறவும்
உளவாம் எனத் தெரிகிறது. அவையாவன:
1. திருஅன்னியூர் : `பாறலைத்த` (தி.5 ப.8) - திருக்குறுந்தொகை. 2. திருமணஞ்சேரி: `பட்டநெற்றியர்` (தி.5 ப.87) - திருக்குறுந்தொகை.
இப்பாடலில்
ஆசிரியர் நிறைவாக இரு பதிகளைக் குறிக்கின்றார். அவை:
1. திருக்கோடிக்கா:
(அ). `நெற்றிமேல்` (தி.4 ப.51) - திருநேரிசை.
(ஆ). `சங்குலாம்` (தி.5 ப.78) - திருக்குறுந்தொகை.
(இ). கண்டலஞ்சேர் (தி.6 ப.81) - திருத்தாண்டகம்.
2. திருவாவடுதுறை:
இப்பதியில் அருளிய பதிகங்கள் வரும் பாடலில் குறிக்கப் பெறுகின்றன.
4. 042 திருத்துருத்தி திருநேரிசை
திருச்சிற்றம்பலம்
பாடல்
எண் : 1
பொருத்திய
குரம்பை தன்னைப்
பொருள்எனக் கருத
வேண்டா,
இருத்திஎப்
பொழுதும் நெஞ்சுஉள்
இறைவனை ஏத்து மின்கள்,
ஒருத்தியைப்
பாகம் வைத்துஅங்கு
ஒருத்தியைச் சடையுள்
வைத்த
துருத்திஅம்
சுடரி னானைத்
தொண்டனேன் கண்ட வாறே.
பொழிப்புரை : எம்பெருமான்
இவ்வுயிருக்குச் செயற்பாட்டுச் சாதனமாம்படி தாதுக்களால் இணைத்துள்ள இவ்வுடலே
காப்பாற்றத் தக்க உயர்ந்த பொருளாகக் கருதுதல் வேண்டா . எம் பெருமானை எப்பொழுதும்
நெஞ்சத்துள் இருக்கச் செய்து அவனைத் துதியுங்கள் . பார்வதிபாகனாய்க் கங்கா
சடாதரனாய் உள்ள திருத்துருத்தியின் ஞானச் சுடரை அடியேன் கண்டு உய்ந்தவாறு என்னே !
பாடல்
எண் : 2
சவைதனைச்
செய்து வாழ்வான்
சலத்துளே அழுந்து
கின்ற
இவைஒரு
பொருளும் அல்ல ,
இறைவனை ஏத்து மின்னோ,
அவைபுர
மூன்றும் எய்தும்
அடியவர்க்கு அருளிச்
செய்த
சுவையினை, துருத்தி யானைத்
தொண்டனேன் கண்ட வாறே.
பொழிப்புரை : குடும்பத்தைப்
பெருக்கி உயிர் வாழ்தலுக்கான வஞ்சனையிலே அழுந்திச் செய்யும் உங்களுடைய இச்செயல்கள்
எல்லாம் குறிப்பிடத்தக்க நற்பயன் தருவன அல்ல என்றறிந்து எம் பெருமானையே
துதியுங்கள் . மும்மதில்களையும் அம்பு எய்து அழித்து அடியார்களுக்கு அருள் செய்த
சுவைப் பொருளாக உள்ள துருத்திப் பெருமானை அடியவனாகிய யான் தரிசித்துப் பெற்ற
இன்பம் இருந்தவாறு என்னே !
பாடல்
எண் : 3
உன்னி
எப் போதும் நெஞ்சுஉள்
ஒருவனை ஏத்து மின்னோ,
கன்னியை
ஒருபால் வைத்துக்
கங்கையைச் சடையுள்
வைத்து,
பொன்னியின்
நடுவு தன்னுள்
பூம்புனல் பொலிந்து
தோன்றும்
துன்னிய
துருத்தி யானைத்
தொண்டனேன் கண்ட வாறே.
பொழிப்புரை : பார்வதிபாகனாய்த்
கங்கா சடாதரனாய்க் காவிரியின் இனிய நீரின் நடுவிலே விளங்கித்தோன்றும் திருத்
துருத்திப் பெருமானைத் தரிசித்து அடியேன் கண்ட மகிழ்வு இருந்தவாறு என்னே ! ஆதலின்
என்னை ஒத்த மகிழ்வினை அடைய எப்பொழுதும் ஒப்பற்ற அப் பெருமானை உள்ளத்தில் இருத்திப்
போற்றுங்கள் .
பாடல்
எண் : 4
ஊன்தலை
வலியன் ஆகி
உலகத்துள் உயிர்கட்கு
எல்லாம்
தான்தலைப்
பட்டு நின்று,
சார்கனல் அகத்து வீழ,
வான்தலைத்
தேவர் கூடி
வானவர்க்கு இறைவா
என்னும்
தோன்றலை, துருத்தி யானைத்
தொண்டனேன் கண்ட வாறே.
பொழிப்புரை : உலகத்தில் எல்லா
உயிர்களுக்கும் அவற்றின் புலால் உடம்பிலும் கலந்து வலிமை தருபவனாகி , உயிர்களுக்குள்ளும் தான் உயிராய் நின்று
, அவ்வுயிர்கள் தத்தம்
வினைகளுக்கு ஏற்பத் தீயைப் போன்ற துன்பங்களில் அகப்பட அத்துயரம் தாங்காமல்
வருந்தும் தேவர்கூட ` எங்கள் தலைவனே ` என்று தம் துயர்களைப் போக்குமாறு
வேண்டும் மேம்பட்டவனான திருத்துருத்திப் பெருமானைத் தரிசித்து அடியேன் உய்ந்த சீர்
இருந்தவாறு என்னே !
பாடல்
எண் : 5
உடல்தனைத்
கழிக்கல் உற்ற
உலகத்துள் உயிர்கட்கு
எல்லாம்
இடர்தனைக்
கழிய வேண்டில்,
இறைவனை ஏத்து மின்னோ,
கடல்தனில்
நஞ்சம் உண்டு
காண்புஅரி தாகி நின்ற
சுடர்தனை, துருத்தி யானைத்
தொண்டனேன் கண்ட வாறே.
பொழிப்புரை : கடலில் தோன்றிய
விடத்தை உண்டு மற்றவர்கள் தம்முயற்சியால் காண்பதற்கு அரியனாக இருக்கும்
ஞானவடிவினனாகிய துருத்திப்பெருமானை அடியேன் தரிசித்து உய்ந்த பேறு இருந்தவாறென்னே
!. உடல் தொடர்பை அடியோடு போக்கக் கருதும் உயிர்களாகிய உங்களுக்குள்ள துயர்களைப்
போக்க நீர் விரும்பினால் அப்பெருமானைத் துதித்துப் போற்றுங்கள் .
