வள்ளிமலை - 0323. சிரம் அம்கை

அருணகிரிநாதர் அருளிய

திருப்புகழ்

சிரம் அங்கம் அம் கை (வள்ளிமலை)

வள்ளிமலை நாதா!

இந்த உடம்பு அழியும் முன்

உனது திருவடியில் அன்பு வைத்து உய்ய அருள்.

தனதந்த தந்தனம் தனதந்த தந்தனம்

     தனதந்த தந்தனம் ...... தனதான

சிரமங்க மங்கைகண் செவிவஞ்ச நெஞ்சுசெஞ்

     சலமென்பு திண்பொருந் ...... திடுமாயம்

சிலதுன்ப மின்பமொன் றிறவந்து பின்புசெந்

     தழலிண்கண் வெந்துசிந் ...... திடஆவி

விரைவின்க ணந்தகன் பொரவந்த தென்றுவெந்

     துயர்கொண்ட லைந்துலைந் ...... தழியாமுன்

வினையொன்று மின்றிநன் றியலொன்றி நின்பதம்

     வினவென்று அன்புதந் ...... தருள்வாயே

அரவின்கண் முன்துயின் றருள்கொண்ட லண்டர்கண்

     டமரஞ்ச மண்டிவந் ...... திடுசூரன்

அகலம்பி ளந்தணைந் தகிலம்ப ரந்திரங்

     கிடஅன்று டன்றுகொன் ...... றிடும்வேலா

மரைவெங்க யம்பொருந் திடவண்டி னங்குவிந்

     திசையொன்ற மந்திசந் ...... துடனாடும்

வரையின்கண் வந்துவண் குறமங்கை பங்கயம்

     வரநின்று கும்பிடும் ...... பெருமாளே.

பதம் பிரித்தல்

சிரம் அங்கம், அம் கை, கண், செவி, வஞ்ச நெஞ்சு, செஞ்

     சலம், என்பு திண் பொருந் ...... திடு மாயம்,

சிலதுன்பம் இன்பம் ஒன்று இற வந்து, பின்பு செந்

     தழலிண்கண் வெந்து, சிந் ...... திட ஆவி,

விரைவின் கண் அந்தகன் பொர வந்தது என்று, வெந்

     துயர் கொண்டு அலைந்து, உலைந்து ...... அழியாமுன்,

வினை ஒன்றும் இன்றி நன்று இயல் ஒன்றி, நின்பதம்

     வினவு என்று அன்பு தந்து ...... அருள்வாயே.

அரவின் கண் முன் துயின்று அருள் கொண்டல், அண்டர் கண்டு,

     அமர் அஞ்ச மண்டி வந் ...... திடு சூரன்,

அகலம் பிளந்து, அணைந்து, அகிலம் பரந்து, இரங்

     கிட அன்று, உடன்று கொன் ...... றிடும் வேலா!

மரை வெம் கயம் பொருந்திட வண்டு இனம் குவிந்து,

     இசை ஒன்ற மந்தி சந் ...... துடன் ஆடும்,

வரையின் கண் வந்து, வண் குறமங்கை பங்கயம்

     வர நின்று கும்பிடும் ...... பெருமாளே.

பதவுரை

     அரவின் கண் --- ஆதிசேடன் மீது,

     முன் துயின்று அருள் --- முன்பு அறி துயில் புரிந்து உலகங்கட்கு அருள் செய்கின்றவரும்,

     கொண்டல் --- நீல மேகம் போன்றவரும் ஆகிய திருமாலும்,

     அண்டர்கள் --- தேவர்களும்,

     கண்டு அமர் அஞ்ச --- பார்த்து போருக்கு அஞ்சும்படி,

     மண்டி வந்திடு சூரன் அகலம் பிளந்து --- நெருங்கி வந்த சூரபன்மனுடைய மார்பைப் பிளந்து,

     அணைந்து அகிலம் பரந்து இரங்கிட --- அவன் அலளி விழும் ஒலி எங்கும் பொருந்தி பரவி ஒலிக்க,

     அன்று உடன்று கொன்றிடும் வேலா --- அந்நாள் போர் புரிந்து கொன்ற வேலவரே!

     மரைவெம் கயம் பொருந்திட --- தாமரை மலர் விரும்பத் தக்க குளங்களில் பொருந்த,

     வண்டு இனம் குவிந்து --- வண்டின் கூட்டங்கள் நிறைந்து,

     இசை ஒன்ற --- இசை ஒலிக்க,

     மந்தி சந்து உடன் ஆடும் --- குரங்குகள் சந்தனமரங்களில் விளையாடுகின்ற,

     வரையின் கண் வந்து --- வள்ளி மலையில் வந்து,

     வண் குற மங்கை --- வன்மையான குற மகளாகிய வள்ளி பிராட்டியின்,

     பங்கயம் வர நின்று --- தாமரை போன்ற பாதம் வருவதைக் கண்டு,

     கும்பிடும் --- கும்பிட்ட,

     பெருமாளே --- பெருமையிற் சிறந்தவரே!

