வள்ளிமலை - 0320. கள்ளக் குவால்பை

அருணகிரிநாதர் அருளிய

திருப்புகழ்

கள்ளக் குவால் பை (வள்ளிமலை)

வள்ளிமலை நாதா!

இந்த மாய உடம்பை ஒழித்து அருள்.

தய்யத்த தாத்த தய்யத்த தாத்த

     தய்யத்த தாத்த ...... தனதான

கள்ளக்கு வாற்பை தொள்ளைப்பு லாற்பை

     துள்ளிக்க னார்க்க ...... யவுகோப

கள்வைத்த தோற்பை பொள்ளுற்ற காற்பை

     கொள்ளைத்து ராற்பை ...... பசுபாச

அள்ளற்பை மாற்பை ஞெள்ளற்பை சீப்பை

     வெள்ளிட்ட சாப்பி ...... சிதமீரல்

அள்ளச்சு வாக்கள் சள்ளிட்டி ழாப்பல்

     கொள்ளப்ப டாக்கை ...... தவிர்வேனோ

தெள்ளத்தி சேர்ப்ப வெள்ளத்தி மாற்கும்

     வெள்ளுத்தி மாற்கு ...... மருகோனே

சிள்ளிட்ட காட்டி லுள்ளக்கி ரார்க்கொல்

     புள்ளத்த மார்க்கம் ...... வருவோனே

வள்ளிச்சன் மார்க்கம் விள்ளைக்கு நோக்க

     வல்லைக்கு ளேற்று ...... மிளையோனே

வள்ளிக்கு ழாத்து வள்ளிக்கல் காத்த

     வள்ளிக்கு வாய்த்த ...... பெருமாளே.

பதம் பிரித்தல்

கள்ளக் குவால் பை, தொள்ளைப் புலால் பை,

     துள் இக்கன் ஆர்,  ...... கயவு கோப

கள் வைத்த தோல் பை, பொள் உற்ற கால் பை,

     கொள்ளைத் துரால் பை, ...... பசுபாச

அள்ளல் பை, மால் பை, ஞெள்ளல் பை, சீப் பை,

     வெள் இட்ட அசாப்  ...... பிசிதம் ஈரல்

அள்ளச் சுவாக்கள் சள் இட்டு இழாப் பல்

     கொள்ளப் படு ஆக்கை ...... தவிர்வேனோ?

தெள் அத்தி சேர்ப்ப! வெள் அத்தி மாற்கும்

     வெள் உத்தி மாற்கும் ...... மருகோனே!

சிள் இட்ட காட்டில் உள்ளக் கிரார்க் கொல்

     புள் அத்த மார்க்கம் ...... வருவோனே!

வள்ளிச் சன்மார்க்கம் விள் ஐக்கு நோக்க,

     வல்லைக்குள் ஏற்றும் ...... இளையோனே!

வள்ளிக் குழாத்து வள்ளிக் கல் காத்த

     வள்ளிக்கு வாய்த்த ...... பெருமாளே.

பதவுரை

     தெள் அத்தி சேர்ப்ப --- தெளிவு பெற்ற அறிவு நிறைந்த தெய்வ யானையின் தலைவரே!

     வெள் அத்தி மாற்கும் --- வெள்ளையானையை உடைய இந்திரனுக்கும்,

     வெள் உத்தி மாற்கும் --- வெண்மையான பாற்கடலில் பள்ளி கொண்ட திருமாலுக்கும்,

     மருகோனே --- திருமருகரே!

     சிள் இட்ட காட்டில் உள்ள --- சிள் வண்டுகள் நிறைந்த கானகத்தில் வாழ்ந்த,

     கிரார் கொல் புள் --- கிராதகர்களான வேடர்கள் கொல்கின்ற பறவைகள் உள்ள,

     அந்த மார்க்கம் --- அந்த காட்டு வழியில்,

     வருவோனே --- வருபவரே!

