திருக் கோழம்பம்
சோழ நாட்டு, காவிரித் தென்கரைத் திருத்தலம்.
மக்கள் வழக்கில் "குழம்பியம்" என்று
வழங்கப்படுகின்றது.
கும்பகோணம் - காரைக்கால் சாலையில்
திருநீலக்குடியை அடுத்துள்ள எஸ்.புதூர் என்ற ஊரை அடைந்து, அங்கிருந்து வடக்கில்
திருக்குழம்பியத்திற்குச் செல்லும் தனிப்பாதையில் 1 கி.மீ. சென்றால் கோயிலை அடையலாம்.
திருவாவடுதுறையில் இருந்தும் கிழக்கில் 5 கி.மீ. ஆட்டோ மூலம் பயணம் செய்தும் இத்திருத்தலத்தை
அடையலாம்.
இறைவர்
: கோகிலேசுவரர், கோழம்பநாதர்
இறைவியார்
: சௌந்திர நாயகி
தேவாரப்
பாடல்கள் : 1. சம்பந்தர் - நீற்றானை நீள்சடை.
2. அப்பர் - வேழம்
பத்தைவர்.
கண்டராதித்த சோழனின் மனைவி செம்பியன்
மாதேவி அவர்களால் கட்டப்பட்ட ஆலயங்களில் இவ்வாலயமும் ஒன்றாகும். அம்பிகை ஒரு சமயம்
சாபத்தின் காரணமாக பசு வடிவம் பெற்று பூவுலகில் பல தலங்களில் இறைவனை வழிபட்டாள்.
அத்தகைய தலங்களில் திருக்கோழம்பம் தலமும் ஒன்று. அவ்வாறு பசு வடிவில் வழிபட்ட போது
பசுவின் காற்குளம்பு இடறியபோது வெளிப்பட்ட இத்தல இறைவன் கோகிலேசுவர் என்று பெயர்
பெற்றார்.
முகப்பு வாயிலுக்கு எதிரே பிரம்ம தீர்த்தம்
உள்ளது. முகுப்பு வாயிலில் மேலே அமர்ந்த நிலையில் சிவன் பார்வதியும், அவர்களின் ஒருபுறம் விநாயகரும், மறுபுறம் வள்ளி தெய்வானையுடன் முருகரும்
சுதை வடிவில் காணப்படுகின்றனர். வாயில் வழி உள்ளே நுழைந்தால் ஒரு நீண்ட பாதை
அடுத்துள்ள 3 நிலை கோபுரத்திற்கு
நம்மை அழைத்துச் செல்கிறது. கோபுரத்திற்கு முன்னால் நந்தி மண்டபமும், பலிபீடமும் உள்ளன. கோபுரம் கடந்து
உட்சென்றால் மகாமண்டபத்தில் நடராஜர் சபை உள்ளது. உள் பிராகாரத்தில் விநாயகர், அப்பர், முருகன், கஜலட்சுமி பைரவர் ஆகியோர் சந்நிதிகள்
காணலாம். கருவறை கோஷ்டத்தில் வழக்கமாக காணப்பதும் தட்சிணாமூர்த்தி, பிரம்மா, துர்க்கை, விநாயகர் ஆகியோருடன் நடராசரும், சட்டை நாதரும் பிட்சாடனரும்
காட்சியளிக்கின்றனர். இத்தல இறைவன் சுயம்பு மூர்த்தியாக அருள்பாலிக்கிறார். இத்தல
லிங்கத்தின் பாணம் மிகவும் பெரியது. பார்வதி பசுவாய் இருந்து பூஜித்ததை
எடுத்துக்காட்ட பசுவின் கால்குளம்பு ஆவுடையார் மேல் பதிந்துள்ளதைக் காணலாம்.
சிவனும் திருமாலும் பார்வதியை நடுவராக வைத்து
சொக்கட்டான் ஆடிக்கொண்டிருந்த போது ஆட்டத்தில் காய் உருட்டியதில் சந்தேகம் வர
பார்வதியிடம் கேட்கிறார் சிவன்.(இப்படியும் ஒரு கதை). பார்வதி மகாவிஷ்ணுவிற்கு
சாதகமான பதிலை கூறியதால் சிவபெருமான் பார்வதியை பசுவாக பூமியில் பிறக்கும் படி சாபம்
இடுகிறார். இப்படி பசுவாக பிறந்த பார்வதி பூவுலகில் பல இடங்களில் இறைவனை
பூஜித்தாள். அவைகளில் இத்தலமும் ஒன்றாகும்.