     சிரம் அங்கம் --- தலையாகிய உறுப்பு,

     அம் கை கண் செவி --- அழகிய கரம், கண், காது,

     வஞ்ச நெஞ்சு --- வஞ்சகத்துக்கு இடமாம் நெஞ்சு,

     செம்சலம் --- சிவந்த நீராகிய உதிரம்,

     என்பு --- எலும்பு ஆகிய இவைகள்,

     திண் பொருந்திடு மாயம் --- வலிமையாகப் பொருந்தியுள்ள மாயமான இந்த உடம்பு,

     சில துன்பம் இன்பம் ஒன்றி வந்து இற --- சில துன்பங்களும் இன்பங்களும் பொருந்தி முடிவு காலம் வந்து சேர,

     பின்பு செம் தழலின் கண் வெந்து --- பின்னர் செவ்விய தீயில் வெந்து,

     ஆவி சிந்திட --- உயிர் பிரிதலுறும்படி,

     விரைவின் கண் அந்தகன் பொர --- வேகமாக எமன் போர் செய்ய,

     வந்தது என்று --- வந்துவிட்டான் என்று,

     வெம் துயர் கொண்டு --- வெப்பமான துக்கத்தைக் கொண்டு,

     அலைந்து உலைந்து அழியா முன் --- அலைந்தும் நிலைகுலைந்தும் அடியேன் அழிவதற்குமுன்

     வினை ஒன்றும் இன்றி --- வினைகள் யாவும் தொலைந்து,

     நன்று இயல் ஒன்றி --- நல்ல செயல்களைப் பொருந்தி,

     நின்பதம் --- உமது பாதங்களை,

     வினவு என்று அன்பு தந்து அருள்வாயே --- கேட்டு ஆராய்ந்து அறிகின்ற அன்பினை வழங்கி அருள் புரிவீராக.

பொழிப்புரை

     ஆதிசேடன் மீது முன் அறிதுயில் கொண்டு உலகங்கட்கு அருள் புரிகின்றவரும், நீலமேக வண்ணரும் ஆகிய திருமாலும் தேவர்களும் கண்ட போரில் அஞ்சுமாறு நெருங்கி வந்த சூரபன்மனுடைய மார்பு பிளந்து, பொருந்திய எல்லா இடங்களிலும் அவன் அலறிய ஒலி பரந்து ஒலிக்க அன்று போர் புரிந்து வதைத்த வேலாயுதரே!

     தாமரை விரும்பத்தக்க குளங்களில் பொருந்த, வண்டுக் கூட்டங்கள் நிறைந்து இசை ஒலிக்க, குரங்குகள் சந்தன மரத்தில் விலையாடும் வள்ளி மலையின்கண் வந்து வளமையான வள்ளியம்மையின் பாதம் வரக் கண்டு கும்பிட்ட பெருமிதம் உடையவரே!

     தலை, அழகிய கை, கண், காது, வஞ்சம் நிறைந்த நெஞ்சு; சிவந்த இரத்தம், எலும்பு முதலிய உறுப்புக்கள் வலிமையாகப் பொருந்திய மாயமான இத் தேகமானது, சில துன்பமும் இன்பமும் பொருந்தி முடிவில் மரணகாலம் வந்த போது, செவ்விய நெருப்பில் வெந்து உயிர் பிரியும் படி, இயமன் வேகமாக வந்து போரிட வந்துவிட்டான் என்று கொடிய துக்கத்தைக் கொண்டு, அலைந்தும் உலைந்தும் அழிவதற்கு முன், வினைகள் யாவும் தொலைந்து, நல்ல செயல்களைப் பொருந்தி, உமது பாதத்தை ஆராய்ந்து அறியும் அன்பை எனக்கு என்று அருள் புரிவீரோ?

விரிவுரை

சிரமங்க மங்கைகண் செவி வஞ்ச நெஞ்சு செஞ்சலம் 

என்பு திண் பொருந்திடு மாயம் ---

இந்த உடம்பு, தலை, கை, கண், காது, நெஞ்சு, உதிரம், எலும்பு முதலிய உறுப்புக்களுடன் கூடியது. அந்தந்த உறுப்புக்கள் இந்த உடம்பில் உறுதியாக அமைக்கப்பட்டுள்ளன. அப்படி அமைத்தவன் இறைவன். அற்புதமான இயந்திரம் இவ்வுடம்பு. இதற்குள் எத்தனை எத்தனையோ கருவிகளை அமைத்திருக்கின்றான். எல்லாப் பூட்டுக்களிலும் பசை நாம் இருக்கின்றவரை இருந்து, கைகால் முதலிய சந்திகள் அசைந்து அசைந்து வேலை செய்ய உதவுகின்றது.

பிறகு உடம்பு மாயமாக மறைந்து விடுகின்றது. அதனால் மாயம் என்றார்.

  

சில துன்பம் இன்பம் ஒன்று இற ---

இற - இற்றுப்போக; முடிவு அடைய.

