வள்ளிமலை - 0321. குடி வாழ்க்கை

அருணகிரிநாதர் அருளிய

திருப்புகழ்

குடிவாழ்க்கை (வள்ளிமலை)

வள்ளிமலை நாதா!

மரணம் வரும் முன்

உன் சரணம் அருள்

தனதாத்த தய்ய தனதாத்த தய்ய

     தனதாத்த தய்ய ...... தனதான

குடிவாழ்க்கை யன்னை மனையாட்டி பிள்ளை

     குயில்போற்ப்ர சன்ன ...... மொழியார்கள்

குலம்வாய்த்த நல்ல தனம்வாய்த்த தென்ன

     குருவார்த்தை தன்னை ...... யுணராதே

இடநாட்கள் வெய்ய நமனீட்டி தொய்ய

     இடர்கூட்ட இன்னல் ...... கொடுபோகி

இடுகாட்டி லென்னை எரியூட்டு முன்னு

     னிருதாட்கள் தம்மை ...... யுணர்வேனோ

வடநாட்டில் வெள்ளி மலைகாத்து புள்ளி

     மயில்மேற்றி கழ்ந்த ...... குமரேசா

வடிவாட்டி வள்ளி அடிபோற்றி வள்ளி

     மலைகாத்த நல்ல ...... மணவாளா

அடிநாட்கள் செய்த பிழைநீக்கி யென்னை

     யருள்போற்றும் வண்மை ...... தரும்வாழ்வே

அடிபோற்றி யல்லி முடிசூட்ட வல்ல

     அடியார்க்கு நல்ல ...... பெருமாளே.

பதம் பிரித்தல்

குடிவாழ்க்கை, அன்னை, மனையாட்டி, பிள்ளை,

     குயில் போல் ப்ரசன்ன ...... மொழியார்கள்,

குலம், வாய்த்த நல்ல தனம், வாய்த்தது என்ன,

     குருவார்த்தை தன்னை ...... உணராதே,

இடநாட்கள், வெய்ய நமன் நீட்டி, தொய்ய

     இடர் கூட்ட, இன்னல் ...... கொடு போகி,

இடுகாட்டில் என்னை எரி உட்டும் முன், உன்

     இருதாட்கள் தம்மை ...... உணர்வேனோ?

வடநாட்டில் வெள்ளி மலைகாத்து, புள்ளி

     மயில் மேல் திகழ்ந்த ...... குமரேசா!

வடிவாட்டி வள்ளி அடிபோற்றி, வள்ளி

     மலை காத்த நல்ல ...... மணவாளா!

அடிநாட்கள் செய்த பிழைநீக்கி, என்னை

     அருள் போற்றும் வண்மை ...... தரும்வாழ்வே!

அடிபோற்றி அல்லி முடி சூட்ட வல்ல

     அடியார்க்கு நல்ல ...... பெருமாளே.

பதவுரை

     வடநாட்டில் --- வடநாட்டில் உள்ள,

     வெள்ளிமலை காத்து --- வெள்ளி மலையைக் காத்து,

     புள்ளி மயில் மேல் திகழ்ந்த --- புள்ளியை உடைய மயில் மீது விளங்குகின்ற,

     குமரேசா --- குமாரக் கடவுளே!

     வடிவு ஆட்டி --- அழகு நிறைந்த பெண்மணியாகிய,

     வள்ளி அடி போற்றி --- வள்ளி பிராட்டியின் திருவடியைப் புகழ்ந்து,

     வள்ளி மலை காத்த --- வள்ளி மலையில் அப்பிராட்டியின் சமயம் பார்த்துக் காத்திருந்த,

     நல்ல மணவாளா --- நல்ல நாயகரே!

     அடி நாள்கள் செய்த --- முன் நாள்களில் அடியேன் செய்த,

     பிழை நீக்கி --- குற்றங்களைப் பொருத்துக் களைந்து,

     என்னை அருள் போற்றும் வண்மை தரும் --- எனக்கு உமது திருவருளைப் போற்றும் வளப்பமான குணத்தைத் தந்தருளிய,

     வாழ்வே --- என் செல்வமே!