மகாவிஷ்ணுவிற்கும், பிரம்மாவிற்கும் ஒரு சமயம் தங்கள்
இருவரில் யார் உயர்ந்தவர் என்பதில் பிரச்னை ஏற்பட்டது. ஜோதி ரூபமாகத் தெரிந்த
சிவபெருமானின் அடி முடியை யார் முதலில் கண்டு வருவது என்ற போட்டியில் பிரம்மன்
முடியை காண்பதற்காக சென்று, முடியாமல் போக
தாழம்பூவின் துணையுடன், முடியை கண்டதாகப்
பொய் சொன்னார். இதனால் கோபப்பட்ட சிவன் பிரம்மனை தண்டித்தார். பின்பு, பிரம்மன் இத்தலம் வந்து தன் பெயரால் ஒரு
குளம் அமைத்து நீராடி இறைவனை வழிபட்டார். அதுவே பிரம்ம தீர்த்தம் என்ற பெயரில்
ஆலயத்திற்கு வெளியே உள்ளது.
சந்தன் என்னும் வித்யாதரன்
தேவேந்திரனின் சாபத்தினால் குயிலாக மாறினான். சாபம் நீங்க இத்தலம் வந்து பல்லாண்டு
காலம் பூஜித்து, சாபம் நீங்கி சுய
உருவை அடைந்தான். குயில் (கோகில) வடிவத்துடன் வந்து பக்தன் பூஜித்ததால்
இப்பெருமான் கோகிலேசுவரர் என அழைக்கப்பட்டார். இந்திரன் தனக்கு அகலிகை, கவுதமரின் சாபம் நீங்க பல காலம் இங்கு
சிவனை பூஜித்து சாபம் நீங்கப் பெற்றான்.
வள்ளல் மெருமான் தாம்பாடி அருளிய விண்ணப்பக் கலிவெண்பாவில், "இல்ல மயல் ஆழம் பங்கு என
அறிந்தோர் செறிந்து ஏத்தும் கோழம்பம் வாழ் கருணைக் கொண்டலே" என்று போற்றி உள்ளார்.
காலை 7 மணி முதல் பகல் 12 மணி வரை மட்டும் திறந்திருக்கும்.
திருஞானசம்பந்தர்
திருப்பதிக வரலாறு
பெரிய
புராணப் பாடல் எண் : 431
அண்ண
லார்திரு ஆவடுதுறை அமர்ந்தாரை
உள்நி
லாவிய காதலி னால்பணிந்து,
உறைந்து,
மண்எ
லாம்உய வந்தவர் போந்துவார் சடைமேல்
தெள்நி
லாஅணி வார்திருக் கோழம்பம் சேர்ந்தார்.
பொழிப்புரை : திருவாவடுதுறையில்
வீற்றிருந்தருளும் இறைவரை உளம் நிறைந்த காதலால் வணங்கி, அங்குத் தங்கி, உலகெலாம் உய்யும் பொருட்டுத் தோன்றிய
பிள்ளையார் அங்கிருந்து சென்று,
நீண்ட
சடையில் தெளிந்த பிறைச்சந்திரனைச் சூடுபவரின் திருக்கோழம்பத்தினைச் சேர்ந்தார்.
பெ.
பு. பாடல் எண் : 432
கொன்றை
வார்சடை முடியரைக் கோழம்பத்து இறைஞ்சி,
என்றும்
நீடிய இன்னிசைப் பதிகம் முன் இயம்பி,
மன்று
உளார்மகிழ் வைகல்மா டக்கோயில் மருங்கு
சென்று
சார்ந்தனர், திருவளர் சிரபுரச்
செல்வர்.
பொழிப்புரை : கொன்றை மலரைச் சூடிய
நீண்ட சடையை உடைய இறைவரைத் திருக்கோழம்பத்தில் வணங்கி, என்றும் அழியாது நிலைபெற்றிருத்தற்கு
ஏதுவாய இன்னிசை உடைய திருப்பதிகத்தைத் திருமுன்பு நின்று பாடி, பொன்னம்பலம் உடைய இறைவர் மகிழ்ந்து
வீற்றிருக்கும் `திருவைகல் மாடக்
கோயிலின்' அருகே முத்திச்
செல்வம் வளர்தற்கு இடனான சீகாழித் தலைவர் சென்று அடைந்தார்.