பாடல்
எண் : 6
அள்ளலைக்
கடக்க வேண்டில்
அரனையே நினைமின்
நீர்கள்,
பொள்ளல்இக்
காயம் தன்னுள்
புண்டரீ கத்து இருந்த
வள்ளலை, வான வர்க்கும்
காண்புஅரிது ஆகி
நின்ற
துள்ளலை, துருத்தி யானைத்
தொண்டனேன் கண்ட வாறே.
பொழிப்புரை : பலதுவாரங்களை உடைய
இவ்வுடலிலே , இதயமாகிய தாமரையில்
இருக்கும் வள்ளலாய் , தேவர்களுக்கும் தம்
முயற்சியால் காண்பதற்கு அரியவனாக இருக்கும் , காளையை ஏறி ஊரும் பெருமானை , அடியேன் கண்டு உய்ந்த சீர்
இருந்தவாறென்னே ! ஆதலின் இப்பிறவியாகிய சேற்றினை நீங்கள் தாண்டிச் செல்ல
விரும்பினால் சிவபெருமானையே தியானம் செய்யுங்கள் .
பாடல்
எண் : 7
பாதியில்
உமையாள் தன்னைப்
பாகமா வைத்த பண்பன்
வேதியன்
என்று சொல்லி
விண்ணவர் விரும்பி
ஏத்தச்
சாதியாம்
சதுர்மு கனும்
சக்கரத் தானும்
காணாச்
சோதியை, துருத்தி யானைத்
தொண்டனேன் கண்ட வாறே.
பொழிப்புரை : பார்வதிபாகன் , வேதியன் என்று தேவர்கள் விரும்பித்
துதித்தவாறிருக்க , பிறப்பெடுத்த
பிரமனும் திருமாலும் காணாத சோதியாகிய திருத்துருத்திப் பெருமானை அடியேன் கண்டு
உய்ந்த நலம் இருந்தவாறென்னே !
பாடல்
எண் : 8
சாமனை
வாழ்க்கை ஆன
சலத்துளே அழுந்த
வேண்டா,
தூமநல்
அகிலும் காட்டித்
தொழுதுஅடி வணங்கு
மின்னோ,
சோமனைச்
சடையுள் வைத்துத்
தொல்நெறி பலவும்
காட்டும்
தூமனத்
துருத்தி யானைத்
தொண்டனேன் கண்ட வாறே.
பொழிப்புரை : பிறையைச் சடையில்
சூடி அடியார்கள் உய்வதற்குப் பழைய நல்ல வழிகளைக் காட்டும் தூய திருவுளங்கொண்ட
திருத்துருத்திப் பெருமானை அடியேன் கண்டு உய்ந்த நலம் இருந்தவா றென்னே! ஆதலின்
தொண்டர்களாகிய நீங்கள் அழிந்து போகக் கூடிய மனைவாழ்க்கை என்ற வஞ்சனையுள் அழுந்தாது
எம்பெருமானுக்கு நறிய அகிற்புகையை அர்ப்பணித்துத் தலையால் தொழுது அவன் திருவடிகளை
உடலால் வணங்குங்கள் .
பாடல்
எண் : 9
குண்டரே
சமணர் புத்தர்
குறிஅறி யாது நின்று
கண்டதே
கருது வார்கள்
கருத்துஎண்ணாது
ஒழிமின் நீர்கள்,
விண்டவர்
புரங்கள் எய்து
விண்ணவர்க்கு
அருள்கள் செய்த
தொண்டர்கள்
துணையி னானைத்
துருத்திநான் கண்ட
வாறே.
பொழிப்புரை : பகைவர்களுடைய
மும்மதில்களையும் அம்பு எய்து அழித்துத் தேவர்களுக்கு அருள்களை வழங்கி
அடியார்களுக்குத் துணைவனாக இருக்கும் பெருமானை அடியேன் திருத் துருத்தியுள்
தரிசித்து உய்ந்த சீர் இருந்தவாறென்னே ! உடல் பருத்த சமணரும் புத்தரும்
அடையவேண்டிய குறிக்கோளை அறியாமல் தம் தம் ஆராய்ச்சியால் கண்டவற்றையே முடிந்த
பொருள்களாகக் கருதுவர் . ஆதலின் அவர்கள் கருத்தை உண்மையாகக் கருதாமல் புறக்கணித்து
விடுங்கள் .
பாடல்
எண் : 10
பிண்டத்தைக்
கழிக்க வேண்டில்
பிரானையே பிதற்று
மின்கள்,
அண்டத்தைக்
கழிய நீண்ட
அடல்அரக் கன்தன்
ஆண்மை
கண்டுஒத்துக்
கால்வி ரலால்
ஊன்றி,மீண்டு அருளிச் செய்த
துண்டத்துத்
துருத்தி யானைத்
தொண்டனேன் கண்ட வாறே.
பொழிப்புரை : உலகங்களைக் கடந்த
நீண்ட புகழை உடைய வலிய அரக்கன் கயிலையைப் பெயர்க்க முற்பட்ட ஆள்வினையை நினைத்து
அவனைக் கால் விரலால் ஊன்றி நெரித்துச் செருக்கு அழித்து மீண்டும் அவனுக்கு
அருள்கள் செய்தவரும் , மதியின் கூறாகிய
பிறையை அணிந்தவருமான துருத்திப் பெருமானை அடியேன் கண்டு உய்ந்த சிறப்பு
இருந்தவாறென்னே! நீங்களும் இவ்வுடல் தொடர்பாகிய பிறவியை அடியோடு போக்க
விரும்பினீர்கள் ஆயின் அப்பெருமான் பண்பு செயல்களையே அடைவு கோடாகப் பேசுங்கள் .
திருச்சிற்றம்பலம்
----------------------------------------------------------------------------------------------------------
1. சுந்தரர் திருப்பதிக வரலாறு:
வன்றொண்டர் திருஎதிர்கொள்பாடியைத்
தொழுது திருவேள்விக்குடியை எய்திப் பெருமானைப் பணிந்து, திருத்துருத்திப் பெருமானையும் உடன்
வைத்துப் பாடியருளியது இத் திருப்பதிகம். (தி. 12 ஏயர்கோன். புரா. 121)
பெரிய
புராணப் பாடல் எண் : 121
எத்திசையும்
தொழுதுஏத்த, "மத்த யானை"
எடுத்து, "எதிர்கொள் பாடியினை
அடைவோம்" என்னும்
சித்தநிலைத்
திருப்பதிகம் பாடிவந்து,
செல்வமிகு
செழுங்கோயில் இறைஞ்சி நண்ணி
அத்தர்தமை
அடிவணங்கி அங்கு வைகி
அருள்பெற்றுத்
திருவேள்விக் குடியில் எய்தி,
முத்திதரும்
பெருமானைத் துருத்தி கூட
"மூப்பதுஇலை"
எனும்பதிகம் மொழிந்து வாழ்ந்தார்.