     அடி போற்றி --- உமது திருவடியைப் போற்றி,

     அல்லி முடி சூட்டவல்ல --- தாமரை மலரை உமது முடியில் சூட்டவல்ல,

     அடியார்க்கு நல்ல --- அடியார்களுக்கு நல்லவராக விளங்கும்,

     பெருமாளே -- பெருமையில் மிகுந்தவரே!

     குடி வாழ்க்கை --- இல்லற வாழ்க்கை,

     அன்னை --- தாய்,

     மனையாட்டி --- மனைவி,

     பிள்ளை --- பிள்ளை,

     குயில் போல் ப்ரசன்ன மொழியார்கள் --- குயில் போலப் பேசி எதிர்ப்படும் மொழியையுடைய பெண்கள்,

     குலம் --- குலம்,

     வாய்த்த நல்ல தனம் --- கிடைத்துள்ள நல்ல செல்வம்,

     வாய்த்தது என்ன --- இவை எல்லாம் நமக்கு வாய்த்தது என்று ஆணவங்கொண்டு,

     குரு வார்த்தை தன்னை உணராதே --- குருவின் உபதேச மொழிகளை உணர்ந்து அறியாமல்,

     நாள்கள் இட --- வாழ்நாளைக் கழிக்க,

     வெய்ய நமன் நீட்டி --- கொடிய இயமன் நெருங்கி வந்து,

     தொய்ய இடர் கூட்ட --- தளர்வுறும்படித் துன்பங்களைத் தர,

     இன்னல் கொடு போகி --- துயரத்துடன் கொண்டு போய்,

     இடு காட்டில் --- சுடுகாட்டில்,

     என்னை எரி ஊட்டு முன் --- அடியேனை எரிப்பதற்கு முன்பாக,

     உன் இரு தாள்கள் தம்மை --- உமது இரு திருவடிகளை,

     உணர்வேனோ --- உணர்ந்து அறியேனோ?

        

பொழிப்புரை

     வட நாட்டில் உள்ள வெள்ளி மலையைக் காத்து, புள்ளி மயில்மீது விளங்குகின்ற குமாரக் கடவுளே!

     அழகு நிறைந்த வள்ளி நாயகியின் திருவடியைப் புகழ்ந்து, வள்ளிமலையில் அவருடைய சமயம் பார்த்து நின்ற நல்ல மணவாளரே!

     அடியேன் முன்னாளில் செய்த குற்றங்களைப் பொறுத்து அவைகளை நீக்கி, அடியேன் உமது திருவருளைப் போற்றுகின்ற சீலத்தைத் தந்த பெருவாழ்வே!

     உமது திருவடியைப் போற்றித் தாமரை மலரைச் சென்னியில் சூட்டவல்ல அடியார்க்கு இனியராக விளங்கும் பெருமிதம் உடையவரே!

     இல்லற வாழ்வு, தாய், மனைவி, மக்கள், குயில் போன்ற மொழியுடன் எதிர்ப்படுகின்ற புதல்வியர் குலம், வாய்த்த இனிய செல்வம் இவையெல்லாம் எனக்கு இருக்கின்றன என்ற ஆணவத்தைக் கொண்டு குருநாதரின் உபதேசமொழியை உணர்ந்தறியாமல், வாழ்நாளைக் கழிக்க, கொடிய எமன் நெருங்கி தளர்வுறுமாறு துன்பத்தைக் கொடுக்க துயருடன் என்னைக் கொண்டுபோய், சுடுகாட்டில் சுடுவதற்கு முன் உமது திருவடிகளை உணர்ந்து உய்வேனோ?

விரிவுரை 

குடிவாழ்க்கை அன்னை மனையாட்டி பிள்ளை குயில்போல் ப்ரசன்ன மொழியர்கள் குலம் வாய்த்த, நல்ல தனம் வாய்த்த்து என்ன ---

சிறந்த வாழ்க்கை, தாய், மனைவி, மக்கள், மகள், குலம், நல்ல செல்வம் முதலியன நமக்கு வாய்த்துள்ளமு என்று மனிதன் தருக்கு அடைகின்றான்.