திருக்கோழம்பத்தில்
அருளிய பதிகம், `நீற்றானை' (தி.2 ப.13) எனத் தொடங்கும் இந்தளப் பண்ணிலமைந்த
பதிகமாகும்.
2.013 திருக்கோழம்பம் பண் - இந்தளம்
திருச்சிற்றம்பலம்
பாடல்
எண் : 1
நீற்றானை, நீள்சடை மேல்நிறைவு
உள்ளதுஓர்
ஆற்றானை, அழகுஅமர் மென்முலை
யாளைஓர்
கூற்றானை, குளிர்பொழில்
கோழம்பம் மேவிய
ஏற்றானை, ஏத்துமின், நும்இடர் ஏகவே.
பொழிப்புரை :திருநீறு அணிந்தவன்.
நீண்ட சடைமுடி மீது பெருகி வந்த கங்கை ஆற்றைத் தாங்கியவன். அழகமைந்த மெல்லிய
தனங்களைக் கொண்ட உமையம்மையைத் தன் திருமேனியின் ஒரு கூறாகக் கொண்டவன். அத்தகையோன்
பொழில் சூழ்ந்த கோழம்பம் என்னும் தலத்தில் விடையூர்தியனாய் உள்ளான். `நும் துன்பங்கள் நீங்க வேண்டுமாயின்
அவனை ஏத்துங்கள்`.
பாடல்
எண் : 2
மைஆன
கண்டனை, மான்மறி ஏந்திய
கையானை, கடிபொழில் கோழம்பம்
மேவிய
செய்யானை, தேன்நெய்பா
லுந்திகழ்ந்து ஆடிய
மெய்யானை
மேவுவார் மேல்வினை மேவாவே.
பொழிப்புரை :கருமைநிறம் பொருந்திய
கண்டத்தினன். மான் கன்றை ஏந்திய கையினன். மணம் கமழும் பொழில் சூழ்ந்த கோழம்பத்தில்
விளங்கும் செம்மையன். தேன், நெய், பால் முதலியவற்றை ஆடிய மெய்யினன். அவனை
இடைவிடாது நினைப்பவர் மேல் வினைகள் மேவா.
பாடல்
எண் : 3
ஏதனை, ஏதம் இலாஇமை
யோர்தொழும்
வேதனை, வெண்குழை தோடுவி
ளங்கிய
காதனை, கடிபொழில் கோழம்ப
மேவிய
நாதனை, ஏத்துமின் நும்வினை
நையவே.
பொழிப்புரை :நாம் செய்யும்
குற்றங்கட்குக் காரணமானவன். குற்றம் அற்ற இமையாநாட்டமுடைய யோகியர்களால் வழிபடப்
பெறும் வேதவடிவினன். வெண்குழையும் தோடும் அணிந்த செவிகளை உடையவன். விளக்கமான
பொழில்கள் சூழ்ந்த கோழம்பம் மேவிய தலைவன். அவனை உம் வினைகள் நைந்து கெடுமாறு
ஏத்துமின்.
பாடல்
எண் : 4
சடையானை, தண்மல ரான்சிரம்
ஏந்திய
விடையானை, வேதமும் வேள்வியும்
ஆயநன்கு
உடையானை, குளிர்பொழில்
சூழ்திருக் கோழம்பம்
உடையானை, உள்குமின் உள்ளம்
குளிரவே.
பொழிப்புரை :சடைமுடியை உடையவன்.
குளிர்ந்த தாமரை மலரில் விளங்கும் பிரமனின் தலையோட்டைக் கையில் ஏந்திய விடை
ஊர்தியன். வேதமும் வேள்வியுமாய நன்மைகளை உடையவன். குளிர்ந்த பொழில்சூழ்ந்த
திருக்கோழம்பத்தைத் தனக்கு ஊராக உடையவன். உள்ளங்குளிர அவனை நினைவீர்களாக.
பாடல்
எண் : 5
காரானை, கடிகமழ் கொன்றைஅம்
போதுஅணி
தாரானை, தையலொர்
பால்மகிழ்ந்து ஓங்கிய
சீரானை, செறிபொழில் கோழம்பம்
மேவிய
ஊரானை
ஏத்துமின் நும்இடர் ஒல்கவே.