பொழிப்புரை : சேர்ந்திடும்பொழுது, எத்திசையும் தொழுது போற்றி `மத்தயானை' எனத் தொடங்கி, திருஎதிர்கொள்பாடியை அடைவோம் என்னும்
கருத்தினை நிலைகொள்ளுமாறு வைத்திடும் திருவுடைய பதிகத்தைப் பாடி வந்து, செல்வமிகுந்த செழுமையான கோயிலினை வணங்கி, அங்குச் சில நாள்கள் தங்கி அருள்பெற்று, திருவேள்விக்குடியைச் சென்றடைந்து, வீடுபேற்றைத் தருகின்ற பெருமானைத்
திருத்துருத்தி என்னும் பதியும் சேர்ந்திட `மூப்பதில்லை' எனத் தொடங்கும் திருப்பதிகத்தைப்
பாடியருளி அங்கிருந் தருளினார்.
குறிப்புரை : இப்பதிகளில் அருளிய
பதிகங்கள்:
1. திருஎதிர்கொள்பாடி:
மத்தயானை - இந்தளம் (தி.7 ப.7)
2. திருவேள்விக்குடியும்
திருத்துருத்தியும்: மூப்பதுமில்லை - நட்டராகம் (தி.7 ப.18) `திருவேள்விக்குடியில் எய்தி ......
துருத்திகூடி மூப்பதிலை\' எனும் பதிகம்
மொழிந்து என்பதால், இவ்விரு பதிகளையும்
இணைத்துப் பாடியமை புலனாகும்.
7. 018 திருவேள்விக்குடி-திருத்துருத்தி பண்
- நட்டராகம்
திருச்சிற்றம்பலம்
பாடல்
எண் : 1
மூப்பதும்
இல்லை பிறப்பதும்
இல்லை இறப்பதுஇல்லை
சேர்ப்பது
காட்டகத்து ஊரினும்
ஆகச்சிந்
திக்கின்அல்லால்
காப்பது
வேள்விக் குடி,தண்
துருத்தி,எங் கோன்அரைமேல்
ஆர்ப்பது
நாகம் அறிந்தோமேல்
நாம்இவர்க்கு
ஆட்படோமே.
பொழிப்புரை : ஆராயுங்கால் எங்கள்
தலைவர் , பிறத்தலும் இல்லை ; பின்பு வளர்ந்து முதுமை அடைதலும் இல்லை ; முடிவில் இறந்தொழிதலுமில்லை ; உறைவிடம் காட்டிடத்துள்ளது ; அதுவன்றி ஊர்களுள் தமக்கு உரித்தாகக்
காப்பது திருவேள்விக்குடியும் ,
தண்ணிய
திருத்துருத்தியும் , அன்றியும் அரைக்கண்
இறுகக் கட்டுவது பாம்பு ; இவற்றை முன்பே
அறிந்தோமாயின் , இவர்க்கு நாம் ஆட்படா
தேயிருப்பேம் . இவற்றை அறிந்தோமாயின் , இவர்க்கு
நாம் ஆட்படா தொழிவேமோ !
பாடல்
எண் : 2
கட்டக்காட்
டில்நடம் ஆடுவர்,
யாவர்க்கும்
காட்சிஒண்ணார்,
சுட்டவெண்
நீறுஅணிந்து ஆடுவர்,
பாடுவர், தூயநெய்யால்
வட்டக்குண்
டத்தில் எரிவளர்த்து
ஓம்பி மறைபயில்வார்
அட்டக்கொண்டு
உண்பது அறிந்தோமேல்
நாம்இவர்க்கு
ஆட்படோமே.
பொழிப்புரை : எங்கள் தலைவர் , இடரைத் தரும் காட்டிலே நடனம் ஆடுவார் ; யாராலும் காண்பதற்கு அரியவர் .
சுடப்பட்ட வெள்ளிய சாம்பலைப் பூசிக்கொண்டு மகிழ்ச்சியாக ஆடல் பாடல்களைச் செய்வார் ; வேதத்தைப் பலகாலும் பயில்கின்றவர்களாகிய
அந்தணர்கள் , வட்டமாகிய குழியில் , தூயதாகிய நெய்யினால் எரியை வளர்த்துப்
போற்றி , அதன்கண் பாகம் செய்த
பொருள்களை ஏற்று உண்பார் ; இவற்றையெல்லாம்
அறிந்தோமேல் நாம் இவர்க்கு ஆட்படோமே!
பாடல்
எண் : 3
பேரும்ஓர்
ஆயிரம் பேர்உடை
யார்,பெண்ணோடு ஆணும்அல்லர்,
ஊரும்
அது ஒற்றியூர், மற்றைஊர்
பெற்றவா நாம்அறியோம்,
காரும்
கருங்கடல் நஞ்சுஅமுது
உண்டுகண்
டங்கறுத்தார்க்கு,
ஆரம்பாம்பு
ஆவது அறிந்தோமேல்
நாம்இவர்க்கு
ஆட்படோமே.
பொழிப்புரை : எங்கள் தலைவர் , பெயரும் தமக்குரியனவாக ஆயிரம் உடையவர் ; இவர் பெண்ணும் அல்லர் ; ஆணும் அல்லர்; இவர்க்கு ஊரும் ஒற்றிஊரே ; அதுவன்றி வேறோர் ஊரை உடைய ராதலை நாம்
அறிந்திலோம் ; இருண்ட கரிய கடலில்
தோன்றிய நஞ்சினை உணவாக உண்டு , கண்டம் கறுப்பாயினார்; இவர்க்கு ஆரமாவது , பாம்பே ; இவற்றையெல்லாம் அறிந்தோமேல் , நாம் இவர்க்கு ஆட்படோமே !
பாடல்
எண் : 4
ஏனக்கொம்
பும்இள ஆமையும்
பூண்டுஅங்குஓர்
ஏறும்ஏறிக்
கானக்காட்டில்
தொண்டர் கண்டன
சொல்லியும் காமுறவே,
மானைத்தோல்
ஒன்றுஉடுத் து,புலித்
தோஒல் பியற்கும்இட்டு,
யானைத்தோல்
போர்ப்பது அறிந்தோமேல்
நாம்இவர்க்கு
ஆட்படோமே.
பொழிப்புரை : எங்கள் தலைவர்
பன்றியின் கொம்பையும் , இளமையான ஆமையின்
ஓட்டினையும் அணிந்து , ஒற்றை எருதின்மேல்
ஏறுபவராய் , தம்மை அடியார்கள்
காட்டில் கண்ட கோலங்களையெல்லாம் பலபடியாக எடுத்துச் சொல்லிய பின்பும் , விருப்பம் உண்டாக , மானினது அழகிய தோல் ஒன்றை அரையில்
உடுத்து , தோளின் கண்ணும்
புலித்தோலை இட்டு , உடம்பின் மேல் யானைத்
தோலைப் போர்த்துக் கொள்பவர் . இவற்றையெல்லாம் அறிந்தோமேல் , நாம் இவர்க்கு ஆட்படோமே !