அங்ஙனம் தருக்குற்று இறுமாந்து, செய்வன தவிர்வன தெரியாது நிற்பான்.

குருவார்த்தை தன்னை உணராதே ---

குருநாதர் மனித உரு எடுத்த தெய்வம். குருநாதனை மனிதனாக எவன் எண்ணுகின்றானோ அவன் நற்கதி அடையான்.

ஆதலால் குரு வார்த்தைக்கு மறுவார்த்தை நினைக்கக் கூடாது.

இட நாட்கள் ---

பிரமதேவன் தந்த வாழ்நாட்கள் அத்தனையும் அவமே கழிந்தன.

வெய்ய நமன் நீட்டி ---

வெப்பமான சீற்றமுள்ளஇயமன் ஓலையை நீட்டி வருவான்.

தொய்ய இடர் கூட்ட ---

தளர்ச்சியடையும்படி உயிரைப்பற்றித் துன்பத்தை செய்வான்.

இன்னல் கொடு போகி ---

சுற்றத்தார்கள் மிகுந்த துன்பத்துடன் உடம்பை எடுத்துக் கொண்டு போவார்கள்.

இடுகாட்டில் என்னை எரியூட்டு முன் உன் இருதாட்கள் தம்மை உணர்வேனோ ---

அருமையிலும் அருமையாக, நேரங் கடவாமல் உயர்ந்த வுணவுகளையுண்டு வளர்த்த இந்த உடம்பு ஒரு நொடியில் தியில் வெந்து சாம்பராகி மறைந்து ஒழிகின்றது.

     “ஒளிருமினல் உருஅதுஎன ஓடிஅங்கம் வெந்திடுவேனை”

                                                                           --- (ஒருவரையும்) திருப்புகழ்.

முருகா! இவ்வாறு அடியேன் எரியில் கரியுமுன் உமது திருவடியை உணர்ந்து உய்ய அருள் செய்” என்று சுவாமிகள் வேண்டுகின்றார்.

வடநாட்டில் வெள்ளி மலை காத்து ---

வடநாட்டில் உள்ள வெள்ளி மலையான திருக்கயிலாயத்தில், கோபுர வாசலில் முருகன் இருந்து காத்தல் செய்கின்றார்.

அடிநாட்கள் செய்த பிழை நீக்கி என்னை அருள் போற்றும் வண்மை தரும் வாழ்வே ---

அருணகிரிநாதர் தன் வரலாற்றை இதில் குறிப்பிடுகின்றார்.

அருணகிரிநாதர் இளமையில் உலக நெறியில் சென்று செய்த பிழைகளையெல்லாம் பொறுத்து, நீக்கி சதா தன்னைப் பாடும் அருள் திறத்தை அருள் புரிந்தார் முருகப் பெருமான்.

அடிபோற்றி அல்லி முடிசூட்ட வல்ல அடியார்க்கு நல்ல பெருமாளே ---

பூவினில் சிறந்தது தாமரைப் பூ. அதனால் பிரமதேவர், இலக்குமி, வாணி, முருகவேள் முதலிய மூர்த்திகள் தாமரையை உறைவிடமாகக் கொண்டார்கள். திருமாலும் திருவீழிமலையில் தினமும் ஆயிரந் தாமரைப் பூக்களால் சிவபெருமானை அருச்சித்து வழிபட்டார்.

      “பூவினுக்கு அருங்கலம் பொங்கு தாமரை”      --- அப்பர்.

நல்ல தாமரை மாலையை முருகனுடைய திருவடியில் சூட்டுகின்ற அடியார்க்கு முருகன் நல்லவராகத் திகழ்கின்றார்.

      “அடியார்க்கு நல்ல பெருமாள், அவுணர்குலம் அடங்கப்

    பொடி ஆக்கிய பெருமாள்”             --- கந்தரலங்காரம்.

கருத்துரை

வள்ளி நாயகனே! மரணமடையும் முன் உன் சரணமடைய அருள் செய்யும்.