பொழிப்புரை :மேகமாக இருந்து மழை
பொழிபவன். மணம் கமழும் கொன்றை மலரால் தொடுக்கப்பட்ட மாலையை அணிந்தவன். உமையம்மையை
ஒருபாலாகக் கொண்டு மகிழ்ச்சிமிக்கவனாய் விளங்கும் புகழினன். செறிந்த பொழில்கள்
சூழ்ந்த திருக்கோழம் பத்தைத்தன் ஊராகக் கொண்டு அதன்கண் உறைபவன். நும் இடர்கள்
நீங்க அவனை ஏத்துங்கள்.
பாடல்
எண் : 6
பண்டுஆலின்
நீழலா னை,பரஞ் சோதியை,
விண்டார்கள்
தம்புர மூன்றுஉட னேவேவக்
கண்டானை, கடிகமழ் கோழம்பம்
கோயிலாக்
கொண்டானை, கூறுமின் உள்ளம்
குளிரவே.
பொழிப்புரை :முற்காலத்தே ஆலின்
நிழலில் இருந்து அறம் உரைத் தவன். மேலான ஒளிவடிவினன். பகைவராகிய அசுரர்களின்
முப்புரங்களும் ஒருசேர வெந்தழியுமாறு செய்தவன். மணம் கமழும் திருக்கோழம்பத்தைக்
கோயிலாகக் கொண்டவன். உள்ளம் குளிர அவன் புகழைக் கூறுங்கள்.
பாடல்
எண் : 7
சொல்லானை, சுடுகணை யால்புரம்
மூன்றுஎய்த
வில்லானை, வேதமும் வேள்வியும்
ஆனானை,
கொல்ஆனை
உரியானை, கோழம்பம் மேவிய
நல்லானை, ஏத்துமின் உம்இடர்
நையவே.
பொழிப்புரை :எல்லோராலும் புகழப்படுபவன்.
அனல் வடிவான கணையைத் தொடுத்து முப்புரங்களை எய்தழித்த வில்லை உடையவன். வேதமும்
வேள்வியும் ஆனவன். தன்னைக் கொல்ல வந்த யானையை உரித்து அதன் தோலைப்போர்த்தவன்.
திருக்கோழம் பத்தில் எழுந்தருளிய மங்கலவடிவினன். நும் இடர் கெட அவனை ஏத்துவீராக.
பாடல்
எண் : 8
வில்தானை
வல்அரக் கர்விறல் வேந்தனைக்
குற்றானைத்
திருவிரலால், கொடும் காலனைச்
செற்றானை, சீர்திக ழுந்திருக்
கோழம்பம்
பற்றானைப்
பற்றுவார் மேல்வினை பற்றாவே.
பொழிப்புரை :விற்படையை உடைய வலிய
இராக்கதர்களின் வலிய வேந்தனாகிய இராவணனைத் தன் அழகிய கால் விரலால் நசுக்கியவன்.
கொடிய காலனைச் செற்றவன். புகழ் விளங்கும் திருக்கோழம்பத்திற் பற்றுதல் உடையவன்.
அவன்மீது பற்றுக் கொள்வாரை வினைகள் பற்றா.
பாடல்
எண் : 9
நெடியானோடு
அயன்அறி யாவகை நின்றதுஓர்
படியானை, பண்டங்க வேடம்
பயின்றானை,
கடிஆரும்
கோழம்ப மேவிய வெள்ஏற்றின்
கொடியானைக்
கூறுமின் உள்ளம் குளிரவே.
பொழிப்புரை :நீண்ட வடிவெடுத்த
திருமாலும் பிரமனும் அறிய முடியாத வகையில் ஓங்கி நின்ற உருவத்தை உடையவன்.
பாண்டரங்கம் என்னும் கூத்தை ஆடும் கோலம் பூண்டவன். மணம் கமழும் திருக்கோழம்பம்
மேவிய இடபக்கொடியினன். உள்ளம் குளிர அவன் புகழைக் கூறுங்கள்.