பாடல்
எண் : 5
ஊட்டிக்கொண்டு
உண்பதுஓர் ஊண்இலர்
ஊர்இடு பிச்சைஅல்லால்,
பூட்டிக்கொண்டு
ஏற்றினை ஏறுவர்,
ஏறிஒர் பூதந்தம்பால்
பாட்டிக்கொண்டு
உண்பவர், பாழிதொ
றும்பல பாம்புபற்றி
ஆட்டிக்கொண்டு
உண்பது அறிந்தோமேல்
நாம்இவர்க்கு
ஆட்படோமே.
பொழிப்புரை : எங்கள் தலைவர்
நாவிற்குச் சுவைகள் பலவற்றை ஊட்டி உண்பதற்கு , ஊரவர் இடுகின்ற பிச்சையையன்றி மற்றோர்
உணவையும் இலர் . ஒற்றை எருதைக் கயிற்றிற் கட்டி வைத்துக் கொண்டு , அதன் மேல் ஏறிச் செல்வர் . சிறிய
பூதங்கள் தம்மிடத்தில் பாட்டு ஈதலைக் கேட்டு நின்று இன்பம் நுகர்பவராவர் .
புற்றுக்கள் தோறும் சென்று பல பாம்புகளைப் பிடித்து ஆட்டிப் பிழைப்பர் .
இவற்றையெல்லாம் அறிந்தோமேல் , நாம் இவர்க்கு
ஆட்படோமே !
பாடல்
எண் : 6
குறவனார்
தம்மகள் தம்மக
னார்மண வாட்டி,கொல்லை
மறவனா
ராய்அங்குஓர் பன்றிப்பின்
போவது மாயங்கண்டீர்,
இறைவனார், ஆதியார், சோதியா
ராய்அங்குஓர்
சோர்வுபடா
அறவனார்
ஆவது அறிந்தோமேல்
நாம்இவர்க்கு
ஆட்படோமே.
பொழிப்புரை : எங்கள் தலைவர்தம்
புதல்வர்க்கு மனைவி , ஒரு குறவர் மகள் ; இவரும் கொல்லும் தொழிலையுடைய வேடுவராய்
முன்பு ஒரு பன்றிப்பின் சென்றார் ;
இவை
மாயமாம் . இவர் இப் பெற்றியரான இறைவரும் , முன்னவரும் , ஒளி வடிவினரும் , அறவரும் ஆவதை அறிந்தோமேல் , நாம் இவர்க்கு ஆட்படோமே !
பாடல்
எண் : 7
பித்தரை
ஒத்துஒரு பெற்றியர்,
நற்றுஅவை
என்னைப்பெற்ற
முற்றுஅவை
தம்மனை தந்தைக்குந்
தவ்வைக்கும்
தம்பிரானார்,
செத்தவர்
தம்தலை யில்பலி
கொள்வதே செல்வம்ஆகி
அத்தவம்
ஆவது அறிந்தோமேல்
நாம்இவர்க்கு
ஆட்படோமே.
பொழிப்புரை : என்னைப் பெற்ற
நற்றாயும் , வயது முதிர்ந்த அவள்
தாயும் , இவ் விருவர்க்கும்
அன்னை , தந்தை , தமக்கை என்பவரும் ஆகிய எல்லோர்க்கும்
இறைவராய் உள்ள இவர் . பித்தரைப் போன்ற ஒரு தன்மை உடையராய் இருக்கின்றார் ; அன்றியும் , இறந்தவர் தலை யோட்டில் பிச்சை ஏற்பதே
செல்வமாக , அன்னதொரு தவமுடைய
ராதலை அறிந்தோமேல், நாம் இவர்க்கு
ஆட்படோமே !
பாடல்
எண் : 8
உம்பரான், ஊழியான், ஆழியான்,
ஓங்கி மலர்உறைவான்,
தம்பரம்
அல்லவர் சிந்திப்
பவர்தடு
மாற்றுஅறுப்பார்
எம்பரம்
அல்லவர் என்னெஞ்சத்து
உள்ளும் இருப்பதுஆகி
அம்பரம்
ஆவது அறிந்தோமேல்
நாம்இவர்க்கு
ஆட்படோமே.
பொழிப்புரை : ` இந்திரன், உருத்திரன், மால், அயன், என்னும் இவர்கள் அளவில் உள்ளரல்லர்
என்றும், ` தம்மை நினைப்பவரது
மனக்கவலையைப் போக்குபவர் எம்மளவல்லவர்` என்றும்
சொல்லப்படுகின்ற இவர், என் மனத்திலும்
இருத்தலுடையவராய் வேறு வெளியாதலை அறிந்தோமேல் , நாம் இவர்க்கு ஆட்படோமே !
பாடல்
எண் : 9
இந்திர
னுக்கும் இராவண
னுக்கும்
அருள்புரிந்தார்,
மந்திரம்
ஓதுவர், மாமறை
பாடுவர், மான்மறியர்,
சிந்துரக்
கண்ணனும் நான்முக
னும்உட னாய்,தனியே
அந்தரம்
செல்வது அறிந்தோமேல்
நாம்இவர்க்கு
ஆட்படோமே.
பொழிப்புரை : எங்கள் தலைவர் தேவர்
கோமானாகிய இந்திரனுக்கும், அரக்கர் கோமானாகிய இராவணனுக்கும்
அருள் புரிந்தார் . அந்தணர்க்குரிய மந்திரம் ஓதுதல் , மறைபாடுதல் என்பவற்றையும் , வேடர்க்குரிய மான் கன்றைப்
பிடித்தலையும் உடையவர் . ` மால் , அயன் ` என்னும் இருவரும் உடனாயிருப்ப , அவரொடு நிற்றலேயன்றி , தாம் மட்டும் தனியே உயர்ந்தும் செல்வர்
. இவற்றையெல்லாம் அறிந்தோமேல் ,
நாம்
இவர்க்கு ஆட்படோமே !
பாடல்
எண் : 10
கூடலர்
மன்னன், குலநாவ
லூர்க்கோன், நலத்தமிழைப்
பாடவல்
லபர மன்அடி
யார்க்குஅடி மைவழுவா
நாடவல்
லதொண்டன், ஆரூரன்,
ஆட்படு மாறுசொல்லிப்
பாடவல்
லார்பர லோகத்து
இருப்பது
பண்டம்அன்றே.