     வள்ளி சன்மார்க்கம் --- வள்ளி பிராட்டியார் அநுட்டித்த நன்னெறி என்னும் உபதேசத்தை,

     விள் ஐக்கு --- கேட்ட தந்தையார்க்கு,

     நோக்க வல்லைக்குள் ஏற்றும் --- ஒரு கணப்பொழுதில் உபதேசித்த,

     இளையோனே --- இளம்பூரணரே!

     வள்ளி குழாத்து --- வள்ளிக் கொடிகள் கூட்டமாய் நிறைந்திருக்கின்ற,

     வள்ளி கல் காத்த --- வள்ளி மலையில் தினைப்புனங் காவல் செய்த,

     வள்ளிக்கு வாய்த்த --- வள்ளிபிராட்டியாருக்கு வாய்த்த,

     பெருமாளே --- பெருமையில் மிகுந்தவரே!

     கள்ள குவால் பை --- கள்ளத்தனமான வஞ்சனை பொய் முதலிய துர்க்குணங்கள் நிறைந்த பை,

     தொள்ளை புலால் பை --- ஓட்டைகளையுடைய மாமிசப் பை,

     துள் இக்கனார் --- துள்ளுகின்ற கரும்பு வில்லையுடைய மன்மதனால் உண்டாகின்ற,

     கயவு கோபம் --- தளர்ச்சி கோபமாகிய,

     கள்வைத்த தோல் பை --- கள்ளை வைத்த தோல் பை,

     பொள் உற்ற கால் பை --- பொள்ளென விரைந்து செல்லும் காற்றடைத்த பை,

     கொள்ளை துரால் பை --- யமன் கொள்ளை கொண்டு போகின்ற செத்தையான பை,

     பசுபாச அள்ளல் பை --- ஆன்மாவும் (உயிரும்) ஆணவமும் சேர்ந்த சேற்றுப் பை,

     மால் பை --- மயக்கத்துக்கு இடமான பை,

     ஞெள்ளல் பை --- குற்றங்கள் நிறைந்த பை,

     சீ பை --- சீழ் நிறைந்த பை,

     வெள் இட்ட --- கலப்பில்லாத,

     அசா --- தளர்வுடைய,

     பிசிதம் ஈரல் --- இறைச்சி ஈரல் இவைகளை,

     அள்ள --- அள்ளி உண்ண. சு

     வாக்கள் --- நாய்கள்,

     சள் இட்டு இழா --- சள்ளென்று குலைத்து இழுத்து,

     பல் கொள்ளப்படு ஆக்கை --- பல்லினால் கடித்துக்கொள்ளும் இந்த உடம்பை

     தவிர்வேனோ --- ஒழிக்கமாட்டேனோ?

பொழிப்புரை

     தெளிந்த அறிவுள்ள தெய்வயானையின் கணவரே!

     வெள்ளை யானையை உடைய இந்திரனுக்கும், திருப்பாற்கடலில் துயிலும் திருமாலுக்கு திருமருகரே!

     சிள்வண்டுகள் நிறைந்த கானகத்தில் வாழும் வேடர்கள் கொல்லுகின்ற பறவைகள் உள்ள காட்டு வழியில் வருபவரே!

     வள்ளி நாயகி மேற் கொண்ட சன்மார்க்கத்தைக் கூறுமாறு சிவபெருமான் கேட்க, கண்ணிமைப் பொழுதில் அவருக்கு உபதேசித்த இளையவரே!

     வள்ளிக்கொடிகள் நிறைந்துள்ள வள்ளிமலையில் தினைப் புனத்தை காவல் செய்த வள்ளியம்மைக்கு வாய்த்த பெருமிதமுடையவரே!