பாடல்
எண் : 10
புத்தரும்
தோகைஅம் பீலிகொள் பொய்ம்மொழிப்
பித்தரும்
பேசுவ பேச்சுஅல்ல, பீடுஉடைக்
கொத்துஅலர்
தண்பொழில் கோழம்ப மேவிய
அத்தனை
ஏத்துமின் அல்லல் அறுக்கவே.
பொழிப்புரை :புத்த சமயத்தினரும், மயில் தோகையாலாகிய பீலியைக் கையில்
கொண்டுள்ள பொய்ம்மொழி பேசும் பித்தர்களாகிய சமணர்களும் பேசுவன பயன்தரும் உண்மையான
அறவுரைகளாகா. பெருமை பொருந்திய பூங்கொத்துக்கள் அலரும் குளிர்ந்த பொழில் சூழ்ந்த
திருக்கோழம்பம் மேவிய அத்தனை அல்லல்கள் அகலப் போற்றுங்கள்.
பாடல்
எண் : 11
தண்புனல்
ஓங்குதண் அம்தராய் மாநகர்
நண்புஉடை
ஞானசம் பந்தன்,நம் பான்உறை
விண்பொழிற்
கோழம்ப மேவிய பத்துஇவை
பண்கொளப்
பாடவல் லார்க்குஇல்லை பாவமே.
பொழிப்புரை :குளிர்ந்த நீர்
மிகுந்த தண்ணிதான அழகிய தராய் என்னும்
மாநகரில் தோன்றிய, எல்லோரிடமும்
நட்புக்கொண்டு ஒழுகும் ஞானசம்பந்தன் சிவபிரான் உறையும் வானளாவிய பொழில் சூழ்ந்த
கோழம்பத்தைப் புகழ்ந்து போற்றிய இப்பதிகப்பாடல்கள் பத்தையும் இசைபொருந்தப்
பாடவல்லவர்கட்குப் பாவம் இல்லை.
திருச்சிற்றம்பலம்
----------------------------------------------------------------------
திருநாவுக்கரசர்
திருப்பதிக வரலாறு
பெரிய
புராணப் பாடல் எண் : 190
மேவுபுனல்
பொன்னிஇரு கரையும் சார்ந்து
விடைஉயர்த்தார்
திருச்செம்பொன் பள்ளி பாடி,
காஉயரும்
மயிலாடு துறை,நீள் பொன்னிக்
கரைத்துருத்தி, வேள்விக்குடி, எதிர்கொள் பாடி,
பாவுறு
செந்தமிழ்மாலை பாடிப் போற்றி,
பரமர்திருப்
பதிபலவும் பணிந்து போந்தே,
ஆவுறும்
அஞ்சு ஆடுவார் கோடி காவில்
அணைந்து,பணிந்து, ஆவடுதண் துறையைச்
சார்ந்தார்.
பொழிப்புரை : நீர் இடையறாது
பொருந்திய காவிரி ஆற்றின் இரு கரைகளிலும் சேர்ந்து, ஆனேற்றுக் கொடியை உயர்த்திய
சிவபெருமானின் திருச்செம்பொன்பள்ளியினைப் பாடிச் சோலைகள் உயர்ந்து சூழ்ந்த
திருமயிலாடுதுறையையும், காவிரியின் இரு
கரைகளிலும் உள்ள திருத்துருத்தி - திருவேள்விக்குடியையும், திருஎதிர்கொள்பாடியையும் தொழுது
செந்தமிழ்ப் பதிகங்களான பாமாலைகளால் போற்றி, இறைவரின் திருப்பதிகள் பலவற்றையும்
பணிந்து சென்று, ஆன் ஐந்தையும் ஆடும் சிவபெருமானின்
திருக்கோடிக்காவை அடைந்து, வணங்கிச் சென்று, திருவாவடுதுறையைச் சேர்ந்தார்.
பரமர் திருப்பதி பலவும் என்றதனால், இது பொழுது திருக்கோழம்பத்தையும் பாடிப்
பரவிய திருப்பதிகம் இது ஆகலாம்.
5. 064 திருக்கோழம்பம் திருக்குறுந்தொகை
திருச்சிற்றம்பலம்
திருச்சிற்றம்பலம்
பாடல்
எண் : 1
வேழம்
பத்துஐவர் வேண்டிற்று வேண்டிப்போய்
ஆழம்
பற்றிவீழ் வார்பல ஆதர்கள்,
கோழம்
பத்துஉறை கூத்தன் குரைகழல்
தாழும்
பத்தர்கள் சாலச் சதுரரே.