பொழிப்புரை : பகைவர்க்கு அவர்
வணங்கும் அரசனும் , மேன்மை பொருந்திய
திருநாவலூர்க்குத் தலைவனும் , நன்மையை யுடைய
தமிழைப் பாடவல்ல சிவனடியார்க்கு அடிமை வழுவாது செய்யுமாற்றால் அப்பெருமானை அடைய
எண்ணுகின்றவனும் ஆகிய நம்பியாரூரன் , தன்
தலைவனுக்கு ஆட்படுதல் இவ்வாறெனச் சொல்லி இப்பதிகத்தைப் பாடவல்லவர் , மேலான உலகத்தில் சென்று தங்குதல்
பொருளன்று . ( மிக எளிதாம் )
திருச்சிற்றம்பலம்
2. சுந்தரர் திருப்பதிக
வரலாறு:
சுவாமிகள், திருவாவடுதுறையை வணங்கித் திருத்
துருத்தியை அடைந்து, ''அடியேன் உற்றபிணி
வருத்தம் எனை ஒழித்தருள வேண்டும்''
என்று
வணங்குவாராய்ப் பணிய, 'இப்பிணி நீங்க இவ்வட
குளத்துக் குளி' என்று பெருமான் கூற, அங்ஙனமே அத் தீர்த்தத்தில் மூழ்கி
எழுந்து பிணி நீங்கி ஒளிசேர் திருமேனியராகி மிக்க பேரன்பினால் திருக்கோயிலை
யடைந்து பாடியருளியது இத் திருப்பதிகம். (தி. 12 ஏயர்கோன். புரா. 300)
பெரிய
புராணப் பாடல் எண் : 296
அங்குஅணைவார்
தமைஅடியார்
எதிர்கொள்ளப்
புக்குஅருளிப்
பொங்குதிருக்
கோயிலினைப்
புடைவலங்கொண்டு
உள்அணைந்து,
"கங்கைவாழ் சடையாய்ஓர்
கண்ணிலேன், எனக்கவல்வார்,
இங்குஎனக்கு
ஆர்உறவு"என்னுந்
திருப்பதிகம்
எடுத்துஇசைத்தார்.
பொழிப்புரை : அத்திருப்பதியை அணைய
வரும் நம்பிகளை, அடியவர்கள் வந்து
எதிர்கொண்டிட, அவர்களுடன்
புகுந்தருளி, பெருகிநிற்கும்
அருளின் சிறப்புடைய திருக்கோயிலினை வலம் வந்து, உள்ளே சென்று, எம்பிரானை நினைந்து, `கங்கை வார் சடையாய் ஓர் கண்ணிலேன்' எனக் கவல்பவர், `இங்கு எனக்கு ஆர் உறவு' என்று சிறந்ததொரு திருப்பதிகத்தை
எடுத்துப் பாடி அருளினார்.
`கங்கைவார் சடையாய்' (தி.7 ப. 70) எனும் முதற்குறிப்புடைய பதிகம்
தக்கேசிப் பண்ணில் அமைந்ததாகும். பதிகப் பாடல் தொறும் `யார் எனக்கு உறவு அமரர்கள் ஏறே' எனவரும் நிறைவுத் தொடரை ஆசிரியர்
முகந்தெடுத்து மொழிந்துள்ளார். திருக்கடைக் காப்பில் `சிங்கடியப்பன்' எனத் தம்மைக் குறித்திருப்பது, வரலாற் றிற்கு அரணாயுள்ளது. இப்பதிகத்து
வரும் இரண்டாவது பாடலில், `கண்ணிலேன் உடம்பில்
அடுநோயால் கருத்தழிந்து உனக்கே பொறையானேன்' எனவரும் முறைப்பாட்டால், கண்ணிழந்ததோடு உடம்பை
வருத்தும் மேக நோயும் நம்பிகளுக்கு இருந்தமை விளங்குகின்றது.
பெ.
பு. பாடல் எண் : 297
திருப்பதிகம்
கொடுபரவிப் பணிந்து, திருவருளால் போய்,
விருப்பினொடும்
திருத்துருத்தி தனைமேவி, விமலர்கழல்
அருத்தியினால்
புக்குஇறைஞ்சி, "அடியேன்மேல் உற்றபிணி
வருத்தம் எனை
ஒழித்துஅருள வேண்டும்"என
வணங்குவார்.
பொழிப்புரை : திருப்பதிகம் கொண்டு
போற்றி செய்து, பணிந்து, திருவருளால் விருப்பத்துடன்
திருத்துருத்தி என்னும் கோயிலை அடைந்து, பெருமானின்
திருவடிகளை அன்பினால் வணங்கி, `எம்பிரானே!
அடியேனுக்குற்ற மேக நோயினை நீக்கியருள வேண்டும்' என வணங்குவாராய்,
பிணி நீங்க வேண்டிப்
பாடிய திருப்பதிகம் கிடைத்திலது.
பெ.
பு. பாடல் எண் : 298
பரவியே
பணிந்தவர்க்குப் பரமர் திருவருள்
புரிவார்,
விரவியஇப்
பிணிஅடையத் தவிர்ப்பதற்கு வேறாக,
"வரமலர்வண்டு
அறைதீர்த்த வடகுளத்துக்
குளி"என்னக்
கரவுஇல்திருத்
தொண்டர்தாம் கைதொழுது
புறப்பட்டார்.
பொழிப்புரை : இவ்வாறு வேண்டிப்
போற்றிய நம்பிகளுக்குப் பெருமான் திருவருள் புரிவாராய், `பொருந்திய இப்பிணி முழுவதும் தீர்தற்கு
இக்கோயிலின் அருகேயுள்ள நல்ல மலர்களில் வண்டுகள் மொய்த்துப்பாட விளங்கும் புனித
நீரையுடைய வடகுளத்தில் குளிப்பாயாக'
என
அருளிட, அதுகேட்ட வஞ்சனையற்ற
நம்பிகள் கைதொழுது, புறப்பட்டுச்
சென்றார்.
வடகுளம் -
திருக்கோயிலின் வடபுறத்தே உள்ளது. இதன் கரையில், ஒற்றைக்கண்ணுடைய திருவடிவில் நம்பிகளின்
திருவுரு அமைந்துள்ளது. தீது நீங்கக் கடல், ஆறு, குளம் முதலியவற்றில் ஆடுவது பண்டு
தொட்டு வரும் மரபாகும்.
பெ.
பு. பாடல் எண் : 299
மிக்கபுனல்
தீர்த்தத்தின் முன் அணைந்து, வேதம் எலாம்
தொக்க வடிவாய் இருந்த துருத்தியார்
தமைத்தொழுது,
புக்கு அதனில்
மூழ்குதலும், புதிய பிணி அது நீங்கி,
அக்கணமே
மணி ஒளிசேர் திருமேனி ஆயினார்.