     களவு பொய் முதலிய தீக்குணங்கள் நிறைந்த பை;

     ஓட்டையுடைய இறைச்சிப் பை;

     துள்ளுகின்ற கரும்பு வில்லையுடைய காமனால் விளையுந் தளர்வு கோபம் என்ற கள் வைத்த தோள் பை;

     விரைந்து போகின்ற காற்றின் பை;

     இயமன் கொள்ளையடித்துக்கொண்டு போகின்ற செத்தையான பை;

     உயிரும் ஆணவமும் அடங்கிய சேற்றுப் பை;

     மயக்கத்தையுடைய பை;

     குற்றம் நிறைந்த பை;

     சீழ் ஒழுகும் பை;

     கலப்பில்லாத தளர்ச்சியுடைய இறைச்சி ஈரல் இவைகளை அள்ளித் தின்னும் நாய்கள் சள்ளென்று குலைத்து பல்லால் கடித்து இழுத்துக் கொண்டு போகும் இந்த உடம்பை ஒழிக்க மாட்டேனோ?

விரிவுரை

கள்ளக் குவாற் பை ---

குவால்-கூட்டம். கள்ளத்தனமான பொய் வஞ்சனை களவு சூது வாது முதலிய தீக்குணங்களின் கூட்டம் நிறைந்த பை இந்த உடம்பு.

உடம்பைப் பலவகையான பை என்று இத்திருப்புகழில் அடிகளார் கூறுகின்றார்.

தொள்ளைப் புலால் பை ---

தொள்ளை-ஓட்டை. ஒன்பது ஓட்டைகளை யுடைய இறைச்சிப் பை.

துள் இக்கனார் கயவு கோப கள் வைத்த தோற்பை ---

துள் இக்கனார்; இக்கன்-கரும்பன் கரும்புவில்லையுடைய மன்மதன். மன்மதன் ஆன்மாக்களை மயக்கும் பொருட்டு துள்ளுவான்.

      “துள்ளுமதவேள் கைக் கணையாலே”      --- திருப்புகழ்.

மன்மதனால் தளர்வு கோபம் முதலிய கள்ளை வைத்த தோற்பை.

கள்-மயக்கத்தைத் தரும். கோபமும் மயக்கத்தைத் தரும்.

    “கள்வைத்த தோற்பை சுமவாதே” --- (ககனமும்) திருப்புகழ்.

பொள் உற்ற கால் பை ---

பொள்ளென வேகமாகச் செல்லும் தசவாயுக்கள் குடிகொண்டிருக்கின்ற பை.

“காயமே இது பொய்யடா. காற்று அடைத்த பையடா” என்பது சித்தர்வாக்கு.

கொள்ளைத் துரால் பை ---

துரால்-செத்தை. யமன் கொள்ளையடித்துக் கொண்டு போகின்ற செத்தை போன்ற உதவாத பை.

பசுபாச அள்ளல் பை ---

பசு-ஆன்மா. பாசம்-ஆணவம் மலம். இவைகட்கு இடமாய சோற்றுப்பை. அள்ளல்-சேறு.

மால் பை ---

மால்-மயக்கம். மயக்கத்துக்கு இடமான பை.

ஞெள்ளல் பை ---

ஞெள்ளல்-தவறு. தவறுகட்கு இடமாய பை.

சீ பை ---

சீ-சீழ்; சீ ஒழுகும் பை.

      “தோல்எலும்பு சீநரம்பு பீளைதுன்று கோழை பொங்கு

   சோரிபிண்ட மாய்உருண்டு      வடிவான 

   தூல பங்க காயம்....                                 --- திருப்புகழ்.

        

வெள்ளிட்ட சாப் பிசிதம் ஈரல் ---

பிசிதம்-இறைச்சி.

சுவாக்கள் சள் இட்டு இழா ---

சுவாக்கள் -- நாய்கள்.  நாய்கள் சள்ளென்று குலைத்துக்கொண்டு வந்து இழுத்துச் செல்லும் உடம்பு.

பல் கொள்ளப் படு ஆக்கை ---

பல்லால் கடித்து நாய்கள் தின்னும் உடம்பு.

ஆக்கை தவிரேனோ ---

இத்தகைய இழிந்த உடம்பின் மீதுள்ள பற்றை விட வேண்டும்.

தாயுமானார் இந்த உடம்பை ப்பற்றிக் கூறும் இனிய பாடலை இங்கு நினைவு கூர்தல் வேண்டும்.