பொழிப்புரை : வேழம்பம் என்னும்
விளையாட்டைப் புரிகின்ற ஐந்து புலன்களாகியவர்கள் விரும்பினவற்றையே தாமும்
விரும்பிச் சென்று உலகியல் ஆழங்காற்பட்டுப் பல அறிவற்றவர்கள் வீழ்வர்; கோழம்பத்தில் உறைகின்ற கூத்தன்
ஒலிக்கும் கழல் அணிந்த திருவடிகளை வணங்கும் பக்தர்களே மிகவும் திறம் உடையவர்கள்.
பாடல்
எண் : 2
கயிலை
நன்மலை ஆளும் கபாலியை
மயில்
இயல்மலை மாதின் மணாளனை,
குயில்ப
யில்பொழில் கோழம்பம் மேய,என்
உயிரினை
நினைந்து உள்ளம் உருகுமே.
பொழிப்புரை : திருக்கயிலாயத்
திருமலையினை ஆள்கின்ற கபாலியும்,
மயிலியலை
உடைய மலைமங்கையின் மணவாளனும் ஆகிய,
குயில்
பயில்கின்ற பொழில்கள் உடைய கோழம்பத்தைப் பொருந்திய என் உயிர்போல்வானாகிய இறைவனை
நினைந்து உள்ளம் உருகுகின்றது.
பாடல்
எண் : 3
வாழும்
பான்மையர் ஆகிய வான்செல்வம்
தாழும்
பான்மையர் ஆகித்தம் வாயினால்
தாழம்
பூமணம் நாறிய தாழ்பொழில்
கோழம்பா
எனக் கூடிய செல்வமே.
பொழிப்புரை : வணங்கும் தன்மையோடு
கூடியவராகித் தம் வாயினால், தாழம்பூக்களின் மணம் வீசுகின்ற
பொழிலை உடைய "கோழம்பத்தலத்து இறைவா!" என்று கூறியதனால் கூடும் செல்வமே, வாழும் தன்மையராகிப் பெற்ற உயர்ந்த
செல்வம் ஆகும்.
பாடல்
எண் : 4
பாடல்
ஆக்கிடும் பண்ணொடு பெண்இவள்
கூடல்
ஆக்கிடும் குன்றின் மணற்கொடு,
கோடல்
பூத்துஅலர் கோழம்பத் துள்மகிழ்ந்து
ஆடும்
கூத்தனுக்கு அன்புபட் டாள்அன்றே.
பொழிப்புரை : வெண்கோடலும்
செங்கோடலும் ஆகிய மலர்கள் பூத்து விளங்கும் கோழம்பத்துள் மகிழ்ந்து ஆடும்
கூத்தனாகிய இறைவனுக்கு இப்பெண் அன்றே அன்பு பட்டாள் ஆதலின், பண்ணொடு கூடிய பாடல் ஆக்குவாள்; மணற்குன்றில் மணலினைக் கொண்டு கூடல் இழைப்பாள்.
பாடல்
எண் : 5
தளிர்கொள்
மேனியள் தான்மிக அஞ்சஓர்
பிளிறு
வாரணத்து ஈர்உரி போர்த்தவன்
குளிர்கொள்
நீர்வயல் கோழம்பம் மேவினான்
நளிர்கொள்
நீர்சடை மேலும் நயந்ததே.
பொழிப்புரை : மாந்தளிரின் வண்ணம்
கொண்ட மேனியளாகிய உமாதேவி மிக அஞ்சுமாறு ஒப்பற்ற பிளிறிவரும் யானையின்
பச்சைத்தோலைப் போர்த்தவனாகிய, குளிர்ச்சிகொண்ட
நீண்ட வயல்களையுடைய கோழம்பத்தில் எழுந்தருளியுள்ள இறைவன் செறிவினைக்கொண்ட
கங்கையினைச் சடைமேலும் நயந்தது வியப்புக்குரியதே.
பாடல்
எண் : 6
நாதர்
ஆவர் நமக்கும் பிறர்க்குந்தாம்,
வேத
நாவர், விடைக்கொடி யார்,வெற்பில்
கோதை
மாதொடும் கோழம்பங் கோயில்கொண்ட
ஆதி
பாதம் அடையவல் லார்களே.