பொழிப்புரை : பெருகிய நீருடைய
வடகுளத்துப் புனித நீர் முன் அணுகி நான்மறைகளும் திரண்டதொரு வடிவென இருந்தருளும்
திருத்துருத்திப் பெருமானாரைத் தொழுது, மூழ்குதலும், அக்கணமே அவர் உடம்பில் இருந்ததொரு புதிய
நோய் நீங்க, முத்தின் ஒளியையுடைய
திருமேனியை உடையராயினார்.
பெ.
பு. பாடல் எண் : 300
கண்டவர்கள்
அதிசயிப்பக் கரை ஏறி, உடை புனைந்து,
மண்டுபெருங்
காதலினால் கோயிலினை
வந்து அடைந்து,
தொண்டர் எதிர், "மின்னுமா மேகம்"எனும்
சொல்பதிகம்
எண்திசையும்
அறிந்து உய்ய ஏழிசையால்
எடுத்துஇசைத்தார்.
பொழிப்புரை : கண்டவர்கள்
வியந்திடக் கரையேறி, உடை அணிந்து, உள்ளத்துப் பெருகும் காதலினால் கோயிலை
அடைந்து, அடியவர்கள்
திருமுன்பாக நின்று, `மின்னுமா மேகம்' எனத் தொடங்கி எடுத்த திருப்பதிகத்தை
எட்டுத் திக்கில் உள்ளாரும் இறைவனது அற்புதத்தை அறிந்து உய்ய, ஏழிசையும் பொருந்தப் பாடினார்.
`மின்னுமா மேகம்' எனத் தொடங்கும் பதிகம், காந்தாரப்பண்ணில் அமைந்ததாகும் (தி.7 ப.74). `என்னை நான் மறக்குமாறு எம்பெருமானை
என்னுடம்பு அடும்பிணி இடர்கெடுத்தானை' என
இப்பதிக முதற்பாடலில் வரும் தொடர்,
இவ்வரலாற்றிற்கு
அரணாகின்றது. எம் பெருமானை, இடர்கெடுத்தானை
மறக்குமாறு என்னை? எனக் கூட்டுக.
7. 074
திருத்துருத்தி-திருவேள்விக்குடி
பண்-காந்தாரம்
திருச்சிற்றம்பலம்
பாடல்
எண் : 1
மின்னுமா
மேகங்கள் பொழிந்துஇழிந்து அருவி
வெடிபடக் கரையொடும்
திரைகொணர்ந்து எற்றும்
அன்னமாம்
காவிரி அகன்கரை உறைவார்
அடியிணை தொழுதுஎழும்
அன்பராம் அடியார்,
சொன்னவாறு
அறிவார் துருத்தியார், வேள்விக்
குடிஉளார், அடிகளைச் செடியனேன்
நாயேன்
என்னைநான்
மறக்குமாறு எம்பெரு மானை,
என்உடம்பு அடும்பிணி
இடர்கெடுத் தானை
பொழிப்புரை : மின்னலை
உண்டாக்குகின்ற கரிய மேகங்கள் மழையைப் பொழிந்தபின் , அருவிகளாய் ஓசையுண்டாகப் பாய்ந்து
அலைகளைக் கொணர்ந்து கரையோடு மோதுவிக்கின்ற , அன்னப் பறவைகள் பொருந்திய
காவிரியாற்றினது , அகன்ற கரையின்கண்
பலவிடத்தும் எழுந்தருளியிருப்பவரும் , திருத்துருத்தியிலும்
, திரு
வேள்விக்குடியிலும் , வீற்றிருப்பவராகிய
தலைவரும் , தமது அடியிணையைத்
தொழுது துயிலெழுகின்ற அன்பையுடையவராகிய அடியவர்கள் வேண்டிக்கொண்ட வகைகளை எல்லாம்
நன்கு உணர்ந்து அவைகளை முடித்தருளுகின்றவரும் , என் உடம்பை வருத்திய பிணியாகிய
துன்பத்தைப் போக்கியவரும் ஆகிய எம் பெருமானாரை , குற்றமுடையேனும் , நாய்போலும் கடையேனும் ஆகிய யான்
மறக்குமாறு யாது !
பாடல்
எண் : 2
கூடுமாறு
உள்ளன கூடியும் கோத்தும்,
கொய்புன ஏனலோடு ஐவனம்
சிதறி,
மாடுமா
கோங்கமே மருதமே பொருது,
மலைஎனக் குலைகளை
மறிக்குமாறு உந்தி
ஓடுமா
காவிரித் துருத்தியார், வேள்விக்
குடியுளார் அடிகளை, செடியனேன் நாயேன்
பாடுமாறு
அறிகிலேன் எம்பெரு மானைப்
பழவினை உள்ளன
பற்றுஅறுத் தானை.
பொழிப்புரை : கூடத் தக்கனவாய் உள்ள
யாறுகளோடு கூடியும் , அவை வேறு
காணப்படாதவாறு கோத்தும் , கொய்யும் பருவத்தை
அடைந்த கொல்லைத் தினைக் கதிர்களையும் , மலைநெற்
கதிர்களை யும் சிதறியும் , இரு பக்கங்களிலும்
கோங்கு மருது முதலிய மரங்களை முரித்தும் , கரைகளை மலை தகர்ந்தாற் போலத் தகருமாறு
இடித்தும் ஓடுகின்ற பெரிய காவிரியாற்றினது கரைக்கண் உள்ள திருத்துருத்தி யிலும் , திருவேள்விக்குடியிலும் உள்ளவராகிய
தலைவரும் , எனது பழவினைகளாய்
உள்ளவற்றை அடியோடு தொலைத்தவரும் ஆகிய எம்பெருமானை , குற்றமுடையேனும் , நாய்போலும் கடையேனும் ஆகிய யான் , பாடும் வகையை அறிகின்றிலேன் !
பாடல்
எண் : 3
கொல்லுமால்
யானையின் கொம்பொடு வம்பார்
கொழுங்கனிச்
செழும்பயன் கொண்டுகூட்டு எய்திப்
புல்கியும்
தாழ்ந்தும்போந் துதவம் செய்யும்
போகரும் யோகரும்
புலரிவாய் மூழ்கச்
செல்லுமா
காவிரித் துருத்தியார் வேள்விக்
குடிஉளார் அடிகளைச்
செடியனேன் நாயேன்
சொல்லுமாறு
அறிகிலேன் எம்பெரு மானைத்
தொடர்ந்துஅடும்
கடும்பிணித் தொடர்வுஅறுத் தானை.