      காகமொடு கழுமு அலகைநாய் நரிகள்

               சுற்று சோறுஇடு துருத்தியை,

         கால்இரண்டு நவ வாசல பெற்றுவளர்

                காமவேள் நடன சாலையை,

      மோக ஆசைமுறி இட்ட பெட்டியை, மும்

                மல மிகுந்து ஒழுகு கேணியை,

             மொய்த்து வெங்கிருமி தத்து கும்பியை,

                முடங்கலார்க்கிடை சரக்கினை,

      மாக இந்த்ரதநு மின்னை ஒத்து இலக

                வேதம் ஓதிய குலாலனார்

         வனைய, வெய்யதடி காரன்ஆனயமன்

                வந்து அடிக்கும்ஒரு மட்கலத்

      தேகமான பொயை மெய்எனக் கருதி,

                ஐய! வைய மிசை வாடவோ?

         தெரிவதற்கு அரிய பிரமமே! அமல

                சிற்சுகோதய விலாசமே!

பிறப்பை ஒழிக்கும் உபாயங்கள் இவையெனக் கூறுகின்றார் குருஞானசம்பந்தர். அவற்றுள் உடலைப் பழித்தல் ஒன்று எனக் குறிப்பிடுகின்றார்.

தன்பெருமை எண்ணாமை, தற்போதமே இழத்தல்,

மின்பெருமை யாம்சகத்தை வேண்டாமை,-தன்பால்

உடலைத் தினம்பழித்தல், ஓங்குசிவத்து ஒன்றல்,

 நடலைப் பிறப்புஒழியும் நாள்.              --- சிவபோகசாரம்.

தெள் அத்தி சேர்ப்ப ---

அத்தி - தெய்வ யானை.

 “முத்தைத்தரு பத்தித் திருநகை அத்திக்கிறை” --- திருப்புகழ்.

அத்தம்-கை. அத்தத்தை உடையது யானை. யானையால் வளர்க்கப்பட்டவள் தெய்வயானை.

தெளிந்த அறிவுள்ள தேவகுஞ்சரியின் கணவர்.

வெள்ளத்தி மால் ---

வெள்ளை யானையையுடைய இந்திரன்.

வெள்ளுத்தி மால் ---

உந்தி-கடல். சந்தத்துக்காக இது உத்தியென வந்தது. வெண்மையான பாற்கடலில் துயின்ற திருமால்.

சிள்ளிட்ட காட்டில் ---

சிள் வண்டுகள் நிறைந்த காடு.

கிரார் ---

கிராதகர்-வேடர். இடைக் குறையாகக் கிரார் என வந்தது.

புள்ளத்த மார்க்கம் ---

அத்தம்-காடு.

வேடர்கள் கொல்லுகின்ற பட்சிகளையுடைய காட்டு வழியில் வள்ளியின் பொருட்டு முருகவேள் சென்றருளினார்.

வள்ளிச் சன்மார்க்கம் ---

வள்ளி அநுட்டித்த உண்மை நெறி.

வள்ளிநாயகி முருகவேளை நினைத்து தன்னை மறந்து தலைவன் தாள்தலைப்பட்டு நின்றார். அந்த நிலை வந்தபோது இறைவன் தானே வந்து அருள் புரிகின்றார். இதுவே இறைவனை அடையும் நெறி. இந்த இரகசிய நெறியை முருகவேள் முக்கட் பிரானுக்கு உபதேசித்தருளினார் என உணர்க.

 

விள் ஐக்கு ---

விள் ஐக்கு-விள்ளுவாய் என்று கேட்ட தந்தைக்கு.

நோக்க வல்லைக்குள் ஏற்றும் இளையோனே ---

வல்லை-விரைவு. நோக்கம்-கண்ணிமைக்கு நேரம்.

இமைப்பொழுதுக்குள் தந்தைக்கு கந்தவேள் உபதேசித்தருளினார்.

கருத்துரை

வள்ளிமலை மேவு வள்ளலே! இந்த மாய உடம்பை யொழித்து அருள்செய்வீர்.