பொழிப்புரை : வேதங்களை ஓதிய நாவை
உடையவரும், இடபக்கொடியினரும், மலைமங்கையாகிய உமாதேவியோடும்
கோழம்பத்திற் கோயில்கொண்ட ஆதியுமாகிய பெருமானின் பாதங்களை அடையவல்லவர்கள் தாம்
நமக்கும் பிறர்க்கும் தலைவர் என்று மதிக்கத்தக்கவர்கள்.
பாடல்
எண் : 7
முன்னை
நான்செய்த பாவம் முதல்அறப்
பின்னை
நான்பெரி தும்அருள் பெற்றது
அன்னம்
ஆர்வயல் கோழம்பத் துள்அமர்
பின்னல்
வார்சடை யானைப் பிதற்றியே.
பொழிப்புரை : அன்னம் பொருந்திய
வயலை உடைய கோழம்பத்துள் அமர்ந்திருக்கின்ற பின்னிய நீண்டசடையானைப் பிதற்றியே, முன்பு நான் செய்த பாவம் முதல்
அறும்படிப் பின்பு நான் பெரிதும் அருள்பெற்றது.
பாடல்
எண் : 8
ஏழை
மாரிடம் நின்றுஇரு கைக்கொடுஉண்
கோழை
மாரொடும் கூடிய குற்றமாம்,
கூழை
பாய்வயல் கோழம்பத் தான்அடி
ஏழை
யேன்முன் மறந்துஅங் கிருந்ததே.
பொழிப்புரை : ஏழையேனாகிய அடியேன்
கூழைமீன்கள் பாய்கின்ற வயல்களை உடைய கோழம்பத்தான் அடியை மறந்து அவர்பால் இருந்தது, பெண்களிடம் நின்று இரண்டு கைகளாலும்
அவர்கள் இடும் உணவைக்கொண்டு உண்ணும் கோழைகளோடு கூடிய குற்றமாம்.
பாடல்
எண் : 9
அரவு
அணைப்பயில் மால்அயன் வந்துஅடி
பரவ
னைப்பர மாம்பரஞ் சோதியைக்
குரவ
னைக்குரவு ஆர்பொழில் கோழம்பத்து
உரவ
னைஒரு வர்க்குஉணர்வு ஒண்ணுமே.
பொழிப்புரை : பாம்பாகிய
படுக்கையில் பயிலும் திருமாலும்,
பிரமனும்
வந்து அடிபரவப்பெறுவானும், பரம்பொருளாகிய
உயர்ந்தசோதியும், பரமாசாரியனும் ஆகிய
குரவமரங்கள் செறிந்த கோழம்பத்தின்கண் அறிவு வடிவானவனை நீங்குபவர்க்கு உணர்தல்
இயலுமோ?
பாடல்
எண் : 10
சமர
சூரபன் மாவைத் தடிந்தவேல்
குமரன்
தாதைநல் கோழம்பம் மேவிய
அமரர்
கோவினுக்கு அன்புஉடைத் தொண்டர்கள்
அமர
லோகம் அதுஆள்உடை யார்களே.
பொழிப்புரை : போரெதிர்ந்து வந்த
சூரபன்மனைக் கொன்ற வேற்படையை உடைய முருகவேளுக்குத் தந்தையும், நல்ல கோழம்பம் மேவிய தேவர்தலைவனும் ஆகிய
பெருமானுக்கு அன்புடைய தொண்டர்கள்,
அமரலோகத்தை
ஆளும் உரிமையுடையவராவர்.
பாடல்
எண் : 11
துட்டன்
ஆகி மலைஎடுத்து அஃதின்கீழ்ப்
பட்டு
வீழ்ந்து படர்ந்துஉய்யப் போயினான்
கொட்டம்
நாறிய கோழம்பத்து ஈசன்என்று
இட்ட
கீதம் இசைத்த அரக்கனே.
பொழிப்புரை : கொட்ட நறுமணம்
வீசுகின்ற கோழம்பத்து இறைவன் என்று விருப்பத்திற்குரிய கீதம் இசைத்த அரக்கன்
துட்டனாகித் திருக்கயிலையை எடுக்கலுற்று, அம்மலையின்
கீழ்ப்பட்டு விழுந்து படர்ந்து பின் உய்ந்தான்.
திருச்சிற்றம்பலம்