பொழிப்புரை : கொல்லுகின்ற பெரிய
யானையின் தந்தங்களையும் , மணம் பொருந்திய
கொழுமையான கனிகளாகிய வளவிய பயனையும் வாரிக்கொண்டு , அவற்றின் தொகுதியைப் பொருந்தி வந்து
வலம் செய்தும் , வணங்கியும் தவம்
புரிகின்ற உலகியலாளரும் , வீட்டுநெறியாளரும்
விடியற்காலையில் வந்து மூழ்குமாறு ஓடுகின்ற பெரிய காவிரி யாற்றினது கரைக்கண் உள்ள
திருத்துருத்தியிலும் , திருவேள்விக்குடியிலும்
வீற்றிருப்பவராகிய தலைவரும் , என்னைத் தொடர்ந்து
வருத்திய மிக்க பிணியினது தொடர்பை அறுத்தவரும் ஆகிய எம்பெருமானாரை , குற்றமுடையேனும் , நாய்போலுங் கடை யேனும் ஆகிய யான்
புகழுமாற்றை அறிகின்றிலேன் !
பாடல்
எண் : 4
பொறியுமா
சந்தனத் துண்டமோடு அகிலும்
பொழிந்துஇழிந்து
அருவிகள் புன்புலம் கவரக்
கறியுமா
மிளகொடு கதலியும் உந்திக்
கடல்உற விளைப்பதே
கருதித்தன் கைபோய்
எறியுமா
காவிரித் துருத்தியார் வேள்விக்
குடிஉளார் அடிகளைச்
செடியனேன் நாயேன்,
அறியுமாறு
அறிகிலேன் எம்பெரு மானை,
அருவினை உள்ளன
ஆசுஅறுத் தானை
பொழிப்புரை : அருவிகள் , பொரிந்த சந்தனக் கட்டைகளையும் , அகிற் கட்டைகளையும் நிரம்பக் கொணர்ந்து
குவித்துப் புன்செய் நிலத்தை மூடிக்கொள்ள , பின்பு , கரிக்கப்படும் சிறந்த மிளகுகளையும், வாழைகளையும் தள்ளிக்கொண்டு சென்று
கடலில் பொருந்தச் சேர்ப்பதையே கருதிக்கொண்டு , தன் இரு மருங்கிலும் சென்று அலை
வீசுகின்ற காவிரியாற்றினது கரையின்கண் உள்ள திருத்துருத்தியிலும் , திருவேள்விக்குடியிலும்
வீற்றிருப்பவராகிய தலைவரும் , எனது அரிய வினைகளாய்
உள்ள குற்றங்களைப் போக்கினவரும் ஆகிய எம் பெருமானாரை , குற்றமுடையேனும் , நாய்போலும் கடையேனுமாகிய யான் அறியும்
வகையை அறிகிலேன் !
பாடல்
எண் : 5
பொழிந்துஇழி
மும்மதக் களிற்றுஇன மருப்பும்
பொன்மலர் வேங்கையின்
நன்மலர் உந்தி
இழிந்துஇழிந்து
அருவிகள் கடும்புனல் ஈண்டி
எண்திசை யோர்களும்
ஆடவந்து இங்கே
சுழிந்துஇழி
காவிரித் துருத்தியார், வேள்விக்
குடிஉளார் அடிகளைச்
செடியனேன் நாயேன்,
ஒழிந்திலேன்
பிதற்றுமாறு எம்பெரு மானை
உற்றநோய் இற்றையே
உறஒழித் தானை
பொழிப்புரை : பொழியப்பட்டுப்
பாய்கின்ற மும்மதங்களை யுடைய யானையது தந்தங்களையும் , பொன்னைப்போல மலர்கின்ற , வேங்கை மரத்தினது நல்ல மலர்களையும்
தள்ளிக்கொண்டு அருவிகள் பலவும் வீழ்தலால் மிக்க நீர் நிரம்பி, எட்டுத் திக்கில் உள்ளவர்களும் வந்து
முழுகுமாறு , இவ்விடத்தில்
சுழித்துக்கொண்டு பாய்கின்ற காவிரியாற்றினது கரைக்கண் உள்ள திருத்துருத்தியிலும் , திரு வேள்விக்குடியிலும்
வீற்றிருப்பவராகிய தலைவரும் , என்னைப் பற்றிய நோயை
இன்றே முற்றும் நீக்கியவரும் ஆகிய எம் பெரு மானாரை , குற்றமுடையேனும் , நாய் போலும் கடையேனும் ஆகிய யான்
பிதற்றுதலை ஒழிந்திலேன் .
பாடல்
எண் : 6
புகழுமா
சந்தனத் துண்டமோடு அகிலும்
பொன்மணி வரன்றியும்
நன்மலர் உந்தி
அகழுமா
அருங்கரை வளம்படப் பெருகி
ஆடுவார்
பாவந்தீர்த்து அஞ்சனம் அலம்பித்
திகழுமா
காவிரித் துருத்தியார், வேள்விக்
குடிஉளார் அடிகளைச்
செடியனேன் நாயேன்,
இகழுமாறு
அறிகிலேன் எம்பெரு மானை
இழித்தநோய் இம்மையே
ஒழிக்கவல் லானை
பொழிப்புரை : புகழப்படுகின்ற
சிறந்த சந்தனக் கட்டைகளையும் , அகிற் கட்டைகளையும் , பொன்னும் மணியுமாகிய இவைகளையும்
வாரிக்கொண்டும் , நல்ல மலர்களைத்
தள்ளிக்கொண்டும் , தன்னால்
அகழப்படுகின்ற , பெரிய , அரிய கரைகள் செல்வம்படுமாறு பெருகி , முழுகுகின்றவர்களது பாவத்தைப் போக்கி , கண்ணில் தீட்டிய மைகளைக் கழுவி
நிற்கின்ற காவிரியாற்றினது கரைக்கண் உள்ள திருத்துருத்தியிலும் , திருவேள்விக்குடியிலும்
வீற்றிருப்பவராகிய தலைவரும் , என்னை இழிவடையச்
செய்த நோயை இப்பிறப்பில் தானே ஒழிக்க வல்லவரும் ஆகிய எம் பெருமானாரை , குற்றம் உடை யேனும் , நாய்போலும் கடையேனும் ஆகிய யான் , இகழுமாற்றை நினையமாட்டேன் !