இந்த உடம்பில் இன்பமும் துன்பமும் மாறி மாறி வந்து கொண்டிருக்கின்றன.

கடலில் மாறி மாறி அலைகள் வருவதுபோல் என அறிக.

தழலின்கண் வெந்து சிந்திட ஆவி ---

பெறுதற்கரிய பிறவி இம்மானுடப் பிறவி. இது வறிதே நெருப்புக்கு இரையாகின்றது. இதனால் ஆய பயனைப் பெற்று விட்டால் உடம்பு அழிவதனால் கவலை இல்லை. உணவு உண்ட பின் வாழை இலையைத் தூக்கி எறிவதுபோல், ஆன்ம லாபம் பெற்ற பின் உடம்பு நீங்கினால் துன்பமில்லை. கரும்பின் சாறு போன பின் சக்கை எரிவதனால் துன்பமில்லை.

கரும்பாட்டிக் கட்டி சிறுகாலைக் கொண்டார்

துரும்பெழுந்து வேம்கால் துயராண் டுழவார் ;

வருந்தி உடம்பின் பயன்கொண்டார் கூற்றம்

வருங்கால் பரிவ திலர்.                         --- நாலடியார்.

கரும்பை மிக்க காலை நேரத்தில் ஆலையில் இட்டுச் சாறு பிழிந்தால் அது பதங்கெடாதது போல, அறப்பயன் கோடலும் வாழ்நாளின் காலை நேரமான இளமைப் பருவத்திலேயே நிகழ்தல் வேண்டுமென்பதும் அறிவுறுத்தப்பட்டது.

சாறு அற்ற கோது எரிதலில் தவக்கம் இல்லாதது போல, உழைத்து அறம் பயந்த உடம்பும் இறத்தலில் வேதனையின்றிக் கழலும்.

வினை ஒன்றும் இன்றி ---

வினையால் உடம்பு மீள மீள வந்து கொண்டிருக்கும்.

      “விதி காணும் உடம்பை விடா வினையேன்”   --- கந்தரநுபூதி.

வினைப்போகமே இந்த உடம்பு.

வினை முற்றினாலும் அற்றாலன்றி பிறவி நீங்காது. ஆகாமியம், பிராரப்தம், சஞ்சிதம் ஆகிய மூன்று வினைகளும் அற்றுப் போக வேண்டும். அதனால் “வினை ஒன்றும் இன்றி” என்று அருளிச் செய்தார்.

வேட்டியில் மெல்ல மெல்லத் தூசு படிவதுபோல் வினை பையப் பையஏறி விடுகிறது.

    தூள்ஏறு தூசு போல் வினைஏறு மெய்எனும்

           தொக்கினுள் சிக்கி, நாளும்

   சுழல்ஏறு காற்றினிடை அழல் ஏறு பஞ்சு எனச்

           சூறையிட்டு, அறிவை எல்லாம்

   நாள்ஏற நாள்ஏற வார்த்திகம் எனும் கூற்றின்

           நட்புஏற, உள் உடைந்து,

   நயனங்கள் அற்றது ஓர் ஊரேறு போலவே

           நானிலந் தனில் அலையவோ?      --- தாயுமானார்.

நன்று இயல் ஒன்றி ---

நல்ல செயல்களில் பொருந்தி.

நற்செயல்களாவன, ஆலய வழிபாடு, ஜெபம், தியானம், பாராயணம், தவம் முதலியனவாம்.

நின்பதம் வினவு என்று அன்பு தந்து அருள்வாயே ---

திருவடியின் பெருமையைக் கற்றார் வாயிலாகக் கேட்டு திருவடிக்கு அன்பு செய்யவேண்டும்.

திருவடியைப் பற்றியே அருணகிரிநாதர் பாடிய சீர்பாத வகுப்பை அன்பர்கள் தினந்தோறும் பாராயணம் புரிதல் வேண்டும்.

அரவின்கண் முன் துயின்று ---

ஆதிசேடன் வெள்ளைப் பாம்பு. அடு சுழுமுனை என்ற நாடி. சுழுமுனையில் பிராணவாயுவைச் செலுத்தி யோகிகள் தூங்காமல் தூங்குவர். இது அறிதுயில்.    

உலகம் உய்யத் திருமால் யோகநித்திரை செய்கின்றார்.

மந்தி சந்துடன் ஆடும் வரை ---

சந்து-சந்தனம். குரங்குகள் சந்தன மரங்களில் விளையாடுகின்ற மலை வள்ளிமலை.

      “சந்தன அடவியினும் உறை குறமகள்”      --- (கொந்துவார்) திருப்புகழ்.

   “மட்டுஒழுகு சாரம் மதுரித்த தேனைப் பருக

   மர்க்கட சமூகம் அமை தொட்டு இறால் எட்டுவரை”    --- பூதவேதாள வகுப்பு.

கருத்துரை

வள்ளிமலை நாதனே! உடம்பு அழியுமுன் உமது திருவடியைத் தந்தருள்வீர்.