பாடல்
எண் : 7
வரையின்மாங்
கனியொடு வாழையின் கனியும்
வருடியும் வணக்கியும்
மராமரம் பொருதும்,
கரையுமா
கருங்கடல் காண்பதே கருத்தாய்க்
காம்பீலி
சுமந்துஒளிர் நித்திலம் கைபோய்
விரையுமா
காவிரித் துருத்தியார் வேள்விக்
குடிஉளார் அடிகளைச்
செடியனேன் நாயேன்,
உரையுமாறு
அறிகிலேன் எம்பெரு மானை
உலகுஅறி பழவினை
அறஒழித் தானை
பொழிப்புரை : அளவில்லாத
மாம்பழங்களையும் , வாழைப் பழங்களையும்
வீழ்த்தியும் , கிளைகளோடு சாய்த்தும்
, மராமரத்தை முரித்தும்
, கரைகள்
அரிக்கப்படுகின்ற கரிய கடலைக் காண்பதையே கருத்தாகக் கொண்டு , மூங்கில்களையும் மயில் தோகைகளையும்
சுமந்து , ஒளி விளங்குகின்ற
முத்துக்கள் இருபக்கங்களும் தெறிக்க , விரைய
ஓடுகின்ற பெரிய காவிரியாற்றினது கரைக்கண் உள்ள திருத்துருத்தியிலும் , திருவேள்விக்குடியிலும்
வீற்றிருப்பவராகிய தலை வரும் , எனது, உலகறிந்த பழவினைகளை முற்றிலும்
நீக்கினவரும் ஆகிய எம் பெருமானாரை ,
குற்றமுடையேனும்
, நாய்போலும் கடையேனும்
ஆகிய யான் துதிக்குமாற்றை அறிகின்றிலேன் !
பாடல்
எண் : 8
ஊருமா
தேசமே மனம்உகந்து உள்ளிப்
புள்ளினம் பலபடிந்து
ஒண்கரை உகளக்
காருமா
கருங்கடல் காண்பதே கருத்தாய்க்
கவரிமா மயிர்சுமந்து
ஒண்பளிங்கு இடறித்
தேருமா
காவிரித் துருத்தியார் வேள்விக்
குடிஉளார் அடிகளைச்
செடியனேன் நாயேன்,
ஆருமாறு
அறிகிலேன் எம்பெரு மானை,
அம்மைநோய் இம்மையே
ஆசுஅறுத் தானை
பொழிப்புரை : அணியவான ஊர்களில்
உள்ளவர்களும் , பெரிதாகிய நாடு
முழுதும் உள்ளவர்களும் , மனம் விரும்பி
நினைக்கு மாறு , பறவைக் கூட்டங்கள் பல
மூழ்கி எழுந்து , அழகிய கரைக்கண் உள்ள
திருத்துருத்தியிலும் , திருவேள்விக்
குடியிலும் திரிய , நீர் நிறைந்த , பெரிய , கரிய கடலைக் காண்பதையே கருத்தாகக்கொண்டு
கவரி மானினது சிறந்த மயிரைச் சுமந்து , ஒளியையுடைய
பளிங்குக் கற்களை உடைத்து , நானிலங்களில் உள்ள
பொருள்களையும் கண்டு செல்கின்ற ,
பெரிய
காவிரியாற்றினது கரைக்கண் உள்ள திருத்துருத்தியிலும் , திருவேள்விக்குடியிலும்
வீற்றிருப்பவராகிய தலைவரும் , எனக்கு வரும்
பிறப்பில் வரக் கடவதாகிய துன்பமாகிய குற்றத்தை இப்பிறப்பிற்றானே களைந் தொழித்தவரும்
ஆகிய எம்பெருமானாரை , குற்றமுடையேனும் , நாய் போலும் கடையேனும் ஆகிய யான் , துய்க்குமாற்றை அறிகின்றிலேன் !
பாடல்
எண் : 9
புலங்களை
வளம்படப் போக்குஅறப் பெருகிப்
பொன்களே
சுமந்துஎங்கும் பூசல்செய்து ஆர்ப்ப
இலங்குமா
முத்தினோடு இனமணி இடறி
இருகரைப் பெருமரம்
பீழ்ந்துகொண்டு எற்றிக்
கலங்குமா
காவிரித் துருத்தியார் வேள்விக்
குடிஉளார் அடிகளைச்
செடியனேன் நாயேன்,
விலங்குமாறு
அறிகிலேன் எம்பெரு மானை,
மேலைநோய் இம்மையே
வீடுவித் தானை.
பொழிப்புரை : வயல்கள் வளம்படவும் , அதனால் எல்லாக் குற்றங் களும் நீங்கவும்
, நீர்பெருகி
பொற்கட்டிகளைச் சுமந்துகொண்டு ,
ஒளி
விளங்குகின்ற சிறந்த முத்துக்களையும் , மற்றும்
பலவகை மணிகளையும் எறிந்து , இருகரைகளிலும் உள்ள
பெரிய மரங்களை முரித்து ஈர்த்துக் கரையைத் தாக்கி , எவ்விடத்தில் உள்ளவர்களும் ஆரவாரம்
செய்து ஒலிக்க , கலங்கி ஓடுகின்ற காவிரியாற்றினது
கரைக்கண் உள்ள திருத்துருத்தியிலும் , திருவேள்விக்குடியிலும்
வீற்றிருப்பவராகிய தலைவரும் , எனக்கு
வரும்பிறப்பில் வரக்கடவதாகிய துன்பமாகிய குற்றத்தை இப்பிறப்பிற்றானே நீக்கியவரும்
ஆகிய எம்பெரு மானாரை , குற்றமுடையேனும் , நாய்போலும் கடையேனும் ஆகிய யான்
நீங்குமாற்றை எண்ணேன் !
பாடல்
எண் : 10
மங்கைஓர்
கூறுஉகந்து ஏறுஉகந்து ஏறி
மாறுஅலார் திரிபுரம்
நீறுஎழச் செற்ற
அங்கையான்
கழல்அடி அன்றிமற்று அறியான்
அடியவர்க்கு அடியவன்
தொழுவன் ஆரூரன்,
கங்கையார்
காவிரித் துருத்தியார் வேள்விக்
குடிஉளார் அடிகளைச்
சேர்த்திய பாடல்
தங்கையால்
தொழுது,தம் நாவின்மேல்
கொள்வார்
தவநெறி சென்று,அமர் உலகம்ஆள் பவரே.
பொழிப்புரை : மங்கை ஒருத்தியை
ஒருபாகத்தில் விரும்பி வைத்தும்,
இடபத்தை
விரும்பி ஊர்ந்தும் நிற்கின்ற, பகைத்தலை உடையவரது
முப்புரங்களை நீறுபட அழித்த அகங்கையை உடையவனது கழலணிந்த திருவடிகளையன்றி வேறொன்றை
அறியாதவனாகியும் , அவன் அடியார்க்கு
அடியவனாகியும் அவனுக்கு அடியவனாகிய நம்பியாரூரன் , கங்கை போலப் பொருந்திய காவிரியாற்றினது
கரைக்கண் உள்ள திருத்துருத்தியிலும் , திருவேள்விக்
குடியிலும் வீற்றிருக்கின்ற தலைவருக்குச் சேர்ப்பித்த இப்பாடல்களை , தங்கள் கையால் தொழுது , தங்கள் நாவிற் கொள்பவர்கள் , தவநெறிக் கண் சென்று , பின்னர்ச் சிவலோகத்தை ஆள்பவராதல்
திண்ணம் .
திருச்சிற்றம்பலம்